Luka 7
7
Yesu a mbəl gula tə səndawl tə sewje iyi
(Matta 8:5-13)
1Abə dawaŋ tə Yesu kəcukwaɗ ley zlapaŋta ma ŋga iyi fuk kwata a ma tə hedi sə mbeh səku iyi i mə zlimeŋ ma ŋga iyi seh, ɓa, a nda ŋga əŋ Kafarnahum. 2A namba, hedi səndawl tə sewje iyi tə əŋ Rawma aka, abə gula ŋga mbiŋ mə mba mbeh səku, wucum ŋga lawlaw halla, mbeh kwata ley məc. 3Əŋ hedi səndawl tə sewje iyi mə zlim labara tə Yesu ta seh, a ləɓ hedi mə ɗal yawa dakayta tə Yahuda iyi əŋ kelek Yesu, ley ɗəpahaw amba mə ndaha ley mbəl gula ŋga ta. 4Hedi iyi ta i gwaraha əŋ kelek Yesu, ɓa, i jaŋ ndəra ŋgas mbeh səku, i zlapaŋgu, i zla: «Hedi wa, a kəlim seh, hwa təru, 5məŋgəvday a kəmba hedi takwa iyi, ar mbiŋ mə ləmanakwa biŋ kə ɗal mbuh əŋ Bizlaf.» 6Abə dawaŋ ta izey, Yesu a nda abə tata. I mbeh kwata ley gwar əŋ ge tə hedi səndawl tə sewje iyi ta, a ləɓ maday ŋga iyi əŋ kelek Yesu amba i zlapaŋgu: «Bay Bayta, hwa mba i təɓəlaha səku ba, məŋgəvday sa kəhwas tiɗe hwa təɗaha əŋ ge na seh halla. 7Məŋgəvday a ɗek, sa gər seh sa abə talaŋ na, sa kəhwas ley ndaha a ma təkwa seh halla. Ama, zlap ma ntaɗ dap, gula na a mbəl za. 8Sa zlapah mənaŋ wa seh, məŋgəvday sa wa, sewje səndawl tə a talaŋ na iyi aka, baha, sa səndawl a talaŋ sewje məzəwindi iyi bahayim. Əŋgah sa zlapaŋ əŋ hedi ntaɗ əŋ faŋw tə sewje na iyi wa: “Nda”, a nda za. Əŋgah sa zlapaŋ əŋ sewje məzəwindi: “Ndaha”, a ndaha za. Əŋgah sa zlapaŋ əŋ gula na: “Ɗal mənaŋ wa”, a ɗalu.» 9Əŋ Yesu mə zlim ma ta seh, kəsəbaŋgu mbeh səku. A buw nje kəɗi a hedi makwas mə ziberʉ iyi, a zlapaŋta, a zla: «Sa kəzlapaheni məndiwiŋ, kwa əŋ hayak tə Israyila iyi, sa kəlim hedi mə kuw ma na mənaŋ wa seh halla.» 10Abə dawaŋ ta, hedi maləɓaha iyi sey, i ziŋ tata əŋ ge tə hedi səndawl tə sewje iyi, i ndaha i lim gula sey, kəmbəl cuza.
