Markus 15
15
Yesu mbə a ma tə Pilatu
(Matta 27:1-2, 11-14; Luka 23:1-5; Yahwana 18:28-38)
1Abə kafa ta vət, hedi səndawl iyi tə a talaŋ hedi iyi i mə ɗal kukus əŋ Bizlaf i jam talaŋ abə hedi mə ɗal yawa iyi, metir tə ma majaw iyi liŋ abə hedi səndawl mə ɗal yawa kə mbəzl ma iyi fuk. Ɓa, i jaw Yesu, i deɓʉ, i vəlaŋgu əŋ ndəra Pilatu. 2Pilatu a ɗəpu, a zla: «Hwa seh, bay tə Yahuda iyi vaw?» Yesu a ziŋgeŋ zlap, a zla: «Ar mənaŋ hwa mə zlap mba.» 3Hedi səndawl iyi tə a talaŋ hedi iyi i mə ɗal kukus əŋ Bizlaf i kəzlap ma iyi par par mbeh səku a talaŋ Yesu. 4Abə dawaŋ ta, Pilatu a ɗəpu baha, a zla: «Hwa ziŋgeŋta zlap səku dap vaw? Gər, i mə zlap ma iyi par par a talaŋ təkwa wa.» 5Ama Yesu kəziŋ zlap halla, ha Pilatu kəhar za.
I mbəzl ma a talaŋ Yesu mbəzl ma kə ja
(Matta 27:15-26; Luka 23:13-25; Yahwana 18:39; 19:16)
6Əŋ gugway tə Paska mə ɗal fuk, Pilatu a kəpəlaŋta hedi ntaɗ tə əŋ daŋgay, hedi, hedi makwas iyi i mə ɗəpu. 7Ama əŋ hala ta mba, hedi məzəwindi aka, miya ŋga Barabbas mbə əŋ daŋgay, mbiŋ abə hedi məzəwindi iyi i kətəlaha ma za, i kəjaha hedi za əŋ təl ma tata ta. 8Hedi makwas iyi i nda əŋ ge Pilatu, i mar ley ɗəpu amba mə ɗalaŋta məsəkəŋ mənaŋ mbiŋ mə nja ka i ɗalaŋta hwayhway. 9Pilatu a ɗəpta, a zla: «Hi mba sa pəlaheni bay tə Yahuda iyi wa vaw?» 10Pilatu a zlap mənaŋ wa seh, məŋgəvday a gər hedi səndawl iyi tə a talaŋ hedi iyi i mə ɗal kukus əŋ Bizlaf i daha Yesu seh, məŋgəvday sərah a kəɗalaŋta a mbiŋ. 11Ama hedi səndawl iyi tə a talaŋ hedi iyi i mə ɗal kukus əŋ Bizlaf i gaɗ hedi iyi amba i ɗəpu gelɓe mə yakaŋta Barabbas. 12Pilatu a ɗəp baha, a zla: «Əŋ ma ta wa seh, heni mba sa ɗal abə hedi heni mə ɗafaŋ ma bay tə Yahuda iyi wa seh mey?» 13Baha, i ziŋgeŋ zlap abə ja varay, i zla: «Daru a mpay mazlaŋgal!» 14Pilatu a ɗəpta, a zla: «Məsəkəŋ madawar mbiŋ mə ɗal seh, vitikey?» Ama i ja varay baha abə fagay abə fagay, i zla: «Daru a mpay mazlaŋgal!» 15Pilatu a mba i səsəm hedi iyi, məŋgəvday a ɗek, a pəlaŋta Barabbas. A zlapaŋta əŋ sewje iyi i mə kəlap Yesu abə laway, abə dawaŋ ta, a vəlaŋta, amba i mə daru a mpay mazlaŋgal.
