Kəzəɗ tə Mələɓ iyi 16
16
Timawte a lah Pawl abə Silas
1Pawl a gwar əŋ Derbe abə əŋ Listira. A namba gula aka, i kəɗafaŋ ma Timawte. Mama ŋga ar lə Yahuda, kəmbaɗ za əŋ hedi tə Almasihu, ama baba ŋga seh, ar lə Gərek. 2Zliŋmana manja tə əŋ Listira iyi abə tə əŋ Ikwaniya iyi fuk i kəzlap ma səntaŋ mbeh səku a talaŋ Timawte. 3Pawl a mba Timawte mə nda abə mbiŋ. A ɓətu, a zlaŋ viɗe, məŋgəvday Yahuda iyi manja tə əŋ hayak ta fuk, i kəsəŋ baba tə Timawte, ar lə Gərek. 4Əŋ berne iyi tata i mə taŋ fuk, Pawl abə Silas, i kəgizeŋta ma majaw tə mələɓ iyi abə tə hedi mə ɗal yawa iyi əŋ hedi makuw ma iyi tə əŋ Urusalima, i ɗəpta amba ley waŋgaŋta talaŋ əŋ ma tata i mə jaw iyi ta. 5Jam talaŋ tə hedi makuw ma iyi i kəlim fagay əŋ kuw ma, a waŋ ta, a waŋ ta, hedi iyi i kəfəfəlaha.
I ɗafaŋ ma əŋ Pawl əŋ Makedawniya
6Pawl abə Silas i kətaŋ hayak tə Firigiya abə Galatiya, məŋgəvday Mimiɗ sə Kweɗek kətakta za ley giz ma tə Bizlaf əŋ Aziya. 7Əŋ tata i mə gwar mbehmbeh abə Misiya, i pələk ley nda əŋ Bitiniya, ama Mimiɗ tə Yesu kəvəlaŋta kataf seh halla. 8Abə dawaŋ ta izey, i taŋ tata kəɗi əŋ Misiya, i bəreŋ əŋ Tarawas. 9Abə njaɗu, Pawl kəlim məsəkəŋ mə nda i ɗal za kəɗi əŋ səsiŋ: a lim lə Makedawniya mə geri a ma ŋga, a ɗalaŋ mbuh, a zla: «Ndaha əŋ Makedawniya#16:9 2 Kwarintʉ iyi 1:16. ley təranini!» 10Mbehmbeh mba, abə dawaŋ tə səsiŋ ta, nini kəpələk kataf za ley nda əŋ Makedawniya, məŋgəvday nini kəsəŋ za Bizlaf kəɗafanini ma amba nini gizeŋta Labara Səntaŋ Lawayaŋ əŋ hedi tə a namba iyi.
Əŋ Filippi, Lidiya kəkuw ma tə Bay Bayta za
11Əŋ Tarawas, nini təɗ əŋ kambuwal, nini nda dəre abə hayak tə əŋ dəməs tə yim tə Samawtaras, ɓa, garaha kafa ta bahayim, nini nda əŋ Neyapawlis. 12Nini gar a namba, nini nda əŋ Filippi, berne titʉz tə əŋ hayak tə Makedawniya, kəmbaɗ za əŋ hayak Rawma mə sla tə a ɗek. Nini kənja za waŋ mbeh səku əŋ berne ta. 13Waŋ tə pis kə yip, nini kətəɗaha tini za əŋ berne ta ley nda əŋ meɗek lakwat, məŋgəvday nini wulək seh nini lim lay ley ɗal mbuh za. Nini nja, ɓa, nini zlapaŋta əŋ wala makwas tə a namba iyi. 14Wala ntaɗ əŋ faŋw tə wala iyi ta aka, miya ŋga Lidiya, mambuwaha tə əŋ berne tə Tiyatira, ar wala mə ber rukut sə pireŋ iyi səntaŋ ləlaw diya. Mbiŋ seh, a kəziber ma tə Bizlaf. A kətehenini zləm, Bay Bayta kərəzaŋ nəf ŋga za, amba ley zlim ma tə Pawl mə giz tə abə dak wucum wa. 15Mbiŋ abə hedi tə ge ŋga iyi fuk i kəlim ley baŋ batem za. Abə dawaŋ ta, ɓa, a ɗafanini ma, a zla: «Əŋgah heni wulək sa kəkuw ma tə Bay Bayta za məndiwiŋ seh, hi ndaha ley nja a ge na.» Ɓa, a takanini wula ley nja a namba.
