Kəzəɗ tə Mələɓ iyi 20
20
Pawl a ziŋ əŋ Makedawniya abə əŋ Akaya
1Əŋ kurzlay mə ɗal tə əŋ Efesʉ sey, kəbes za, Pawl a kwas hedi makuw ma iyi, a zlapaŋta zlap mə vəl fagay. Ɓa, a ɗalaŋta mbele, a nda ŋga əŋ Makedawniya. 2A taŋ kəɗi əŋ hayak ta, a vəlaŋta fagay əŋ hedi makuw ma iyi abə ley ɗal ŋgalaw iyi par par abə tata. Abə dawaŋ ta, a nda ŋga əŋ Akaya, 3a nja a namba ntəra maakaɗ. A kənda i tap əŋ kambuwal ley nda əŋ Siriya seh, a zlim Yahuda iyi i kəjaw ma za a talaŋ ŋga ley ɗalaŋ məsəkəŋ madawar. Abə dawaŋ ta izey, a ɓət wulək ley ziŋ ŋga kəɗi əŋ Makedawniya. 4Hedi mə ndaha tə abə mbiŋ iyi seh, ar Sawpater, mbu tə Pirrus, hedi tə əŋ Bereya, Aristarkus abə Sekundus, hedi tə əŋ Tessalawniŋki iyi, Gayus, hedi tə əŋ Derbe liŋ Timawte, mənaŋ mba baha, Tikikus abə Tawrafimus, hedi tə əŋ hayak tə Aziya iyi. 5Hedi iyi wa, i kənda za məpər a nini, i kəgəbaranini əŋ Tarawas. 6Nini bahayim, nini tap əŋ kambuwal ley nda əŋ Filippi, abə dawaŋ tə gugway tə peŋ mə tak is a ɗəməŋ, waŋ juɓum abə dawaŋ ta, nini ndaha ley limta əŋ Tarawas, a namba nini kəɗal waŋ dʉsəlʉɗ.
Maɗ ma tə Pawl ley gər hedi iyi əŋ Tarawas
7Abə luma gamtak, nini kəjam talaŋ za ley zəm peŋ, Pawl a kəzlapaŋta əŋ hedi iyi ha ŋgəlak njaɗu, məŋgəvday garaha kafa ta seh, a nda ŋga. 8Lalam iyi mbeh səku əŋ biŋ nini mə jam talaŋ tə ɗəməŋ, ha əŋ biŋ tə a talaŋ biŋ. 9Gula məzəwindi aka, miya ŋga Ewtikus mə nji a meɗek məgədu tə biŋ. A kəwaŋ falalaŋ əŋ Pawl a kəgiz ma. Əŋ mbiŋ a kəwaŋ falalaŋ seh, a ndəvaha əŋ teyek mar əŋ biŋ tə a talaŋ biŋ məmaakaɗ ta əŋ teyek. I mba i garahaw, ama kəməc cuza. 10Pawl a bəreŋgehe, a waŋ a mbiŋ, a məlu əŋ ndəra, ɓa, a zlap, a zla: «Hi mba i wulək səku, mbə abə nje!» 11Ɓa, a ziŋ ŋga əŋ biŋ tə a talaŋ biŋ sey, a ŋga peŋ, a zəmu. Abə dawaŋ ta, kəzlap za baha nja mbeh səku ha əŋ pis mə təɗaha, ɓa, a nda ŋga. 12Abə dawaŋ ta, i daha gula ta, mbə abə nje. Ma ta, kəvəlaŋta fagay za əŋ tata fuk.
Pawl a gar əŋ Tarawas a nda əŋ Miletus
13Nini nda məpər abə kambuwal ley nda əŋ Assaws, a namba, nini ɓət Pawl, məŋgəvday kəwulək za ley nda abə ŋgas kəɗi əŋ kataf ta. 14Əŋ mbiŋ mə limenini əŋ Assaws seh, nini ɓətu əŋ kambuwal ley nda əŋ Mitilene. 15Mar tə a namba, nini gar baha abə kambuwal, nini gwar əŋ Kiyaws abə kafa. Garaha kafa ta baha, nini gwar əŋ Samaws, waŋ mə ziber ta baha, nini gwar əŋ Miletus. 16Pawl kəɓət wulək za ley taŋ kəɗi əŋ Efesʉ, kwa kəgar a namba seh halla, məŋgəvday a kəmba i nja əŋ hayak tə Aziya səku. A kəvaz ley nda əŋ Urusalima, əŋgah a lim za seh, ha əŋ gugway tə Pantekwasta mə nda i ɗal seh, mbiŋ kəgwar cuza.
