Markus 14
14
Hedi səndawl tə Yahuda iyi i kəɗal yawa ley məl Yesu
(Matta 26:1-5; Luka 22:1-2; Yahwana 11:45-53)
1Mayak waŋ bək ley gwar əŋ gugway tə Paska abə gugway tə peŋ mə tak is a ɗəməŋ, hedi səndawl iyi tə a talaŋ hedi iyi i mə ɗal kukus əŋ Bizlaf abə metir tə ma majaw iyi i pələk kataf ley məl Yesu abə wereh amba i ju. 2I zlap əŋ faŋw tata, i zla: «Nakwa iyi mba i ɗal məsəkəŋ ta abə pis tə gugway səku, məŋgəvday hedi iyi i nda i mbuw ma.»
Wala mə mbaɗ ɓurdi a talaŋ tə Yesu
(Matta 26:6-13; Luka 12:1-8; Yahwana 12:1-8)
3Yesu mbə əŋ Baytaniya a ge Simaŋw hedi kwalkwala. Əŋ tata i kəzəm wuda, wala məzəwindi aka, a təɗaha əŋ kelek tata abə ŋgəfa tə albatər, mə gweɗi abə ɓurdi tə mpay iyi i mə ɗafaŋ ma «nardi». Ɓurdi ta səntaŋ, dala a ɗek kwak. A ŋga meɗek tə ŋgəfa ta, ɓa, a mbaɗaŋ ɓurdi ta a talaŋ tə Yesu. 4Hedi dakayta tə a namba iyi i zəm nəf a wala ta, i zlap əŋ faŋw tata, i zla: «A gay ɓurdi ta wa seh, məŋgəvday a mey? 5Əŋgah kəberza za abə dala malaway temere maakaɗ seh, pay day səku vaw? Kəvəlaŋ dala ta za əŋ hedi məstakwaŋ iyi seh pay day səku vaw?» Ɓa, i vəlaŋ hem abə gwazlak. 6Ama Yesu a zlapaŋta, a zla: «Hi yaku, hi ŋgaŋ talaŋ seh, məŋgəvday a mey? Kəɗalaka kəzəɗ səntaŋ za. 7Hedi məstakwaŋ iyi i mbə abə heni kwa a pipi a pipi, əŋ heni mə mba fuk, heni gula i ɗalaŋta məsəkəŋ səntaŋ. Ama sa seh, heni kənda i limeke ley nja abə heni kwa a pipi a pipi aka səku ba. 8Wala ta kəɗal məsəkəŋ mbiŋ mə gula i ɗal za: Mar sa kəməc halla ndagwa, kəmbaɗaka ɓurdi za a wucum ley ɗiy wucum na əŋ jiɓ. 9Sa kəzlapaheni məndiwiŋ, kwa a tikey əŋ məŋhayak wa, i nda i giz Labara Səntaŋ Lawayaŋ, i giz məsəkəŋ wala wa mə ɗal wa za bahayim, amba hedi iyi i səŋ kenek a wala ta.»
Yahuda a kəpələk wereh ley vəlaŋta Yesu əŋ hedi səndawl iyi tə a talaŋ hedi iyi i mə ɗal kukus əŋ Bizlaf
(Matta 26:14-16; Luka 22:3-6)
10Yahuda Iskariyawt, hedi ntaɗ tə əŋ faŋw tə gula ŋga iyi wam a meɗek bək, a nda əŋ kelek hedi səndawl iyi tə a talaŋ hedi iyi i mə ɗal kukus əŋ Bizlaf amba ley vəlaŋta Yesu əŋ ndəra tata. 11Əŋ tata i mə zlim ma ŋga seh, i səsəm, i zlap i vəlaŋ dala za. Mar tə əŋ hala ta mba, Yahuda a kəpələk kataf səntaŋ ley vəlaŋta Yesu əŋ ndəra tata.
