Lúkasa 22
22
Bóguóŋon Yésu ɛdɔg
(Mat 26.1-5,14-16; Mál 14.1-2,10-11)
1Buɔ́s bá budɔ́mb bá bɛnyɔka bá kand ginudúgíné bábɛ́laná ká budɔ́mb báguáŋɛ́g bá Beyúdɛn mabá búgányɛ egúy. 2Bɔgɔ́gɔ na bóŋ bisele mambá nŋili yá guɔ́n Yésu, ta anaány, bámabá bédíne band. 3Sátan guad gubíŋín Yúdasa Isikalióto umáabá agá ɔlɔŋ wá bát na bándɛ. 4Uwanagálá ɛdɔg na bɔgɔ́gɔ, na bebíd ɔnyɛb ká bɔ́bɔ́n nɛnama ɛnɛ́ ugenúduún bɔ́ Yésu. 5Band abaány ɔbɔ́b bese, obónd ɔbɔ́bɔ́n ká béŋin wɔ́ muonyi. 6Uwádáb, uwedúm guamba ginɔ́g gá gɛsɛgɛl ká úduún bɔ́ Yésu band dɛlɛnsɛ.
Bɛbiándɛ́nɛ́n bá budɔ́mb bá guáŋɛ́g bá Beyúdɛn
(Mat 26.17-19; Mál 14.12-16)
7Buɔ́s bá budɔ́mb bá bɛnyɔka bá kand ginudúgíne ubuásiám. Búbú buád bésígene baan bá bɛdɔ́mbá ɛbɛ́ báganúnyánan buɔ́s bá budɔ́mb bá guáŋɛ́g bá Beyúdɛn. 8Yésu gudɔ́m Piéle, nág ná Sáŋa, uganyɛ gɔ́b ká: «Ánɔ́b guadídábɔ́nɛ́n budɔ́mb bá guáŋɛ́g bá Beyúdɛn.» 9Obófún wɔ́ ká: «Nány ambaná ká diádábɔ́ná bɔ́ e?» 10Uwondinyi bɔ́ ká: «Anyɛ́ nugegúnúbíŋen agá tísɔn, nugegúlumen na anɔ́mandɔ na iseny yá madɛ́ga agá ɔduɔ́, núlád wɔ́ agá gians ɛgɛ́ ugegúnúbíŋin kɔ́, 11nuɔ́yɛdɛn muát nuyá ká: “Ofúnyifúny maál ká: gɛndaŋiá ɛgɛ́ ngegúnúdúmbenyi budɔ́mb bá guáŋɛ́g bá Beyúdɛn na bafɔ́nɔfɔ́n bám nyɛ nány e?” 12Ugegúnúdíye gianta gá giéns gá gians ugumuana, gínyɛ na buanda gidigid buófonó, núdídábɔ́nɛn budɔ́mb bá guáŋɛ́g bá Beyúdɛn.» 13Abáb, ɔbɔ́fuɔg buanda gidigid Kɔɔ́kɔ anyɛ́ umɔ́ɔyɔɔ́n bɔ́, abánámba manyán má budɔ́mb bá guáŋɛ́g bá Beyúdɛn.
Manyán má Ɔgúnɔ́
(Mat 26.26-29; Mál 14.22-25; 1Kɔ 11.23-26)
14Gɛsɛgɛl máal gímeége, Yésu gudúm gunyánan na bedúmeb. 15Uganyɛ gɔ́b ká: «Nsemeny gubíléne ká dínyá manyán má budɔ́mb bá guáŋɛ́g bá Beyúdɛn ɔlɔŋ nanɔ yaál imányɛ ndɛbanyɛ́g guɔ́bɛ́gɔɔn. 16Búnyɛ nɔ́, ngúnuɔ́yɔɔn ká ndɛgand gunyá mɔ́ guám buɔ́s ubú búgonúbífuógi agá Bufuŋ bá Gɔdányá.» 17Uwɔgɔ́l endeŋe, uwéŋin Gɔdányá nukany, uganyɛ ká: «Ɔ́nugɔ́l endeŋe ewe, núbúwánan wɔ́ banuá bem. 18Búnyɛ nɔ́ ngúnuɔ́yɔɔn ká, gubanyɛg nɛnuán, ndɛgand gubúwá magɛ́b gɔb águám anyɛ́ Bufuŋ bá Gɔdányá genuúl.» 19Uwand gugɔ́l gɛnyɔka umáal úméŋín Gɔdányá nukany, uwáns gɛ́, uwéŋin bafɔ́nɔfɔ́n bág, uganyɛ ká: «Nuɔ́l nám enue iménuéŋín gán gá busió, nual nuala nɔ́ numbɛ́dága.» 20Bámáal na gunyá, uwɔgɔ́l endeŋé, uwaal buanda búmoom umáal na gɛnyɔka, uganyɛ ká: «Endeŋe ewe nyɛ gɛŋɛ́lɛŋɔ́siɔ gá nɛlad ná manɔŋ mám málaná ká band bá bulada na Gɔdányá, módood gán gá busió.
Gidógio gá guandɛn ɛdɔg
(Mat 26.20-25; Mál 14.17-21)
21«Ánɔlɛ́ns gɔ́g ká mɔnd wunduénené gúnyánan nɛ́nuán ɔlɔŋ nam. 22Búnyɛ nɔ́, Mɔɔn wá mɔnd gegú Kɔɔ́kɔ anyɛ́ búnyá buɔyɛ́dɔ́n. Gɔsɔ́g gɔg na mɔnd ugegúnúdú wɔ́.» 23Bafɔ́nɔfɔ́n ebédúm gubiófoon bɔ́bɔ́ na bɔ́bɔ́ ká ányá agás gá ɔlɔŋ ugagúnuál bú e?
Ányá unyá ɔgunɔ e?
(Mat 18.1; 20.25-28; Mál 9.34; 10.42-45)
24Bafɔ́nɔfɔ́n ebédúm gusuŋenenyi ká bálɛ́ns ányá unyá ɔgɔ́n ɔgɔ́b gá ɔlɔŋ? 25Uganyɛ gɔ́b ká: «Befuŋ bá gɛdɔŋ gúmányɛ́ganɛn band bɔ́b, ebe béndenyé bɛdɔŋ bíléné ká bɔ́yɔ gɔ́b ká bányɛ band bálaná bese. 26Búdɛ́bá nɔ́ aganuá, mɔnd mámba gubá ɔgɔ́n agán gá ɔlɔŋ, nsɛ́ úgɔ́l niluku ná gilimbe. Ewe wambaná ká úbianan bɔsɔ́gɔ́, nsɛ́ úgɔ́l niluku ná eŋél buol. 27Na ewe wafɛnanɛná na ewe unyánaná, ányá udɔ́mbaná sɔ́gɔ e? Saá sɔ́gɔ́ unyánaná e? Anaány gɔg yaŋuá sɔ́n inyá gadágadá wanɔ ká inuálaan buol.
(Mat 19.28)
28«Banuá nunyɛ ebe bányá gubá agám gá masiá bigúl gidigid inyá gubá agá meyú. 29Anyɛ́ Babá mámfá Bufuŋ, anaány sɔ́n yaŋuá nganúnúfá. 30Nuganyánan, núbúwánan agám gá Bufuŋ, núlúkumen agá eluku yá Bufuŋ gá gúsúmbá moóny má egúl át na ándɛ yá Ísalayɛ́la.»
Yésu maál ká Piéle gabɛ́sáŋɔ́n wɔ́
31Ɔgúnɔ́ Yésu ganyɛ gá Símune ká: «Símune, Símune, mbɛ́dɔ́lɛ́gɛ́n, Sátan sófún bugaga bágual ká únuádɔ́n nam Kɔɔ́kɔ anyɛ́ bádɔ́naná iŋɔndɔ na dufun. 32Yaŋuá gɔg nsobísógólonyi gɔ́w gá busió ká guádáb gɔ́w dinyim. Aŋuá gɔg, agaal ómósiondo agamia, aál ká belimen bɔ́w gɔ́nɛ́n agá guádáb.»
(Mat 26.33-34; Mál 14.29-30)
33Piéle ganyɛ gág ká: «Ɔgúnɔ́, nguádában ká yɛɛ́b ɔlɔŋ nɔw agá gians gá mbíne ta ɔ́gɔ ká, ngú ɔlɔŋ nɔw.» 34Yésu guondinyi wɔ́ ká: «Piéle, mmɔ́guɔyɛ́dɛ́n ká ínen eye, ká gided sién gídádɛ́d, agagúbá amámbɛ́sáŋɔ́n bigúl bɛ́dadɔ.»
Ánubɛ́dábɔ́n gá asaŋɔ
35Yésu ganyɛ gá bafɔ́nɔfɔ́n bág ká: «Anyɛ́ imáanɔ́dɔ́m kand muonyi, kand gɛgada, ta ɔgɔ́ ká mfaŋáŋá, numabaŋɛ́d buanda e?» Obóndinyi ká: «Buágó» 36Uganyɛ gɔ́b gɔg ká: «Nɛ́nuán, ewe unyá na muonyi ugɔ́l, wa gɛgad, ugɔ́l, udiábáná na nugub udú gɛla gág ká wɔɔ́nd nú. 37Búnyɛ nɔ́, ngúnuɔ́yɔɔn ká búguofoon ká ubú búnyá buɔyɛ́dɔ́n agám gá giáy bífuógidonyi Kɔɔ́kɔ anyɛ́ búnyá buɔ́ŋɔ́n agá mbɔbɔnɔ ká: Bámabán wɔ́ agá ɔlɔŋ wá bɛmbuánsɛl. Kányɛ búnyɛ ká ubú búnyá buɔyɛ́dɔ́n gám góbusió gúbianan ká búŋal.» 38Bágányɛ gág ká: «Ɔgúnɔ́, dugub edue duándɛ.» Uganyɛ ká: «Gɛdám igiány mége.»
Mbísógol yá Yésu agá nɔgɔnd na bolifié
(Mat 26.36-41; Mál 14.32-42)
39Yésu guám, gɔb agá nɔgɔnd nunyá ɔfɛ́n ká nɔgɔnd ná bolifié, Kɔɔ́kɔ anyɛ́ umáabá wala nsua. Bafɔ́nɔfɔ́n bág abálád wɔ́ sɔ́n. 40Uwɔ́ gá nɔ́, uganyɛ gɔ́b ká: «Ónubísógólónyí ká nudɛgɔɔ́n agá mbuge.» 41Uwosió bɔ́ ány, uwabɛ́sɛdɛn mɔɔn wá gɛnambɛ, uweguns enú egegus, uwabanyɛg gubísógólonyi, wɔyɔ ká: 42«Babá, émébíléne, mbagɛ́n nugényigény unɔgɔ́n. Nsɛ́ búbiál anyɛ́ aŋuá ebílénené, saá anyɛ́ yaŋuá mbílénené.» 43Ɛngɛlɛs imóolín muana iyesiéŋín wɔ́ magɔ́gɔ. 44Anyɛ́ ɔdɛm wág máabá ofuógón na gianta gá isígíl, uwand gugɛ́nd na mbísógól, giík ámaan wɔ́ alá bidógól bá manɔŋ, bíguanan egegus. 45Umáal wadɔgaan gá mbísógól, uwɔb giáy gá bafɔ́nɔfɔ́n bág, uwɔfuɔg bɔ́ gá dunɔ́. Bámáab gá dunɔ́ gágual ká, mahan mabá nɔbɔ. 46Uganyɛ gɔ́b ká: «Saá gigúl gá dunɔ́ egie, ánuadɔ́g núbísógólonyi ká nudɛguɛ́n agá mbuge.»
Giadɛgɛna gá Yésu
(Mat 26.47-55; Mál 14.43-49)
47Umáal unyá gúgála, ɔfɔ́nɔfɔ́n ondodió ɔfɛ́n ká Yúdasa umáabá agá ɔlɔŋ wá bát na bándɛ, uwámɛ́nɛn. Umabá agá ɔduɔ́ wá giŋi gá band, uwabɛ́sɛdɛnɛn Yésu ká úgɔ́l wɔ́ nŋond. 48Yésu ganyɛ gág ká: «Yúdasa, guŋɔ́l nŋond gúgú eménúndú gá gú e? Yaŋuá Mɔɔn wá mɔnd e?» 49Bafɔ́nɔfɔ́n bá Yésu máal ná guán ká gígagúsɛŋɛg, bágányɛ ká: «Ɔgúnɔ́, dísɔ́m dugub dásué?» 50Bámáal bányɛ nɔ́, ɔfɔ́nɔfɔ́n uwomoom gufɛ́lɛ́d odú wá ɔmbɔ́g ɔnɛ́m wá eŋél buol wa ɔgɔ́n wa bɔgɔ́gɔ. 51Yésu ganyɛ ká: «Ánɔnɛɛ́n anaány.» Uwebísíd odú wá eŋél buol uwaány, uwéŋúg.
52Yésu gɔb na busió, uganyɛ gá bɔgɔ́gɔ, na bagɔn bá bebíd ɔnyɛb, na bagɔn bá gɛdɔŋ ká: «Numóloón na iŋúmb, na dugub gá gúsɛŋadɛ́gɛ́n inyɛ gɛmbuánsɛl e? 53Ngubá mɔɔ́s mem nanɔ agá ɔnyɛb, banuá ta gundál ɛmbɔ́g, gɛsɛgɛl gán meég gɔ́g nɛ́nuán, bugaga bá mbíne bú.»
Piéle mábɛ́sáŋɔ́n Yésu
(Mat 26.57-58; Mál 14.53-54)
54Abádɛgɛn Yésu, abában wɔ́ agá nuyá ná ɔgɔn wa bɔgɔ́gɔ, Piéle mabá uládaan bɔ́ agá gélem, gɛnambɛ. 55Anyɛ́ bámáfuán gɛnkɔny gá yoóg agá ɔdɛm wá ɔɔnd, ebélukumen, Piéle gusilukúmín agá gadágadá wɔbɔ.
(Mat 26.69-72; Sáŋ 18.17,25-27)
56Eŋél buol agánd, guán wɔ́ ilukié agá masiá má yoóg, uwabɛ́bɔ́lɛ́man wɔ́ uganyɛ ká: «Mɔnd ewe sɔ́n águbá naga.» 57Piéle gusáŋɔ́n uganyɛ ká: «Ndɛgúlɛnsaan wɔ́.» 58Mɔɔn wá gɛsɛgɛl, sɔ́gɔ ondodi guéti wɔ́ eŋís uganyɛ ká: «Aŋuá sɔ́n anyɛ ɔgɔ́b gá ɔlɔŋ.» Piéle ganyɛ ká: «Ágó, ambɛ́lɛ́ŋa.» 59Agá gélem ány, sɔ́gɔ́ ondodi guondidonyi ká: «Búnyɛ́ nɔ́, uwaány sɔ́n águbá naga, na nɔ́ sɔ́n, unyɛ mɔnd wa Galilé.» 60Piéle guondinyi ká: «Ndɛgúlɛnsaan buanda ubú ambaná guɔyɛd.» Umáal unyá gúgálá, gided igiédúmbi gudádɛ́d. 61Ɔgúnɔ́ gubɛ́guagalɛd, ebélumen eŋís na Piéle, uwabɛ́dágɛ́d gugál gá Ɔgúnɔ́ ugú umɔ́ɔyɛ́dɛ́n wɔ́ ká: «Ká gided sién gídádɛ́d ínen, agagúbá amámbɛ́sáŋɔ́n bɛsɛgɛl bídadɔ.» 62Uwaám, uwanagɔ́nd na nióny.
(Mat 26.67-68; Mál 14.65)
63Begiíg mɔɔnɔ́ Yésu, bégíde wɔ́. 64Béfúge wɔ́ busió, bɔ́yɔ gág ká: «Ímábá anyɛ ibús, ɔyɛ́d mɔnd umánugunáŋɛ́d.» 65Bétenyi wɔ́ giod gá nsɛgɛ agá moóny bɔ́mɔ́yɔɔ́n wɔ́.
Yésu agá nɛgál ɛnɛgɔn ná Beyúdɛn
(Mat 26.59,63-65; Mál 14.55,61-64)
66Anyɛ́ kɔɔ́m mábálá, bagɔn bá Beyúdɛn, na bɔgɔ́gɔ, na bóŋ bisele, gɔbɛ́gɔ́sɛ́d, abában Yésu aga Sanadelɛ́ŋ, 67bágányɛ gág ká: «Ɔ́gɔ anyɛ Kilíse, ewe uwɔ́ Gɔdányá mɔ́ɔdɔ́bɔ́n, diɔ́yɛ́dɛ́n.» Uwondinyi ká: «Ímɔ́nuɔ́yɛdɛn, nudigaguádáb; 68ímónuófún nŋófúny, nudigoguóndinyi. 69Gubanyɛg nɛ́nuán, yaŋuá Mɔɔn wá mɔnd, ngabá ilukié agá ɔmbɔ́g ɔnɛ́m wá Gɔdányá unyá na bugaga.» 70Bem ganyɛ ká: «Aŋuá gɔg anyɛ Mɔɔn wá Gɔdányá e?» Uwɔ́ guondinyi ká: «Búnyɛ́ nɔ́, anyɛ́ nuɔyɔnɔ́, inyɛ.» 71Bágányɛ gɔg ká: «Gɛ́laluá gínúm sɔ́n diambaná e? Dimɔ́biɔ́bɛ́n basuá muát gugál gág.»
ទើបបានជ្រើសរើសហើយ៖
Lúkasa 22: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
