Kəzəɗ tə Mələɓ iyi 18
18
Pawl mbə əŋ Kwarintʉ
1Abə dawaŋ tə wa, Pawl a gar əŋ Atena, a nda əŋ Kwarintʉ. 2A namba, a gbam talaŋ abə lə Yahuda miya ŋga Akilas, mambuwaha tə əŋ Pawntus. A gwaraha mar tə əŋ Italiya abə wala ŋga Piriskilla, məŋgəvday Bay tə Rawma miya ŋga Kalawdiyus kəzlapaŋta za əŋ Yahuda iyi fuk ley yak hayak tə Rawma. Pawl a nda i limeheta, 3a nja abə tata, i kəɗal kəzəɗ a lay ta, məŋgəvday kəzəɗ tata ntaɗ: I ɗiy biŋ meker, i ker iyi. 4Əŋ pis kə yip fuk, Pawl a kəɓət zlap əŋ biŋ kə ɗal mbuh əŋ Bizlaf, a kəpələk ley ɗal yawa abə Yahuda iyi liŋ abə lə Gərek iyi ley dayta abə zlap. 5Əŋ Silas abə Timawte i mə gwaraha mar tə əŋ Makedawniya, Pawl a vəl talaŋ ŋga fuk ley giz ma tə Bizlaf. A kəɗal sedewe a ma tə Yahuda iyi fuk: Yesu seh, ar Almasihu. 6Ama Yahuda iyi i kəmba i kuw ma tə Pawl səku, i ru. Abə dawaŋ ta izey, Pawl a mbic luguda tə a rukut ŋga iyi#18:6 Markus 6:11. a talaŋ tata, ɓa, a zlapaŋta, a zla: «Əŋgah heni kəkuɗəp za seh, ar məŋgəvday hem təheni. Ma na a ɗəməŋ halla ba. Mar mənjawa, sa nda za kəɗi əŋ kelek hedi Yahuda iyi səku.» 7A gar ŋga a namba, a nda əŋ ge hedi, miya ŋga Titus Yustus, hedi mə ləndəŋ Bizlaf. Ge ŋga mbehmbeh abə biŋ kə ɗal mbuh əŋ Bizlaf. 8Kirispus, ar talaŋ habay tə əŋ biŋ kə ɗal mbuh əŋ Bizlaf, kəkuw ma tə Bay Bayta za, abə hedi tə ge ŋga iyi fuk. Hedi manja tə əŋ Kwarintʉ iyi mbeh səku i kəteheŋ zləm əŋ Pawl, i kəkuw ma za bahayim, i kəbaŋ batem za. 9Əŋ njaɗu par aka, Bay Bayta kəzlapaŋ za əŋ Pawl kəɗi əŋ səsiŋ, a zla: «Hwa mba i ləndəŋ səku, ama zlap dap, hwa mba i bes səku, 10məŋgəvday sa mbə abə hwa. Kwa hedi mə nda i zləŋgah takwaŋ seh halla, məŋgəvday hedi na iyi mbeh səku əŋ berne wa.» 11Pawl kənjaha za a namba va ntaɗ abə ntəra ŋkuh, a kəsərəkaŋta ma tə Bizlaf əŋ hedi iyi fuk.
Pawl mbə a ma tə Galliyaŋw
12Əŋ va Galliyaŋw mbiŋ guverner tə əŋ hayak tə Akaya, Yahuda iyi i kəjaw ma za a talaŋ Pawl. I deɓʉ əŋ lay kə mbəzl ma. 13I zla: «Hedi wa, a kəbim hedi iyi ley daraŋ malakw əŋ Bizlaf abə kataf iyi par, mə nda tə abə kukus tə ma majaw səku.» 14Pawl a mba i zlap, ama Galliyaŋw a zlapaŋta əŋ Yahuda iyi, a zla: «Heni Yahuda iyi, əŋgah ar hem par, aka səku məsəkəŋ madawar par hedi wa, mə ɗalu seh, sa teheheni zləm za. 15Ama ar yawa tə a talaŋ zlap iyi, tə a talaŋ miya iyi abə tə a talaŋ ma majaw təheni iyi, mbamba seh, ma ta, kəgəraheni za. Sa kənda i nja əŋ hedi mə mbəzl ma tə a talaŋ ma iyi wa seh halla.» 16Ɓa, a gamahata mar tə əŋ lay kə mbəzl ma. 17Abə dawaŋ ta izey, tata fuk i məl Sawstenes, talaŋ habay tə əŋ biŋ kə ɗal mbuh əŋ Bizlaf, i tawu a ma tə hedi iyi fuk əŋ lay kə mbəzl ma. Ama Galliyaŋw kəwulək a taw ta seh halla səlak.