Sla wucum tə Yesu abə gula ŋga iyi əŋ gugway tə Paska
(Matta 26:17-25; Luka 22:7-23; Yahwana 13:21-30)
12Waŋ titʉz tə gugway tə peŋ mə tak is a ɗəməŋ, əŋ pis kə fat ntek tə gugway tə Paska iyi, gula tə Yesu iyi i ɗəpu, i zla: «Hwa mba nini nda i ɗiyaha lay amba nakwa iyi zəm wuda tə gugway tə Paska seh, a tikey?» 13Ɓa, Yesu a ləɓ gula ŋga iyi bək, a zlapaŋta, a zla: «Hi nda əŋ berne, hi gbam talaŋ za abə hedi a kəndaha abə yim əŋ duguzl, hi ziberʉ. 14Əŋ ge mbiŋ mə nda i təɗ, hi zlapaŋ əŋ hedi lə ge ta: “Metir, a zla: Biŋ ley zəm wuda tə gugway tə Paska abə gula na iyi seh, vitikey?” 15A gizeheni biŋ tə a talaŋ biŋ za. Biŋ ta, səndawl mə ɗiyi kwata lawlaw abə məsəkəŋ nakwa mə mba iyi, a namba, hi ɗiyaha nakwa məsəkəŋ kə zəm.» 16Gula ŋga iyi sey i nda, i gwar əŋ berne ta, i lim məsəkəŋ iyi fuk mənaŋ Yesu mə zlapaŋta, ɓa, i ɗiy wuda tə gugway tə Paska ta.
Yesu a kəzəm wuda tə Paska abə gula ŋga iyi
(Matta 26:20-30; Luka 22:14-23; Yahwana 13:21-26; 1 Kwarintʉ iyi 11:23-25)
17Əŋ məcukahw kwata seh, Yesu a gwaraha abə gula ŋga iyi wam a meɗek bək. 18Əŋ tata i kəzəm wuda, Yesu a zlapaŋta, a zla: «Sa kəzlapaheni məndiwiŋ, hedi ntaɗ əŋ faŋw təheni, a kəzəm wuda abə sa, a bereke za.» 19Ma ta kəjaŋta wucum tə gula ŋga iyi za, kwa viyey i mar ley ɗəpu ntaɗ ntaɗ, i zla: «Ar sa vaw, ar sa vaw?» 20A ziŋgeŋta zlap, a zla: «Ar hedi ntaɗ tə əŋ faŋw təheni sə wam a meɗek bək iyi wa, hedi nini mə jam ndəra tə əŋ kwaɗum tə abə mbiŋ wa. 21Məndiwiŋ, Mbu tə Hedi a məc za mənaŋ ma mawuzlel tə əŋ Ɗerewel tə Bizlaf mə zlap tə a ɗek. Ama tuwah a ndaha za a talaŋ hedi mə nda i ber Mbu tə Hedi. Gelɓe əŋ hedi ta kəmbuwaha halla.»
Wuda tə Bay Bayta
(Matta 26:26-30; Luka 22:15-20; 1 Kwarintʉ iyi 11:23-25)
22Əŋ tata i kəzəm wuda, Yesu a ɓət peŋ, a ɗalaŋ sʉse əŋ Bizlaf, a ŋgu, ɓa, a vəlaŋta əŋ gula ŋga iyi, a zlapaŋta, a zla: «Hi ɓətu, wawa, ar wucum na.» 23Abə dawaŋ ta, a ɓət kwaɗum tə abə mavu, a ɗalaŋ sʉse əŋ Bizlaf, a vəlaŋta, ɓa, i su tata fuk tata iyi. 24A zlapaŋta, a zla: «Wawa, ar məmbəz na, məmbəz kə jaw ma tə Bizlaf, mambaɗaha məŋgəvday hedi iyi mbeh səku. 25Sa kəzlapaheni məndiwiŋ, sa kənda i sa mavu halla ba, ha əŋ waŋ sa mə nda i sa mavu lawayaŋ əŋ Bay tə Bizlaf.» 26Abə dawaŋ tə wa, Yesu abə gula ŋga iyi i ja dərif kə səbaŋ Bizlaf, i təɗ tata ley nda əŋ wuzum tə Jaytun iyi.
