Yahwana 7
7
Yesu mbə əŋ gugway tə biŋ meker iyi
1Abə dawaŋ tə wa, Yesu a kəpik əŋ hayak tə Galili, məŋgəvday a kəmba i nda əŋ hayak tə Yahudiya səku, məŋgəvday hedi səndawl tə Yahuda iyi i kəpələku ley ja. 2Əŋ mbamba, gugway tə Yahuda iyi i mə ɗafaŋ ma gugway tə biŋ meker iyi mbeh kwata. 3Zliŋgeŋ tə Yesu iyi i zlapaŋgu, i zla: «Gar təkwa za a nawa, nda əŋ hayak tə Yahudiya, amba gula təkwa iyi, tata bahayim i mə gər kəzəɗ hwa mə ɗal iyi. 4Kwa viyey mə mba hedi iyi i mə səŋgu seh, a mba i ɗal məsəkəŋ abə ɓah səku. Əŋ hwa kəɗal kəzəɗ iyi ta wa giz talaŋ təkwa a ma tə hedi iyi.» 5Məndiwiŋ ta seh, kwa zliŋgeŋ iyi ta abə talaŋ tata i kəkuwaŋ ma halla. 6Yesu a ziŋgeŋta zlap, a zla: «Pis na kəhwasaha halla ndagwa. Ama tə təheni seh, kwa pis vitikey fuk ləlaw diya. 7Məŋhayak a gula i mbalaheni səku seh halla, ama sa seh, məŋhayak a kəŋgələzaka a nje səku, məŋgəvday sa kəɗal sedewe a kəzəɗ tata madawar iyi fuk. 8Heni seh, hi nda əŋ gugway ta. Sa seh, sa nda halla, məŋgəvday pis na kəhwasaha halla ndagwa.» 9Abə dawaŋ tə mbiŋ mə zlapaŋta ma iyi ta wa seh, nja, a nja ka əŋ Galili.
10Ama əŋ zliŋgeŋ iyi i cu tata əŋ gugway sey, ɓa, a nda əŋ gugway ta bahayim, ama abə ɓah, kwa kəgizehe talaŋ ŋga seh halla. 11Hedi səndawl tə Yahuda iyi i kəpələku əŋ gugway ta, i kəɗəp, i zla: «Mbə a tikey?» 12Əŋ faŋw tə hedi makwas iyi, i kəzlap a talaŋ ŋga mbeh səku, i zla: «Mbiŋ seh, ar hedi səntaŋ.» Ama hedi məzəwindi iyi, i zla: «Mənaŋ mba səku, ar hedi mə bim hedi iyi ley kuɗəp.» 13Ama kwa hedi mə zlap a talaŋ ŋga ma nje hedi iyi seh halla, məŋgəvday hedi iyi fuk i kələndəŋ abə hedi səndawl tə Yahuda iyi.
Yesu a kəsərək hedi iyi əŋ biŋ tə Bizlaf, hedi makwas iyi i kəɗəp talaŋ tata, mbiŋ seh, ar Almasihu vaw?
14Əŋ reyta tə waŋ tə gugway#7:14 Gugway Gugway tə biŋ meker ta seh, a kəɗal waŋ dʉsəlʉɗ. iyi i kətaŋ kwata, Yesu a təɗ əŋ biŋ tə Bizlaf, ɓa, a mar ley sərək hedi iyi. 15Yahuda iyi i kəhar za, i ɗəp, i zla: «Mbiŋ kəjeŋge halla, a səŋ ma mawuzlel wa seh viŋgey#7:15 Matta 13:54; Luka 2:47.?» 16Yesu a ziŋgeŋta zlap, a zla: «Ma, sa mə sərək wa, a ndaha a ndəra na səku, ama a ndaha seh a ndəra hedi mə ləɓaka. 17Hedi kəɓət wulək za ley ɗal məsəkəŋ Bizlaf mə mba seh, a səŋ za əŋgah sərək na a ndaha a ndəra Bizlaf, aka səku əŋgah sa kəzlap a talaŋ na. 18Hedi mə zlap tə a talaŋ ŋga seh, a kəpələk səndawl əŋ talaŋ ŋga. Ama hedi mə pələk səndawl əŋ hedi mə ləɓahaw seh, a kəzlap zlap məndiwiŋ, bərəsl ma a ndəra ŋga seh halla. 19Zlezle seh, Musa kəvəlaheni ma majaw za səku vaw? Ama kwa hedi ntaɗ əŋ faŋw təheni mə ɗal kəzəɗ abə ma majaw ta seh halla. Hi pələk ley jaka seh məŋgəvday a mey?» 20Hedi makwas iyi i ziŋgeŋ zlap, i zla: «Hwa abə mimiɗ madawar əŋ talaŋ!