Kəzəɗ tə Mələɓ iyi 17
17
Pawl abə Silas, i nda əŋ Tessalawniŋki
1Pawl abə Silas, i taŋ kəɗi əŋ Amfipawlis abə kəɗi əŋ Apawlaniya, i gwar əŋ Tessalawniŋki. A namba, Yahuda iyi abə biŋ tata kə ɗal mbuh əŋ Bizlaf aka. 2Mənaŋ vah hwayhway, Pawl a nda əŋ biŋ ta. Waŋ tə pis kə yip maakaɗ, a kəɗal yawa abə tata a talaŋ ma mawuzlel tə əŋ Ɗerewel tə Bizlaf, 3a kəsərəkta, a kəgizeŋta abə kataf ta mənaŋ ma tə Bizlaf mə zlap tə a talaŋ Almasihu, sey a zləŋ takwaŋ za, a garaha ŋga za əŋ faŋw tə hedi maməc iyi. Pawl kəzlapaŋta za, a zla: «Yesu, sa mə gizeheni wa seh, ar mbiŋ, Almasihu.» 4Hedi dakayta mə teh zləm iyi seh i kəkuw ma ta za, i jamaha əŋ talaŋ Pawl abə Silas. Mənaŋ wa, lə Gərek iyi mbeh səku abə wala iyi mbeh səku tə əŋ ntaŋw tə hedi sə ndʉlʉk iyi i kəwaŋgaŋ talaŋ əŋ Bizlaf bahayim. 5Ama Yahuda dakayta iyi sərah a ɗalaŋta mbeh səku. I kwasaha məsulah tə hedi malim tə a kataf iyi, i kətəlaŋta ma əŋ hedi makwas iyi, i kəɗal kurzlay əŋ berne. Abə dawaŋ ta izey, i nda əŋ ge Yasaŋw ley pələkaha Pawl abə Silas amba i daha tata a ma tə hedi iyi. 6Ama i kəlimeheta halla, i ŋgaslaha Yasaŋw abə zliŋgeŋ dakayta iyi i deɓta a ma tə talaŋ habay iyi tə əŋ berne ta. I mar ley ja varay, i zla: «Hedi iyi wa, hedi mə gaɗ hedi tə əŋ məŋhayak iyi fuk ley ɗal kurzlay, mənjawa, i kəgwaraha za əŋ nawa. 7Yasaŋw kəkuwta za əŋ ge ŋga! Hedi iyi ta fuk i kəɗal məsəkəŋ mə nda tə abə ma majaw tə Bay Rawma səku, məŋgəvday i kəzlap bay par aka, miya ŋga Yesu.» 8Abə zlap iyi ta wa, i kəjəvəɗaŋta nəf tə hedi makwas iyi abə hedi səndawl tə əŋ berne iyi ta wa za. 9Yasaŋw abə hedi dakayta iyi sey, i vəlaŋta dala za ndagwa əŋ talaŋ habay iyi amba i yakahata.
Pawl abə Silas, i mbə əŋ Bereya
10Əŋ njaɗu kəɗal kwata, hedi makuw ma iyi i ləɓ Pawl abə Silas əŋ Bereya. Əŋ tata i mə gwar seh, i nda əŋ biŋ kə ɗal mbuh əŋ Bizlaf tə Yahuda iyi. 11Hedi tə əŋ Bereya iyi i kəmbaɗ mənaŋ hedi tə əŋ Tessalawniŋki iyi seh halla. I kəkuw ma tə Bizlaf abə nəf ntaɗ. Əŋ waŋ fuk i kəgər ma mawuzlel tə əŋ Ɗerewel tə Bizlaf abə dak wucum amba ley səŋ ma Pawl mə zlapaŋta wa seh, ar ma məndiwiŋ. 12Hedi iyi mbeh səku əŋ faŋw tata i kəkuw ma za. Əŋ faŋw tə lə Gərek iyi, wala tə əŋ ntaŋw sə ndʉlʉk iyi liŋ muwul iyi mbeh səku i kəkuw ma za bahayim. 13Ama əŋ Yahuda iyi tə əŋ Tessalawniŋki i mə zlim Pawl a kəgiz ma tə Bizlaf əŋ Bereya bahayim seh, i ndaha, i mar ley jəvəɗ hedi tə a namba iyi, i dəmaŋta nəf əŋ hedi makwas iyi. 14Mbehmbeh mba, zliŋge tə əŋ kuw ma iyi i lah Pawl əŋ meɗek talafay, ama Silas abə Timawte, i mə nji əŋ Bereya. 15Hedi mə laha Pawl iyi i deɓʉ ha əŋ Atena. Ɓa, i ziŋgehe tata əŋ Bereya abə zlap tə Pawl amba Silas abə Timawte, i mə ndaha viyu əŋ kelek ŋga.
