Rawma iyi 8
8
Ley nja abə Mimiɗ tə Bizlaf
1Ayaw, mənjawa seh, kwa pek əŋ hedi majam tə abə Yesu Almasihu seh halla ba. 2Məŋgəvday ma majaw tə Mimiɗ sə Kweɗek seh, a kəvəl mədəŋcur kəɗi Yesu Almasihu, kəpəlaka za mar tə əŋ ma majaw tə hem, abə tə məc. 3Bizlaf kəɗal məsəkəŋ ma majaw tə Musa mə gula i ɗal səku za, məŋgəvday hulawf tə wucum tə hedi dəgənak mə mbaɗza əŋ hedi mə tak fagay: Bizlaf kəɓət hem ta za, kəpekza za əŋ nəf tə hedi dəgənak hulawf iyi abə ley ləɓaha Mbu ŋgaŋ cekcek ley nja mənaŋ hedi dəgənak mə ɗal hem iyi. 4Bizlaf kəɗal məsəkəŋ ta za, amba zlap tə ma majaw mə ceh ley zlap wa mə ɗal əŋ nini, i mə mba i nja mənaŋ abə mba məsəkəŋ madawar tə əŋ nəf tə hedi iyi mba səku ba, ama mənaŋ abə Mimiɗ sə Kweɗek. 5Ama hedi mə nja tə abə mba məsəkəŋ madawar tə hedi dəgənak iyi seh, i nda i yak talaŋ tata ley ziber mba məsəkəŋ madawar tə hedi dəgənak. Ama hedi mə nja tə abə Mimiɗ sə Kweɗek iyi seh, i nda i yak talaŋ tata ley ziber məsəkəŋ Mimiɗ tə Bizlaf mə mba. 6Hedi mə yak talaŋ tata iyi ley ziber mba məsəkəŋ madawar tə hedi dəgənak seh, wulək tata iyi ta i kədeɓta əŋ məc, ama hedi mə yak talaŋ tata iyi ley ziber Mimiɗ tə Bizlaf seh, Mimiɗ ta, a kədeɓta əŋ mədəŋcur abə əŋ zahay. 7Hedi mə yak talaŋ tata iyi əŋ mba məsəkəŋ madawar tə hedi dəgənak mə sla tə a talaŋ tata iyi mba seh, tata məsəgər tə Bizlaf iyi. I kəwaŋgaŋ talaŋ əŋ ma majaw tə Bizlaf səku, i gula səku. 8Hedi iyi i mə ziber mba məsəkəŋ madawar tə hedi dəgənak dap seh, i gula i ŋgəmaŋ əŋ Bizlaf səku.
9Ama heni seh, heni mə nji mənaŋ əŋ mba məsəkəŋ madawar tə hedi dəgənak səku. Heni mə nji mənaŋ Mimiɗ sə Kweɗek mə mba, məŋgəvday Mimiɗ tə Bizlaf mə nji əŋ heni. Hedi abə Mimiɗ tə Almasihu halla seh, ar hedi tə Almasihu səku. 10Əŋgah Almasihu mbə əŋ heni seh, wucum təheni a məc za məŋgəvday hem, ama Mimiɗ tə Bizlaf a vəlaheni mədəŋcur za, məŋgəvday heni kəmbaɗ za əŋ hedi sə delele iyi a ma tə Bizlaf. 11Əŋgah Mimiɗ tə Bizlaf mə garaha Yesu tə əŋ faŋw tə hedi maməc iyi wa, mbə əŋ heni seh, mənaŋ mba izey, Bizlaf, hedi mə garaha Almasihu tə əŋ faŋw tə hedi maməc iyi wa, a vəl mədəŋcur za bahayim əŋ wucum təheni mə nda i məc iyi mba, kəɗi Mimiɗ ŋga tə əŋ heni mba.
