Sáŋa 14
14
Yésu nyɛ nŋili yɛbaná agá Gɔdányá
1Yésu ganyɛ gɔ́b sɔ́n ká: «Nudiákɛ́nán, ánubiánán giondi ɔdɛ́mɔ́ agá Gɔdányá, nuond nuondonyi ɔdɛm agamia. 2Eluku nyɛ giod agá gians gá Babá, ímábá búdɛ́bá nɔ́, gesí nsaman gúnuɔ́yɛdɛn. Góbusió ká ngúbaan gá guanúdábúnɛ́n niluku. 3Anyɛ́ gúnyá ngúbaan gá guanúdábɔ́naán kɔɔ́m ɔgɔ́ nugenúlúkúmen, ngosiondo, nsinúgɔ́l. Kɔɔ́m nganúbá, gɔ́gɔ́ banuá sɔ́n nuganúbá. 4Kɔɔ́m ɔgɔ́ yɛbaná, nugúlɛnsaan nŋili yá kɔ́.» 5Tómasia ganyɛ gág ká: «Ɔgúnɔ́! Dɛdɛguál gɔlɛnsan kɔɔ́m abaná. Nanyá digúnúlɛ́ns nŋili e?» 6Yésu guondinyi wɔ́ ká: «Inyɛ nŋili, inyɛ meliŋítas yaŋuá nɔ́ gusɔ́d. Mɔnd dɛbá báguám agá Babá umáal udɛdɔ́mbɛ́n agamia. 7Ímábá nugúŋlɛnsaan, nugúlɛnsaan sɔ́n Babá. Gudúm nɛ́nuán, nugúlɛnsaan wɔ́ nuond nuánaan wɔ́.» 8Fílibe ganyɛ gá Yésu ká: «Ɔgúnɔ́, dídíye Babá, dɛdɛguámba buanda búmodió.» 9Yésu guondinyi wɔ́ ká: «Feké dinyá ɔlɔŋ, adɛgɔ́ŋlɛnsan e? Ámáŋán, asaán Babá. Gá giág ɔyɔnɔ́ ká: “Dídíye Babá e”? 10Adɛguádábaan ká inyɛ na Babá, Babá nam e? Móony ɔmɔ́ inuɔ́yɔnɔ, dɛbá ɛmbɛ́dágɛ́dɛ́n sám sábɛ́muát. 11Ánuádáb gigúl yɔyɔnɔ́ ká inyɛ na Babá, Babá nam; ta nudiádábaán gugál gám, ánuádábaán góbusió bá manda ɔmɔ́ yalaná. 12Agá meliŋítas, ngúnuɔ́yɔn ká mɔnd máŋádábaan, ugala sɔ́n manda ɔmɔ́ yalaná, gɔdɔ́mb anaány. Gágual ká gɔb gám egue aga Babá. 13Buand gidigid nugonuófún agám gá ɔfɛ́n, ngaal bɔ́. Ngaal bɔ́ nɛnama nɛ́nyá ká ndíye band anyɛ́ Babá nyá bese. 14Númófún buanda agá ɔfɛ́n wám, ngaal bɔ́.
Ndán ya ndɔ́ma yá Mefúny má Gɔdányá
15«Númémbíléné, nugúbiana ká nufuógonyi bisele bám; 16yaŋuá yaád gubísógólidi Babá ká únúdɔ́mɛ́n odúgúny omodió uganúbá nanɔ bɛsɛgɛl biim. 17Odúgúny uwaány nye Ɛsámb yá Mefúny ídíyenyé meliŋítas, ɛ́yɛ́ bɛndiádábá diábáná bágɔ́dáŋáb góbúsió ká bádɛ́guánaan yɛ́, bónd bádɛ́lɛnsaán yɛ́. Banuá gɔg, nugɔ́lɛnsaan yɛ́ gágual ká ínyɛ́ gadágadá wanɔ, ígabá agán gá nuɔ́l. 18Ndigúnúsiónon anyɛ iŋunu, ngosiondo. 19Mɔɔn wá gɛsɛgɛl, band bá gus dɛgand guŋán púm púm, banuá gɔg, nugaŋán gágual ká ngɔsɔ́dɔɔn, banuá sɔ́n nugɔsɔ́dɔɔn. 20Buɔ́s ubuány gaal búmásiám, nugalɛns ká inyɛ na Babá, Babá nam. Banuá sɔ́n nunyɛ nam, yaŋuá nanɔ. 21Mɔnd mábɛ́dɛ́gaan bisele bám wond ufuógonyi bɛ́, ugúmbíléne. Babá gebíléne mɔnd wumbílénené, yaŋuá sɔ́n mbíléné mɔnd wumbílénené, ngedíye mɔnd uwaány buanda inyá.» 22Yudé, saá Yúdasa Ísikalióto ganyɛ gá Yésu ká: «Ɔgúnɔ́ nanyá ɔyɔnɔ́ ká basuá gusúg egenúdídíye buanda ubú ányá, saá gus guum e?» 23Yésu guondinyi ká: «Mɔnd mémbíléné, uguála buanda ubú gugál gám ɔ́yɔnɔ́. Babá gebíléne wɔ́, dɛgaab agagá diágɛ́gá kɔ́. 24Mɔnd udiémbílénéné dɛguála buanda yɔyɔnɔ́. Gugál ugú ngálaná nɛ́nuán dɛbá ɛmbɛ́dágɛ́dɛ́n sám sámuát, gunyɛ́ gugál gá Babá umáandɔ́m. 25Ngúgála anaány gágual ká imaányɛ nanɔ. 26Babá ganɔ́dɔ́mɛ́n agá ɔfɛ́n wám Ɛsámb yá Mefúny íganúbianan ká ínúdúgúne. Ɛ́yɛ́ ígenúnúfúnyifunyi buand gidigid, yónd ínúbídégesenyi buanda gidigid inyá gunuɔ́yɔɔn. 27Imánúnɛ́nɛ́n bumbén, imánúfá bumbén bám, saá anyɛ́ band bá gus éŋeniné. Nudiákɛ́nán, nudɛbiá buwa. 28Nusɔɔ́b anyɛ́ nsɔ́gunuɔ́yɛdɛn ká: “Ndɔ́mb, ta anaány, ngosiondo agán gá masiá.” Ímábá nugúnlɛ́ga, gesí nugúdɔdɔn gágual ká ngúbaan agá Babá, góbúsió ká unyɛ gianta wundɔ́mbaan. 29Ngúnuɔ́yɔɔn manda amaány gúmaányɛ gá nsua nɛnama nɛ́nyá ká gigúl búganúbiála, nuádáb. 30Gudúm ínen gɔb nobusió, dɛdɛgand guɔyɔ moóny gianta gá gɛsɛgɛl nanɔ, gágual ká, ofuŋ wá gus egue ganyá gúleén. Ta nɔ́, udɛbá báguŋal buanda; 31band bá gus gúbianan ká bálɛ́ns ká ngúbíléne Babá, yond yala buanda wuŋɔyɔnɔ́. Ánuadɔ́g dɛ́dɔ́mb!
ទើបបានជ្រើសរើសហើយ៖
Sáŋa 14: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