#7:20 Matta 4:24. Mə pələkah ley jah seh viyey?» 21Yesu a ziŋgeŋta zlap, a zla: «Sa kəɗal kəzəɗ ntaɗ dap, heni fuk heni kəhar za. 22Musa kəvəlaheni ma majaw za ley zla viɗe, vəl kataf ta seh a mar abə Musa səku, ama a mar zlezle abə dide tə dide iyi. Heni seh, heni kəzla viɗe tə wuziyi muwul iyi əŋ pis kə yip. 23Əŋgah hi kəzla viɗe tə hedi əŋ pis kə yip seh, ar məŋgəvday heni mba i waŋgaŋ talaŋ əŋ ma majaw tə Musa, mənaŋ wa izey, heni kəzəm nəf a talaŋ na məŋgəvday sa mə mbəl wucum tə hedi fuk əŋ pis kə yip seh məŋgəvday a mey? 24Hi yak ley mbəzl ma a məsəkəŋ heni mə gər tə a nje, ama hi mbəzl ma abə kataf ta.»
25Hedi məzəwindi iyi tə əŋ Urusalima i kəzlap, i zla: «Wawa, ar hedi, i mə pələk ley ja sey səku vaw? 26Ehe, a kəzlap a ma tə hedi iyi, ama talaŋ habay takwa iyi, i kəzlapaŋ kwa mey seh halla, i kəsəŋza za məndiwiŋ mbiŋ seh, ar Almasihu vaw? 27Ama əŋ Almasihu mə nda i ndaha seh, hedi mə nda i səŋ a ndaha kəɗi əŋ lay vitikey seh halla, ama hedi wa seh, nakwa iyi kəsəŋ kəɗi əŋ lay mbiŋ mə ndaha.» 28Abə dawaŋ ta izey, Yesu a kəsərək hedi iyi əŋ biŋ tə Bizlaf, a kəzlapaŋta abə fagay, a zla: «Heni kəsəŋgaka, heni kəsəŋ əŋ lay sa mə ndaha. Sa kəndaha abə mazla na seh halla. Ama hedi mə ləɓaka wa, ar hedi sə delele. Mbiŋ seh, heni kəsəŋgu səku. 29Sa seh, sa kəsəŋgu məŋgəvday sa ndaha a kelek ŋga, mbiŋ mə ləɓaka.» 30Abə dawaŋ ta izey, i pələk ley məlu, ama kwa hedi mə ges ndəra a mbiŋ seh halla, məŋgəvday hala ŋga kəhwasaha halla ndagwa. 31Əŋ faŋw tə hedi makwas iyi ta, hedi iyi mbeh səku i kəkuw ma ŋga za, ɓa, i zlap, i zla: «Əŋ Almasihu mə nda i ndaha seh, a ɗal mazla mə day tə hedi wa za vaw?»
Hedi mə jəɗ biŋ tə Bizlaf iyi i pələk ley məl Yesu
32Farisa iyi i zlim hedi mə sisek ma iyi tə əŋ faŋw tə hedi makwas iyi a talaŋ Yesu. Abə dawaŋ ta izey, hedi səndawl iyi tə a talaŋ hedi iyi i mə ɗal kukus əŋ Bizlaf abə Farisa iyi i ləɓ hedi mə jəɗ biŋ tə Bizlaf iyi ley məlaha Yesu. 33Yesu a zlapaŋta, a zla: «Sa mbə abə heni tə nja mbizek ndagwa, ɓa, sa ziŋ na əŋ kelek hedi mə ləɓaka. 34Hi pələkaka za, ama heni limeke halla, məŋgəvday heni gula i nda əŋ lay sa mə nda i nda seh halla.» 35Yahuda iyi i kəɗəp wucum əŋ faŋw tata, i zla: «A nda i nda əŋ vey amba nakwa gula i limza səku wa? A nda i nda əŋ hayak tə Yahuda iyi mawʉweɗ tə əŋ faŋw tə lə Gərek iyi, amba ley daha sərək ŋga əŋ lə Gərek iyi vaw? 36Ma ta, mbiŋ mə zlap wa, a mba i zlap seh viŋgey, a zla: “Hi pələkaka za, ama heni limeke halla, məŋgəvday heni gula i nda əŋ lay sa mə nda i nda seh halla”?»
