2 Kɔlɛntiɛ́ŋ 11
11
Pólo gúgála na bambɛ́lɛmbɛ́l bág
1Ánuŋádábɛ́n siɔdɛd ká nnúgálaan anyɛ imábál bugɔnɔ! Ɛɛ́ŋ, anuŋádábɛ́n! 2Inyɛ meliŋítas na yɔt gán góbusió, yɔt iyaány nyɛ anyɛ yá Gɔdányá. Mmanɔ́dánɛ́n gigiŋ na mɔnd táŋ omoom unyá Kilíse. Mmadán ká ngenuéŋin gág anyɛ́ sié wa ɔmbúlɔ éŋené ɔmbúlɔ gá ɔnɛ́m waga ta gɔlɛns anɔ́mandɔ. 3Nnyɔ́k na gɛsɔbɔ gág menéŋ Ɛ́fa agánd wobusió. Ngúbianan buwa ká mɔnd núnéŋ sɔ́n banuá ká núdɔ́mb gubá babɛ́gɔ́dán na Kilíse meliŋítas. 4Gágual ká band bólonó aganuá, nugúnɛnan bɔ́ ká bɔ́nuɔ́yɔɔn Yésu unyá sáŋal na uwɔ́ dimɔ́ɔnuɔ́yɔɔ́n. Nuond nuádábaan ɛsamb yá mefúny ínyá sáŋal na ɛyɛ́ numáabiá, nuádábaan sɔ́n Ndág ya Nsɔ́m inyá sáŋal na ɛyɛ́ dimɔ́ɔnuɔ́yɔɔ́n, nuguámɛnan bɔ́.
5Ngúbɛdága ká bambás bedúmeb bán bányá bianta dɛgɔ́ndɔ́mbaan. 6Búnyɛ bágubá nɔ́ ká ndibá na bugél. Saá anaány sɔ́n nnyá gá gɔlɛns gá manda má Gɔdányá, dígunúdíye bú gá manda gidigid dinyá guala. 7Anyɛ́ iméenúdúmbínyí Ndág ya Nsɔ́m ya Gɔdányá, ndimóofún mɔnd buanda. Imebísélí ká banuá núbá bianta, búnyɛ gɛnana imáal a? 8Anyɛ́ imáabá yala buol gán góbúsió, biɔ́b bá beédéb bíndodió bímáabá bímfánan muonyi. 9Anyɛ́ imáal ndibiánán buanda gɛsɛgɛl imáabá aganuá, ndimóoy wádia ká wúmfá buanda. Belimen bás bómóol Maseduán bámáamfá manda mómóoŋófónín; ndimamba ká mbá gɛnɔ gán ta gá buanda, ngabaan nobusió na guala anaány. 10Agá meliŋítas má Kilíse ɔmɔ́ mbiananá, ngúnuɔ́yɔɔn ká ta mɔnd udigeŋleg ká yɔ́bɔɔn bese gá bú agá giéns gá gus bábɛ́laná ká Akayí. 11Gágiag ngálaná anaány, búnyɛ aya ká ndigúnúbíléne e? Gɔdányá gúlɛnsan ká ngúnúbíléne! 12Buanda yalaná nɛ́nuán, ngabaan nobusió na guala bú. Anaány ká, band bámbaná nŋili ya gual ká bɔ́biɔ́yɔ ká bányɛ agá nsɛgɛl ya buol imoom nasɔ, bádɛbiá giás gá gubiɔ́yɔ. 13Band abaány dɛbá mbanda bedúméb. Bányɛ biád bá bél buól bénéŋené band ká bányɛ bedúméb bá Kilíse. 14Búdɛ́bá giényígienyé gá buanda, Sátan muát guála anaány, ubíyenyi ɔsɔ́mɔsɔm wa gise. 15Búnyɛ nɔ́ ká bél buol bág sɔ́n guɛ́yaan anyɛ bél buol bá manda mányá agá busi, gusúgúdenyi gɔ́b gabá buanda búmoom na bielínyelínyé bɔ́b.
