Lúkasa 5
5
Ɔmbɔs wá maŋál na Ɔmbɛ́lɛ́gɛ́n wá bafɔ́nɔfɔ́n béní
(Mat 4.18-22; Mál 1.16-20; Sáŋ 21.1-11)
1Buɔ́s búmodió, Yésu mabá ndényé agá gɛsál gá manáŋ abɔ́sa bábɛ́laná ká Genesalɛ́t. Giŋi gá band táta wɔ́ gá gúbɛ́dɔ́lɛ́gɔɔn moóny má Gɔ́dany. 2Uwaán bilu biándɛ bisuŋén agá gɛsal gá manáŋ abɔ́sa; bosogi mabá bámámán gúsel, básɔ́ga moli mɔ́b. 3Yésu gubɔ́lɛ́g agá gilu gá gímoom, gímáabá gá Símune, uwɔ́ guɔyɛdɛn Símune ká wélí gɛ́ agá gɛsál, úsɛdɛn gɛ́ siɔdɛd agá madɛ́ga, ɔwɔ́ gúlukumin. Umabá ɔwɔ́ uguány agá gilu, ufúnyifunyi giŋi gá band. 4Umáal úmáman gugálá, uganyɛ gá Símune ká: «Bɛ́sɛdɛ́n siɔdɛd agá kɔɔ́m gá guyuum, nuétenyi mooli mán, gá guadɛgan muɔbɔ.» 5Símune guondinyi wɔ́ ká: «Ɔgúnɔ́gɔn, dɛmámán guɔ́bɛ́gɔn budug gidigid, ta mfɔ́na, ta anaány, agá gugál gɔ́w, ngeguéti buoli.» 6Abál nɔ́, abádɛgɛn giod gá muɔbɔ, nɛnama nɛ́nyá ká mooli mɔ́b umuábanyɛg gulafalaf. 7Abábɛ́lɛ́gɛn buɔbɔ bá gilu gíméesién agá gɛsál na ɛmbɔ́g ká boól básiágɛ́n bɔ́ ɔmbɔ́g; abásiám. Ɔlɔŋ na bɔsɔ́gɔ́ abaány, obófuógi muɔbɔ agá bílu bim biándɛ nɛnama nɛ́nyá ká, ibiábanyɛg gubíŋen agá madɛ́ga. 8Símune Piéle máal na guán anaány, uwagɔɔn Yésu agá ambana, uganyɛ ká: «Ɔgúnɔ́, ɛmbɛ́ ayáyá nam, gágual ká inyɛ afalafal.» 9Búnyá, buwa móol wɔ́ ɔlɔŋ na bɔsɔ́gɔ́ gidigid bámáabá naga, anyɛ́ bámaán gɛdám gá muɔbɔ ɛgɛ́ bámáadɛ́gɛ́n. 10Sáka, na Sáŋa baan bá Sebedé mabá begúl bá Símune. Bɔ́bɔ́ sɔ́n, buwa mádɛ́gɛ́n bɔ́. Yésu ganyɛ gá Símune ká: «Adɛbiá buwa, gubanyɛg nɛ́nuán, ogond osóg band.» 11Básiámán na bilu agá gɛsál, abátɛ́n buanda gidigid, abálád wɔ́.