Pawl abə Silas, i mbə əŋ daŋgay əŋ hayak tə Filippi
16Əŋ pis məzəwindi aka, əŋ nini kənda əŋ lay kə ɗal mbuh seh, hazləma dalay mə ɗal kəzəɗ aka, a ndaha ley gbam talaŋ abə nini. Hazləma ta abə mimiɗ madawar əŋ talaŋ. Mimiɗ madawar ta, kəmbaɗza za əŋ hedi mə gər məsəkəŋ mə nda i ɗal tə a ma iyi. Kəzəɗ ŋga iyi ta i kədahaŋta dala mbeh səku əŋ bay ŋga iyi. 17A mar ley ziberenini abə Pawl, a kəja varay, a zla: «Hedi iyi wa, ar hedi mə ɗal kəzəɗ əŋ Bizlaf iyi tə wuzlaf! I kəgizeheni kataf mə nda i deɓeheni əŋ reh!» 18A kəɗal məsəkəŋ iyi ta mənaŋ wa əŋ waŋ iyi mbeh səku. Əŋ cukwaɗ ta seh, Pawl nəf ŋga kədəm za mbeh səku, a buw nje, a zlapaŋ əŋ mimiɗ madawar ta, a zla: «Abə miya tə Yesu Almasihu, təɗaha za əŋ talaŋ tə wala wa!» Mbehmbeh mba, mimiɗ ta, a təɗaha ŋga əŋ talaŋ tə wala ta. 19Əŋ bay ŋga iyi i mə gər, i gula i lim dala abə wala ta wa səku ba seh, i məl Pawl abə Silas, ɓa, i deɓta a lay hedi iyi mbeh səku a ma tə hedi səndawl iyi. 20I deɓta a ma tə hedi mə mbəzl ma tə Rawma iyi, ɓa, i zlapaŋta, i zla: «Hedi iyi wa, i kəɗal kurzlay əŋ berne takwa. Tata seh, ar Yahuda iyi. 21I kəsərək kukus lawayaŋ iyi, ama əŋ nakwa Rawma iyi seh, nakwa gula i kuwta səku, nakwa gula i ziberta səku.» 22Hedi makwas iyi i kəgaraha əŋ talaŋ tata. Hedi səndawl tə Rawma iyi i zlapaŋta əŋ hedi iyi ley cakwaŋta rukut tə Pawl abə Silas, i zlapaŋta əŋ hedi iyi ley kəlapta. 23Abə dawaŋ tə i kəkəlapta kwata mbeh səku seh, i nahta əŋ daŋgay, ɓa, i zlapaŋta əŋ hedi mə jəɗ ley jəɗta lawlaw. 24Əŋ hedi mə jəɗ mə zlim ma ta, ɓa, a deɓta əŋ biŋ tə əŋ dəməs tə daŋgay. A daraŋta ŋgas tata iyi əŋ walaŋ tə mpay iyi. 25Ŋgəlak njaɗu, Pawl abə Silas, i kəɗal mbuh əŋ Bizlaf, i kəhəmən Bizlaf abə dərif. Hedi tə əŋ daŋgay dakayta iyi i kəteheŋta zləm. 26Mbehmbeh mba, hayak a huɓəl, huɓəl səndawl a huɓəl manjaraf tə biŋ tə daŋgay. Mebiŋ iyi fuk, i rəz mbehmbeh mba, calalu iyi i mə jaw hedi tə əŋ daŋgay iyi tə abə mbiŋ i pəl tata. 27Hedi mə jəɗ daŋgay a fəɗaha. Əŋ mbiŋ mə lim mebiŋ iyi mə rizi seh, a təɗaha masalam ŋga ley ja talaŋ ŋga, məŋgəvday a wulək seh hedi tə əŋ daŋgay iyi i kəhiy tata cuza. 28Ama Pawl a zlap abə fagay, a zla: «Hwa mba i ja talaŋ təkwa səku. Nini fuk, nini mbə a nawa!» 29Hedi mə jəɗ biŋ ta, a ɗəp kahaw, a vaz viyu əŋ biŋ tə daŋgay ta, a kənəna, ləndəŋ a kəju, a ndəv əŋ gədaŋ ŋgas tə Pawl abə Silas. 