Sewje iyi i ɓasaŋ a talaŋ Yesu
(Matta 27:27-31; Yahwana 19:2-3)
16Sewje iyi i deɓ Yesu a palah ge tə bay Pilatu, əŋ lay kə mbəzl ma tə guverner. Ɓa, i ɗafaŋta ma əŋ dəl tə sewje dakayta iyi fuk. 17I ndəkaŋ rukut sə pireŋ tə bay iyi a wucum, i ja digeɗ mənaŋ lapam, i ɗiyaŋgu a talaŋ ŋga. 18Ɓa, i mar ley ɗalaŋ mbele, i zla: «Mbele, bay tə Yahuda iyi!» 19I tawu abə zlambay tə wuruf əŋ talaŋ, i pireŋ mesleɓ a wucum, i dar malakw a ma ŋga. 20Abə dawaŋ ta, i kəɓasaŋ kwata a talaŋ ŋga seh, i cakwaŋ rukut sə pireŋ sey, i ndəkaŋ rukut ŋga iyi. Ɓa, i təɗahaw əŋ berne ta, i deɓʉ ley daru a mpay mazlaŋgal.
Sewje iyi i dar Yesu a mpay mazlaŋgal
(Matta 27:32-44; Luka 23:26-43; Yahwana 19:17-27)
21Hedi tə əŋ hayak tə Sirene məzəwindi aka, miya ŋga Simaŋw, baba tə Alekzandəre abə Rufus#15:21 Rawma iyi 16:13., a kəndaha a damu. Sewje iyi i takaŋ wula ley ɓət mpay mazlaŋgal tə Yesu. 22I deɓ Yesu a lay i mə ɗafaŋ ma Gwalgwata, mənaŋ zlap ta: «Lay tə kirŋgisl tə talaŋ#15:22 Matta 27:33..» 23I mba i vəlaŋ mavu majavaɗ tə abə mənjivek tə mpay «mir», ama Yesu a kəmba i su səku. 24Ɓa, i daru a mpay mazlaŋgal, abə dawaŋ ta, i ɗal caca ley wuɗak rukut ŋga iyi amba ley səŋ əŋ kwa viyey mə nda i ɓət rukut iyi ta. 25I dar Yesu a mpay mazlaŋgal seh, abə kafa tə njamndi cafaɗ. 26Ma i mə ja Yesu tə a ɗek wa seh, i wuzlelʉ a kwambum kə wuzlel, i daru a mpay, i zla: «Ar bay tə Yahuda iyi.» 27I dar Yesu a mpay mazlaŋgal abə hedi iyi bək mə la məsəkəŋ tə hedi iyi, ntaɗ əŋ ndəra zəma ŋga, ntaɗ əŋ ndəra gula ŋga. 28[Məsəkəŋ ta kəɗal za mənaŋ ma mawuzlel tə əŋ Ɗerewel tə Bizlaf zlezle mə zlap: «I kəŋgəɗza za əŋ faŋw tə hedi madawar iyi#15:28 Əŋ ɗerewel tə Gərek dakayta iyi i kəwuzlel lay ta wa za, əŋ ɗerewel dakayta iyi bahayim halla.»]. 29Hedi mə taŋ kəɗi mba iyi, i huɓəl talaŋ, i ru, i zla: «Hey! hwa seh, hwa mə mba i hurum biŋ tə Bizlaf, hwa ləmza za əŋ waŋ maakaɗ, 30reh talaŋ təkwa, ɓa, hwa bəreŋgehe a mpay mazlaŋgal!» 31Mənaŋ mba bahayim, hedi səndawl iyi tə a talaŋ hedi iyi i mə ɗal kukus əŋ Bizlaf abə metir tə ma majaw iyi i ɓasaŋ a talaŋ, i zlap əŋ faŋw tata, i zla: «Kəreh hedi məzəwindi iyi za, ama a gula i reh talaŋ ŋga səku. 32Əŋgah mbiŋ, ar Almasihu Bay tə Israyila iyi seh, sey mə bəreŋgehe a mpay mazlaŋgal mənjawa, amba nakwa iyi i gəru, nakwa iyi kuwaŋ ma.» Hedi madar tə abə mbiŋ iyi i ru bahayim.
