Kəzəɗ tə Mələɓ iyi 19
19
Gwaraha tə Pawl əŋ Efesʉ
1Əŋ Apalaws mbə əŋ Kwarintʉ seh, Pawl a kəziber kataf kəɗi əŋ hayak tə wuzum tə Aziya mekedek iyi ha a gwar əŋ Efesʉ. A namba, a lim hedi makuw ma dakayta iyi, 2a ɗəpta, a zla: «Heni kəlim Mimiɗ sə Kweɗek za əŋ heni mə kuw ma wa vaw?» I ziŋgeŋ zlap, i zla: «Nini kəter ley zlim ma tə Mimiɗ sə Kweɗek seh halla səlak.» 3Pawl a ɗəpta izey, a zla: «Kaa, heni lim seh batem vitikey?» I ziŋgeŋ zlap, i zla: «Nini lim seh batem tə Yahwana.» 4Pawl a zlapaŋta, a zla: «Yahwana a ɗalaŋta batem seh, əŋ hedi mə kuw ley buw nja tata iyi, a zlapaŋta əŋ hedi tə əŋ Israyila iyi ley kuw ma tə hedi mə nda i ndaha tə abə dawaŋ ŋga. Hedi ta seh, ar Yesu#19:4 Matta 3:11; Markus 1:4, 7-8..» 5Abə dawaŋ tə i mə zlim ma iyi wa, i kuw batem abə miya tə Bay Bayta Yesu. 6Pawl a ɗiyaŋta ndəra a tata, Mimiɗ sə Kweɗek a bəreŋgehe a tata, ɓa, i mar ley zlap abə ma hedi iyi i mə səŋ səku. I kəzlap abə miya tə Bizlaf. 7Hedi iyi fuk seh, i ɗal wam a meɗek bək za.
8Əŋ ntəra maakaɗ Pawl a kənda hwayhway əŋ biŋ kə ɗal mbuh əŋ Bizlaf, a kəzlapaŋta əŋ hedi iyi kwa abə ləndəŋ səku. A zlapaŋta a talaŋ ma tə Bay tə Bizlaf, a kəvəl fagay amba hedi ŋga mə teh zləm iyi i mə kuw ma ta. 9Ama hedi tata dakayta iyi i ɗal talaŋ tawytawy, i ŋgəm ley kuw ma ta səku, i kəzlap ma madawar a talaŋ kataf tə Bay Bayta a ma tə hedi makwas iyi. Abə dawaŋ ta izey, Pawl a yakta, a jam abə hedi makuw ma iyi, a kəzlapaŋta a waŋ ta, a waŋ ta əŋ lekwal tə hedi i mə ɗafaŋ ma Tiranʉs. 10A kəɗal mənaŋ mba ha va bək, Yahuda iyi abə Yahuda iyi səku tə əŋ hayak tə Aziya fuk i kəzlim ma tə Bay Bayta ta za.