Gieŋugie gá oŋún-ŋun
(Mat 8.1-14; Mál 1.40-45)
12Anyɛ́ Yésu máabá umányɛ agá tísɔn ondodió, oŋúnuŋún umáabiánán bɛmálámáns mabá kɔ́. Anyɛ́ umáan Yésu, uwagɔɔn wɔ́ agá busió nɔbɔl egegus. Uwedúm gubísógólonyi wɔ́, wɔyɔ ká: «Ɔgúnɔ́, émébíléné, anyɛ bágɔnsɔgɔn#5.12 Gunúma uguány mabá guóndonyi mɔnd bíle agá busió bá Gɔdányá Alɛ́ŋɛ́d Lef 13.46.» 13Yésu guganɔn ɔmbɔ́g, gúbísíd mɔnd uwaány, uganyɛ ká: «Ooo, mmádáb gúgusɔgɔn, éŋúg.» Kɔ́ nɔ kɔ́, iŋún iyaman. 14Yésu gusásɛ́d wɔ́ ká udiɔyɛ́dɛ́n ta mɔnd, uganyɛ gág ká: «Ɛmbɛ́ gebídíyé aga aságɔsag, ónd éŋín bɛbiág bá gɛ́sɔgɔna gusúg, Kɔɔ́kɔ anyɛ́ Moyíso mɔ́ɔyɛ́d: Ány bágabia bulinsi ká anyɛ asɔgɔ́nán.» 15Ta nɔ́, ɔfɛ́n wág ábaan gɔban na busió na gubiɔ́yɔ. Bianta bá biŋi bá band bɛ́gɔ́sa gá gúbɛ́dɔ́lɛ́gɔɔn wɔ́, bámba giéŋugie gá ɛgɔnɔ sɔ́b. 16Ɔwɔ́, umabá ubɛ́gɔ́gɛ́d agá giɔ́sɔ́ŋɔliɔ́ gá guobísógólónyí.
Yésu méŋúgí ginsúgule
(Mat 9.18; Mál 2.1-12)
17Buɔ́s búndodió Yésu mábá ufúnyifunyi, na Bafalisiɛŋ#5.17 Bafalisiɛ́ŋ nyɛ gimbi gá band bá Beyúdɛn báládaan bisele bá Moyíso bese na bese, bónd bɔ́yɛ́kɔnɛn manda mómodió, na bóŋ bisele mabá kɔ́. Bómóolónín agá bɛdɔŋ gidigid bá biéns bá gus bá Galilé, bá Yudé, na bá Yelúsalɛm. Bugaga bá Ɔgúnɔ́ mabá naga ká wéŋúgenyi band. 18Band abámɛ́nɛn, bámabɛ́dɔgaan mɔnd agá buanda anyɛ nɛbɛd, umabá ginsúgule; bámambá nŋili yá gubíŋínyi wɔ́ agá gians, ká bág wɔ́ agá busió bá Yésu. 19Anyɛ́ giŋi gá band máabá filíŋidiŋidi, giás gá gúbíŋínyi wɔ́ dɛmabá. Abábɔ́lɛ́g agá nsaga, abágadɛd yɛ́, ebéseli gɛ́ gadágadá wa band, agá busió bá Yésu. Gɛ́mabá ɛmbɛdiá agá akan. 20Wánán guádáb gɔ́b, uganyɛ gá mɔnd ká: «Mmágɔnɛ́nɛ́n bɔbɛ bɔ́w.» 21Bóŋ bisele na Bafalisiɛ́ŋ obónd gá guanɔna bɔ́biɔ́yɔɔn ɔgɔ́b gá ɛdɛm ká: «Búnúm bɔbɔnd ebue búsíganá Gɔdányá ana e? Ányá unyá bágútɛ́nɛn sɔ́gɔ bɔbɛ bág, gúmén gúdiál Gɔdányá e?» 22Anɛ́ Yésu máalɛnsán ɛmbɛ́dágɛ́dɛ́n sɔ́b, uganyɛ ká: «Góbúsió bá giág núbianana isiány ɛmbɛ́dágɛ́dɛ́n e? 23Búnúm búnyá fɛɛ́d fɛɛ́d gual, ɔ́mɔ́yɛd ká: “Mmágɔtɛ́nɛn bɔbɛ bɔ́w”, ɔ́gɔ́ guɔyɛd ká: “Adɔ́g ndénye, ánda e?” 24Ooo! Nŋuámba gunúlínsi ká Mɔɔn wá mɔnd aya egegus, gúbianan bugaga bágútɛ́nanɛn band bɔbɛ bɔ́b.» Uganyɛ gá ginsúgule ká: «Mmaál gɔ́w ká, adɔ́g ndényé, gɔ́lɔ nɛbɛd nɔ́w, ɛmbɛ́ ɔgɔwɔ.» 25Kɔ́ nɔ kɔ́, mɔnd gagal gagal gudélímin ndényé, band gidigid lɛ́ŋá wɔ́, uwɔgɔ́l nɛbɛd nág, gɔb agág gá nuyá wuúl wéŋeen Gɔdányá nugúm. 26Ubuekémi band gidigid, abáb gá guéŋen Gɔdányá nugúm, na buwa gidigid bɔ́yɔ ká: «Dimaán bíkékén bá manda ínen.»