Məc tə Yesu
(Matta 27:45-56; Luka 23:44-49; Yahwana 19:28-30)
33Əŋ pis ɓarakɓarak seh, ləvəŋ a ɗal a talaŋ hayak fuk ha ler maakaɗ tə məcukahw. 34Əŋ ler maakaɗ ta, Yesu a ja varay abə fagay, a zla: «Elawhi, Elawhi, lema sabaktani?» Mənaŋ zlap ta: «Waa Bizlaf na, waa Bizlaf na, hwa yakaka seh məŋgəvday a mey?» 35Hedi məzəwindi magar tə a namba iyi i zlimʉ, i zla: «Ehe, a kəɗafaŋ ma əŋ Eliya!» 36Hedi ntaɗ əŋ faŋw tata a ndaha abə hiy, a jəraɓ məsəkəŋ mənaŋ sifaŋw əŋ mavu sə kuyiŋ, ɓa, a paɗu a mpay tə wuruf, abə dawaŋ ta, a ɗefeŋgu əŋ Yesu amba mə səseɓʉ, a zlap, a zla: «Mazukwa i gəbaru amba nakwa iyi gəru kəganah Eliya a ndaha za ley bəreŋgehew a mpay mazlaŋgal ta kəvah!» 37Ama Yesu a ja varay abə fagay, ɓak! a məc ŋga. 38Rukut meker lay tə əŋ biŋ kə ɗal kukus əŋ Bizlaf, a ŋgwahak wuɗak bək, mar tə wuzlaf ha əŋ teyek. 39Hedi səndawl tə a talaŋ sewje iyi temere tə Rawma, magar tə a ma tə Yesu, əŋ mbiŋ mə gər Yesu mə məc ma a nje ŋga seh, a zla: «Məndiwiŋ, hedi wa, ar Mbu tə Bizlaf.» 40Wala məzəwindi iyi a namba aka bahayim, i kəgər nje abə guduk ta. Əŋ faŋw tata Mariyama tə Magdala, Salawme liŋ Mariyama mama tə Yakuba mbu mekedek abə Yawses. 41Wala iyi wa mə ziber Yesu iyi, mə ɗalaŋ kəzəɗ iyi əŋ mbiŋ mbə əŋ Galili. Wala məzəwindi iyi bahayim mbeh səku aka, i kəziber Yesu ha əŋ Urusalima.
Pəs tə Yesu
(Matta 27:57-61; Luka 23:50-56; Yahwana 19:38-42)
42Məcukahw kwata, ar seh pis kə sla wucum tə gugway, mənaŋ zlap ta garaha kafa tə pis kə yip, 43Yusufa tə əŋ berne i mə ɗafaŋ ma Arimatiya a gwaraha. Ar hedi bayta tə əŋ faŋw tə hedi səndawl mə ɗal yawa kə mbəzl ma iyi. Mbiŋ bahayim, a kəgəbar Bay tə Bizlaf. A səɓ nəf, a nda əŋ ge Pilatu ley ɗəpaha wucum tə Yesu. 44Pilatu kəhar za ley zlim Yesu kəməc za viyu. A ɗafaŋ ma əŋ hedi səndawl tə sewje iyi temere tə Rawma, a ɗəpu, a zla: «A məc seh, zlezle vaw?» 45Abə dawaŋ tə kəzlim labara ta kwata a ndəra səndawl tə sewje iyi temere tə Rawma iyi seh, a vəlaŋ kataf əŋ Yusufa ley ɓət wucum tə Yesu. 46Yusufa a səkəm rukut səntaŋ sə kweɗek, a bəreŋgehe wucum tə Yesu a mpay mazlaŋgal, ɓa, a paɗu abə rukut ta, a ɗiyu əŋ jiɓ mara tə əŋ nvəŋ. Ɓa, a guduŋgulaha beler bayta ley pek meɗek tə jiɓ ta. 47Mariyama tə Magdala abə Mariyama mama tə Yawses i kəgər əŋ lay i mə ɗiyi wucum tə Yesu.
ទើបបានជ្រើសរើសហើយ៖
Markus 15: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល