Luka 6
6
Yesu mə sla a pis kə yip
(Matta 12:1-8; Markus 2:23-28)
1Əŋ pis kə yip məzəwindi aka, Yesu abə gula ŋga iyi i kətaŋ kəɗi əŋ lay tə ndəri alkamari. Gula ŋga iyi i ŋga talaŋ tə ndəri alkamari ta, i vərkəɗu abə ndəra tata, ɓa, i ɓamu. 2Farisa məzəwindi iyi i zlapaŋta, i zla: «Hi ɗal məsəkəŋ ma majaw mə taku ley ɗal əŋ pis kə yip wa seh, məŋgəvday a mey?» 3Yesu a ziŋgeŋta zlap, a zla: «Heni kəjeŋge ma mawuzlel tə əŋ Ɗerewel tə Bizlaf, məsəkəŋ bay Dawuda abə hedi ŋga iyi i mə ɗal əŋ mətis a kəjata seh halla vaw? 4Kətəɗ za əŋ biŋ tə Bizlaf, kəɓət peŋ mavəl əŋ Bizlaf za, ɓa, a zəmu, a vəlaŋta əŋ hedi ŋga iyi bahayim. Ama nakwa iyi kəsəŋ peŋ ta seh, ma majaw tə əŋ ɗerewel tə Musa kəvəl kataf əŋ hedi iyi fuk ley zəmu seh halla, sey əŋ hedi mə ɗal kukus əŋ Bizlaf iyi dap.» 5Yesu a zlapaŋta baha, a zla: «Mbu tə Hedi mə sla a pis kə yip.»
Yesu a ɗiyaŋ ndəra maməc tə hedi əŋ pis kə yip
(Matta 12:9-14; Markus 3:1-6)
6Əŋ pis kə yip məzəwindi aka, Yesu a təɗ əŋ biŋ kə ɗal mbuh əŋ Bizlaf, ɓa, a sərək hedi iyi. Əŋ biŋ ta, hedi məzəwindi aka ndəra ŋga tə zəma kəməc za. 7A namba, metir tə ma majaw iyi abə Farisa iyi i kəzlel Yesu abə dak wucum ley gəru a mbəl hedi za əŋ pis kə yip kəvah, amba i lim zlap ley vəlaŋ hem. 8Ama Yesu kəsəŋ wulək tata cuza. A zlapaŋ əŋ hedi ndəra maməc sey, a zla: «Garaha, gar a lay wa əŋ faŋw tə hedi iyi fuk.» Hedi ta a garaha, deŋ! a gar. 9Ɓa, Yesu a zlapaŋta, a zla: «Sa ɗəpaheni: Ma majaw a vəl kataf əŋ pis kə yip seh, ley ɗal seh mey? Ley ɗal məsəkəŋ səntaŋ vaw, aka səku ley ɗal məsəkəŋ madawar vaw? Ɓa, ley reh hedi əŋ məsəkəŋ madawar vaw, aka səku ley ja hedi vaw?» 10Yesu a gər hedi iyi ta ntaɗ ntaɗ fuk, ɓa, a zlapaŋ əŋ hedi ndəra maməc sey, a zla: «Ɗefehe ndəra təkwa ta.» Hedi wa, ɗef, a ɗefehe ndəra ŋga ta. Ndəra ŋga ta, mbaɗ ŋga əŋ səntaŋ. 11Ama metir tə ma majaw iyi abə Farisa iyi nəf tata kədəmaŋta za mbeh səku, amba i ɗal yawa əŋ faŋw tata, i zla: «Nakwa iyi nda i ɗalaŋ əŋ Yesu wa seh, viŋgey?»