Pawl a kəgiz Labara Səntaŋ Lawayaŋ əŋ Atena
16Əŋ Pawl a kəgəbar Silas abə Timawte əŋ Atena seh, nəf ŋga kədəmaŋgu za mbeh səku əŋ mbiŋ mə gər berne ta mə gweɗi abə kuli iyi mbeh səku. 17A kəɗal yawa abə Yahuda iyi liŋ abə hedi Yahuda iyi səku əŋ biŋ kə ɗal mbuh əŋ Bizlaf. Əŋ lay kə kwas hedi iyi bahayim, a waŋ ta, a waŋ ta, a ɗal yawa abə hedi mbiŋ mə gbam talaŋ iyi. 18Hedi məzəwindi mə səŋ məsəkəŋ iyi, i mə ɗafaŋta ma Epikuri iyi abə Sitawiyki iyi i ndaha i ɗal yawa abə mbiŋ bahayim. Hedi dakayta iyi tə əŋ faŋw tata i ɗəp, i zla: «Hedi bay pakwam wa, a mba i zlap seh mey?» Hedi məzəwindi iyi, i zla: «Kəganah a kəgiz ma tə hedi mə waŋgaŋta talaŋ əŋ kuli iyi tə əŋ hayak par iyi kəvah.» I zlap mənaŋ wa seh, məŋgəvday Pawl a kəgiz Labara Səntaŋ Lawayaŋ tə a talaŋ Yesu abə tə a talaŋ garaha tə hedi əŋ faŋw tə hedi maməc iyi. 19I məlu, i deɓʉ a lay kə ɗal yawa kə mbəzl ma i mə ɗafaŋ ma Areyawpagus, i zlapaŋgu, i zla: «Nini nda i səŋ sərək təkwa lawayaŋ hwa mə giz mba seh viŋgey? 20Hwa kəgizenini məsəkəŋ nini mə səŋ səku, nini mba i səŋ məsəkəŋ ta.» 21Hedi tə əŋ Atena iyi fuk abə hedi madaway manja tə əŋ faŋw tata iyi, i mə nji sey ley giz, aka səku ley teh zləm a zlap lawayaŋ iyi. 22Pawl a gar əŋ faŋw tə hedi iyi tə əŋ Areyawpagus, a ɓət zlap, a zla: «Waa hedi tə əŋ Atena iyi! Sa gər heni kəziber kukus tə kuli iyi tədayday. 23Məŋgəvday, əŋ sa kəpik əŋ berne təheni seh, sa kəgər məsəkəŋ iyi heni mə waŋgaŋta talaŋ za, sa kəlim lay kə məsaw məsəkəŋ ntaɗ za, mə wuzleli a ɗek, a zla: “bizlaf mə tak səŋ.” Məsəkəŋ heni mə waŋgaŋ talaŋ kwa heni kəsəŋza za səku, sa ndaha ley gizeheniza. 24Bizlaf mə ləm məŋhayak abə məsəkəŋ tə ɗəməŋ iyi fuk, mbiŋ seh, ar Bay Bayta tə a talaŋ məsəkəŋ tə wuzlaf iyi abə tə teyek iyi, a kənja əŋ biŋ heni mə ləm tə abə ndəra səku. 25Kwa əŋ kəzəɗ ŋga a kəmba ndəra tə hedi iyi səku, məsəkəŋ mayakaŋ halla, məŋgəvday mbiŋ mə vəl mədəŋcur, nəp liŋ abə məsəkəŋ dakayta iyi fuk#17:25 1 Bay iyi 8:27; Esaya 42:5.. 26Mar abə hedi ntaɗ, kələmaha hedi iyi fuk, kəɗiyta za əŋ məŋhayak. Kəɗiyaŋta waŋ ta, abə hala ta, tata i mə nda i nja əŋ məŋhayak kwata. 27A ɗal məsəkəŋ iyi ta wa amba i mə pələk Bizlaf. Kwa i mbə əŋ tuwah ley pələku seh, kəganah i limza za kəvah. Məndiwiŋ ta seh, Bizlaf mbə guduk abə nakwa seh halla, 28məŋgəvday ma mawuzlel mə zlap, a zla:
“Ar məŋgəvday mbiŋ, nakwa iyi mbə abə nje,
ar məŋgəvday mbiŋ, nakwa iyi kəhuɓəl, nakwa iyi kəlim ley pik.”
Ar mənaŋ hedi dakayta iyi i mə ja dərif təheni iyi i mə zlap, i zla:
“Məŋgəvday, nakwa mambuwaha tə Bizlaf iyi.”»
29«Mənaŋ wa seh, əŋgah nakwa wuziyi ŋga iyi seh, nakwa iyi mba i wulək Bizlaf seh, mənaŋ kuli tə malaway mawaɗ, tə dala, aka səku tə nvəŋ hedi iyi i mə ɗalta tə abə wulək tata, aka səku abə mazla tata səku. 30Ama Bizlaf kəɗiy wulək ŋga a məsəkəŋ mataŋ sə zlezle wa seh halla, məŋgəvday hedi iyi i kəsəŋ ma ŋga səku ndagwa, ama mənjawa, a kəɗafaŋta ma əŋ hedi iyi fuk kwa a tikey ley buw nja tata. 31Məŋgəvday kəɗiy waŋ za əŋ mbiŋ mə nda i mbəzl ma a talaŋ məŋhayak fuk abə kataf ta, kəɗi a hedi mbiŋ mə mayu. Kəgizeŋta za əŋ hedi iyi fuk abə ley garaha hedi ta əŋ faŋw tə hedi maməc iyi!»
32Əŋ tata i mə zlim Pawl a kəzlap a talaŋ garaha tə hedi əŋ faŋw tə hedi maməc iyi seh, hedi dakayta iyi i kəɓasaŋ a talaŋ ŋga. Ama hedi dakayta iyi i kəzlap, i zla: «Nini kəmba i teheh zləm a ma wa a vah par baha.» 33Mənaŋ wa, Pawl a nda ŋga, a yakta. 34Ama hedi dakayta iyi bahayim, i kəkuw ma ta za, ɓa, i ziberʉ. Əŋ faŋw tata, Diyawnisiyus hedi tə Areyawpagus abə wala, i mə ɗafaŋ ma Damaris liŋ abə hedi dakayta iyi baha.
ទើបបានជ្រើសរើសហើយ៖
Kəzəɗ tə Mələɓ iyi 17: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
