Kəzəɗ tə Mələɓ iyi 15
15
Yawa kəɗal za əŋ Antakiya a talaŋ ma kə zla viɗe əŋ hayak tə Siriya
1Hedi dakayta iyi i bəreŋgehe əŋ hayak tə Yahudiya, i gwar əŋ Antakiya. I kəɗalaŋta sərək əŋ zliŋge iyi, i zla: «Əŋgah heni kəzla viɗe halla seh, heni lim ley reh halla, mənaŋ ma majaw tə Musa mə zlap.» 2Pawl abə Barnabas, i kəkuw ma ta halla, i kəɗal yawa za mbeh səku abə tata a talaŋ ma ta. I kəɗal wulək za əŋ faŋw tata, Pawl abə Barnabas liŋ hedi dakayta iyi tə əŋ Antakiya i nda za əŋ Urusalima ley zlapaŋta əŋ mələɓ iyi abə hedi mə ɗal yawa iyi a talaŋ ma ta. 3Jam talaŋ tə hedi makuw ma iyi tə əŋ Antakiya i kəvəlaŋta mətər ley nda əŋ pik ta. Əŋ tata i kətaŋ kəɗi əŋ Finikiya abə Samariya, i kəzlap a talaŋ hedi Yahuda iyi səku, i mə buw nja tata kəɗi əŋ Bay Bayta. Labara ta kəvəlaŋta səsəm za mbeh səku əŋ hedi makuw ma iyi fuk. 4Əŋ tata i mə gwar əŋ Urusalima, jam talaŋ tə hedi makuw ma iyi, mələɓ iyi abə hedi mə ɗal yawa iyi i kəkuwta za. I gizeŋta məsəkəŋ Bizlaf mə ɗal iyi tə abə tata fuk. 5Ama hedi makuw ma dakayta tə əŋ faŋw tə Farisa iyi, i zlap, i zla: «Sey hedi Yahuda iyi səku i mə kuw ley zla viɗe, sey i mə waŋgaŋ talaŋ əŋ ma majaw tə Musa.» 6Mələɓ iyi abə hedi mə ɗal yawa iyi i jam ley gər ma ta. 7Abə dawaŋ tə yawa ta, a kəɗal mbeh səku seh, Piyer a gar, a zlap, a zla: «Zliŋmana makuw ma iyi, heni kəsəŋ mar zlezle Bizlaf mə mayaka əŋ faŋw təheni amba sa giz Labara Səntaŋ Lawayaŋ əŋ hedi Yahuda iyi səku, amba i mə zlimʉ, i mə kuw ma tə Bizlaf. 8Bizlaf seh, ar hedi mə səŋ nəf tə hedi dəgənak iyi fuk, kətəlta za əŋ mbiŋ mə kuwta abə ley vəlaŋta Mimiɗ sə Kweɗek mənaŋ mbiŋ mə vəlanakwa wa bahayim. 9Bizlaf kəwuɗakta abə nakwa seh halla: kəbaŋgaŋta nəf tata za məŋgəvday i kəkuw ma za. 10Məŋgəvday a ɗek, mənjawa hi mba i təl Bizlaf abə ley ɗiyaŋta məsəkəŋ sə ndʉlndʉl iyi a gula iyi seh məŋgəvday a mey? Kwa nakwa, kwa dide tə dide takwa iyi fuk, nakwa gula i ɓətu səku. 11Mənaŋ nakwa mə kuw ma wa, nakwa kəlim reh za kəɗi əŋ səntaŋ tə Bay Bayta Yesu, mənaŋ mba bahayim, tata i reh za.»
12Abə dawaŋ ta izey, hedi makwas iyi fuk i nja tete, i kəteheŋta zləm əŋ Barnabas abə Pawl məŋgəvday i mə gizeŋta məsəkəŋ mə har hedi iyi, əŋ Bizlaf mə ɗalu kəɗi əŋ tata əŋ faŋw tə hedi Yahuda iyi səku. 13Əŋ tata i mə cukwaɗ ley zlap, Yakuba a ɓət zlap, a zla: «Zliŋmana makuw ma iyi, hi teheke zləm! 14Simaŋw#15:14 Matta 4:18. kəgizeheni za abə kataf ta, mənaŋ Bizlaf mə jəɗ hedi tə əŋ məŋhayak iyi ley mayta, amba i mə mbaɗ əŋ hedi ŋga iyi. 15Ma iyi ta wa, ntaɗ abə tə hedi mə giz ma abə miya tə Bizlaf iyi, mənaŋ ma mawuzlel tə əŋ Ɗerewel tə Bizlaf mə zlap, a zla:
16“Bay Bayta, a zla: Abə dawaŋ tə wa, sa ziŋgehe za,
ley ləm ge tə Dawuda mahurum sey,
sa ləmza za, sa garahaza za a lay ta.
17Abə dawaŋ ta izey, hedi dakayta iyi fuk i pələk Bay Bayta Bizlaf za,
ayaw, hedi iyi fuk sa mə ɗafaŋta ma amba i mə mbaɗ əŋ hedi na iyi seh, i zibereke za.
Ehe, məsəkəŋ Bay Bayta Bizlaf mə zlap, a zla: 18kəɗal məsəkəŋ iyi ta za mar zlezle#15:18 Amaws 9:11-12..”»
