Yahwana 6
6
Yesu a vəlaŋta məsəkəŋ kə zəm əŋ hedi iyi gabal juɓum
(Matta 14:13-21; Markus 6:30-44; Luka 9:10-17)
1Abə dawaŋ tə wa, Yesu a taŋ kəɗi əŋ kəv məzəwindi tə gaw tə Galili, i kəɗafaŋ ma baha talafay tə Tiberiyas. 2Hedi iyi mbeh səku i kəziberʉ, məŋgəvday hedi iyi i kəgər mazla mbiŋ mə ɗal iyi ley mbəl hedi mə dal iyi. 3Məŋgəvday a ɗek, Yesu a tap əŋ wuzum, a nja abə gula ŋga iyi a namba. 4Əŋ hala ta mba, gugway tə Yahuda iyi, i mə ɗafaŋ ma Paska mbeh kwata. 5Yesu a kaf nje seh, a lim hedi makwas iyi mbeh səku i kəndaha əŋ kelek ŋga. A zlapaŋ əŋ Filip, a zla: «Nakwa iyi nda i səkəmaha peŋ ley vəlaŋta əŋ hedi iyi wa fuk ley zəm seh a tikey?» 6A zlapaŋ əŋ Filip mənaŋ wa seh, ar a mba i təlu, məŋgəvday Yesu kəsəŋ məsəkəŋ mbiŋ mə nda i ɗal cuza. 7Filip a ziŋgeŋ zlap, a zla: «Kwa abə dala tə malaway mawaɗ temere bək seh, nakwa gula i səkəmaha peŋ mbeh səku amba kwa viyey a lim mbizek mbizek seh halla.» 8Gula ntaɗ tə əŋ faŋw tə gula ŋga iyi, Andəre, zliŋgeŋ tə Simaŋw Piyer, a zlapaŋgu, a zla: 9«A nawa, mbu muwul mekedek aka, abə peŋ juɓum liŋ kəlif bək, ama əŋ hedi sə mbeh səku iyi wa seh, a nda i hwasaŋ taŋ əŋ viyey?» 10Yesu a zla: «Hi zlapaŋta əŋ hedi iyi wa fuk i mə nja.» Ŋgusawf mbeh səku a lay ta. Ɓa, hedi iyi i nja, muwul iyi a ɗal mbeh kwata gabal juɓum. 11Abə dawaŋ ta, Yesu ɓət a ɓət peŋ iyi sey, a ɗalaŋ sʉse əŋ Bizlaf, ɓa, a ɓizekeŋta əŋ hedi tə a namba iyi. A ɗal mənaŋ mba baha abə kəlif, a vəlaŋta kwa əŋ viyey mənaŋ tata mə mba. 12Əŋ tata i kəgwaɗ kwata seh, Yesu a zlapaŋta əŋ gula ŋga iyi, a zla: «Hi cakal mayak iyi ta amba kwa i mə mba i gay tə haya səku.» 13Gula ŋga iyi ta i cakal mayak tə peŋ juɓum hedi iyi i mə zəm sey, kəgwaɗ gadakar iyi wam a meɗek bək. 14Əŋ hedi iyi i mə lim mazla Yesu mə ɗal wa, i zla: «Məndiwiŋ, hedi wa, ar hedi mə giz ma abə miya tə Bizlaf, mə nda i ndaha əŋ məŋhayak.» 15Ama Yesu a kəsəŋ i ndaha za ley məlu abə fagay amba ley ɗiyu əŋ bay. Abə dawaŋ ta izey, a nda ŋga əŋ wuzum baha, mbiŋ taataɗ ŋga.
Yesu a nda a talaŋ yim abə ŋgas
(Matta 14:22-33; Markus 6:45-52)
16Əŋ məcukahw kwata seh, gula tə Yesu iyi i bəreŋgehe əŋ meɗek gaw. 17I tap əŋ kambuwal ley taŋ gaw, i nda tata kəɗi əŋ Kafarnahum. Njaɗu kəɗal kwata, Yesu kəndaha əŋ kelek tata halla ndagwa. 18Yim tə əŋ gaw a kəhuɓəl, məŋgəvday mimiɗ a kəɗal abə fagay. 19Əŋ gula iyi i mə kwaraha kambuwal a ɗal kilewmetir juɓum, aka səku ŋkuh seh, i lim Yesu a kəkərəɗaha əŋ kelek kambuwal, a kənda a talaŋ yim abə ŋgas. I kələndəŋ za. 20Ama Yesu a zlapaŋta, a zla: «Ar sa, hi mba i ləndəŋ səku.» 21I mba i ɓətu əŋ kambuwal, ama mbehmbeh mba, kambuwal kəgwar za əŋ bəra zəzay kəɗi əŋ kəv tata mə mba i nda.