Yesu a zlap seh, Piyer a yakza za
(Matta 26:31-35; Luka 22:31-34; Yahwana 13:36-38)
27Yesu a zlapaŋta əŋ gula ŋga iyi, a zla: «Heni fuk, hi yakaka za, mənaŋ Ɗerewel tə Bizlaf mə zlap, a zla: “Sa ja njʉwiŋ za, ntek iyi i wʉweɗ tata za”. 28Ama əŋ sa kəgaraha cuza əŋ faŋw tə hedi maməc iyi, sa nda za məpər a heni əŋ Galili.» 29Piyer a zlapaŋgu, a zla: «Kwa əŋgah hedi iyi fuk i kəyakah za, sa seh, sa yakah halla səlak.» 30Yesu a ziŋgeŋ zlap, a zla: «Sa kəzlapah məndiwiŋ, hwa, eci əŋ njaɗu wa, ha gwamzakw a nda i ja wula əŋ ŋgas bək seh, hwa ja ma za əŋ ŋgas maakaɗ hwa kəsəŋgaka səku.» 31Ama Piyer a ceh ley zlap abə fagay, a zla: «Sa kənda i ja ma sa kəsəŋgah səku seh halla, kwa ar ley məc, sa nda i məc abə hwa.» Gula ŋga dakayta iyi i zlap mənaŋ mba bahayim.
Yesu a kəɗal mbuh a Gecemane
(Matta 26:36-46; Luka 22:39-46)
32Yesu abə gula ŋga iyi i gwar əŋ lay i mə ɗafaŋ ma Gecemane. Yesu a zlapaŋta əŋ gula ŋga iyi, a zla: «Hi nja a nawa, sa nda i ɗalaha mbuh.» 33A ŋgasl Piyer, Yakuba liŋ Yahwana a nda abə tata. Ɓa, ləndəŋ abə wuzlaɗ talaŋ a mar ley ɗalaŋgu. 34A zlapaŋta, a zla: «Wulək tə əŋ nəf na a kəmba i jaka. Hi nja a nawa, hi mba i waŋ səku.» 35A nda a ma mbizek, a ndəv əŋ teyek, ɓa, a ɗalaŋ mbuh əŋ Bizlaf amba əŋgah a lim za seh, hala tə tuwah wa mə taŋ guduk abə mbiŋ. 36A zla: «Abba, Baba na, a ndəra təkwa seh məsəkəŋ fuk a ɗal za, ɓətaka tuwah wa, hwa mba i ɗal mənaŋ sa mə mba səku, ama ɗal mənaŋ hwa mə mba.» 37Abə dawaŋ ta, a ziŋgehe a lim gula ŋga iyi maakaɗ sey i kəwaŋ. A zlapaŋ əŋ Piyer, a zla: «Simaŋw, hwa kəwaŋ vaw? Hwa kəlim fagay ley jəɗ kwa tə ler ntaɗ seh halla dap vaw? 38Hi jəɗ, hi ɗal mbuh amba hi mba i təɗ əŋ məsəkəŋ madawar səku. Hedi dəgənak a kəmba i ɗal məsəkəŋ səntaŋ, ama wucum ŋga fagay halla.»
39A nda baha, a ɗal mbuh mənaŋ nakaha sey. 40Ɓa, a ziŋgehe, a limta i kəwaŋ baha, məŋgəvday waŋ a kəjata. I kəsəŋ tata mə nda i ziŋgeŋ zlap səku. 41A nda, a ziŋgehe əŋ kelek tata əŋ ŋgas maakaɗ, a zlapaŋta, a zla: «Heni kəwaŋ ha mənjawa dap vaw? Heni kəyip vaw? Kwata izey, pis ta kəhwasaha za, mənjawa i nda i vəl Mbu tə Hedi əŋ ndəra hedi mə ɗal hem iyi. 42Hi gar! Mazukwa! Ehe, hedi mə nda i bereke əŋ ndəra hedi mə ɗal hem iyi, i mbə ceh.»