Pawl a ziŋ ŋga əŋ Antakiya
18Pawl kənja za baha mbeh səku əŋ Kwarintʉ. Abə dawaŋ ta, ɓa, a yak zliŋge makuw ma iyi, a tap əŋ kambuwal ley nda əŋ Siriya, tata abə Piriskilla liŋ Akilas. Mar kətap əŋ kambuwal halla ndagwa seh, kəfəɗ talaŋ ŋga za əŋ Keŋkereya, məŋgəvday kəzlap za ley ɗal məsəkəŋ. 19I gwaraha əŋ Efesʉ, Pawl a yak Piriskilla abə Akilas a namba. A nda əŋ biŋ kə ɗal mbuh əŋ Bizlaf, a kəɗal yawa abə Yahuda iyi. 20Yahuda iyi ta i ɗəpu ley nja abə tata tə waŋ mbeh səku, ama a kuw səku. 21Əŋ mbiŋ mə yakta seh, a zlapaŋta, a zla: «Əŋgah Bizlaf kəmba za, sa ziŋgehe za əŋ kelek təheni.» Abə dawaŋ ta, a tap əŋ kambuwal, ɓa, a nda ŋga əŋ Efesʉ. 22Əŋ mbiŋ mə gwar əŋ Kaysariya, a nda ndagwa əŋ Urusalima ley ɗalaŋta mbele əŋ jam talaŋ tə hedi makuw ma iyi. Abə dawaŋ ta, a nda əŋ Antakiya. 23A nja a namba tə waŋ mbizek, ɓa, a nda ŋga. A taŋ kəɗi əŋ Galatiya abə Firigiya, a kəvəlaŋta fagay əŋ hedi makuw ma tə a namba iyi fuk.
Apalaws a kəsərək ma tə Bizlaf əŋ Efesʉ abə əŋ Kwarintʉ
24Lə Yahuda aka, miya ŋga Apalaws, mambuwaha tə əŋ Alekzandəriya, kəgwaraha za əŋ Efesʉ. Ar hedi mə gula i zlap, a kəsəŋ ma mawuzlel tə əŋ Ɗerewel tə Bizlaf lawlaw. 25A kəsəŋ kataf tə Bay Bayta lawlaw, mə gweɗi abə səsəm mbeh səku, a kəgiz, a kəsərək ma tə a talaŋ Yesu abə kataf ta. Ama a səŋ seh, sey batem tə Yahwana dap. 26A kəzlap abə ləndəŋ səku əŋ biŋ kə ɗal mbuh əŋ Bizlaf. Abə dawaŋ ta, Piriskilla abə Akilas i mə zlimʉ seh, i ŋgaslu əŋ ge tata amba ley gizeŋ kataf tə Bizlaf lawlaw. 27Abə dawaŋ ta, Apalaws kəwulək za ley nda əŋ hayak tə Akaya. Hedi makuw ma iyi i kəvəlaŋ fagay, i kəwuzleleŋta letir za əŋ zliŋgeŋ tata iyi tə a namba amba i mə kuwu lawlaw. Əŋ mbiŋ mə gwar əŋ namba seh, kətər hedi makuw ma lawayaŋ iyi za mbeh səku abə səntaŋ tə Bizlaf tə a talaŋ ŋga. 28A kəgiz məndiwiŋ wulək tə sərək tə Yahuda iyi a ma tə hedi iyi fuk, a kəzlap ha Yahuda iyi i gula i ziŋgeŋ zlap səku. A kəgizeŋta abə ma mawuzlel tə əŋ Ɗerewel tə Bizlaf məndiwiŋ Yesu seh, ar Almasihu.
ទើបបានជ្រើសរើសហើយ៖
Kəzəɗ tə Mələɓ iyi 18: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