19Məŋgəvday a ɗek, Yakuba a zlap baha, a zla: «Nakwa iyi mba i zləŋgaŋta takwaŋ əŋ hedi Yahuda iyi səku wa səku, mə buwaha nje kəɗi əŋ kelek Bizlaf iyi. 20Ama gelɓe nakwa iyi wuzleleŋta letir wa: i mba i zəm zli tə abə ndəra dəlay mandaha tə kukus mavəl əŋ kuli iyi səku, i mba i ɗal barlaw səku, i mba i zəm zli mə tak zla wula səku, kwa məmbəz bahayim. 21Məŋgəvday mar zlezle hedi mə ɗal yawa iyi i kəgiz ma majaw tə əŋ Ɗerewel tə Musa əŋ berne iyi fuk, i kəjeŋgʉ əŋ biŋ iyi kə ɗal mbuh əŋ Bizlaf əŋ pis kə yip fuk.»
I kələɓaŋta letir za əŋ hedi Yahuda iyi səku
22Abə dawaŋ ta izey, mələɓ iyi abə hedi mə ɗal yawa iyi liŋ abə jam talaŋ tə hedi makuw ma iyi fuk i kəɓət wulək za ley may hedi dakayta iyi tə əŋ faŋw tata, ley ləɓta əŋ Antakiya abə Pawl liŋ Barnabas. I may Yahuda, i mə ɗafaŋ ma baha Barsabas abə Silas. Tata bək tata iyi fuk, ar hedi sə ndʉlndʉl iyi tə əŋ faŋw tata. 23I ləɓta abə letir wa: «Nini mələɓ iyi abə hedi mə ɗal yawa iyi, zliŋmana takwa makuw ma iyi, nini kəɗalaheni mbele əŋ zliŋmana takwa Yahuda iyi səku manja tə əŋ Antakiya, tə əŋ Siriya abə tə əŋ Silikiya. 24Nini zlim seh, hedi tini dakayta iyi i kəndaha za əŋ kelek təheni, i kəwuzlaɗaheni talaŋ za, i kəjəvəɗaheni za abə zlap tata iyi. Ama nini seh, nini kələɓahata halla. 25Məŋgəvday a ɗek, nini kəjaw ma za ntaɗ ley may hedi iyi ley ləɓta əŋ kelek təheni. I nda za abə zliŋmana takwa iyi Pawl abə Barnabas, 26hedi mavəl talaŋ tata iyi ley ɗal kəzəɗ tə Bay Bayta takwa Yesu Almasihu. 27Nini kələɓaheni Yahuda abə Silas za, i gizeheni labara nini mə wuzlel tə əŋ ɗerewel wa za. 28Məŋgəvday a ɗek, kəŋgəmaŋ za əŋ Mimiɗ sə Kweɗek abə əŋ nini ley ɗiyaheni məsəkəŋ sə ndʉlʉk səku wa, sey ma nini mə wuzleleheni wa dap, ehe, ma iyi ta: 29Hi mba i zəm zli mandaha tə kukus mavəl əŋ kuli iyi səku, hi mba i zəm məmbəz səku, kwa məsəkəŋ mandaham maɓərət, i ɓərət iyi, hi mba i ɗal barlaw səku. Əŋgah heni kəɗal məsəkəŋ iyi fuk za lawlaw seh, heni kəɗal məsəkəŋ səntaŋ za. Hi nja lawlaw!»
30I yakta, i nda tata əŋ Antakiya. I kwas hedi makuw ma iyi, ɓa, i vəlaŋta letir ta. 31I jeŋge letir ta, hedi iyi fuk i səsəm məŋgəvday i kəvəlaŋta fagay. 32Yahuda abə Silas seh, tata abə talaŋ tata i kəmbaɗ za əŋ hedi mə giz ma abə miya tə Bizlaf iyi, i kəzlapaŋta əŋ zliŋge iyi ha nja mbeh səku ley vəlaŋta fagay abə ley nja lawlaw əŋ kuw ma tata. 33I kənja a namba mbizek əŋ Antakiya, ɓa, i wuɗak əŋ zahay abə zliŋgeŋ iyi, ley ziŋ tata əŋ kelek hedi iyi i mə ləɓahata. 34[Ama Silas a ɗal wulək ley nja a namba, ama Yahuda a ziŋ taataɗ ŋga əŋ Urusalima.] 35Pawl abə Barnabas i kənja mbeh səku əŋ Antakiya, abə hedi iyi mbeh səku, i kəsərək hedi iyi ley giz Labara Səntaŋ Lawayaŋ, i giz ma tə Bay Bayta.
Pawl abə Barnabas, i kəwuɗak tata za
36Waŋ mbizek abə dawaŋ ta, Pawl a zlapaŋ əŋ Barnabas, a zla: «Nakwa iyi ziŋ ley gəraha hedi makuw ma iyi tə əŋ berne iyi fuk əŋ lay nakwa iyi mə gizehe ma tə Bizlaf Bay Bayta, amba ley gərahata, i mə nji seh viŋgey.» 37Barnabas, a kəmba i ŋgasl Yahwana, i mə ɗafaŋ ma Markus wa, mə nda abə tata. 38Ama Pawl kəkuw halla, məŋgəvday Markus kəwuɗak za abə tata mar tə əŋ Pamfiliya, kəyak kəzəɗ za, kəzibereta əŋ kəzəɗ halla. 39Pawl abə Barnabas i kəzlar nje halla ha i wuɗak tata. Barnabas, i təɗ abə Markus əŋ kambuwal, i nda tata əŋ Kiprus. 40Pawl bahayim, a may Silas i nda tata, hedi makuw ma iyi i yakta əŋ səntaŋ tə Bizlaf, ɓa, i nda tata. 41I taŋ Siriya abə Silikiya, i kəvəlaŋta fagay əŋ hedi makuw ma iyi tə a namba.
ទើបបានជ្រើសរើសហើយ៖
Kəzəɗ tə Mələɓ iyi 15: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
