Kəzəɗ tə Mələɓ iyi 5
5
Ananiyas abə Safira
1Ama hedi aka, miya ŋga Ananiyas, miya tə wala ŋga Safira, i ɗal wulək tata ntaɗ bək ta, Ananiyas a ber lay tata dakayta. 2A ɗal wulək abə wala ŋga, a wuɗak dala ta dəl bək, a ɓah dala ta dakayta, ɓa, a nda, a vəlaŋta mayak tə dala ta əŋ mələɓ iyi. 3Piyer a zlapaŋgu, a zla: «Ananiyas, hwa yak Sayɗanu amba mə təɗ əŋ nəf təkwa wa seh, məŋgəvday a mey#5:3 Yahwana 13:2.? Hwa kəbərəslaŋ ma za əŋ Mimiɗ sə Kweɗek, hwa kəɓah dala tə lay hwa mə ber wa za. 4Mar hwa kəber lay ta halla, ar tə təkwa. Abə dawaŋ tə hwa kəberza za, dala ta seh tə təkwa səku vaw? Məŋgəvday a mey hwa sla wucum i ɗal kəzəɗ madawar wa? Hwa bərəsl ma wa seh əŋ nini səku, ama əŋ Bizlaf!» 5Əŋ Ananiyas mə zlim ma ta seh, a ndəv, ɓak a məc ŋga. Hedi mə zlim labara iyi ta fuk ləndəŋ səndawl kəɗalaŋta za. 6Gula iyi i ndaha, i paɗ məce ta, ɓa, i ɓətu, kah, i kahu.
7A ɗal mbeh kwata ler maakaɗ abə dawaŋ ta, wala tə Ananiyas a ndaha. Ama a kəsəŋ məsəkəŋ mataŋ ta səku. 8Ɓa, Piyer a ɗəpu, a zla: «Gizekʉ, hi ber lay təheni seh, dala ta mənaŋ wa vaw?» A ziŋgeŋ zlap, a zla: «Ayaw, nini berʉ a dala mənaŋ mba.» 9Abə dawaŋ ta izey, Piyer a zlapaŋgu, a zla: «Hwa abə muwul təkwa, heni jaw ma i jəvəɗ Mimiɗ sə Kweɗek tə Bay Bayta Bizlaf seh, məŋgəvday a mey? Ehe, zlimʉ, hedi mə kah muwul təkwa iyi i mbə a medigiɗ, i nda i ɓətah bahayim.» 10Mbehmbeh mba, a ndəv a ma tə Piyer, ɓak, a məc ŋga. Gula iyi i təɗaha, i limʉ kəməc cuza, i ɓətu, kah, i kahu a kelek muwul ŋga. 11Jam talaŋ tə hedi makuw ma iyi fuk abə hedi mə zlim labara iyi ta fuk ləndəŋ səndawl kəɗalaŋta za.
Mələɓ iyi i kəɗal məsəkəŋ mə har hedi iyi za mbeh səku
12Mələɓ iyi i kəɗal mazla mə har hedi iyi za mbeh səku əŋ faŋw tə hedi iyi. Hedi makuw ma iyi fuk i kəjam za a lay ta a gədaŋ gəlaɓ tə Sulaymanu. 13Hedi tə wuta iyi fuk i kələndəŋ za ley jam a talaŋ tata, ama hedi iyi mbeh səku i kəhəmənta. 14A pis ta, a pis ta, muwul iyi abə wala iyi mbeh səku i kəfəfəlaha, i ndaha ley kuw ma tə Bay Bayta Bizlaf. 15Məŋgəvday a ɗek, i kədeɓ hedi mə dal iyi a kataf, i waŋta a kwambum iyi abə a ɓəɓele iyi amba əŋ hala Piyer a kətaŋ seh, ŋgiseŋ ŋga a dəp hedi ntaɗ əŋ faŋw tata. 16Hedi iyi mbeh səku i ndaha mar tə wuta sə mbehmbeh tə abə Urusalima iyi, i daha hedi tata mə dal iyi, mimiɗ tə abə ndəra dəlay mə zləŋgaŋta takwaŋ iyi, tata fuk i kəmbəl za.
I kəzləŋgaŋta takwaŋ za əŋ mələɓ iyi
17Abə dawaŋ ta izey, hedi səndawl tə a talaŋ hedi iyi i mə ɗal kukus əŋ Bizlaf abə hedi tə abə mbiŋ iyi fuk, mənaŋ zlap ta seh, lə Saduki dakayta iyi, i kəɗal sərah za mbeh səku a mələɓ iyi. I ɓət wulək ley zləŋgaŋta takwaŋ. 18I məl mələɓ iyi ta, i pekta əŋ daŋgay. 19Ama əŋ njaɗu ta mba, mələɓ tə Bay Bayta Bizlaf a ndaha, a rəz medigiɗ tə daŋgay ta, a təɗaha mələɓ iyi ta, ɓa, a zlapaŋta, a zla: 20«Hi nda əŋ biŋ tə Bizlaf, a namba hi gizeŋta əŋ hedi iyi ma tə a talaŋ mədəŋcur lawayaŋ.» 21Mələɓ iyi i kəkuw ma ta za, i kəɗal za mənaŋ mba. Abə kafa vət, i təɗ əŋ biŋ tə Bizlaf, i mar ley sərək hedi iyi a talaŋ ma ta. Hedi səndawl tə a talaŋ hedi iyi i mə ɗal kukus əŋ Bizlaf abə hedi tə a kelek ŋga iyi, i ndaha, i ɗafaŋta ma əŋ hedi mə ɗal yawa tə Yahuda iyi fuk, amba ley ɗal yawa. Ɓa, i ləɓ hedi əŋ daŋgay ley dahaŋta mələɓ iyi sey. 22Sewje iyi sey i gwar əŋ daŋgay, i kəlimta əŋ daŋgay tata ta halla. Ɓa, i ziŋgehe tata, i gizeŋta ma ta əŋ hedi səndawl mə ɗal yawa kə mbəzl ma iyi sey, i zla: 23«Nini lim medigiɗ tə daŋgay mə peki lawlaw, hedi mə jəɗ iyi i mbə a namba i kəjəɗu. Ama əŋ nini mə rəz medigiɗ seh, nini kəlim hedi kwa ntaɗ a ɗəməŋ halla.» 24Əŋ hedi səndawl tə a talaŋ hedi iyi i mə jəɗ biŋ tə Bizlaf abə hedi səndawl iyi tə a talaŋ hedi iyi i mə ɗal kukus əŋ Bizlaf i zlim ma tə mələɓ iyi ta kəjəvəɗta za, məŋgəvday i kəsəŋ məsəkəŋ mataŋ ta səku. 25Ɓa, hedi a ndaha, a zlapaŋta, a zla: «Ehe, hedi iyi heni mə pekta tə əŋ daŋgay sey, i mə geri əŋ biŋ tə Bizlaf, i kəsərək hedi iyi!» 26Abə dawaŋ ta izey, hedi səndawl tə a talaŋ hedi iyi i mə jəɗ biŋ tə Bizlaf, a nda abə gula ŋga iyi ley daha mələɓ iyi. Ama i kəɗalaŋta məsəkəŋ madawar halla, məŋgəvday i kələndəŋ za a hedi iyi i nda i ŋgwafta abə nvəŋ. 27Abə dawaŋ tə i mə daha mələɓ iyi ta seh, i deɓta a ma tə hedi səndawl mə ɗal yawa kə mbəzl ma iyi. Hedi səndawl tə a talaŋ hedi iyi i mə ɗal kukus əŋ Bizlaf a mar ley vəlaŋta hem. 28A zlapaŋta, a zla: «Nini kətakaheni za ley giz ma tə Bizlaf abə miya tə hedi wa, ama ehe, heni mə ɗal! Heni kəgiz ma ta za əŋ hedi tə Urusalima iyi. Hi mba i daha hem tə məc ŋga a talaŋ tini vaw#5:28 Matta 27:25.?» 29Piyer abə mələɓ məzəwindi iyi i ziŋgeŋta zlap, i zla: «Nini waŋgaŋ talaŋ seh əŋ Bizlaf, əŋ hedi iyi səku. 30Bizlaf tə dide tə dide takwa iyi kəgaraha Yesu za əŋ məc, heni mə ju, heni mə daru a mpay mazlaŋgal. 31Bizlaf kəkafza za əŋ ndəra zəma ŋga, kəɗiyza za əŋ bay, hedi mə reh hedi iyi, amba hedi tə Israyila iyi i mə buw nja tata, i mə lim ley baŋ hem tata iyi. 32Nini kəɗal sedewe za a talaŋ məsəkəŋ iyi ta mba fuk, nini abə Mimiɗ sə Kweɗek Bizlaf mə vəlaŋta əŋ hedi iyi i mə waŋgaŋ talaŋ.»
33Əŋ hedi mə ɗal yawa iyi i mə zlim ma ta seh, ɓa, nəf a dəmaŋta, i mba i ja mələɓ iyi ta. 34Ama hedi ntaɗ əŋ faŋw tata aka, miya ŋga Gamaliyel, ar metir tə ma majaw, hedi sə ndʉlndʉl a ma tə hedi iyi fuk. A gar, a zlapaŋta ley təɗaha mələɓ iyi wa a palah tə nja mbizek. 35Ɓa, a zlapaŋta, a zla: «Hedi tə Israyila iyi, hi sla wucum lawlaw a talaŋ məsəkəŋ heni mə nda i ɗalaŋta əŋ hedi iyi wa. 36Nja gaa halla, i lim hedi aka miya ŋga Tewdas, kəndaha za, a zlap mbiŋ seh hedi bayta. Hedi iyi a ɗal mbeh kwata temere nfaɗ i kəziberʉ. Ama i ju, hedi mə ziberʉ iyi fuk i wʉweɗ tata, ma ŋga cukwaɗ. 37Abə dawaŋ ŋga, əŋ hala i kəwuzlel miya tə hedi iyi seh, i lim Yahuda hedi tə Galili, a ndaha. Kəŋgasl hedi iyi mbeh səku a dawaŋ ŋga. Ama mbiŋ bahayim, i kəjaza za, hedi mə ziberʉ iyi fuk i kəwʉweɗ tata za. 38Mənjawa, sa kəzlapaheni: hi mba i wulək a hedi iyi wa səku ba, hi yakta, i mə nda tata. Məŋgəvday əŋgah wulək tata abə kəzəɗ tata a ndaha a ndəra hedi iyi, aka səku a ndəra tata seh, i kuɗəp za. 39Ama əŋgah i ndaha a ndəra Bizlaf seh, heni gula i gayaŋta kəzəɗ tata halla. Hi sla wucum, məŋgəvday hi mba i jəm abə Bizlaf səku!» Hedi səndawl mə ɗal yawa kə mbəzl ma iyi i kəkuw ma tə Gamaliyel za. 40I kəɗafaŋta ma za əŋ mələɓ iyi baha, ɓa, i tawta, i zlapaŋta amba i mə mba i zlap abə miya tə Yesu səku ba. Ɓa, i yakta. 41Mələɓ iyi i yak hedi mə ɗal yawa kə mbəzl ma iyi, i nda tata abə səsəm mbeh səku, Bizlaf kəgərta za, tata tiɗe ley zləŋ takwaŋ məŋgəvday miya tə Yesu Almasihu. 42A pis ta, a pis ta, i mbə əŋ biŋ tə Bizlaf abə a ge iyi, i kəyak ley sərək hedi iyi abə ley giz Labara Səntaŋ Lawayaŋ tə a talaŋ Yesu Almasihu seh halla.
ទើបបានជ្រើសរើសហើយ៖
Kəzəɗ tə Mələɓ iyi 5: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
