Lúkasa 21
21
Bibiág bá gisi gá agánd
(12.41-44)
1Umáal unyá gulɛ́ŋa, uwaán ɛnɔ́m sá band sɛ́máabá siágán bibiág agá kɔɔ́m báganá muonyi. 2Uwaán sɔ́n ɔsúgɔsugɔ wa gisi gá agánd wágaan imbámb sá sɛg sɛg íyandɛ. 3Uganyɛ ká: «Ngúnuɔ́yɔɔn agá meliŋítas ká agánd ewe maág giod gɔdɔ́mb band gidigid. 4Gágual ká gɛdám gá muonyi band mánuágán digúsésenyi bɔ́ ta siɔdɛd, ta anyɛ́ unyá ɔsúgɔsugɔ, uméŋín buanda gidigid unyá gubianan ká úbióyonyi na bú.»
Yésu mɔ́yɛd gɛgada gá ɔnyɛb wá Gɔdányá
(Mat 24.1-2; Mál 13.1-2)
5Gɛdám gá band mayɛ́gɛ́ná gɛfuág gá ɔnyɛb, bɔ́yɔ ká, ɔɔ́b gɛfuág na bɛnɔg bá adanyɛ, na bɛnɔg bá manda béméeŋén Gɔdányá. Yésu ganyɛ ká: 6«Ubuány ubú núyɛ́gɛ́naná, mɔ́ɔs gúleen ɔmɔ́ ta nɛdany nɛ́dɛgand gubá nɛdálán agá sɔ́g nɛdany. Búgagadɛg ták.»
Gubanyɛg gá meyú
(Mat 24.3-14; Mál 13.3-8)
7Obófún wɔ́ ká: «Ofúnyifúny, niík búganúbiál e, bulinsi búnúm búgenúdíye ká búgabiál e?» 8Uwondinyi bɔ́ ká: «Ánubɛ́nyáŋanyáŋ, mɔnd dinúnéní. Giod gá band gɔbiɔ́sɛgɔɔn agá gélem gá ɔfɛ́n wám, bɔ́gɔyɔ ká: “Yaŋuá inyá Kilíse” bónd bɔ́yɔ ká: “gɛsɛgɛl másiám”; nudɛlád bɔ́. 9Gigúl nugɔnuɔ́b bɔ́yɔ bide, band lɔ́nsɔ́gɔgaan, nudɛbiá buwa. Gágual ká búguófon ká manda amaány ákɛn gubiál. Ta anaány, gúman gá gus gabá gúmányɛ gúdɛ́bá egúy.»
10Uwɔ́yɛ́kɛnɛn ká: «Bɛdɔŋ genusenyinyi, mefuŋ nuanan mɔ́mɔ́ ná mɔ́mɔ́. 11Gús gebiéyeen mɔkɔɔ́m mɔkɔɔ́m, nsana na bianta bá ɛgɔnɔ gabá, bigégén bá manda bíganúbiála ugumuana na bianta bá melinsi gaal ká band bianan buwa.»
(Mat 10.17-22; Mál 13.9-13)
12«Manda amaány gaal mámányɛ mádíbiál, báganuádɛgaan, bénúsésenyi, bábaan nanɔ aga bagɔn bá bians bás bá mbísógól, bénúfugen agá bians bá mbíné, bábaan nanɔ agá befuŋ na bɛngɔ́mɔnɔ gám góbusió. 13Ány nuganúbia nŋili yágubá bél bílaluá bám ɔgɔ́b góbusió. 14Ánubiág agá ɔduɔ́ ká nudigabianan gisiósio ká núdábɔ́na gubiɔ́gɔnɔgɔn gán. 15Gágual ká yaŋuá muát ngenuéŋín gugál na nsiŋi nɛnama nɛ́nyá ká ta bambɛ́lɛmbɛ́l bán, bédídémbényí nanɔ ɔ́gɔ ká bébísid ubú nugɔnuɔ́yɔ. 16Bebiény bán genúduénen, belimen núduénen, besié bán na begúl bán núduénen. Bɔ́gɔ́nɔ giod agán gá ɔlɔŋ. 17Band giod gɛɛ́y bambɛ́lɛmbɛ́l bán gobusió bá ɔfɛ́n wám. 18Ta anaány, ta oŋído ómoom agán gá ɔduɔ́ digenyím. 19Númɔ́mínɔɔ́n, nugadáŋáb gusɔ́d gá kand nɛmanɛ́ná.»