Yesu a may mələɓ ŋga iyi wam a meɗek bək
(Matta 10:1-4; Markus 3:13-19)
12Əŋ waŋ iyi ta mba, Yesu a nda əŋ wuzum ley ɗalaŋ mbuh əŋ Bizlaf. A namba njaɗu njaɗu a kəɗalaŋ mbuh əŋ Bizlaf. 13Əŋ lay mə daŋgaha daŋ, ɓa, a ɗafaŋta ma əŋ gula ŋga iyi əŋ kelek ŋga, a cam hedi iyi wam a meɗek bək əŋ faŋw tata, a ɗiyaŋta miya mələɓ iyi. 14Ehe, miya tə mələɓ iyi ta: Simaŋw, a ɗiyaŋ miya baha Piyer, abə zliŋgeŋ Andəre, Yakuba, Yahwana, Filip, Bartawlawme, 15Matta, Tawmas, Yakuba mbu tə Alfa, Simaŋw, i mə ɗafaŋ ma hedi mə mba hayak ŋga. 16Yahuda mbu tə Yakuba abə Yahuda Iskariyawt hedi mə nda i ber Yesu əŋ ndəra məsəgər ŋga iyi.
Yesu a kəsərək hedi iyi mbeh səku, a kəmbəl hedi mə dal iyi
(Matta 4:23-25)
17Abə dawaŋ ta, Yesu a bəreŋgehe abə tata a wuzum, a gar a palah bay, gula ŋga iyi mbeh səku liŋ hedi iyi mbeh səku bahayim i mbə a namba. Hedi iyi ta i ndaha mar tə əŋ hayak tə Yahudiya iyi fuk, abə tə əŋ Urusalima iyi liŋ hedi dakayta iyi bahayim i ndaha kəɗi meɗek lakwat tə hayak tə Tirʉs abə Sidaŋw. 18I ndaha ley zlim ma ŋga, amba a mbəlta əŋ məc tata iyi. Hedi mimiɗ tə abə ndəra dəlay tə əŋ talaŋ mə zləŋgaŋta takwaŋ iyi i kəndaha za bahayim, i kəmbəl za. 19Hedi iyi fuk i kəpələk ley ges abə mbiŋ, məŋgəvday fagay tə əŋ wucum ŋga, a kətəɗaha ley mbəl hedi iyi fuk.
Hedi manja səntaŋ iyi abə hedi tə əŋ tuwah iyi
(Matta 5:1-12)
20Abə dawaŋ ta, Yesu a gər gula ŋga iyi, a zlapaŋta, a zla:
«Nja səntaŋ aka əŋ heni, hedi məstakwaŋ iyi
məŋgəvday Bay tə Bizlaf mbə əŋ heni.
21Nja səntaŋ aka əŋ heni, hedi mətis mə jata mənjawa iyi,
məŋgəvday Bizlaf a gwaɗaheni za.
Nja səntaŋ aka əŋ heni, hedi mə haŋ mənjawa iyi,
məŋgəvday heni ɓas za.
22Nja səntaŋ aka əŋ heni, əŋgah hedi iyi i kəmbalaheni səku, i kəgamaheni za əŋ faŋw tata, i kəraheni, i kəzlap ma madawar a talaŋ təheni məŋgəvday Mbu tə Hedi.
23Hi səsəm əŋ waŋ ta mba, hi mbir abə səsəm, məŋgəvday Bizlaf a mineheni muwurɓay tə kəzəɗ təheni za mbeh səku a wuzlaf, məŋgəvday mənaŋ mba bahayim, dide tə dide tata iyi i kəzləŋgaŋta takwaŋ za əŋ hedi mə giz ma abə miya tə Bizlaf iyi zlezle.
24Ama tuwah aka əŋ heni, hedi tə abə məsəkəŋ iyi,
məŋgəvday heni kəlim səntaŋ təheni kwata.
25Tuwah aka əŋ heni, hedi magwaɗ mənjawa iyi,
məŋgəvday mətis a jaheni za.
Tuwah aka əŋ heni, hedi mə ɓas mənjawa iyi,
məŋgəvday hi nja za əŋ tuwah, hi haŋ za.
26Tuwah aka əŋ heni, əŋgah hedi iyi fuk i kəhəmənaheni mənjawa,
məŋgəvday mənaŋ mba bahayim, dide tə dide tata iyi i mə ɗalaŋta əŋ hedi mə giz ma məndiwiŋ səku abə miya tə Bizlaf iyi.»