Hedi iyi i kəpələk Yesu
22Garaha kafa ta seh, hedi manja iyi fuk kəɗi əŋ kəv məzəwindi tə gaw, i səŋ kenek seh kambuwal ntaɗ mayak aka. Hedi iyi i kəsəŋ Yesu kətap əŋ kambuwal abə gula ŋga iyi seh halla, ama i cu tata taataɗ tata. 23Ama kambuwal məzəwindi iyi i ndaha kəɗi berne tə Tiberiyas, i gwaraha mbehmbeh abə lay tata i mə zəm peŋ sey, əŋ mbamba seh, Bay Bayta kəɗalaŋ sʉse cuza əŋ Bizlaf məŋgəvday a ɗek. 24Əŋ hedi makwas iyi i kəlim kwa Yesu a namba halla, kwa gula iyi a namba halla seh, i tap əŋ kambuwal iyi ta i nda tata əŋ Kafarnahum ley pələkaha Yesu.
Yesu seh, ar məsəkəŋ kə zəm mə vəl mədəŋcur
25I lim Yesu kəɗi əŋ kəv məzəwindi tə gaw seh, ɓa, i ɗəpu, i zla: «Metir, hwa gwaraha əŋ nawa seh a pipey?» 26Yesu a ziŋgeŋta zlap, a zla: «Ayaw, sa kəzlapaheni məndiwiŋ, heni kəpələkaka wa seh, ar məŋgəvday heni mə lim mazla sa mə ɗal iyi wa səku, ama məŋgəvday heni mə zəm məsəkəŋ ha gwaɗ wa. 27Hi mba i ɗal kəzəɗ məŋgəvday wuda mə nda i gay tə əŋ məŋhayak wa səku, ama hi ɗal kəzəɗ məŋgəvday wuda mə nda i nja mbeh səku, mə vəl nje yim tə mədəŋcur mə cukwaɗ səku. Wuda ta seh, Mbu tə Hedi a nda i vəlaheniza, məŋgəvday Baba, Bizlaf kəɗalaŋ lamba tə mazla ŋga za a mbiŋ.» 28Abə dawaŋ ta, i ɗəpu, i zla: «Nini nda i ɗal amba ley cukwaɗ kəzəɗ iyi Bizlaf mə mba wa seh mey?» 29Yesu a ziŋgeŋta zlap, a zla: «Kəzəɗ Bizlaf mə mba seh, heni kuw ma tə hedi mbiŋ mə ləɓahaw.» 30I ɗəpu izey, i zla: «Mazla vitikey, hwa mə gula i ɗalu amba nini gəru, nini kuwah ma wa? Hwa nda i ɗal seh kəzəɗ vitikey? 31Zlezle seh, dide tə dide takwa iyi i kəzəm manu#6:31 Manu, mənaŋ zlap ta seh, ar məsəkəŋ kə zəm mandaha tə wuzlaf. za əŋ təp damu, mənaŋ ma mawuzlel tə əŋ Ɗerewel tə Bizlaf mə zlap, a zla: “Kəvəlaŋta məsəkəŋ kə zəm mandaha tə wuzlaf za.#6:31 Jabura 78:24.”» 32Ama Yesu a ziŋgeŋta zlap, a zla: «Ayaw, sa kəzlapaheni məndiwiŋ, ar Musa mə vəlaheni məsəkəŋ kə zəm mandaha tə wuzlaf səku, ama, ar Baba na mə vəlaheni məsəkəŋ kə zəm cekcek mandaha tə wuzlaf. 33Məŋgəvday məsəkəŋ kə zəm tə Bizlaf ta seh, ar hedi mebəreŋgehe mar tə wuzlaf, a kəvəl mədəŋcur əŋ məŋhayak.» 34Abə dawaŋ ta, i zlapaŋgu, i zla: «Bay Bayta, vəlaheni məsəkəŋ kə zəm ta, a waŋ ta a waŋ ta.»
