Matta 11
11
Mələɓ tə Yahwana mə ɗal batem iyi
(Luka 7:18-35)
1Əŋ Yesu kəcukwaɗ za ley ŋgəz gula ŋga iyi wam a meɗek bək, a gar ŋga za a lay ta. A nda i giz abə ley sərəkaŋta əŋ hedi iyi Labara Səntaŋ Lawayaŋ əŋ berne tata iyi.
2Əŋ mbamba, Yahwana mə ɗal batem mbə əŋ daŋgay seh, a zlim labara tə kəzəɗ tə Almasihu. A ləɓ gula ŋga iyi bək əŋ kelek ŋga, 3i ɗəp Yesu ta, i zla: «Hwa seh, hedi mə nda i ndaha ley reh hedi iyi sey vaw? Aka səku, nini gəbar hedi par vaw?» 4Yesu a ziŋgeŋta zlap, a zla: «Hi nda i gizeŋ əŋ Yahwana ta məsəkəŋ heni mə zlim abə məsəkəŋ heni mə lim: 5Hedi wuluf iyi i kəlim nje, məslewslew iyi i kənda abə ŋgas tata iyi lawlaw, hedi kwalkwala iyi i kəbaŋ cuza, mədəgəzləm iyi i kəzlim zləm, hedi maməc iyi i kəgaraha za əŋ faŋw tə hedi maməc iyi, i kəgizeŋta Labara Səntaŋ Lawayaŋ bahayim əŋ hedi məstakwaŋ iyi#11:5 Esaya 35:5-6; 61:1.. 6Nja səntaŋ aka əŋ hedi mə nda i yak kuw ma səku məŋgəvday sa.»
7Əŋ mələɓ tə Yahwana iyi i cu tata seh, Yesu a mar ley zlapaŋta əŋ hedi makwas iyi a talaŋ ma tə Yahwana, a zla: «Heni mə nda əŋ təp damu wa seh, ley gəraha seh mey? Wuruf mimiɗ mə huɓəl iyi vaw? 8Kaa! heni nda i gəraha seh mey? Heni gəraha seh, hedi mə ndək rukut səntaŋ a wucum vaw? Ama hedi mə ndək rukut səntaŋ iyi seh, i mə nji a ge bay iyi. 9Kaa, hi nda i gəraha seh viyey? Hedi mə giz ma abə miya tə Bizlaf vaw? Ayaw, sa kəzlapaheni, mbiŋ kəday kwa hedi mə giz ma abə miya tə Bizlaf za. 10Məŋgəvday Yahwana ta seh, ar hedi, ma mawuzlel tə əŋ Ɗerewel tə Bizlaf mə zlap tə a talaŋ ŋga, a zla: “Ehe, sa kələɓ mələɓ na a ma təkwa, ley ɗiyah kataf təkwa.”» 11Yesu a zlap baha, a zla: «Sa kəzlapaheni məndiwiŋ: Əŋ faŋw tə hedi dəgənak iyi wa seh, hedi mə day Yahwana mə ɗal batem seh halla, ama hedi mekedek tə əŋ Bay tə wuzlaf seh, hedi ta pay day a Yahwana mə ɗal batem. 12Mar əŋ pis Yahwana mə ɗal batem mə giz ma tə Bay tə wuzlaf ha mənjawa, Bay tə wuzlaf a kəzlim tuwah abə fagay, hedi tə abə fagay iyi i kəpələk ley lu abə fagay. 13Ma majaw tə Musa abə hedi mə giz ma abə miya tə Bizlaf iyi fuk, i kəgiz ma tə Bay tə wuzlaf za ha a gwaraha əŋ pis tə Yahwana. 14Əŋgah heni kəmba i kuwaka ma lawlaw seh, Yahwana seh, ar Eliya, mə nda i ziŋgehe. 15Hedi abə zləm, mə zlimʉ!»