Hi mba məsəgər təheni iyi
(Matta 5:38-48; 7:12a)
27«Ama sa kəzlapaheni, heni mə teheke zləm iyi: Hi mba məsəgər təheni iyi, hi ɗalaŋta məsəkəŋ səntaŋ əŋ hedi mə ŋgələzaheni a nje səku iyi. 28Hi pireŋta ma əŋ hedi mə gayaheni iyi. Hi ɗalaŋ mbuh əŋ Bizlaf məŋgəvday hedi iyi i mə zlap ma madawar tə a talaŋ təheni iyi. 29Əŋgah hedi kətawah za əŋ bəra zləm ntaɗ, buwaŋ kəv məzəwindi baha. Əŋgah hedi a ɓətah garawal təkwa, hwa mba i taku ley ɓət ɗeŋkəce təkwa səku baha. 30Kwa viyey mə ɗəpah məsəkəŋ, vəlaŋgu. Əŋgah hedi kəɓətah məsəkəŋ təkwa za, hwa mba i ɗəp məsəkəŋ ta səku. 31Hi ɗalaŋta məsəkəŋ səntaŋ əŋ hedi iyi mənaŋ heni mə mba, i mə ɗalaheni məsəkəŋ səntaŋ bahayim#6:31 Rawma iyi 13:8-10..»
32«Əŋgah hi mba hedi mə mbalaheni iyi dap seh, heni gəbar sʉse seh vitikey? Kwa hedi mə ɗal hem iyi bahayim i kəmba hedi mə mbata iyi. 33Əŋgah hi kəɗalaŋta məsəkəŋ səntaŋ əŋ hedi mə ɗalaheni məsəkəŋ səntaŋ iyi dap seh, heni gəbar sʉse seh, vitikey? Kwa hedi mə ɗal hem iyi i kəɗal mənaŋ mba bahayim. 34Əŋgah hi vəl duwa əŋ hedi iyi, heni mə wulək a tata i gula i ziŋgeheniza za dap seh, heni gəbar sʉse seh, vitikey? Kwa hedi mə ɗal hem iyi i kəvəl duwa əŋ hedi mə ɗal hem iyi amba a wara i ziŋgeŋta mənaŋ mba bahayim. 35Ama heni seh, hi mba məsəgər təheni iyi, hi ɗalaŋta məsəkəŋ səntaŋ, hi mba i ɗalaŋta məsəkəŋ səntaŋ əŋ hedi iyi ley lim məsəkəŋ a ndəra tata səku. Hi lim muwurɓay tə kəzəɗ təheni za mbeh səku, hi mbaɗ za əŋ wuziyi tə Bizlaf iyi tə wuzlaf, məŋgəvday mbiŋ seh, ar Bizlaf səntaŋ əŋ hedi mə səŋ ley ɗal sʉse səku iyi abə əŋ hedi sə lem iyi. 36Hi mbaɗ əŋ hedi mə səŋ nje həhər a hedi iyi mənaŋ Baba Bizlaf təheni mə səŋ nje həhər a hedi iyi.»
Hi mba i gər hem tə hedi iyi səku
(Matta 7:1-5)
37Yesu a zlapaŋta baha, a zla: «Hi mba i mbaɗ əŋ hedi mə mbəzl ma tə hedi dakayta iyi səku, Bizlaf bahayim a mbəzlaheni ma halla. Heni mba i vəlaŋta hem əŋ hedi iyi səku, Bizlaf a vəlaheni hem halla bahayim. Hi yakaŋta hem tə hedi iyi, Bizlaf bahayim a yakaheni hem təheni za. 38Hi vəl məsəkəŋ əŋ hedi iyi, Bizlaf a vəlaheni məsəkəŋ za: a nda i kʉyaheni za əŋ jiba səndawl tə rukut təheni məsəkəŋ masla səntaŋ, majəjək, magiŋges lawlaw haf, ha a kʉyaha əŋ teyek. Məsəkəŋ kə sla məsəkəŋ heni mə ɓət ley sla məsəkəŋ tə abə mbiŋ mba, i nda i slaheni məsəkəŋ abə mbiŋ bahayim.»
