Matta 12
12
Pis kə yip
(Markus 2:23-28; Luka 6:1-5)
1Waŋ mbizek abə dawaŋ ta, Yesu a kətaŋ kəɗi lay tə ndəri alkamari#12:1 Alkamari, ar məsəkəŋ mənaŋ melewri., ar əŋ pis kə yip. Gula ŋga iyi mətis a kəjata, məŋgəvday a ɗek, i mar ley ŋga talaŋ tə ndəri alkamari ta, ɓa, i ɓamu. 2Əŋ Farisa iyi i mə lim məsəkəŋ tata i mə ɗal ta, i zlapaŋ əŋ Yesu, i zla: «Gər gula təkwa iyi i kəɗal məsəkəŋ matak ley ɗal əŋ pis kə yip.» 3Yesu a ziŋgeŋta zlap, a zla: «Heni kəjeŋge məsəkəŋ Dawuda mə ɗal, mbiŋ abə hedi ŋga iyi əŋ mətis a kəjata seh halla vaw? 4A təɗ əŋ biŋ tə Bizlaf abə hedi ŋga iyi, ɓa, i zəm peŋ mavəl əŋ Bizlaf. Kwa kataf kə vəlaŋta ley zəmu seh halla, sey əŋ hedi mə ɗal kukus əŋ Bizlaf iyi dap. 5Aka səku, heni kəjeŋge əŋ ma majaw tə Musa, hedi mə ɗal kukus əŋ Bizlaf iyi i mə ɗal kəzəɗ əŋ biŋ tə Bizlaf kwa əŋ pis kə yip seh halla vaw? Abə mbiŋ ta fuk, i kəwaŋgaŋ talaŋ əŋ ma majaw tə pis kə yip səku, ama tata abə hem halla. 6Ama sa kəzlapaheni: Ehe, məsəkəŋ səndawl mə day biŋ tə Bizlaf mbə a nawa. 7Əŋgah heni kəsəŋ lawlaw ma mawuzlel mə zlap, a zla: “Sa mba seh, səŋ nje həhər, ama məsəkəŋ mandaham mafat iyi səku,” mənaŋ wa seh, heni kənda i vəlaŋta hem əŋ hedi mə tak hem iyi seh halla. 8Məŋgəvday, ar Mbu tə Hedi mə sla a pis kə yip.»
Yesu a ɗiyaŋ ndəra maməc tə hedi
(Markus 3:1-6; Luka 6:6-11)
9Yesu a gar a namba, a nda, a təɗ əŋ biŋ tata iyi kə ɗal mbuh əŋ Bizlaf. 10Hedi məzəwindi aka a namba, ndəra ŋga maməc. Farisa iyi i ɗəp Yesu, i zla: «Ma majaw takwa kəvəl kataf za ley mbəl hedi əŋ pis kə yip takwa vaw?» I pələk ley vəlaŋ hem məŋgəvday a ɗek. 11Yesu a ziŋgeŋta zlap, a zla: «Əŋgah hedi ntaɗ əŋ faŋw təheni abə ntek ŋga ntaɗ dap, a ndəv əŋ jiɓ sə jiŋ əŋ pis kə yip seh, a təɗahaw halla vaw? 12Məndiwiŋ, hedi pay day a ntek, əŋgah mənaŋ mba seh, kataf aka ley ɗalaŋ məsəkəŋ səntaŋ əŋ hedi əŋ pis kə yip.» 13Abə dawaŋ ta izey, Yesu a zlapaŋ əŋ hedi sey, a zla: «Ɗefehe ndəra təkwa.» A ɗefeŋgu, ndəra ŋga ta a ɗiy ŋga ndaŋwndaŋw mənaŋ məzəwindi. 14Farisa iyi i təɗaha tata, i ɗal yawa ley lim kataf amba ley ja Yesu.
Yesu seh, hedi mə ɗal kəzəɗ tə Bizlaf
15Əŋ Yesu mə zlim məsəkəŋ tata mə mba i ɗal ta seh, a gar ŋga za a lay ta mba, ɓa, hedi makwas sə mbeh səku iyi i ziberʉ. A kəmbəl hedi mə dal iyi fuk. 16Ama a ŋgəzta, a zla: «Hi mba i gizek kwa əŋ viyey səku.» 17Mənaŋ wa, amba ma tə hedi mə giz ma abə miya Bizlaf, Esaya mə ɗal, kəzlap za, a zla:
18«Bizlaf a zla: “Ehe, hedi na mə ɗal kəzəɗ, sa mə mayu,
ar hedi sa mə mbaza mbeh səku, sa kəɗiy səsəm na fuk a mbiŋ.
Sa ɗiy Mimiɗ na za a mbiŋ,
a nda i gizeŋta əŋ hedi iyi məsəkəŋ sə delele.