30Ɓa, a təɗahata, a zlapaŋta, a zla: «Bay Bayta na iyi, sa nda i ɗal amba ley reh seh viŋgey?» 31I ziŋgeŋ zlap, i zla: «Kuwaŋ ma əŋ Bay Bayta Yesu, hwa reh za, hwa abə hedi tə ge təkwa iyi.» 32Ɓa, i gizeŋta ma tə Bizlaf, əŋ mbiŋ abə əŋ hedi tə ge ŋga iyi fuk. 33Əŋ hala ta mba, abə ŋgəlak njaɗu, hedi mə jəɗ hedi tə əŋ daŋgay iyi, a deɓta ley baŋgaha mbəlah tata iyi. Mbehmbeh mba, a lim ley baŋ batem abə hedi tə ge ŋga iyi fuk. 34A deɓ Pawl abə Silas əŋ ge ŋga, a vəlaŋta məsəkəŋ kə zəm. I kəsəsəm za mbeh səku mbiŋ abə hedi tə ge ŋga iyi fuk, məŋgəvday i kəkuw ma tə Bizlaf za.
35Əŋ lay mə daŋgaha seh, hedi mə mbəzl ma tə əŋ Rawma iyi i ləɓaha sewje iyi ley zlapaŋta əŋ hedi mə jəɗ daŋgay iyi, i zla: «Yakaha hedi iyi wa.» 36Hedi mə jəɗ daŋgay a hiyaha, a gizeŋ ma ta əŋ Pawl, a zla: «Hedi mə mbəzl ma tə əŋ Rawma iyi i kələɓaha za, i zla nini yakaheni. Əŋ ma ta wa seh, heni gula i təɗaha izey, hi nda təheni abə zahay.» 37Ama Pawl a zlapaŋta əŋ hedi iyi ta, a zla: «I kətawanini za a ma tə hedi iyi mbeh səku, kwa i kəmbəzlanini ma halla. Nini bahayim, nini hedi tə Rawma iyi, abə dawaŋ ta, i kənahanini za əŋ daŋgay. Mənjawa, i mba i təɗahanini za abə ɓah seh viŋgey? A ɗal halla! I mə ndaha abə talaŋ tata ley pəlanini!» 38Hedi iyi ta i nda i gizeŋta ma iyi ta fuk əŋ hedi mə mbəzl ma iyi tə əŋ Rawma. I kələndəŋ za əŋ tata i mə zlim Pawl abə Silas tata bahayim ar hedi Rawma iyi. 39I ndaha ley ɗəp mbuh a ndəra tata, ɓa, i təɗahata əŋ daŋgay, i zlapaŋta i mə nda tata za əŋ berne ta. 40Əŋ Pawl abə Silas, i mə təɗaha tata əŋ daŋgay seh, i nda əŋ ge Lidiya. A namba, i lim zliŋge iyi i vəlaŋta fagay, ɓa, i nda tata.
ទើបបានជ្រើសរើសហើយ៖
Kəzəɗ tə Mələɓ iyi 16: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