39Yesu a zlapaŋta abə ma marərək baha, a zla: «Hedi wuluf a gula i ŋgasl hedi wuluf za vaw? I ndəv bək tata za əŋ jiɓ. 40Hedi mə sərək a day hedi mə sərəku seh halla. Ama əŋgah kəcukwaɗ sərək ŋga za lawlaw seh, a mbaɗ za mənaŋ hedi mə sərəku.»
41Yesu a zlap abə ma marərək par baha, a zla: «Hwa kəgər heziɗ tə əŋ nje tə zliŋgeh, ama hwa seh, mpay səndawl mbə əŋ nje təkwa, hwa kəwulək a ɗek halla seh, məŋgəvday a mey? 42Mənaŋ viŋgey hwa nda i zlapaŋ əŋ zliŋgeh: “Zliŋmana, yak, sa kʉslekeh heziɗ tə əŋ nje təkwa za”, hwa maa, hwa kəgər mpay tə əŋ nje təkwa halla. Hwa hedi mə zlap ganaɗ sə bək bək, ɓət mpay tə əŋ nje təkwa za ndagwa, ɓa, hwa lim heziɗ tə əŋ nje tə zliŋgeh lawlaw.»
Mpay mə mbuw wuziyi səntaŋ iyi abə mpay mə mbuw wuziyi madawar iyi
(Matta 7:16-20; 12:33-35)
43Yesu a zlapaŋta baha, a zla: «Mpay səntaŋ a mbuw wuziyi madawar iyi seh halla, mpay madawar a mbuw wuziyi səntaŋ iyi seh halla. 44Kwa mpay vitikey i səŋgu seh a wuziyi ŋga iyi. I kəmbal wuziyi tə mədifsəkiɗ a mpay tə abə digeɗ səku. I kəmbal wuziyi tə zugwaɗ a mele səku. 45Hedi səntaŋ a kətəɗaha məsəkəŋ səntaŋ tə əŋ məsəkəŋ səntaŋ tə əŋ nəf ŋga iyi, hedi madawar a kətəɗaha məsəkəŋ madawar tə əŋ məsəkəŋ madawar tə əŋ nəf ŋga iyi. Məŋgəvday ma tə hedi mə zlap seh, a kətəɗaha məsəkəŋ magwaɗ tə əŋ nəf ŋga.»
Zlap a talaŋ ntaŋw tə biŋ iyi bək
(Matta 7:24-27)
46Yesu a zlapaŋta, a zla: «Heni ɗafaka ma “Bay Bayta, Bay Bayta”, ama heni kuw ley ɗal məsəkəŋ mənaŋ sa mə zlapaheni səku seh, məŋgəvday a mey? 47Hedi mə ndaha əŋ kelek na, mə zlimeke ma na, mə ɗal kəzəɗ abə mbiŋ, sa nda i gizeheniza, a gər seh, mənaŋ viyey. 48Sa nda i slaza abə hedi mə ləm biŋ. A ra jiɓ kpum! ha a kefeɗ, ɓa, a ɗiy manjaraf tə biŋ ta a ɗek. Əŋ waŋ məzəwindi vaŋ a zah, yim a ndaha ha tulək biŋ ta, ama kəhurumu halla, məŋgəvday biŋ ta, mə limi lawlaw a kefeɗ. 49Ama hedi mə zlimeke ma na, kəɗal kəzəɗ abə mbiŋ halla seh, sa nda i slaza abə hedi mə ləm biŋ a hayak luhuɓ, kwa kəra jiɓ ley ɗiy manjaraf ta halla. Əŋ waŋ məzəwindi vaŋ a zah, yim a ndaha tulək biŋ ta, mbehmbeh mba, biŋ ta, kərkətip! A hurum ŋga fuk.»
ទើបបានជ្រើសរើសហើយ៖
Luka 6: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