35Yesu a zlap baha, a zla: «Sa seh, sa məsəkəŋ kə zəm mə vəl mədəŋcur. Hedi mə ndaha əŋ kelek na seh, a kənda i zlim mətis halla səlak, baha, hedi mə kuw ma na seh, yim a kənda i jaza halla. 36Ama sa kəgizeheniza za, sa zla: Heni kəlimeke za, ama, abə mbiŋ ta fuk, heni kəkuw ma ta halla. 37Hedi Baba mə vəlaku fuk, a ndaha za əŋ kelek na. Hedi mə ndaha əŋ kelek na seh, sa kənda i kapza halla, 38məŋgəvday sa bəreŋgehe a wuzlaf seh ley ɗal məsəkəŋ mənaŋ sa mə mba səku, ama ley ɗal məsəkəŋ mənaŋ hedi mə ləɓaka mə mba. 39Ehe, məsəkəŋ hedi mə ləɓaka mə mba: Sa mba i kuɗəp kwa hedi ntaɗ əŋ faŋw tə hedi mbiŋ mə vəlakta iyi səku, ama sa nda i garahata əŋ məc əŋ cukwaɗ tə məŋhayak. 40Ehe, mba tə Baba na: Kwa viyey mə lim Mbu ta, mə kuw ma ŋga, a lim mədəŋcur mə cukwaɗ səku za, sa garahaw za əŋ məc, əŋ cukwaɗ tə məŋhayak.»
41Mar tə pis mba, Yahuda iyi i mar ley guŋgur ma#6:41 Luka 15:2. a talaŋ Yesu, məŋgəvday mbiŋ mə zlap, a zla: «Sa seh, ar məsəkəŋ kə zəm mebəreŋgehe tə wuzlaf.» 42I zlap, i zla: «Mbiŋ seh Yesu, mbu tə Yusufa səku vaw? Nakwa iyi kəsəŋ baba ŋga abə mama ŋga#6:42 Matta 13:55; Markus 6:3; Luka 4:22. səku vaw? Kaa, a zlap mənjawa, a zla: “Sa bəreŋgehe a wuzlaf”, seh viŋgey?» 43Yesu a ziŋgeŋta zlap, a zla: «Hi yak ley guŋgur ma əŋ faŋw təheni. 44Kwa hedi mə gula i ndaha əŋ kelek na seh halla, sey Baba mə ləɓaka wa mə ŋgaslahaw. Sa garahaza za əŋ faŋw tə hedi maməc iyi, əŋ pis tə məŋhayak mə nda i cukwaɗ. 45Hedi mə giz ma abə miya tə Bizlaf iyi i kəwuzlel za mənaŋ wa, i zla: “Hedi iyi fuk Bizlaf a sərəkta za#6:45 Esaya 54:13..” Kwa viyey mə zlim ma tə Baba, mə kuw sərək ta seh, a ndaha za əŋ kelek na. 46Mənaŋ zlap ta seh, kwa hedi ntaɗ mə lim Baba seh halla, sey hedi mə ndaha tə a kelek Bizlaf, mbiŋ taataɗ ŋga kəlim Baba za. 47Ayaw, sa kəzlapaheni məndiwiŋ: Hedi mə kuw ma seh, kəlim mədəŋcur mə cukwaɗ səku cuza. 48Sa seh, sa məsəkəŋ kə zəm mə vəl mədəŋcur. 49Zlezle seh, dide tə dide təheni iyi i kəzəm manu#6:49 Manu, mənaŋ zlap ta seh, ar məsəkəŋ kə zəm mandaha tə wuzlaf. za əŋ təp damu, ama abə mbiŋ ta fuk seh, i kəməc za. 50Ama kwa viyey mə zəm məsəkəŋ kə zəm mebəreŋgehe tə wuzlaf wa seh, a kənda i məc halla ba. 51Sa seh, sa məsəkəŋ kə zəm mə vəl mədəŋcur, mebəreŋgehe tə wuzlaf. Əŋgah hedi kəzəm məsəkəŋ kə zəm ta za seh, a nda i nja kwa a pipi a pipi. Məsəkəŋ kə zəm, sa mə nda i vəl ta wa seh, ar wucum na, sa mə nda i vəlu amba məŋhayak mə lim mədəŋcur.» 52A zlap iyi ta wa, Yahuda iyi i mar ley ɗal yawa abə fagay əŋ faŋw tata, i ɗəp, i zla: «Hedi wa, a nda i vəlanakwa wucum ŋga ley zəm seh viŋgey?» 