12Mənaŋ wa, zliŋmana iyi, nakwa abə tak wula, ama kəɗi hulawf tə zli wucum tə hedi dəgənak ley nja əŋ mba məsəkəŋ madawar səku ba. 13Məŋgəvday əŋgah heni mə nji mənaŋ əŋ mba məsəkəŋ madawar təheni wa dap seh, heni məc za. Ama əŋgah kəɗi Mimiɗ sə Kweɗek seh, heni lim fagay za ley ja nja tə mba məsəkəŋ madawar tə əŋ heni, mbamba seh, heni lim mədəŋcur za. 14Hedi iyi Mimiɗ tə Bizlaf mə deɓta fuk, ar wuziyi tə Bizlaf iyi. 15Məŋgəvday Mimiɗ heni mə lim wa seh, kəmbaɗaheni əŋ məva seh halla, ama kəgwaɗaheni za baha abə ləndəŋ. Ama ar Mimiɗ sə Kweɗek mə mbaɗaheni əŋ wuziyi tə Bizlaf iyi, mə vəlanakwa kataf ley jaŋ varay əŋ Bizlaf: «Abba, Baba#8:15 Markus 14:36.!» 16Mimiɗ tə Bizlaf abə talaŋ ŋga a kəɗal sedewe a talaŋ mimiɗ takwa, nakwa wuziyi tə Bizlaf. 17Ayaw, nakwa wuziyi ŋga iyi, nakwa hedi mə nda i zəm ge ŋga iyi. Hedi mə nda i zəm ge tə Bizlaf iyi seh, i zəm ge za abə Almasihu. Məŋgəvday əŋgah nakwa iyi kəzləŋ takwaŋ abə mbiŋ seh, nakwa iyi nda i nja abə mbiŋ əŋ səndawl ŋga bahayim#8:17 2 Kwarintʉ iyi 4:17; 1 Piyer 4:13..
Zləŋ takwaŋ iyi tə əŋ hala wa, abə səndawl tə Bizlaf mə nda i ndaha tə a ma
18Sa wulək a talaŋ zləŋ takwaŋ takwa tə əŋ hala mənjawa seh, kəsla abə səndawl Bizlaf mə nda i gizenakwa seh halla. 19Məsəkəŋ maləmaha iyi fuk, i kəgəbar abə dak wucum, hala əŋ Bizlaf mə nda i gizehe səndawl tə wuziyi ŋga iyi. 20Məŋgəvday məsəkəŋ maləmaha iyi fuk i kəndəv za əŋ mazla tə fagay iyi i mə deɓ hedi əŋ məsəkəŋ haya, ar məsəkəŋ iyi ta i mə mba a ɗal mənaŋ wa səku, ama ar Bizlaf mə ɓət ndəra a talaŋ tata. Abə mbiŋ ta fuk, wulək kə lim məsəkəŋ aka. 21Məsəkəŋ maləmaha iyi ta abə talaŋ tata i lim pəl za əŋ mazla tə məsəkəŋ mə gay lay, mə məlta əŋ məva iyi wa, i lim ɓiz za əŋ səndawl tə pəl tə wuziyi tə Bizlaf iyi. 22Nakwa iyi kəsəŋ ha mənjawa baha, məsəkəŋ maləmaha iyi ta fuk i kəceh ley kəzləŋ takwaŋ mənaŋ wala mə nda i mbuwaha. A kəɗalu abə nakwa a lay ta, 23məŋgəvday ar məsəkəŋ maləmaha iyi taataɗ i mə zləŋ takwaŋ səku: ama nakwa mə lim Mimiɗ sə Kweɗek mənaŋ ɓiz titʉz tə vəl Bizlaf mə zlap a vəl za wa bahayim, nakwa iyi kəceh əŋ nəf abə ley gəbar Bizlaf mə mbaɗanakwa əŋ wuziyi ŋga iyi, amba mə pəlanakwa wucum takwa əŋ zləŋ takwaŋ tata iyi#8:23 2 Kwarintʉ iyi 5:2-4.. 24Məŋgəvday nakwa kəreh za, ama abə wulək kə lim məsəkəŋ dap. Əŋgah hedi a kəgər məsəkəŋ hedi mə wulək ley lim seh, mbamba, ar wulək kə lim məsəkəŋ səku ba: mə wulək ley lim məsəkəŋ ndagwa, a kəgəru seh, viyey? 25Ama əŋgah məsəkəŋ nakwa mə wulək ley lim, nakwa iyi kəgəru səku seh, nakwa iyi kəgəbaru abə səɓ nəf.
26Mənaŋ mba bahayim, Mimiɗ sə Kweɗek a kəndaha ley təranakwa, məŋgəvday nakwa hulawf iyi. Nakwa iyi kəsəŋ ley ɗalaŋ mbuh əŋ Bizlaf abə kataf ta səku. Ama Mimiɗ abə talaŋ ŋga a kəɗalaŋ mbuh əŋ Bizlaf məŋgəvday nakwa, abə nəf ntaɗ, abə zlap mə day fagay tə hedi ley zlap. 27Bizlaf, hedi mə gər nəf tə hedi iyi, a kəsəŋ məsəkəŋ Mimiɗ sə Kweɗek mə mba i ɗəp, məŋgəvday Mimiɗ a kərək Bizlaf məŋgəvday hedi makuw ma iyi, mənaŋ Bizlaf mə mba.
28Nakwa iyi kəsəŋ Bizlaf a kəɗal məsəkəŋ səntaŋ iyi fuk məŋgəvday hedi mə mbalu iyi, hedi iyi ta mba, Bizlaf kəɗafaŋta ma za mənaŋ mba ŋga. 29Məŋgəvday Bizlaf kəmayta za mar zlezle, kəɓət wulək za mar zlezle ley mbaɗta mənaŋ Mbu ŋgaŋ, amba Mbu ta, mə mbaɗ əŋ Gwenje əŋ faŋw tə zliŋge iyi mbeh səku. 30Hedi maɗaf ma iyi ta wa, Bizlaf mə ɓət wulək məpər a tata, kəɗafaŋta ma za bahayim. Hedi maɗaf ma iyi ta mba, kəmbaɗta za əŋ hedi sə delele iyi. Hedi mambaɗ əŋ hedi sə delele iyi ta mba, kətəɗta za əŋ səndawl ŋga bahayim.
Mə nda i wuɗakanakwa abə mba wucum tə Bizlaf seh, mey?
31Mənjawa, nakwa iyi nda i zlap mə day wa seh, mey?
Əŋgah Bizlaf mbə abə nakwa seh, mə nda i nja əŋ məsəgər takwa seh, viyey?
32Mbiŋ seh, kwa Mbu ŋgaŋ maa kəyakza za ley zləŋ takwaŋ, ama kəyakza za ley məc məŋgəvday nakwa fuk.
Mənaŋ wa, abə Mbu ŋgaŋ seh, a gula i vəlanakwa məsəkəŋ iyi ta fuk za səku vaw?
33Mə nda i bərəslaŋta ma əŋ hedi mamay tə Bizlaf iyi seh viyey? Kwa hedi halla, məŋgəvday ar Bizlaf mə ɗiyta əŋ hedi sə delele iyi.
34Mə nda i pekta seh, viyey? Hedi halla, məŋgəvday Yesu Almasihu kəməc za, abə dawaŋ ta, kəgaraha ŋga za əŋ faŋw tə hedi maməc iyi, mbə əŋ ndəra zəma tə Bizlaf, a kəɗal mbuh məŋgəvday nakwa.
35Mə nda i wuɗakanakwa abə mba wucum tə Almasihu seh, viyey?
Tuwah vaw? Ləndəŋ vaw? Təl ma vaw? Mətis vaw? Takwaŋ vaw? Məsəkəŋ mə ɗal məsəkəŋ madawar əŋ hedi vaw? Məc vaw?
36Mənaŋ ma mawuzlel tə əŋ Ɗerewel tə Bizlaf mə zlap, a zla:
«Məŋgəvday hwa, i kəpələk ley janini əŋ waŋ iyi fuk,
i kəgəranini mənaŋ ntek i mə deɓ əŋ lay kə fat#8:36 Jabura 44:23..»
37Ama əŋ məsəkəŋ iyi ta wa fuk nakwa iyi lim i ɗal bay gula səndawl za a talaŋ tata kəɗi hedi mə mbalanakwa.
38Ayaw, məndiwiŋ sa kəsəŋ məsəkəŋ mə nda i wuɗakanakwa abə mba wucum ŋga seh halla:
kwa məc, kwa mədəŋcur, kwa mələɓ tə Bizlaf iyi, kwa fagay tə wuzlaf iyi,
kwa məsəkəŋ mənjawa iyi, kwa məsəkəŋ mə nda i ndaha tə a ma iyi,
39kwa fagay tə wuzlaf iyi, kwa fagay tə teyek iyi,
kwa məsəkəŋ ntaɗ par maləmaha seh halla,
kwa məsəkəŋ mə nda i wuɗakanakwa abə mba wucum Bizlaf mə gizenakwa kəɗi Yesu Almasihu Bay Bayta takwa seh halla səlak.
ទើបបានជ្រើសរើសហើយ៖
Rawma iyi 8: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