Maɗ ma tə waŋ tə gugway
37Maɗ ma tə waŋ tə gugway pay day a waŋ məzəwindi iyi. Əŋ waŋ ta mba, Yesu a gar, a zlap abə fagay, a zla: «Əŋgah hedi yim a kəju seh, mə ndaha əŋ kelek na ley su. 38Hedi mə kuw ma seh, mənaŋ ma mawuzlel tə əŋ Ɗerewel tə Bizlaf mə zlap, a zla: “yim mə vəl mədəŋcur a hiyaha za əŋ nəf ŋga.”» 39Yesu a zlap mənaŋ wa seh, a talaŋ Mimiɗ sə Kweɗek, hedi mə kuw ma ŋga iyi i lim Mimiɗ sə Kweɗek ta za. Əŋ mbamba, Mimiɗ sə Kweɗek mə tak vəl ndagwa, məŋgəvday Yesu kətap əŋ wuzlaf əŋ lay mbiŋ mə nda i nja əŋ səndawl ŋga seh halla ndagwa.
40Əŋ hedi iyi i mə zlim ma iyi ta wa seh, hedi məzəwindi iyi tə əŋ faŋw tə hedi makwas iyi i zlap, i zla: «Məndiwiŋ hedi wa, ar hedi mə giz ma abə miya tə Bizlaf.» 41Hedi məzəwindi iyi, i zla: «Ar Almasihu.» Hedi məzəwindi iyi baha, i zla: «Almasihu a ndaha za a Galili vaw? 42Ma mawuzlel tə əŋ Ɗerewel tə Bizlaf a kəzlap, a zla: “Almasihu a nda i təɗaha seh əŋ ntaŋw tə Dawuda, əŋ berne tə Baytilama, Dawuda mə nja tə ɗəməŋ” səku vaw?» 43Mənaŋ wa, hedi iyi i kəwuɗak za əŋ faŋw tata məŋgəvday Yesu. 44Hedi məzəwindi iyi tə əŋ faŋw tata i mba i məlu, ama kwa hedi ntaɗ mə ges ndəra a mbiŋ seh halla.
45Hedi mə jəɗ biŋ tə Bizlaf iyi sey i ziŋ əŋ kelek hedi səndawl iyi tə a talaŋ hedi iyi i mə ɗal kukus əŋ Bizlaf abə Farisa iyi, i zlapaŋta, i zla: «Heni kədahaw halla seh məŋgəvday a mey?» 46Hedi mə jəɗ biŋ tə Bizlaf iyi i ziŋgeŋta zlap, i zla: «Kwa hedi mə zlap mənaŋ wa seh halla səlak.» 47Farisa iyi i ɗəpta, i zla: «Heni bahayim heni kəyak talaŋ təheni ley bim vaw? 48Hedi ntaɗ tə əŋ faŋw tə talaŋ habay takwa iyi, aka səku əŋ faŋw tə Farisa iyi mə kuw ma ŋga seh, aka vaw? 49Sey hedi makwas iyi mba, tata i mə səŋ ma majaw tə Musa səku, ar hedi magay iyi!» 50Nikwademus, ar hedi ntaɗ əŋ faŋw tə Farisa tə a namba iyi, mbiŋ seh, kənda za əŋ kelek Yesu zlezle. A zlapaŋta, a zla: 51«Ma majaw takwa kəvəlanakwa kataf za ley mbəzl ma a talaŋ hedi mar nakwa iyi kəzlim ma ŋga a məsəkəŋ mbiŋ mə ɗal iyi halla ndagwa vaw?» 52I ziŋgeŋ zlap, i zla: «Hwa bahayim, hwa hedi tə Galili vaw? Gər lawlaw ma mawuzlel tə əŋ Ɗerewel tə Bizlaf, hwa lim kwa hedi ntaɗ mə giz ma abə miya tə Bizlaf mandaha mar tə əŋ Galili seh halla.»
Yesu abə wala mə ɓət wucum sifteleh a palah
53Abə dawaŋ ta, kwa viyey a nda ŋga əŋ ge ŋga.
ទើបបានជ្រើសរើសហើយ៖
Yahwana 7: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