Yesu a garaha mbu tə wala məce əŋ məc
11Abə dawaŋ ta, Yesu a nda əŋ berne i mə ɗafaŋ ma Nayiŋ. Gula ŋga iyi abə hedi makwas iyi i kənda abə mbiŋ. 12Əŋ mbiŋ mbeh kwata ley təɗ əŋ berne ta seh, i gbam talaŋ abə hedi iyi i kədaha məce tə mbu ley pəs. Ar mbu malay tə wala məce. Hedi tə wuta iyi ta mbeh səku i kəlaha wala ta. 13Əŋ Bay Bayta mə lim wala ta seh, kəɗalaŋ nje həhər za mbeh səku, a zlapaŋgu, a zla: «Dak nəf, hwa mba i haŋ səku!» 14Abə dawaŋ ta, a kərəɗ, a ges ndəra a ɓəɓele i mə ɓətaha məce tə a ɗek sey. Ɓa, hedi mə ɓətaha məce iyi ta i gar. Yesu a zlapaŋgu, a zla: «Zaray gula, sa kəzlapah: Garaha!» 15Mbu maməc sey a garaha, a nja i nja, ɓa, a mar ley zlap. Yesu a vəlaŋgu əŋ mama ŋga. 16Hedi iyi fuk i kəhar za, i kələndəŋ za, i kəhəmən Bizlaf, i zlap, i zla: «Eci, hedi mə giz ma abə miya tə Bizlaf səndawl kəndaha za əŋ faŋw takwa.» I zlap baha, i zla: «Bizlaf kəndaha za ley gər hedi ŋga iyi.» 17Hedi tə əŋ hayak tə Yahudiya iyi fuk abə tə əŋ hayak məzəwindi iyi tə abə bəra iyi fuk, i kəzlim labara tə məsəkəŋ Yesu mə ɗal wa za.
Yahwana mə ɗal batem a ləɓ gula ŋga iyi bək əŋ kelek Yesu
(Matta 11:2-19)
18Gula tə Yahwana iyi i gizeŋ məsəkəŋ Yesu mə ɗal iyi wa fuk əŋ bay tata. Ɓa, Yahwana mə ɗal batem a ɗafaŋta ma əŋ gula ŋga iyi bək əŋ faŋw tata, 19a ləɓta əŋ kelek Bay Bayta ley ɗəpahaw: «Hwa seh, hwa Almasihu hedi mə nda i ndaha ley reh hedi iyi sey vaw? Aka səku, nini gəbar hedi par vaw?» 20Ɓa, i nda. I gwar əŋ kelek Yesu, i zlapaŋgu, i zla: «Yahwana mə ɗal batem mə ləɓanini əŋ kelek təkwa ley ɗəpah: “Hwa seh, hwa Almasihu hedi mə nda i ndaha ley reh hedi iyi sey vaw? Aka səku, nini gəbar hedi par vaw?”» 21Əŋ mbamba, Yesu kəmbəl hedi mə dal iyi mbeh səku, kwa əŋ məc par par iyi fuk, kəgam mimiɗ madawar tə əŋ talaŋ tə hedi iyi mbeh səku, baha, kərəzaŋta nje tə hedi wuluf iyi mbeh səku. 22Abə dawaŋ ta, a ziŋgeŋta zlap əŋ mələɓ tə Yahwana mə ɗal batem iyi sey, a zla: «Hi nda i gizeŋ əŋ Yahwana ta, məsəkəŋ heni mə lim tə abə nje təheni, heni mə zlim tə abə zləm təheni. Hi zlapaŋ seh: “Hedi wuluf iyi i kəlim nje, hedi məslewslew iyi i kənda lawlaw abə ŋgas tata iyi, hedi kwalkwala iyi i kəbaŋ cuza, mədəgəzləm iyi i kəzlim zləm, hedi maməc iyi i kəgaraha əŋ faŋw tə hedi maməc iyi, hedi məstakwaŋ iyi i kəzlim Labara Səntaŋ Lawayaŋ.” 23Nja səntaŋ aka əŋ hedi kəyak ley kuw ma na halla.»