Pawl a zlapaŋta əŋ hedi mə ɗal yawa tə əŋ Efesʉ iyi
17Mar tə əŋ Miletus, Pawl a ləɓ əŋ Efesʉ ley zlapaŋta əŋ hedi mə ɗal yawa iyi tə əŋ jam talaŋ tə hedi makuw ma iyi ley ndaha əŋ kelek ŋga. 18Əŋ tata i mə gwaraha əŋ kelek ŋga seh, a zlapaŋta mənaŋ wa, a zla: «Heni kəsəŋ əŋ sa mə nja hwayhway tə abə heni seh, viŋgey, mar əŋ pis titʉz tə gwaraha na əŋ hayak tə Aziya. 19Sa kəɗalaŋ kəzəɗ za əŋ Bay Bayta abə waŋ talaŋ, abə haŋ liŋ abə tuwah sa mə lim məŋgəvday Yahuda iyi i mə jaw ma a talaŋ na ley ɗalaka məsəkəŋ madawar. 20Heni kəsəŋ əŋ giz ma na, sa kəɓah kwa məsəkəŋ ntaɗ mə nda i təraheni seh halla. Sa kəgizeheni məsəkəŋ iyi ta fuk za, sa kəsərəkaheni ta fuk za a ma tə hedi iyi abə a ge təheni iyi bahayim. 21Sa kəɗafaŋta ma za əŋ Yahuda iyi abə hedi Yahuda iyi səku amba i buw nja tata, i buwaha nje kəɗi a Bizlaf, i mə kuw ma tə Bay Bayta takwa Yesu. 22Mənjawa, sa kənda na əŋ Urusalima, ar Mimiɗ sə Kweɗek mə takaka wula ley ɗalu, sa kəsəŋ məsəkəŋ mə nda i ɗalaka tə a namba səku. 23Məsəkəŋ ntaɗ sa mə səŋ tə əŋ berne sa mə nda i nda fuk seh, Mimiɗ sə Kweɗek a kəgizekʉ, daŋgay abə tuwah i kəgəbaraka. 24Ama sa kəgər nəp na mənaŋ məsəkəŋ səntaŋ seh halla. Sa mə mba seh, ar ley gwar ha əŋ cukwaɗ tə hiy na, abə ley cukwaɗ kəzəɗ Bay Bayta Yesu mə vəlaku: Ley giz Labara Səntaŋ Lawayaŋ a talaŋ səntaŋ tə Bizlaf#20:24 2 Timawte 4:7..»
25«Sa kəpik za əŋ faŋw təheni abə ley giz labara tə Bay tə Bizlaf, ama sa kəsəŋ mənjawa əŋ faŋw təheni kwa hedi ntaɗ mə nda i limeke seh halla ba. 26Məŋgəvday a ɗek, sa kəɗal sedewe za a heni mənjawa: Əŋgah hedi ntaɗ əŋ faŋw təheni kəkuɗəp za seh, ma na a ɗəməŋ halla ba. 27Məŋgəvday sa kəgizeheni məsəkəŋ Bizlaf mə mba fuk za, kwa sa kəɓah məsəkəŋ a heni ntaɗ seh halla. 28Hi jəɗ talaŋ təheni, hi jəɗ ŋgaɓa Mimiɗ sə Kweɗek mə vəlaheni ley jəɗ. Hi mbaɗ njʉwiŋ səntaŋ iyi ley jəɗ jam talaŋ tə hedi makuw ma iyi Bizlaf mə vəlanakwa kəɗi əŋ məmbəz tə mbu ŋgaŋ#20:28 1 Piyer 5:2.. 29Sa kəsəŋ abə dawaŋ tə sa cu na seh, hedi iyi mənaŋ haza damu madawar iyi i təɗaha za əŋ faŋw təheni, i nda i wʉweɗ ŋgaɓa wa. 30Hedi dakayta tə əŋ faŋw təheni iyi bahayim i nda i bərəsl ma ley bim hedi makuw ma iyi amba ley ziberta. 31Məŋgəvday a ɗek, hi jəɗ, hi səŋ kenek əŋ va maakaɗ, njaɗu abə pis fuk, sa kəyak ley ŋgəzaheni abə haŋ əŋ nje seh halla.»
32«Mənjawa, sa kəyakaheni əŋ ndəra Bizlaf abə əŋ ndəra labara tə səntaŋ ŋga. Ma ta, a gula i vəlaheni fagay əŋ kuw ma abə ley ɗiyaheni ley zəm ge əŋ məsəkəŋ mbiŋ mə ɓah əŋ hedi ŋga iyi fuk. 33Sa kəmba dala səku, malaway mawaɗ səku, kwa rukut tə hedi səku. 34Heni abə talaŋ təheni, heni kəsəŋ, sa kəɗal kəzəɗ za abə ndəra na, amba sa lim dala ley səkəm məsəkəŋ kə zəm əŋ sa abə hedi mə zibereke iyi. 35Sa kəgizeheni məsəkəŋ sa ɗal iyi fuk za, sey hi ɗalta amba ley tər hedi hulawf iyi, abə ley səŋ kenek bahayim a Bay Bayta Yesu mə zlap mbiŋ abə talaŋ ŋga, a zla: “Səsəm tə hedi mə vəl məsəkəŋ seh, a day tə hedi mə kuw məsəkəŋ ta.”» 36Abə dawaŋ tə zlap iyi wa, Pawl a mar ley dar malakw, ɓa, a ɗal mbuh abə tata. 37Tata fuk i haŋ, i ndəvaha a wula ŋga amba ley səməɗaŋ wucum. 38Tata fuk i kəsəsəm halla, məŋgəvday Pawl mə zlapaŋta, a zla: «Heni limeke a nje halla ba.» Abə dawaŋ ta, i lahaw ha əŋ kelek kambuwal.
ទើបបានជ្រើសរើសហើយ៖
Kəzəɗ tə Mələɓ iyi 20: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
