Kəzəɗ tə Mələɓ iyi 6
6
I may hedi iyi dʉsəlʉɗ ley tər mələɓ iyi
1Əŋ hala ta mba, hedi makuw ma iyi i kəfəfəlaha, hedi makuw ma mə zlap ma Gərek iyi i kəguŋgur ma a talaŋ hedi mə zlap ma Ibraniŋki iyi, i zlap, i zla: wala məce tə əŋ faŋw tata iyi i kəlim zəm a vah ta, a vah ta əŋ hala i kəwuɗak wuda səku. 2Abə dawaŋ ta izey, mələɓ iyi wam a meɗek bək i kwas a lay ntaɗ abə hedi makuw ma iyi, i zla: «Ləlaw səku amba nini yak ley giz ma tə Bizlaf, ɓa, nini ɓiz məsəkəŋ kə zəm. 3Məŋgəvday a ɗek, zliŋmana iyi, hi may əŋ faŋw təheni hedi dʉsəlʉɗ mə ɗal kəzəɗ tə abə nəf ntaɗ iyi, magwaɗ tə Mimiɗ sə Kweɗek iyi, hedi tə abə burŋguzl iyi, ɓa, nini vəlaŋta kəzəɗ ta. 4Nini seh, nini kəziber ley ɗal mbuh abə ley giz ma tə Bizlaf.» 5Hedi tə əŋ jam talaŋ iyi ta fuk i kəkuw ma ta za, i may Etiyen, hedi tə abə kuw ma, magwaɗ tə abə Mimiɗ sə Kweɗek, baha, i may Filip, Pawrawkwarus, Nikanawr, Timaŋw, Parmenas abə Nikwalawus tə əŋ Antakiya, hedi madaway mə ziber kukus tə Yahuda iyi. 6Ɓa, i deɓeŋta əŋ mələɓ iyi. I ɗal mbuh, i ɗiyaŋta ndəra a talaŋ tata. 7Ma tə Bizlaf a kənda a ma a ma. Hedi makuw ma iyi i kəfəfəl mbeh səku əŋ Urusalima, hedi mə ɗal kukus əŋ Bizlaf iyi mbeh səku i kəwaŋ talaŋ əŋ kuw ma tə Yesu.
I kəməl Etiyen za
8Etiyen, hedi magwaɗ tə abə səntaŋ abə mazla tə Bizlaf, kəɗal mazla səndawl iyi abə məsəkəŋ mə har hedi iyi za əŋ faŋw tə hedi iyi. 9Abə dawaŋ ta izey, hedi dakayta iyi tə əŋ biŋ kə ɗal mbuh əŋ Bizlaf, i mə ɗafaŋ ma biŋ kə ɗal mbuh əŋ Bizlaf tə məva mapəlaha iyi, ar hedi mandaha iyi mar tə əŋ Sirene abə tə əŋ Alekzandəriya, abə tə əŋ Silikiya liŋ abə tə əŋ hayak tə Aziya. I kəmar za ley ɗal yawa abə Etiyen. 10Ama Etiyen, a kəzlap abə burŋguzl liŋ abə mazla tə Mimiɗ sə Kweɗek ha i gula i zlap abə mbiŋ səku. 11Məŋgəvday a ɗek, i vəlaŋta dala əŋ hedi iyi abə ɓah amba i mə bərəsl ma a talaŋ Etiyen, i zla: «Nini kəzlim za, a kəzlap ma madawar a talaŋ Musa abə a talaŋ Bizlaf#6:11 Matta 26:59-61; Markus 14:55-58..» 12Mənaŋ wa, i kəgaɗ hedi iyi ley təlaha ma: hedi mə ɗal yawa iyi abə metir tə ma majaw iyi. Ɓa, i limeŋ kesek əŋ Etiyen, i məlu, i deɓʉ a ma tə hedi səndawl mə ɗal yawa kə mbəzl ma iyi. 13Ɓa, i daha sedewe iyi amba i bərəslaŋ ma, i zla: «Hedi wa, hwayhway a kəzlap ma madawar a talaŋ biŋ tə Bizlaf sə Kweɗek abə a talaŋ ma majaw tə Musa. 14Məŋgəvday nini kəzlim za, a kəzlap: “Yesu lə Nasaratu wa, a hurum biŋ tə Bizlaf za, a buw kukus nakwa mə lim tə ndəra Musa wa za.”» 15Hedi manja tə a namba iyi fuk, i kəgər Etiyen, i gər nje ŋga mənaŋ tə mələɓ tə Bizlaf.
ទើបបានជ្រើសរើសហើយ៖
Kəzəɗ tə Mələɓ iyi 6: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