19A kənda i ɗal pakwam abə hedi halla, a kənda i ja varay halla.
Hedi mə nda i zlim wula ŋga əŋ kataf səndawl iyi halla.
20A kənda i ŋga wuruf mahurum seh halla.
A kənda i məc lalam mə bas sə kʉsit kʉsit ndagwa seh halla,
a nda i ɗal kəzəɗ ta mənaŋ wa ha əŋ mbiŋ mə nda i mbəzl ma ŋga a talaŋ hedi iyi fuk.
21Ɓa, hedi dakayta iyi fuk i nda i ɗiy wulək tata a mbiŋ.»
Yesu a kəɗal kəzəɗ abə mimiɗ madawar vaw?
(Markus 3:22-30; Luka 11:14-23)
22Abə dawaŋ ta izey, i dahaŋ hedi məzəwindi aka, ar hedi wuluf, ɓəɓa, məŋgəvday mbə abə mulula əŋ talaŋ. Yesu a mbəlu, ɓa, hedi ta a mar ley zlap, a lim kə nje. 23Kəhar hedi makwas iyi fuk za, i zlap, i zla: «Hedi wa seh, ar Mbu tə Dawuda səku vaw?» 24Əŋ Farisa iyi i mə zlim ma ta, i zla: «Hedi wa, a kəgam mimiɗ madawar iyi abə fagay Belzebul, bay tə mimiɗ madawar iyi, mə vəlaŋgu.» 25Ama Yesu kəsəŋ wulək tata, a zlapaŋta, a zla: «Əŋgah hedi iyi tə əŋ hayak tə bay ntaɗ i kəɗal vərəm əŋ faŋw tata, hayak ta a gay ŋga za. Əŋgah hedi tə əŋ berne iyi, aka səku tə ge iyi i kəjəm əŋ faŋw tata seh, berne ta a gay ŋga za, aka səku ge ta a gay ŋga za. 26Əŋgah Sayɗanu a kəgam Sayɗanu, mbamba seh, a jəm abə talaŋ ŋga, bay ŋga ta, a nda i nja seh viŋgey? 27Əŋgah heni zlap sa kəgam mimiɗ madawar iyi abə fagay tə Belzebul, mə vəlaku seh, kaa, wuziyi təheni iyi bahayim mə vəlaŋta fagay ley gamta seh viyey? Məŋgəvday a ɗek, wuziyi təheni iyi tata bahayim, i nda i zlapaheni, heni abə hem. 28Ama əŋgah sa kəgam mimiɗ madawar iyi abə fagay tə Mimiɗ tə Bizlaf, mənaŋ mba seh, Bay tə Bizlaf kəgwaraha za ha a heni.»
29«Əŋgah hedi tə abə fagay, mə tak jaw seh, hedi gula i təɗ əŋ ge ŋga ley kəcaha məsəkəŋ ŋga iyi seh viŋgey? Ama əŋgah i kəjawza za seh, hedi gula i kəcaŋ məsəkəŋ tə ge ŋga iyi fuk za#12:29 Markus 3:27.. 30Hedi mbə abə sa halla, ar məsəgər na. Hedi kətəraka ley kamalaha halla, a kəwʉweɗta. 31Məŋgəvday a ɗek, sa kəzlapaheni: hem iyi, abə məra tə a talaŋ Bizlaf iyi fuk, hedi dəgənak iyi i mə ɗal wa, Bizlaf a gula i baŋgaŋta hem. Ama hedi mə ra Mimiɗ sə Kweɗek seh, Bizlaf a kənda i baŋgaŋ hem ŋga halla səlak. 32Hedi mə zlap ma madawar a talaŋ Mbu tə Hedi, Bizlaf a baŋ hem ŋga za. Ama hedi mə zlap ma madawar a talaŋ Mimiɗ sə Kweɗek seh, Bizlaf a kənda i baŋgaŋ hem ŋga halla səlak, kwa mənjawa, kwa a wara bahayim.»
Mpay abə wuziyi ŋga iyi
(Luka 6:43-45)
33«Əŋgah mpay səntaŋ seh, wuziyi ŋga iyi bahayim səntaŋ. Əŋgah mpay madawar seh, wuziyi ŋga iyi bahayim madawar. I səŋ mpay seh a wuziyi ŋga iyi. 34Heni wuziyi tə hursla iyi, heni nda i zlap məsəkəŋ səntaŋ iyi, heni maa, heni madawar iyi seh viŋgey? Məŋgəvday ma a kətəɗaha məsəkəŋ magwaɗ tə əŋ nəf. 35Hedi səntaŋ a kətəɗaha məsəkəŋ səntaŋ tə əŋ məsəkəŋ səntaŋ iyi magwaɗ tə əŋ nəf ŋga. Hedi madawar bahayim, a kətəɗaha məsəkəŋ madawar tə əŋ məsəkəŋ madawar iyi magwaɗ tə əŋ nəf ŋga. 36Sa kəzlapaheni, əŋ pis kə mbəzl ma tə a talaŋ məŋhayak seh, hedi iyi i nda i giz tata abə talaŋ tata a ma tata madawar haya matəɗaha iyi mba fuk. 37Məŋgəvday ar kəɗi a zlap təkwa iyi, i mbəzlah ma za, i ɗiyah za əŋ hedi səntaŋ, aka səku i ɗiyah za əŋ hedi madawar.»