I məl Yesu
(Matta 26:47-56; Luka 22:47-53; Yahwana 18:3-12)
43Mar Yesu kəcukwaɗ ley zlap halla ndagwa seh, Yahuda, hedi ntaɗ tə əŋ faŋw tə gula ŋga iyi wam a meɗek bək, a gwaraha abə hedi iyi mbeh səku, i kəslaha wucum za abə masalam iyi liŋ abə zlambay iyi. Ar hedi səndawl tə a talaŋ hedi iyi i mə ɗal kukus əŋ Bizlaf, metir tə ma majaw iyi liŋ hedi mə ɗal yawa iyi, i mə ləɓahata. 44Yahuda, hedi mə nda i vəl Yesu əŋ ndəra məsəgər iyi, kəgizeŋta məsəkəŋ tata mə nda i ɗal kwata seh, a zla: «Hedi sa mə nda i ɗalaŋ mbele mənaŋ maday na seh, ar mbiŋ. Hi məlu, hi deɓʉ, hi jəɗu lawlaw.» 45Yahuda a gwaraha, a kərəɗ əŋ kelek Yesu, a zlapaŋgu, a zla: «Rabbi.» Ɓa, a ɗalaŋ mbele abə məl wucum. 46Abə dawaŋ ta izey, hedi mə ndaha tə abə mbiŋ iyi, i məl Yesu. 47Hedi ntaɗ əŋ faŋw tə gula ŋga iyi a təɗaha masalam ŋga, a bəl gula tə hedi səndawl tə a talaŋ hedi iyi i mə ɗal kukus əŋ Bizlaf, a zlaŋ zləm. 48Yesu a zlapaŋta, a zla: «Hi ndaha abə masalam iyi liŋ zlambay iyi ley məlaka mənaŋ sa məhil seh məŋgəvday a mey? 49Hwayhway, sa mbə abə heni əŋ biŋ tə Bizlaf, sa kəsərəkaheni, heni kəməlaka halla. Ama məsəkəŋ ta a ɗal mənaŋ wa, amba ma mawuzlel tə əŋ Ɗerewel tə Bizlaf mə ɗal.» 50Abə dawaŋ ta izey, gula ŋga iyi fuk i hiy tata, i yaku. 51Gula məzəwindi aka, a kəziber Yesu, kəsləkəɗ wucum kwata abə gwedere. I məlu, 52ama a reh ŋga, a yak gwedere, a hiy ŋga wucum meneweŋ.
Yesu mbə a ma tə hedi səndawl mə ɗal yawa kə mbəzl ma iyi
(Matta 26:57-68; Luka 22:54-55, 63-71; Yahwana 18:13-14, 19-24)
53I deɓ Yesu a ma tə hedi səndawl tə a talaŋ hedi iyi i mə ɗal kukus əŋ Bizlaf. Hedi səndawl iyi tə a talaŋ hedi iyi i mə ɗal kukus əŋ Bizlaf ta, abə hedi mə ɗal yawa iyi liŋ metir tə ma majaw iyi fuk i kwas a namba. 54Piyer a kəziber Yesu abə guduk ta ha əŋ ge tə hedi səndawl tə a talaŋ hedi iyi i mə ɗal kukus əŋ Bizlaf. A nja abə gula mə jəɗ ge iyi, a kəsit kahaw. 55Hedi səndawl iyi tə a talaŋ hedi iyi i mə ɗal kukus əŋ Bizlaf abə hedi səndawl mə ɗal yawa kə mbəzl ma iyi i pələk kataf ley hem Yesu amba ley mbəzlaŋ ma kə ja, ama i kəlim halla. 56Hedi iyi mbeh səku i kəbərəslaŋ ma za, ama ma tata kəjam halla. 57Hedi dakayta iyi əŋ faŋw tata, i gar, i bərəslaŋ ma a talaŋ ŋga, i zla: 58«Nini kəzlim za a kəzlap, a zla: “Sa hurum biŋ tə Bizlaf hedi iyi i mə ləm wa za, sa ləm par za əŋ waŋ maakaɗ, ar hedi iyi i mə nda i ləmu abə ndəra səku.”» 59Ama abə mbiŋ ta fuk, ma tata kəjam halla. 