Wuziyi tə Sikewas iyi
11Bizlaf kəɗal mazla mə har hedi iyi za mbeh səku kəɗi a Pawl. 12Mənaŋ wa izey, i kəɗiy rukut iyi, aka səku məsəra rukut meges tə abə wucum tə Pawl iyi a hedi mə dal iyi, i kəmbəl tata za əŋ məc tata iyi, mimiɗ madawar iyi bahayim i kətəɗaha tata za əŋ talaŋ tata. 13Yahuda dakayta iyi i mə pik lay iyi ley gam mimiɗ madawar iyi seh, i kətəl za ley gamta tata bahayim abə miya tə Bay Bayta Yesu. I kəzlapaŋta əŋ mimiɗ madawar iyi, i zla: «Sa kəzlapaheni ley təɗaha abə miya tə Yesu, hedi Pawl mə giz ma ŋga sey.» 14Hedi səndawl tə a talaŋ hedi iyi i mə ɗal kukus əŋ Bizlaf, miya ŋga Sikewas, abə wuziyi ŋga iyi dʉsəlʉɗ i kəɗal za mənaŋ mba ta. 15Ama əŋ waŋ par aka, mimiɗ madawar a ziŋgeŋta zlap, a zla: «Sa kəsəŋ Yesu, Pawl bahayim sa kəsəŋ ma ŋga. Ama heni seh, heni viyey?» 16Hedi tə abə mimiɗ madawar sey, a hiyaha a talaŋ tata, a dayta abə fagay fuk, a zləŋgaŋta takwaŋ. Abə dawaŋ ta, i təɗaha a ge ta abə hiy, rukut a wucum halla, wucum tata i mə gʉreti gurat gurat. 17Yahuda iyi abə Yahuda iyi səku tə əŋ Efesʉ iyi fuk i kəzlim ma ta za. Nəf tata kədəɗ za mbeh səku, ɓa, i həmən miya tə Bay Bayta Yesu. 18Hedi iyi mbeh səku i kəmbaɗ za əŋ hedi makuw ma iyi, i kəndaha ley giz abə fagay məsəkəŋ madawar tata iyi i mə ɗal tə a ma tə hedi iyi fuk. 19Hedi iyi mbeh səku mə ɗal mazla madawar iyi sey, i daha ɗerewel tata iyi, i varta a ma tə hedi iyi fuk. Dala tə ɗerewel ta, a ɗal malaway tə dala gabal ndəra juɓum za#19:19 Markus 6:37.. 20Mənaŋ wa, abə fagay tə Bay Bayta, ma tə Bizlaf a kənda a ma a ma, a kəlim fagay mbeh səku.
Ma kəjəvəɗ za əŋ Efesʉ
21Abə dawaŋ tə ma iyi ta, Pawl a ɓət wulək ley taŋ kəɗi əŋ Makedawniya abə Akaya ley nda əŋ Urusalima. A zla: «Abə dawaŋ tə sa cu za əŋ namba, a kəlim seh sa nda əŋ Rawma bahayim.» 22A ləɓ Timawte abə Erastus əŋ Makedawniya, hedi tata iyi i kəɗal kəzəɗ lalaŋ, ama mbiŋ abə talaŋ ŋga a nja tə waŋ mbizek ndagwa əŋ hayak tə Aziya. 23A va ta mba, kurzlay səndawl kəɗal za əŋ Efesʉ, məŋgəvday kataf tə Bay Bayta. 24Hedi, miya ŋga Demetiriyus, hedi mə ɓəsl malaway kə ɗal daŋgwa, a kəɗal biŋ kə ɗal kukus tə kuli iyi mekedek mekedek abə malaway tə dala, biŋ iyi ta seh, i ɗafaŋta ma Artemis. Məŋgəvday kəzəɗ ta wa, a kəvəlaŋta dala mbeh səku əŋ hedi mə ɗal kəzəɗ tə ɗəməŋ iyi ta. 25A ɗafaŋta ma fuk, abə hedi mə ɗal kəzəɗ mənaŋ wawa iyi bahayim. A zlapaŋta, a zla: «Maday na iyi, heni kəsəŋ nakwa iyi lim məsəkəŋ seh, abə kəzəɗ wa. 26Ama heni abə talaŋ təheni, heni kəgəru, heni kəzlim məsəkəŋ Pawl mə ɗal. A kəzlap, a zla: kuli maləm tə ndəra tə hedi iyi seh, ar bizlaf iyi səku! Kəlim za ley day hedi iyi mbeh səku abə zlap, a nawa əŋ Efesʉ taataɗ səku, ama əŋ hayak tə Aziya fuk. 27Əŋgah ma ta, a kəziber mənaŋ wa seh, i nda i gay kəzəɗ takwa taataɗ səku, baha, i nda i gay biŋ tə kuli Artemis, hedi iyi i nda i yak ley həmən bizlaf takwa iyi ta kwa a tikey əŋ hayak tə Aziya iyi fuk abə əŋ məŋhayak iyi fuk.» 28Əŋ hedi mə teh zləm iyi i mə zlim ma ta seh, nəf tata kədəm za mbeh səku, i mar ley ja varay, i zla: «Artemis, kuli tə hedi tə əŋ Efesʉ iyi seh, ar kuli səndawl!» 29Kurzlay ta kəkʉkweɗ za əŋ berne ta fuk. I məl hedi tə a kelek Pawl iyi bək, ar Gayus abə Aristarkus, hedi mandaha tə əŋ Makedawniya iyi, mə pik tə abə Pawl iyi, i vazaha tata fuk ley deɓta a lay kə ɗeher. 30Pawl a mba i nda a ma tə hedi makwas iyi, ama hedi makuw ma iyi i taku. 31Hedi səndawl tə əŋ hayak tə Aziya iyi, hedi mambaɗ əŋ maday ŋga iyi i ləɓ əŋ kelek ŋga, ley rəku amba mə mba i nda əŋ lay kə ɗeher ta səku. 32Əŋ pis ta mba, hedi makwas iyi, i kəjəvəɗ ma za mbeh səku. Kwa viyey a kənja varay, a kəzlap məsəkəŋ mbiŋ mə mba, məŋgəvday hedi iyi ndəra səndawl tə əŋ faŋw tata iyi i kəsəŋ i kwas seh məŋgəvday a mey səku. 33Hedi dakayta iyi tə əŋ faŋw tə hedi makwas iyi i gizeŋ ma ta əŋ hedi məzəwindi aka, miya ŋga Alekzandəre, Yahuda iyi i mba i garu a ma tə hedi iyi. Abə dawaŋ ta izey, Alekzandəre a kaf ndəra əŋ wuzlaf, a mba i ɓət zlap ley gizeŋta ma ŋga, a ma tə hedi makwas iyi. 34Ama əŋ tata i mə səŋ mbiŋ seh, ar lə Yahuda, i kəja varay ha a ɗal ler bək: «Artemis, kuli tə hedi tə əŋ Efesʉ iyi seh, ar kuli səndawl!»
35Əŋ cukwaɗ ta, hedi mə wuzlel tə əŋ berne ta, a lim ley bes hedi makwas iyi seh abə tuwah, a zla: «Waa hedi tə əŋ Efesʉ iyi! Kwa viyey a kəsəŋ Efesʉ seh, ar berne mə jəɗ biŋ tə Artemis səndawl abə kuli ŋga mə nahaha mar tə a wuzlaf. 36Hedi mə gula i zlap mənaŋ mba səku seh halla. Məŋgəvday a ɗek, sey heni bes ka, hi wulək lawlaw amba hi zlap məsəkəŋ fuk. 37Heni kəda hedi iyi wa za əŋ nawa i kəɗal məsəkəŋ madawar əŋ biŋ takwa iyi halla, i kəra kuli wala takwa iyi seh halla. 38Əŋgah Demetiriyus abə hedi mə ɗal kəzəɗ lalaŋ iyi i kəmba i vəlaŋ hem əŋ hedi seh, lay kə mbəzl ma aka, hedi mə mbəzl ma iyi aka, pis kə mbəzl ma aka, hi deɓta a ma tata. 39Ama əŋgah heni abə ɗəp baha, i ɗiyu za a ma tə hedi iyi makwas wa. 40Məŋgəvday i gula i vəlanakwa hem a talaŋ kwas takwa tə eci wa. Məŋgəvday nakwa abə kataf ley kwas mənaŋ wa halla.» 41Abə dawaŋ tə ma iyi wa, a zlapaŋta əŋ hedi makwas iyi i mə nda tata əŋ wuta.
ទើបបានជ្រើសរើសហើយ៖
Kəzəɗ tə Mələɓ iyi 19: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