Guɔ́bɛ́g gúmáamɛ́n Pólo
16Imaánd gunuɔyɛdɛn ká, nudibɛ́dágá ká inyɛ gieg, númɔ́ŋgɔ́lɔɔ́n gɔg anyɛ gieg, nugɔ́l gɛsɛgɛl gɔg nam, ká yaŋuá sɔ́n mbíkányɛd siɔdɛd. 17Ndigɔguɔ́yɛd ubú yambaná guɔyɛd anyɛ́ Ɔgúnɔ́ bílénené. Ngagúbíkánya anyɛ gieg, gágual ká ngúbianan nɛɛ́m. 18Anyɛ́ gúnyá giod gúbíkánya gá manda má gus egue, yaŋuá sɔ́n ngabíkánya. 19Banuá nunyá bonsiŋónsíŋo, nuguɔ́mínɔɔn na band bálaná anyɛ bieg. 20Nuguɔ́mínɔɔn ká bɔ́núgɔ́lɔɔn anyɛ biɔ́l, bénúnéŋenéŋ, bénuébenin, bánúsɛ́gɛ́nan, bénúgíde ogóbusió. 21Ngúbianan ɔduɔ́ gɔnɔ́ ká yɔ́yɛd ká dígubá na buyɛgɛl giod ká diál anyɛ bɔ́bɔ́. Kɔɔ́m ɔgɔ́ bómodió diédínéné gubíkánya, ngúgála anyɛ inyɛ gieg yaŋuá sɔ́n inyɛ bágual nɔ́. 22Bɔ́guɔ́yɔ ká bányɛ mbanda Beyúdɛn, yaŋuá sɔ́n inyɛ Yúdɛn. Bɔ́yɔ ká bányɛ Bísalayɛ́l, yaŋuá sɔ́n inyɛ wa Ísalayɛ́l. Bɔ́yɔ ká bányɛ nugɔgɔ ná Ábalaháma, yaŋuá sɔ́n inyɛ wa nugɔgɔ unuány. 23Bɔ́yɔ ká bányɛ bél buól bá Kilíse. Ngaguánd gugálɛ́d anyɛ gieg. Inyɛ eŋél buól wá Kilíse, ngúdɔ́mbaan bɔ́ gá manda gidigid.
Ta gá buól,
nsaman gubaan gá bɛmbɔg bɛsɛgɛl anyɛ bɛsɛgɛl,
ebéngide ta bɔ́guɔyɔ,
Ndiánd guɔyɔ bɛsɛgɛl bíník nigú ságuman guŋyɔl!
24Beyúdɛn ébéŋgide bɛsɛgɛl bɛ́tán, dusue bɛsɛgɛl etín ándɛ na bunyo na dúní, 25Balomɛ́ŋ ebéngide bɛsɛgɛl bídadɔ,
band ebéŋétenyi adány gɛsɛgɛl gímoom ká bɔ́ŋɔ́n, iyal ká nsɔ́l agá madɛ́ga bɛsɛgɛl bɛ́dadɔ, iyedúmbi buɔ́s búmoom na budug búmoom agá manáŋ abɔ́sa.
26Agá ɛŋɛnd sám sá giod, meyú giod amáŋámanɛn,
iyayág nigú agá dubɔmɔ gɛsɛgɛl gá ɛmaŋ,
iyéti nigú ogóbusió bá bɛmbuánsɛl,
ogóbusió bá belimen bám Beyúdɛn,
ta ebe bádiábá Beyúdɛn,
agá bɔtísɔn,
agá bɛsɛɛ́sɛ,
agá bamanáŋ abɔ́sa,
agá gadágadá wa ebe bádiábá agá meliŋítas belimen bám bá guádáb!
27Iyala moól má meyú, iyɔɔ́bɛ́gɔɔn, iyɔlɔbɔɔn iŋanyuá, nɛɛ́da na nsana amáŋnúma, iyebílégeen manyán, niyo iniéŋgide, yaŋuá kand bɛla; 28ndiánd guɔyɔ moólonó moónd, yágɛ́naan giod gá biɔ́b bá beédéb gidigid medug mámáalɔ́ŋ mem. 29Gɛsɛgɛl gidigid wádia diábiánáná bugaga, yaŋuá sɔ́n inyɛ kand bugaga; wádia maál gɛfal, nguɔ́bɔɔn guyɔ́kɛn giod agá ɔdɛm. 30Búmófoon ká mbíkánya, gubíkánya gám gúlenin gá manda médíyenyé ká ndɛbá na bugaga. 31Gɔdányá, Sié wa Ɔgúnɔ́ Yésu gúlɛnsaan ká ndigúnéŋe. Nsɛ́ dɛ́kánya wɔ́ gá bɛsɛgɛl bim. 32Anyɛ́ imáabá agá tísɔn bábɛ́laná ká Damása, ngɔ́mɔnɔ umáabá kɔ́ gɛsɛgɛl gá bufuŋ bá Alétasa máag musia agá embíŋínín wá tísɔn ká báŋadɛgɛn. 33Begúl bám abáŋág agá nsada, ebéŋémi agá wúndí wa nɛmám ná ɔmɛndɛ úbɔ́ŋɔnɔ́ tísɔn ká mbiɔ́g agá makál má ngɔ́mɔnɔ uwaány.
ទើបបានជ្រើសរើសហើយ៖
2 Kɔlɛntiɛ́ŋ 11: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល