Lúkasa 4
4
Mbuge agá gɛsɛ́sɛ
(Mat 4.1-11; Mál 1.12-13)
1Yésu máal naguám agá asa wá Yuludɛ́ŋ uganyɛ ofuógón na Ɛsámb yá Mefúny, iyádɔ́m wɔ́ agá gɛsɛɛ́sɛ, 2Uwedúmbi kɔ́ medug etín ándɛ, sátan siɔ́bɛ́dɔɔ́n wɔ́, ta buanda udɛmanyánan mɔ́ɔs amaány. Medug máal nágɔdɔ́mbɔ, nsana iyadɛgɛn wɔ́. 3Sátan ganyɛ gág gɔ́g ká: «Ɔ́gɔ meliŋítas anyɛ mɔɔn wá Gɔdányá, ɔyɛ́dɛ́n nɛdany enié, nɛɛ́y gɛnyɔka.» 4Yésu guondinyi wɔ́ ká: «Mbɔbɔnɔ ya Gɔdányá guɔ́yɔ ká: Saá gɔ́ɔgɔ manyán málaná ká mɔnd sɔ́dɔɔn.» 5Sátan gɔb naga pát ugumuana, agá mɔɔn wá gɛsɛgɛl, uwedíye wɔ́ bɛdɔŋ bá gus gidigid, 6uwand guɔyɛd gág ká: «Ngagufá bugaga gidigid, na nugúm agá bɛdɔŋ ibiány gágual ká bámamfá mɔ́, inyɛ béguéŋin mɔnd gidigid mbílénené. 7Aŋuá gɔg, éméngúmenyi, agabia mɔ́ gidigid.» 8Yésu ganyɛ gág ká: «Búnyɛ buɔ́ŋɔ́n agá mbɔbɔnɔ ká: Agúbianan ká égúményi Ɔgúnɔ́ Gɔdányá ónd álaan wɔ́ buol ɔwɔ́ eŋényé.» 9Uwɔban Yésu Yelúsalɛm agá ɔdɔ́nd wá ɔnyɛb, uganyɛ gág ká: «Ɔ́gɔ anyɛ mɔɔn wá Gɔdányá, bɛ́nɛɛ́n águá egegus; 10gágual ká búnyɛ́ buɔ́ŋɔ́n ká: Ugéŋin ɛngɛlɛs bág bugaga bágúgununa. 11Búnyɛ sɔ́n buɔ́ŋɔ́n ká: Bágagúbɛ́dɔ́gaan ɔgɔ́b gá ɛmbɔ́g, nɛnama nɛ́nyá gɛgɔnd gɔ́w dibúbén agá nɛdany.» 12Yésu ganyɛ gág ká: «Búnyɛ buɔ́ŋɔ́n agá mbɔbɔnɔ ya Gɔdányá ká: Ɔdiɔ́bɛ́dɔ́n Ɔgúnɔ́ Gɔdányá wɔw.» 13Umáal ná guman insiŋi ság gidigid gá guɔ́bídɔɔn Yésu, uwadɔ́mb, uwebídenyi buɔ́s búmodió.
Gubanyɛg gá buól bá Yésu agá giéns gá gus gá Galilé
(Mat 4.12-17; Mál 1.14-15)
14Kányɛ gɔ́g Yésu móond Galilé, uganyɛ ofuógón na bugaga bá Ɛsámb yá Mefúny. Anaány nugúm nág máasálámándán agá giéns gá gus igiány gidigid. 15Umefúnyifúnyi agá bians bá mbísógól bɔ́b bá Beyúdɛn, band gidigid ebedúm gugúmenyi wɔ́.
Band bá Násalɛd méfénín Yésu
(Mat 13.54-58; Mál 6.1-6)
16Yésu guond Násalɛd kɔɔ́m umáagɔmɔ. Uwebíŋín gɔɔ́gɔ anyɛ́ umáabá wala agá gians gá Beyúdɛn buɔ́s bɔ́b bégúdúkid, uwedélímin ká úbánan mbɔbɔnɔ ya Gɔdányá. 17Ebéŋín wɔ́ mbɔbɔnɔ ya ibús Isayí. Anyɛ́ umáaganɔ́n yɛ́, uwagua agá kɔɔ́m búnyá buɔ́ŋɔ́n ká:
18Mefúny má Ɔgúnɔ́ nyɛ agamia
gágual ká, úgundɔ́bɔ́n uwond uwandɔ́m
ká yɔ́yɔɔn basɔgasɔga ndág ya nsɔ́m.
Ká yɔ́yɛdɛn biɔ́l giaŋɔna gɔ́b
Yónd yɔ́yɛdɛn bebúdebude ká bágaand gubanyɛg guánaan,
yáŋɔ́n ebe bányá agá nusésídény
19yónd yɔ́yɛdɛn bɔ́ sɔ́n ká yɔŋ eye Ɔgúnɔ́ díyenyé bɔ́ bese waga.
20Yésu máal na guman gubanaan, uwɔlɔ́lɛ́d mbɔbɔnɔ, uwondinyi eŋél buol wa gians gá mbísógól gá Beyúdɛn, uwelukumin, band gidigid bámáabá kɔ́, abádál wɔ́ eŋís. 21Uwedúm guɔyɔɔn bɔ́ ká: «Ánulɛnsá ká ínen eye, inyɔ́ŋ esie móbífuógídónyí gá banuá numbídɔ́lɛ́gɔnɔ́.» 22Band gidigid mɔyɔ́ ká gugál gág nyɛ́ bese, béméŋemeŋ, bónd bɔ́yɔ ká: «Saá mɔɔn wá Yɔ́sɛba ewúné a?» 23Uganyɛ gɔ́b gɔg ká: «Gɔb uguányɛ, núndúmín nsab inyá ká: “Aŋanyány bígódínyí aŋuá muát.” Nuónd nuál gám ká: Disaman guɔ́bɔ́n manda gidigid ányá guala Kafalanahúm, alá sɔ́n nɔ́ aya ɔgɔ́w gá gɛlámban.» 24Uganyɛ sɔ́n ká: «Ɛ́ɛŋ, ngúnuɔ́yɔɔn ká ibús digúgúme agagá. 25Agá meliŋítas, ngúnuɔ́yɔɔn ká, agá gɛdɔŋ gá Ísalayɛ́la, bisi#4.25 Bómodio guɔ́yɔ ká: bisig bá bagánd mabá giod agá gigúl gá ibús Elí. Anyɛ́ dɔbɔl máasɔ́mbɛ́g duɔŋ dúdadɔ na iyól ɛ́tɛ́ndád, ɔndɔmɔ uwágua agá gɛdɔŋ gidigid; 26ta anaány, Gɔdányá dimadɔ́m Elí aga gisi ta gímoom, asiá aga gisi gá agánd wa tísɔn wa Salɛ́pɛ́ta gínyá agá giéns gá gus gá Sidɔ́ŋ. 27Beŋúnuŋún mabá sɔ́n giod agá gɛdɔŋ gá Ísalayɛ́la gigúl Elisé máabá ibús, ta omoom wa guéŋúg asiá Namána wa gɛdɔŋ gá Silí.»
28Band gidigid bámáabá agá gians gá mbísógól ɔbɔ́b ilób anyɛ́ bɔ́mɔ́ɔb gugál uguány. 29Ebédélímin ndényé, abáb gá gútuŋe wɔ́ ká waám ɔgɔ́b gá tísɔn, abáb naga agá ɔduɔ́ wá gɛny, kɔɔ́m tísɔn wɔbɔ máabá afuágán ká bédídig wɔ́ wáguá gúsigúsié. 30Ta anaány, uwandɛn gadágadá wɔ́bɔ, uwadɔ́mb.
Yésu mémí giád gá gíliíndié agá nuɔ́l ná mɔnd
(Mál 1.21-28)
31Yésu gudúnúg agá tísɔn wá Kafalanahúm, unyá agá giéns gá gus gá Galilé. Uwefúnyifunyi bɔ́ buɔ́s bá gúdúkid bá Beyúdɛn agá gians gá mbísógól. 32Band meméŋeméŋ giod na gufúnyifunyi gág, gágual ká gúmabá anyɛ gá ofuŋ udióbiófónó gá mɔnd. 33Agá gians igiány, mɔnd mabá kɔ́ umáabiánán giád gá gíliíndié, uwánsɛ́d magɔ́gɔ́n uganyɛ ká: 34«wɛ́ɛy, Yésu wa Násalɛd, agúdiámba na buóny e? Éguúl ká ésidífúfí e? Ngúlɛnsan bɔbɔnd ányá, anyɛ Ɛsámb yá mɔnd Gɔdányá nyá gɔdɔ́m.» 35Yésu guánsɛ́dɛn gɛ́ uganyɛ ká: «Lúŋú pɔ́! Ónd aám agá nuɔ́l ná mɔnd uwaány» igiádiá wɔ́ egegus ɔgɔ́b gá busió, igiám ta gugíd wɔ́. 36Band gidigid ebédúm guméŋemeŋ, bɔ́biɔ́yɔɔn bɔ́bɔ́ na bɔ́bɔ́ ká: «Kasɛ́ nɛnama ná gual enie e? Mɔnd ewe gúbémbenyi biád bá bíliíndié, wɔyɔ gá bɛ́ ká biáman, biáman anyɛ́ usɔ́guɔyɛd.» 37Anaány nugúm ná Yésu moól núbiɔ́yɔ́ agá giéns gá gus gidigid.
Biéŋugie
(Mat 8.14-17; Mál 1.29-34)
38Umáal wámaan agá gians gá mbísógól gá Beyúdɛn, uwébíŋín agá gians gá Símune. Inyódió agány Símune mabá ɛmbɛ́diá unúma gágual ká nuɔ́l nág mabɔ́lɛ́g, obóbísógólidi Yésu ká waál buanda. 39Uwabɛ́sɛdɛnɛn wɔ́, uwánsɛ́dɛn gú ká guélíki, uguélíki, kɔ́ nɔ kɔ́, agánd uwedúm guamban bɔ́ buanda bágúnyá. 40Ɔɔny máal na guabɛ́dɛ́mɛ́n na niɔ́b, obólonin Yésu band gidigid bámáabá bánúma anama yá ɛgɔnɔ gidigid, uwadála sig mɔnd a ɛmbɔ́g, ebéŋúgeen. 41Biád bá bíliíndié sɔ́n mámáan aga giod gá band. Bímabá biánsa, biɔ́yɔ ká: «Anyɛ Mɔɔn wá Gɔdányá o!» Umelég bɛ́ na bugaga gidigid ká bɛ́dɛ́gálɛ́d gágual ká bɛ́malɛnsán ká unyɛ Kilíse.
Guélíki gá Yésu Kafalanahúm
(Mál 1.35-39; Mat 4.23)
42Kɔɔ́m máal ná gubála, uwaám, uwɔb agá giɔ́sɔ́ŋɔliɔ́, biŋi bá band mambá wɔ́. Anyɛ́ bámáal na guɔfuɔ́gɛ́n wɔ́, abámbɛd ká bɔ́lɔ́bɔn wɔ́, ká udiádɔ́gán nɔbɔ. 43Uganyɛ gɔ́b ká: «Búguófon ká yɛɛ́b guɔyɔ́ sɔ́n ndág ya nsɔ́m ya Bufuŋ bá Gɔdányá agá bɔtísɔn bóndodió, gágual ká, búbú imóol gá bɔ́.» 44Anaány umóol wɔ́yɔ ndág ya nsɔ́m iyaány, agá bians bɔ́b bá mbísógól bim bá giéns gá gus gá Yudé.
ទើបបានជ្រើសរើសហើយ៖
Lúkasa 4: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