53Yesu a zlapaŋta, a zla: «Ayaw, sa kəzlapaheni məndiwiŋ, əŋgah heni kəzəm wucum tə Mbu tə Hedi halla, əŋgah heni kəsa məmbəz ŋga halla seh, heni kənda i lim mədəŋcur əŋ heni seh halla. 54Hedi mə zəm wucum na, mə sa məmbəz na seh, kəlim mədəŋcur mə cukwaɗ səku cuza, sa garahaw za əŋ faŋw tə hedi maməc iyi əŋ cukwaɗ tə məŋhayak. 55Məŋgəvday wucum na seh, ar wuda cekcek, məmbəz na bahayim, ar məsəkəŋ kə sa cekcek. 56Hedi mə zəm wucum na, mə sa məmbəz na seh, mə jemi abə sa, sa bahayim, sa mə jemi abə mbiŋ. 57Mənaŋ Baba, hedi mə ləɓaka, mbə abə nje, sa mə nji məŋgəvday mbiŋ, mənaŋ mba bahayim, kwa viyey mə zəm wucum na seh, a nja za məŋgəvday sa. 58Ehe, məsəkəŋ kə zəm mebəreŋgehe tə wuzlaf. Ar mənaŋ məsəkəŋ kə zəm dide tə dide təheni iyi i mə zəmu mba səku. Tata seh i kəzəmu za, i kəməc tata za. Ama hedi mə zəm məsəkəŋ kə zəm ta seh, a nda i nja kwa a pipi a pipi.» 59Yesu a zlap ma iyi ta wa seh, əŋ mbiŋ a kəsərək hedi iyi əŋ biŋ kə ɗal mbuh əŋ Bizlaf a Kafarnahum.
Gula dakayta iyi i yak Yesu
60Əŋ gula tə Yesu sə mbeh səku iyi i mə teheŋ zləm wa seh, i zla: «Ma wa ɓirɓir. Mə gula i kuw ma ta wa seh viyey?» 61Ama Yesu kəsəŋ cuza gula ŋga iyi i guŋgur ma wa seh a ɗek, məŋgəvday a ɗek, a zlapaŋta, a zla: «Ma ta wa seh, a kədəmaheni nəf vaw? 62Əŋgah heni lim Mbu tə Hedi a kətap əŋ lay mbiŋ mə njaha zlezle seh, hi nda i ɗal viŋgey#6:62 Kəzəɗ tə Mələɓ iyi 1:9-11. izey? 63Ar Mimiɗ tə Bizlaf mə vəl mədəŋcur. Wucum tə hedi seh a gula i ɗal kwa mey səku. Ma sa mə zlapaheni wa seh, ar Mimiɗ sə Kweɗek abə mədəŋcur. 64Ama hedi dakayta iyi tə əŋ faŋw təheni i kəkuw ma halla.» Məŋgəvday a ɗek, mar tə əŋ mar ta, Yesu a kəsəŋ hedi mə nda i kuw ma ŋga iyi səku, baha, a kəsəŋ hedi mə nda i berʉ. 65Yesu a zlap baha, a zla: «Ehe, məŋgəvday a ɗek, sa kəzlapaheni za: “Hedi mə gula i ndaha əŋ kelek na seh halla, sey hedi Baba mə vəlaŋ kataf.”»
66Mar tə pis mba, gula ŋga iyi mbeh səku i ziŋ tata əŋ dawaŋ, i yak ley ziberʉ. 67Abə dawaŋ ta izey, Yesu a ɗəp gula ŋga iyi wam a meɗek bək, a zla: «Heni bahayim, hi kəmba i nda təheni səku vaw?» 68Simaŋw Piyer a ziŋgeŋ zlap, a zla: «Bay Bayta, nini nda i nda seh əŋ kelek vitey? Hwa abə zlap mə vəl mədəŋcur mə cukwaɗ səku. 69Nini seh, nini kəkuw ma za, nini kəsəŋ hwa seh hwa Hedi sə Kweɗek, maləɓaha tə ndəra Bizlaf#6:69 Matta 16:16; Markus 8:29; Luka 9:20..» 70Yesu a ziŋgeŋta zlap, a zla: «Ar sa mə mayaheni wam a meɗek bək wa fuk səku vaw? Ama hedi ntaɗ əŋ faŋw təheni seh, ar Iblisa.» 71A zlap mənaŋ wa seh a talaŋ Yahuda, mbu tə Simaŋw Iskariyawt, məŋgəvday Yahuda ta seh, ar hedi ntaɗ tə əŋ faŋw tə gula ŋga iyi wam a meɗek bək, mə nda i berʉ.
ទើបបានជ្រើសរើសហើយ៖
Yahwana 6: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