Gɛgada gá Yelósalɛm
(Mat 24.15-21; Mál 3.14-19)
20Yésu uwɔb nobusió na gugál, uganyɛ ká: «Anyɛ́ nuganuán Yelúsalɛm ɔbɔ́ŋɔ́n na ɛlɔŋ sá bide, ánɔlɛ́ns ká gɛsɛgɛl gá gɛgada gág mésiég. 21Ebe báganúbá agá giéns gá gus bábɛ́laná ká Yudé gabianan ká bɔ́biɔ́sɛgɔɔ́n agá dɔ́gɔnd. Ebe báganúbá agá tísɔn wa Yelúsalɛm gabianan ká bámaan fiaŋ, Ebe báganúbá madiádány, bódiónd agá tísɔn. 22Mɔɔ́s amaány gabá mɔɔ́s má nɛgál. Gɔ́gɔ́ buanda gidigid búnyá buɔ́ŋɔ́n agá mbɔbɔnɔ ya Gɔdányá gonúbífuógi. 23Gɔsɔ́g na bagánd bá eŋum, na ebe bégenúfúŋenyi mɔɔ́s amaány gágual ká gianta gá nusésídény gabá agá gɛdɔŋ igiány. Gɔdányá gedíye bɔ́ ká uguɔ́bɔnɛn bɔ́ ilób. 24Bɔ́gɔ́nɔ́ bóndodi na muɔ́nɔnɔ má bide, bában bómodió gá buɔ́l agá bɛdɔŋ gidigid. Ebe bádiábáná Beyúdɛn gagad Yelúsalɛm guám anyɛ́ gɛsɛgɛl ɛgɛ́ bámáadábɛ́n bɔ́ genuég.»
Guúl gá Mɔ́ɔn wá mɔnd
(Mat 24.24-31; Mál 13.24-27)
25Yésu uwɔb nobusió na gugál, uganyɛ ká: «Melinsi gánɛ́gaan agá ɔɔ́ny, na agá oól, na agá muódód. Aya egegus band bá bɛdɔŋ gabá agá biméŋél, bákɛ́naan na gudɔgodɔ gá manáŋ abɔ́sa, na gá binob. 26Band geguénen na buwa bámábɛ́dága manda máganúbiála egegus. Gágual ká, Gɔdányá geyidin manda gidigid mányá ugumuana. 27Ány band ganuán gusiónd gám, yaŋuá Mɔɔn wá mɔnd agá nugánd na bugaga na nugúm gidigid.
(Mat 24.32-35; Mál 13.28-31)
28«Manda amaány gaal mágányá gúbiála, nubɛ́gɛ́ndɛ́n, nudɛbɛ́nɛɛ́n gágual ká gidúgune gán ganyɛ egúy.» 29Yésu uwedúmín bɔ́ nsab eye, uganyɛ gɔ́b ká: «Ánuág eŋís gá bɔdɛ́d bábɛ́laná ká figiyé ta gá madɛ́d móndodió: 30Gigúl ɛgɛ́ bɛgas bág ménudúm gúdɔsɔ, nugúlensan ká, ginɔ́g gá gɛsɛgɛl ganyɛ egúy. 31Nɛnama nímoom banuá sɔ́n, gigúl nuganuánan manda amaány biála, ánɔlɛ́ns ká Bufuŋ bá Gɔdányá gányɛ egúy. 32Agá meliŋítas, ngúnuɔ́yɔɔn ká anyɛ́ manda eme gidigid ganúbiál, band bá nɔgɔndɔ enue gabá bámányɛ bédígu gidigid. 33Gus na muana ánɔ́dɔ́mb, moóny mám gɔg nyɛ nabánamana.
Yésu énuúl gibelédényé
34«Ánubɛ́nyáŋanyáŋ! Nudidúmbényi gɛsɛgɛl gán gidigid gá mɔdɔ́mb, na gubálaan magɛ́b, na ɛŋágɛ́nɛ́n gá manda má gus. Kand nɔ́, gianta gá buɔ́s igiány genúbélédenyi, 35Kɔɔ́kɔ anyɛ́ buoli gányá búgɔɔn muɔbɔ, anaány sɔ́n buɔ́s ubuány ganúgɔɔn band bá gus gidigid. 36Nudɛɛ́b gá dúnɔ́, nubísógólonyi bigúl gidigid, ány nuganúbia magɛ́nda mɔ́gúbínɔɔn buanda gidigid búganúbiál, ány nugedélímín agám góbusió yaŋuá Mɔɔn wá mɔnd.»
Mɔɔ́s má gusúgúdenyi má Yésu agá ɔnyɛb
37Yésu mabá ufúnyifunyi agá ɔnyɛb wá Gɔdányá na buɔ́s, na niɔ́b wɔb wedúmbényí budug agá nɔgɔnd núnyá ɔfɛ́n ká nɔgɔnd ná bolifié. 38Tútútú na budúdug, band ábaan agá ɔnyɛb gá guɔbɛ́dɔ́lɛ́gɔ́n wɔ́.
ទើបបានជ្រើសរើសហើយ៖
Lúkasa 21: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