60Hedi səndawl tə a talaŋ hedi iyi i mə ɗal kukus əŋ Bizlaf a gar əŋ faŋw tə hedi iyi, a ɗəp Yesu, a zla: «Hwa ziŋgeŋta zlap əŋ hedi iyi i mə zlap tə a talaŋ təkwa wa səku dap vaw?» 61Ama Yesu mə nji tete, kəziŋgeŋta zlap halla səlak. Hedi səndawl tə a talaŋ hedi iyi i mə ɗal kukus əŋ Bizlaf a ɗəpu baha, a zla: «Hwa seh, hwa Almasihu, Mbu tə Bizlaf nini həmən seh vaw?» 62Yesu a ziŋgeŋta zlap, a zla: «Ayaw, ar sa, ama heni seh, heni lim Mbu tə Hedi mə nji əŋ ndəra zəma əŋ Bay tə Bizlaf tə abə fagay za. Heni limza za a kəndaha əŋ mekwetene tə wuzlaf.» 63Hedi səndawl tə a talaŋ hedi iyi i mə ɗal kukus əŋ Bizlaf a ŋgwahak rukut ŋga iyi, a zla: «Nakwa iyi mba sedewe iyi par səku ba! 64Hi kəzlim mbiŋ mə ra Bizlaf za. Hi wulək seh viŋgey?» Tata fuk i zlap, mbiŋ abə hem, mbiŋ tiɗe ley ja.
65Hedi iyi i pireŋ mesleɓ a mbiŋ. I dəpaŋ nje, i tawu, ɓa, i zlapaŋgu, i zla: «Səŋ hedi mə tawah!» Ɓa, hedi mə jəɗ ge iyi, i ɓət Yesu, i vəlaŋ maraw.
Piyer a zlap seh a kəsəŋ Yesu səku
(Matta 26:69-75; Luka 22:54-62; Yahwana 18:15-18, 25-27)
66Əŋ Piyer mə nji a teyek, a palah ge, hazləma ntaɗ əŋ faŋw tə hazləma mə ɗal kəzəɗ a ge hedi səndawl tə a talaŋ hedi iyi i mə ɗal kukus əŋ Bizlaf, a ndaha. 67Əŋ mbiŋ mə lim Piyer a kəsit kahaw seh, a gəru, a zlapaŋgu, a zla: «Hwa bahayim, hwa mbə abə Yesu lə Nasaratu.» 68Ama Piyer a ja ma, a zla: «Sa kəsəŋ ma hwa mə mba i zlap wa səku, sa kəsəŋ ma ta səku.» Ɓa, a nda kəɗi medigiɗ. [Əŋ hala ta mba gwamzakw a ja wula.] 69Hazləma sey a limʉ, a ziŋ ley zlapaŋta baha əŋ hedi tə a namba iyi, a zla: «Hedi wa, ar hedi ntaɗ tə əŋ faŋw tata.» 70Ama Piyer a ja ma baha. Abə dawaŋ ta mbizek, hedi tə a namba iyi i zlapaŋ əŋ Piyer baha, i zla: «Məndiwiŋ, hwa hedi ntaɗ tə əŋ faŋw tata, məŋgəvday hwa lə Galili.» 71Ama Piyer a mar ley zlap, a zla: «Əŋgah sa bərəsl ma seh, Bizlaf mə ɗalaka məsəkəŋ madawar! Sa meɗ za, sa kəsəŋ hedi heni mə zlap tə a talaŋ ŋga wa səku.» 72Mbehmbeh mba, gwamzakw a ja wula əŋ ŋgas bək. Piyer a səŋ kenek a ma Yesu mə zlapaŋgu, a zla: «Ha gwamzakw a nda i ja wula əŋ ŋgas bək seh, hwa ja ma za əŋ ŋgas maakaɗ hwa kəsəŋgaka səku.» A wulək ta wa, a təɗaha ŋga viyu, ɓa, a mar ley haŋ.
ទើបបានជ្រើសរើសហើយ៖
Markus 14: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល