Rawma iyi 11
11
1Sa kəɗəp izey, sa zla: Bizlaf kəkap hedi ŋga iyi za vaw? Məndiwiŋ ta seh, mənaŋ mba səku! Məŋgəvday sa abə talaŋ na bahayim, sa lə Israyila, mambuwaha tə əŋ ntaŋw tə Ibrahima, sa hedi tə əŋ ntaŋw tə Benyamin#11:1 Filippi iyi 3:5.. 2Bizlaf kəkap hedi ŋga iyi seh halla, mbiŋ mə mayta mar zlezle#11:2 Jabura 94:14.. Heni kəsəŋ səku vaw, ma mawuzlel tə əŋ Ɗerewel tə Bizlaf, əŋ lay, Eliya mə haŋ tə a talaŋ Israyila iyi a ma tə Bizlaf, mə zlap, 3a zla: «Waa Bay Bayta, i kəja hedi mə giz ma abə miya təkwa iyi za, i kəŋgwaf lay kə məsaw məsəkəŋ iyi əŋ hwa za: Sa seh, sa hedi ntaɗ mayak, i kəpələk ley jaka!» 4Bizlaf a ziŋgeŋ zlap seh, viŋgey? A zla: «Ama mənaŋ mba səku, sa kəɗiy hedi iyi əŋ sa, gabal dʉsəlʉɗ, hedi mə tak dar malakw iyi a ma tə bizlaf, i mə ɗafaŋ ma Baal#11:4 1 Bay iyi 19:10, 18..» 5Mənaŋ mba baha, əŋ nja mənjawa, hedi mayak iyi kʉsit wa, Bizlaf mə mayta məŋgəvday səŋ nje həhər ŋga. 6Kəmayta za kəɗi səŋ nje həhər ŋga, ama məŋgəvday kəzəɗ tata iyi səku, halla seh, səŋ nje həhər tə Bizlaf, a kənda i mbaɗ əŋ səŋ nje həhər məndiwiŋ seh halla.
7Mənjawa, ma ta, a mba i zlap seh, viŋgey? Məsəkəŋ Israyila iyi i mə pələk seh, i kəlim halla. Sey hedi mamay tə Bizlaf iyi i kəlimʉ za. Hedi dakayta iyi seh, i kəɗal talaŋ tata tawytawy. 8Mənaŋ ma mawuzlel tə əŋ Ɗerewel tə Bizlaf mə zlap, a zla: «Bizlaf kəwaŋgaŋta səŋ məsəkəŋ tata iyi za. Kətak nje tata iyi za ley gər məsəkəŋ, kətak zləm tata iyi za ley zlim zləm ha mənjawa.» 9Dawuda a zlap bahayim, a zla:
«Lay kə zəm wuda tata mə mbaɗ əŋ jembəlew əŋ tata, əŋ kʉse,
əŋ kataf kə buwaŋ dawaŋ əŋ Bizlaf, abə ley lim muwurɓay tə kəzəɗ tata iyi.
10Nje tata iyi i mə wuluf, amba i mə mba i lim nje səku ba.
Ɗal amba dawaŋ tata mə reɓ kwa a pipi a pipi.»
11Sa kəɗəp izey: əŋ Yahuda iyi micimbiɗim mə tawta wa seh, i kəndəv za ha i kuɗəp vaw? Məndiwiŋ ta seh, mənaŋ mba səku! Ama, məŋgəvday ndəv tata ta seh, hedi dakayta iyi i kəlim reh za, ha ley garaha sərah tə Yahuda iyi. 12Ama, əŋgah ndəv tə Yahuda iyi ta kədaha səntaŋ za mbeh səku əŋ məŋhayak, əŋgah hem tata ta kəvəlaŋ məsəkəŋ za əŋ hedi dakayta iyi, əŋgah Israyila iyi i kəbuw nja tata za fuk seh, səntaŋ a fəfəl za mbeh səku.
13Sa zlap mənjawa seh, əŋ heni hedi Yahuda iyi səku: Sa seh, sa mələɓ maɗiy əŋ hedi Yahuda iyi səku, məŋgəvday a ɗek, sa kəsəsəm a talaŋ kəzəɗ na. 14Sa abə wulək ley garaha sərah tə zliŋmana Yahuda iyi amba ley reh hedi dakayta iyi. 15Əŋ hala Bizlaf mə yakta abə bəra seh, məŋhayak kəlim za ley zlar ndəra abə Bizlaf. Əŋ tata i kəzlaraha ndəra za baha seh, mə nda i ɗal seh izey mey? I mbaɗ za əŋ hedi mə ziŋgehe məndiwiŋ tə əŋ faŋw tə hedi maməc iyi əŋ mədəŋcur baha!
16Əŋgah peŋ titʉz wa, ar peŋ mavəl əŋ Bizlaf seh, peŋ mayak dakayta iyi fuk, ar tə təŋga iyi bahayim. Əŋgah zem tə mpay iyi, ar mavəl əŋ Bizlaf seh, ma ndəra iyi ta bahayim, ar tə təŋga iyi bahayim. 17Israyila seh, ar mənaŋ jaytun əŋ Bizlaf mə rəsl ma ndəra dakayta iyi. Ama hwa, Yahuda səku wa, kəneɓeh za əŋ faŋw tə ma ndəra dakayta iyi, mənaŋ ma ndəra tə jaytun tə damu: Mənjawa, hwa lim ley sa yim tə mpay mə tapaha tə əŋ zem tə jaytun za bahayim. 18Məŋgəvday a ɗek, hwa mba i geŋgir ma ndəra tə mpay marəsl iyi səku. Hwa nda i hav talaŋ seh, viŋgey? Ar hwa mə məl zem səku, ama ar zem mə məlah.
19Hwa zlapaka za: «Ama, i rəsl ma ndəra tə mpay iyi wa seh, amba i neɓeke.» 20Məndiwiŋ ta seh, i rəslta za məŋgəvday tata abə kuw ma halla, hwa gar a lay wa seh, məŋgəvday kuw ma təkwa. Ama, hwa mba i hav talaŋ səku! Sla wucum lawlaw ɗəba. 21Əŋgah Bizlaf kəburuk Israyila iyi halla, tata, ma ndəra tə ntaŋw tə mpay iyi səntaŋ. Bizlaf kəsəŋgaŋta nje həhər halla seh, hi wulək seh a səŋgaheni nje həhər za vaw?
22Gər mənaŋ viŋgey, Bizlaf a kəgiz ɗal səntaŋ ŋga abə ɗal lem ŋga: Mbiŋ seh, hedi sə lem a talaŋ hedi mandəv iyi, ama mbiŋ seh, hedi səntaŋ məŋgəvday hwa. Ama sey hwa ziber ley ɗiy wulək təkwa a talaŋ səntaŋ ŋga, halla seh, i rəslah za bahayim mənaŋ ma ndəra tə mpay dakayta iyi. 23Əŋgah Yahuda iyi i kəziŋgehe cuza əŋ kuw ma tata seh, i neɓta za a lay tata sə zlezle. Məŋgəvday Bizlaf abə mazla ley neɓta baha. 24Hwa seh, hwa ma ndəra tə mpay mar tə əŋ mar ta, tə jaytun tə damu, Bizlaf kərəslza za, kəneɓza za a jaytun maɗəs tə əŋ jerne, par par abə jaytun tə damu. Yahuda iyi seh, ar ma ndəra tə mpay tə jaytun maɗəs ta: Abə tuwah halla, Bizlaf a gula i neɓta baha a mpay tata i mə dəvaha.
Israyila iyi fuk i reh za
25Zliŋmana iyi, sa mba i gizeheni məsəkəŋ maɓah. Məŋgəvday heni mba i gər talaŋ təheni mənaŋ hedi tə abə burŋguzl iyi səku. Dəl tə Israyila dakayta iyi i kəmba i zlim zlap ta səku ha hedi dakayta iyi i lim ley ndaha kəɗi kelek Bizlaf. 26Ar mənaŋ wa, Israyila iyi fuk i reh za, mənaŋ ma mawuzlel tə əŋ Ɗerewel tə Bizlaf mə zlap, a zla:
«Hedi mə nda i reh hedi iyi, a ndaha za mar tə wuzum tə Siyawna,
a ɓət məsəkəŋ madawar iyi tə hedi mambuwaha tə əŋ ntaŋw tə Yakubu iyi fuk za.
27Ehe, jaw ma sa mə nda i jaw tə abə tata,
əŋ sa mə nda i ɓətaŋta hem tata iyi#11:27 Esaya 27:9; 59:20-21..»
28Əŋgah hedi a ɗiy wulək a tata i mə mba i kuw Labara Səntaŋ Lawayaŋ səku mba seh, i kəmbaɗ za əŋ məsəgər tə Bizlaf iyi, amba heni zlim Labara Səntaŋ Lawayaŋ. Ama əŋgah hedi a ɗiy wulək a may tə ndəra Bizlaf seh, i mə nji kwa a pipi a pipi hedi mamay iyi məŋgəvday dide tə dide tata iyi. 29Məŋgəvday Bizlaf a kəziŋ i ɓət məsəkəŋ mbiŋ mə vəl səku, a kəbuw wulək a talaŋ hedi iyi mbiŋ mə ɗafaŋta ma səku. 30Zlezle seh, heni kəwaŋgaŋ talaŋ əŋ Bizlaf halla, ama mənjawa seh, heni kəsəŋ səŋ nje həhər tə Bizlaf za, məŋgəvday Yahuda iyi i kəwaŋgaŋ talaŋ halla. 31Mənaŋ mba bahayim, i kəwaŋ talaŋ mənjawa halla amba səŋ nje həhər tə Bizlaf wa mə nja əŋ heni bahayim, ama amba tata bahayim i mə səŋ mənjawa səŋ nje həhər ta mənaŋ mba bahayim. 32Məŋgəvday Bizlaf kəjaw hedi iyi fuk əŋ waŋ talaŋ səku, amba ley gizeŋta əŋ hedi iyi fuk səŋ nje həhər ŋga.
Səndawl tə Bizlaf
33Kay! Səŋ nje həhər tə Bizlaf seh, mbeh səku!
Burŋguzl ŋga abə səŋ məsəkəŋ ŋga seh hedi gula i səŋ səku!
Mə gula i giz ɓət wulək ŋga seh, viyey?
Mə gula i səŋ kəzəɗ mbiŋ mə ɗal iyi seh, viyey?
34Mənaŋ ma mawuzlel tə əŋ Ɗerewel tə Bizlaf mə zlap, a zla:
«Mə səŋ wulək tə Bay Bayta seh, viyey?
Mə gula i mbaɗ əŋ hedi ŋga mə ɗal yawa seh, viyey?
35Mə mar ley vəlaŋ məsəkəŋ titʉz,
amba ley lim məsəkəŋ a ndəra ŋga, ɓa, a mineŋgʉ a ɗek seh, viyey?»
36Məŋgəvday məsəkəŋ fuk a ndaha a ndəra ŋga, məsəkəŋ iyi fuk i mə nji kəɗi a mbiŋ, məŋgəvday mbiŋ.
Səndawl mə nja əŋ Bizlaf kwa a pipi a pipi. Amen!
ទើបបានជ្រើសរើសហើយ៖
Rawma iyi 11: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