Məsəkəŋ mə taŋ tə abə Yawnas
(Markus 8:11-12; Luka 11:29-32)
38Abə dawaŋ ta izey, metir tə ma majaw dakayta iyi abə Farisa dakayta iyi i zlapaŋ əŋ Yesu, i zla: «Bay Bayta, nini kəmba hwa ɗalanini mazla, amba nini gəru.» 39Yesu a ziŋgeŋta zlap, a zla: «Hedi mənjawa iyi, tata hedi madawar iyi, mə bim Bizlaf iyi, i kəɗəp mazla, i kənda i lim par halla, sey məsəkəŋ mə taŋ tə abə hedi mə giz ma abə miya tə Bizlaf, Yawnas. 40Mənaŋ Yawnas mə ɗal pis maakaɗ abə njaɗu maakaɗ a dəməs kəlif səndawl, mənaŋ mba bahayim, Mbu tə Hedi a ɗal pis maakaɗ abə njaɗu maakaɗ za əŋ hayak. 41Əŋ pis kə mbəzl ma tə a talaŋ məŋhayak seh, hedi tə əŋ hayak tə Niniwe iyi i garaha za ley vəlaŋta hem əŋ hedi mənjawa iyi, məŋgəvday hedi tə əŋ hayak tə Niniwe iyi i kəbuw nja tata za əŋ tata i mə zlim giz ma tə Yawnas. Anjəkər, hedi mə day Yawnas a nawa aka. 42Əŋ pis kə mbəzl ma tə a talaŋ məŋhayak seh, bay tə wala tə əŋ hayak kəɗi əŋ teyek, a garaha za ley vəlaŋta əŋ hedi mənjawa iyi, məŋgəvday a ndaha guduk ha maɗ ma tə hayak ley zlim zlap tə abə burŋguzl tə Sulaymanu. Anjəkər, hedi mə day Sulaymanu a nawa aka.»
Ziŋgehe tə mimiɗ tə abə ndəra dəlay
(Luka 11:24-26)
43«Əŋgah mimiɗ tə abə ndəra dəlay kətəɗaha ŋga za əŋ talaŋ tə hedi seh, a nda, a pikehe a damu, a pələkaha lay ley yip, ama əŋgah kəlimehe halla, 44abə dawaŋ ta izey, a wulək əŋ nəf ŋga, a zla: “Sa nda i ziŋ əŋ ge na, əŋ lay sa mə təɗaha.” Əŋ mbiŋ mə ziŋgehe, kəlim məsəkəŋ a ɗəməŋ halla, mə feɗi lawlaw, mə ɗiyi lawlaw. 45Abə dawaŋ ta izey, a nda, a pələkaha mimiɗ madawar dakayta iyi dʉsəlʉɗ, mə dayza tə abə lem iyi, i təɗ əŋ biŋ ta, i nja a ɗəməŋ. Nja tə hedi ta a gay za day nakaha, mənaŋ wa, məsəkəŋ ta a ɗal za əŋ hedi madawar mənjawa iyi.»
Zliŋgeŋ tə Yesu iyi abə mama ŋga
(Markus 3:31-35; Luka 8:19-21)
46Əŋ Yesu a kəzlapaŋta əŋ hedi makwas iyi ndagwa seh, mama ŋga abə zliŋgeŋ iyi i kəgwaraha. I gar a palah, i kəpələk ley zlapaŋgu. 47Hedi məzəwindi aka, a zlapaŋgu, a zla: «Ehe, mama təkwa abə zliŋgeh iyi i mə geri a palah, i kəmba i zlapah.» 48Yesu a ziŋgeŋ zlap, a zla: «Mama na seh, viyey? Zliŋmana iyi seh viyey?» 49Ɓa, a ɗef ndəra kəɗi gula ŋga iyi, a zla: «Ehe, Mama na abə zliŋmana iyi. 50Məŋgəvday hedi mə ɗal mba tə Baba na tə wuzlaf seh, hedi ta mba ar zliŋmana muwul muwul, wala wala liŋ mama na.»
ទើបបានជ្រើសរើសហើយ៖
Matta 12: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