Yesu a zlap a talaŋ Yahwana mə ɗal batem
(Matta 11:7-11)
24Abə dawaŋ tə mələɓ tə Yahwana iyi i cu tata seh, Yesu a mar ley zlap a talaŋ Yahwana mə ɗal batem əŋ hedi iyi mbeh səku tə a kelek ŋga iyi, a zlapaŋta, a zla: «Heni mə nda əŋ təp damu mba seh, i gəraha seh mey? Wuruf mimiɗ mə huɓəl iyi vaw? Mənaŋ mba səku. 25Ayaw, kaa, heni nda i gəraha seh izey mey? Hedi mə ndək rukut səntaŋ a wucum vaw? Ama hedi mə ndək rukut səntaŋ tə dala iyi a wucum seh, i mə nji əŋ zahay a ge bay iyi. 26Hi nda i gəraha seh izey mey? Hedi mə giz ma abə miya tə Bizlaf vaw? Ayaw, ar mbiŋ, sa kəzlapaheni: Məndiwiŋ, a day hedi mə giz ma abə miya tə Bizlaf. 27Məŋgəvday Yahwana ta seh, ar hedi, ma mawuzlel tə əŋ Ɗerewel tə Bizlaf mə zlap tə a talaŋ ŋga, a zla:
“Ehe, sa kələɓ mələɓ na a ma təkwa,
ley ɗiyah kataf a ma təkwa.”»
28Yesu a zlapaŋta baha, a zla: «Sa kəzlapaheni: Əŋ faŋw tə hedi mambuwaha iyi fuk, kwa hedi mə day Yahwana mə ɗal batem abə səndawl seh halla. Ama hedi mekedek tə əŋ Bay tə Bizlaf seh, hedi ta pay day a Yahwana mə ɗal batem. 29Hedi tə a namba iyi fuk abə hedi mə cakal budu iyi i mə zlim ma iyi ta seh, i kəsəŋ za Bizlaf seh, ar hedi mə ɗal məsəkəŋ tə abə kataf ta. Məŋgəvday a ɗek, i ndaha əŋ kelek Yahwana amba a ɗalaŋta batem. 30Ama Farisa iyi abə metir tə ma majaw iyi i kəkuw məsəkəŋ Bizlaf mə mba əŋ tata seh halla, məŋgəvday i kəmba Yahwana mə ɗal batem a ɗalaŋta batem səku.»
31Yesu a zlapaŋta ma par baha, a zla: «Sa nda i sla hedi tə jemere iyi wa seh, abə viyey? Tata wa seh, mənaŋ viyey? 32Tata mənaŋ wuziyi manja tə əŋ lay kə kwas hedi iyi, i kəjaŋta varay əŋ dakayta iyi, i zla: “Nini kəmbizeheni sləlam za, ama heni kəzlay halla. Nini kəjaheni dərif məce za, ama heni kəhaŋ halla.” 33Məŋgəvday Yahwana mə ɗal batem kəndaha za, a kəzəm wuda mənaŋ hedi məzəwindi iyi səku, a kəsa mavu səku, ama hi zla: “Mbiŋ seh, abə mulula əŋ talaŋ.” 34Mbu tə Hedi kəndaha za, a kəzəm məsəkəŋ, a kəsa məsəkəŋ mənaŋ hedi məzəwindi iyi. Ama hi zla: “Hi gər hedi wa, a wulək seh, sey ley zəm məsəkəŋ abə ley sa mavu əŋ dəməs ŋga dap. Baha, mbiŋ seh, ar maday tə hedi mə cakal budu iyi abə hedi mə ɗal hem iyi.” 35Ama burŋguzl tə Bizlaf seh, i səŋgu delele seh kəɗi a hedi iyi i mə kuw ma ta.»