Yésu mábɛ́lɛ́gɛ́n Léfi
(Mat 9.9-10; Mál 2.13-17)
27Agá gélem ány, Yésu gudɔ́mb, uwɔ́ guán eduús tás ɔfɛ́n ká Léfi, umabá ilukié agág gá kɔɔ́m gá buol. Uganyɛ gág ká: «Ɛ́lad.» 28Uwatɛɛ́n manda gidigid, uwadɔg, uwɔb gá gúládan Yésu. 29Gɔɔ́gɔ gɔ́g Léfi máadánán gianta gá ɔnyɔ́ góbusió bá Yésu agág gá nuyá. Giŋi gá bedús taás na band bóndodió mabá kɔ́ ilukié bányánan ɔlɔŋ nɔbɔ. 30Bafalisiɛ́ŋ na bóŋ bisele gudúm bisɔ́mɔnɔ bɔ́yɔ gá bafɔ́nɔfɔ́n bág ká: «Gá giág núnyánaná nubúwánan na bogól taás na bél manda amabɛ e?» 31Uganyɛ gɔ́b ká: «Saá band bányá giligil bámbaná aŋanyány, gɔɔ́gɔ bánɔ́maná bámbaná aŋanyány. 32Gɔdányá dɛɛ́gɔndɔ́m gobúsió bá band banyá besi, gɔ́ɔgɔ góbusió bá bél manda amabɛ́, ká bénúgi gusɔ́d, básɔ́mb gɛgɔnd gɔ́b gá mɔ́.»
Nŋófúny agá giáy gá gubílég manyán
(Mat 9.14-17; Mál 2.18-22)
33Bafalisiɛ́ŋ ganyɛ gá Yésu ká: «Bafɔ́nɔfɔ́n bá Sáŋa na bás gubílégen manyán bigúl bim bónd bóbísógólonyi. Bɔ́w nyánan, bábúwánan.» 34Uwɔ́ gɔ́b ká: «Nunyɛ bágual nual ká begúl bá muát gigiŋ bílég manyán agá budɔ́mb bá gigiŋ gigúl muát budɔ́mb nyá ɔlɔŋ nɔbɔ e? 35Mɔɔ́s guúlen ɔmɔ́ muát gigiŋ genuélíkinyi bɔ́, igiány gigúl bégenúbílég manyán mɔ́ɔs amaány.»
Manda ɔmɔgɔ́s na má bilunu
(Mat 9.16-17; Mál 2.21-22)
36Yésu guand gudúmín bɔ́ nsab: «Ta mɔnd dɛbá bágusɔ́mb giéns gá gɛla gɛgɔ́s ká wégíd gilunu gá gɛla na gɛ́, úmáal nɔ́, umégús gɛla gɛgɔ́s. Giéns gá gɛla gɛgɔ́s na gilunu gá gɛla dɛgalɛ́ŋanɛn buanda búmoom. 37Anaány mɔnd diábáná sɔ́n báguág magɛ́b mɔgɔ́s agá bilunu bá mubeŋe bámáayɛ́ŋaán na gɛɛmf; ámaál nɔ́, magɛ́b ɔmɔgɔ́s guáda mú, magɛ́b ódig, áyɛ́n mubeŋe. 38Búguófon gɔg guágaan magɛ́b mɔgɔ́s agá mubeŋe mugɔ́s. 39Mɔnd gidigid umánúbúwa gilunu gá magɛ́b digúbíléne magɛ́b mɔgɔ́s. Gágual ká uguɔ́yɔ ká: “Gilunu gá magɛ́b nyɛ bese.”»
ទើបបានជ្រើសរើសហើយ៖
Lúkasa 5: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