16«Sa nda i sla hedi tə jemere iyi wa seh, abə viyey? Tata mənaŋ wuziyi manja tə əŋ lay kə kwas hedi iyi, i kəjaŋta varay əŋ dakayta iyi, i zla: 17“Nini kəmbizeheni sləlam za, ama heni kəzlay halla. Nini kəjaheni dərif məce za, ama heni kəhaŋ halla.” 18Məŋgəvday Yahwana mə ɗal batem kənda za, a kəzəm məsəkəŋ mənaŋ hedi məzəwindi iyi səku, a kəsa məsəkəŋ səku, ama hedi iyi i kəzlap, i zla: “Mbiŋ seh, abə mulula əŋ talaŋ.” 19Mbu tə Hedi kəndaha za, a kəzəm məsəkəŋ, a kəsa məsəkəŋ mənaŋ hedi məzəwindi iyi. Ama hedi iyi i kəzlap, i zla: “Hi gər hedi wa, a wulək seh, sey ley zəm məsəkəŋ abə ley sa mavu əŋ dəməs ŋga dap. Baha, mbiŋ seh, ar maday tə hedi mə cakal budu iyi abə hedi mə ɗal hem iyi.” Ama burŋguzl tə Bizlaf seh, a kəgizehe delele seh kəɗi a kəzəɗ ŋga iyi.»
Wuta səndawl iyi i mə mba i kuw ma iyi səku
(Luka 10:13-15)
20Abə dawaŋ ta izey, Yesu a mar ley vəlaŋta hem əŋ berne iyi əŋ lay mbiŋ mə ɗalaha mazla iyi mbeh səku, məŋgəvday hedi tata iyi i kəbuw nja tata halla, a zla: 21«Tuwah a ndaha za a talaŋ təkwa, Kwarajin! Tuwah a ndaha za a talaŋ təkwa, Baytisayda! Məŋgəvday mazla iyi maɗal tə əŋ faŋw təheni wa, əŋgah a ɗal wa əŋ Tirʉs abə Sidaŋw seh, mar zlezle hedi tə a namba iyi, i ndək rukut tə gabal iyi za a wucum#11:21 I ndək rukut tə gabal iyi za a wucum: Mənaŋ zlap ta, i ndək rukut kə nja tə a lay məce za a wucum., i kʉy birtik za a wucum ley səŋ i kəbuw nja tata za. 22Məŋgəvday a ɗek, sa kəgizeheni: Əŋ pis kə mbəzl ma tə a talaŋ məŋhayak seh, mbəzl ma tə a talaŋ Tirʉs abə Sidaŋw a ɗal pay gelɓe za a tə təheni. 23Hwa Kafarnahum, hwa wulək seh Bizlaf a kafah za əŋ wuzlaf vaw? Mənaŋ mba səku! I nda i bəreŋgeh ha əŋ nja tə hedi maməc iyi. Məŋgəvday mazla iyi maɗal tə a ge təkwa wa, əŋgah a ɗal wa a Sawdawma seh, berne ta, a nja za ha mənjawa! 24Məŋgəvday a ɗek, sa kəzlapaheni: Əŋ pis kə mbəzl ma tə a talaŋ məŋhayak seh, mbəzl ma tə a talaŋ Sawdawma a ɗal pay gelɓe za a tə təkwa.»
Hi ndaha əŋ kelek na, hi lim yip za
(Luka 10:21-22)
25Əŋ hala ta mba, Yesu a zlap, a zla: «Waa Baba, Bay Bayta Bizlaf mə sla a lay tə wuzlaf abə tə teyek, sa kəɗalah sʉse məŋgəvday hwa kəgizeŋta za əŋ wuziyi mekedek iyi məsəkəŋ hwa mə ɓah a hedi tə abə burŋguzl iyi, a hedi mə səŋ məsəkəŋ iyi. 26Ayaw, waa Baba, əŋ səŋ nje həhər təkwa, hwa kəmba za mə ɗal mənaŋ wa.»
27Abə dawaŋ ta, a zlap, a zla: «Baba na kəvəlaka məsəkəŋ iyi wa fuk əŋ ndəra na. Kwa hedi mə səŋ Mbu seh halla, sey Baba na. Kwa hedi mə səŋ Baba na seh halla bahayim, sey Mbu liŋ hedi Mbu mə mba i gizeŋgʉ amba a səŋgu bahayim.
28«Hi ndaha əŋ kelek na, heni hedi mə ɓət məsəkəŋ sə ndʉlʉk iyi abə hedi matəɓəl iyi, sa vəlaheni yip za. 29Hi ɓət zuk na a heni, hi sərək a ndəra na, məŋgəvday sa seh, sa hedi sə tete, hedi mə waŋ talaŋ, hi lim yip za əŋ talaŋ təheni#11:29 Yeremiya 6:16.. 30Məŋgəvday zuk na seh, tuwah ley ɓət halla, məsəkəŋ sa mə nda i vəlaheni ley ɓət wa bahayim, kefeŋkefeŋ ley ɓət.»
ទើបបានជ្រើសរើសហើយ៖
Matta 11: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