Wala a mbaɗ ɓurdi a Yesu
36Lə Farisa məzəwindi aka, a ɗafaŋ ma əŋ Yesu əŋ ge ŋga ley zəm wuda. Yesu a nda əŋ ge hedi ta, ɓa, i nja ley zəm wuda. 37Əŋ berne ta, wala aka, a kəɗal hem təday. A zlim Yesu mbə a ge lə Farisa ta, a kəzəm wuda. Ɓa, a nda abə ŋgəfa mahaf tə abə ɓurdi a ndəra əŋ ge hedi ta. Ŋgəfa tə nvəŋ mavərək miya tə ŋgəfa ta «albatər.» 38A gar a dawaŋ Yesu mbehmbeh abə ŋgas ŋga iyi. A haŋ ha məseleŋ a zləv a ŋgas tə Yesu. Ɓa, a takwaɗaŋta abə bujuguɗ tə talaŋ ŋga, a məl ŋgas iyi ta, a səməɗaŋta. Ɓa, a mbaɗaŋ ɓurdi a ɗek. 39Əŋ lə Farisa mə ɗafaŋ ma əŋ Yesu ley zəm wuda sey, a gər məsəkəŋ wala mə ɗal wa, a wulək əŋ nəf ŋga, a zla: «Əŋgah hedi wa, ar hedi mə giz ma abə miya tə Bizlaf məndiwiŋ seh, a səŋ wala mə ges tə abə mbiŋ wa za, ar wala tə abə hem.» 40Abə dawaŋ ta izey, Yesu a ɓət zlap, a zlapaŋ əŋ lə Farisa ta, a zla: «Simaŋw, sa mba i zlapah ma ntaɗ.» Simaŋw a ziŋgeŋ zlap, a zla: «Metir, zlap maa.» 41Yesu a zlapaŋgu, a zla: «Hedi iyi bək aka, i ɓət duwa a ndəra hedi. Hedi ntaɗ a ɓət gabal temere juɓum, hedi məzəwindi a ɓət gabal ndəra juɓum. 42Ama əŋ faŋw tata bək tata iyi wa, i gula i mineŋ duwa ta səku. Mənaŋ wa, hedi ta yak, a yakaŋta duwa ta. Əŋ tata bək tata iyi wa seh, mə nda i mbaza mbeh səku seh viyey?» 43Simaŋw a ziŋgeŋ zlap, a zla: «Sa wulək seh hedi mbiŋ mə yakaŋ duwa sə mbeh səku mba.» Ɓa, Yesu a ziŋgeŋ zlap, a zla: «Ayaw məndiwiŋ, ar mbiŋ.» 44Abə dawaŋ ta, ɓa, Yesu a buw nje kəɗi a wala sey, a zlapaŋ əŋ Simaŋw, a zla: «Hwa kəgər wala wa səku vaw? Sa ndaha seh əŋ ge təkwa, ama hwa kəvəlaka yim ley baŋ ŋgas iyi halla. Ama mbiŋ seh, kəbaŋgaka ŋgas na iyi za abə haŋ ŋga, kətakwaɗakta za abə bujuguɗ tə talaŋ ŋga iyi. 45Hwa kəkuwaka abə nəf ntaɗ ha abə səməɗ wucum seh halla, ama mbiŋ, mar sa mə ndaha əŋ ge təkwa, kəyak ley səməɗaka ŋgas iyi seh halla. 46Hwa kəmbaɗaka mel mə njif səntaŋ a talaŋ na halla, ama mbiŋ seh, kəmbaɗaka ɓurdi za a ŋgas na iyi. 47Məŋgəvday a ɗek, sa zlapah mənaŋ wa seh: Mba wucum ŋga sə mbeh səku wa, kəgiz hem ŋga sə mbeh səku iyi wa i mə beŋgi za. Ama əŋ hedi, i mə baŋgaŋ hem ŋga sə kʉsit, mba wucum ŋga bahayim mekedek.» 48Abə dawaŋ ta izey, Yesu a zlapaŋ əŋ wala sey, a zla: «Hem təkwa iyi i mə beŋgi za.» 49Hedi mə zəm wuda tə abə mbiŋ iyi i mar ley wulək əŋ faŋw tata, i zla: «Ar viyey? Mə gula i baŋ hem tə hedi iyi wa!» 50Ama Yesu a zlapaŋ əŋ wala sey, a zla: «Kuw ma təkwa kəreheh za. Nda təkwa abə zahay!»
ទើបបានជ្រើសរើសហើយ៖
Luka 7: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
