Luka 8
8
Wali ma lah Yesu aagi
1A diwzha tə, Yesu tsaa nda a ŋge a hayak ma dzamadzam aagi, abə hayak ma dzuk dzuk aagi, aska a ɗaf Ma wiyə ma təwah ataa Bay Bizlaf. Magəli tə ma wam aha gbak aagi, aa talahzə. 2Azha wali ndiɓi aagi aka, Yesu tagam miɗ ma gamak bəza a ha ta, takwaleŋatana dawər ta aagi bəza. Aa ɗa tiw: Mariyama ndə Magdala, ndə miɗ ma gamak ŋshiliɗ a ndaa a bəza a zlikusəm tə, 3Yawana wala ataa Cuzha, mazlərah ataa Haridus Antipas, Susana abə wali ndiɓi aagi vərəm, aa kalamzə tiw Yesu abə magəli tə aagi abə səkən ta aagi.
Maŋgəla ala ma zləga
(Mat 13.1-9; Mrk 4.1-9)
4Ŋgaɓa həji aagi aa tadzam ta abəra Yesu, aa ndaa aka a ŋge a hayak ma dzamadzam ma parpar parpar aagi. Dəba Yesu a azlapatana maŋgəla watsə: 5«Ala ma zləga minja, a nda a damə aska a zləga la tə. Zləga tə watsa, a kwiy kwiyə. Tiɗa ndə a kwiyə, minja ndəv a ndəv tə a mazləm təf, dəba həji aagi anda a heɗe. Azha vigin aagi leŋ aa ji, pit aa miɗ bəza. 6Minja, a kwiy tə ata kefe, ndə a kadəfha, hwap a ŋhwal tə ara ndə la ŋkula ɗa njaɓek aska. 7Zhana minja a kwiy tə a jigiɗ, ndə a kadəfha, a kagəl, jigiɗ a kagəl, hurakw a hurakw tə. 8Minja a kwiy a hayak ma ŋtan, dəf a dəf tə, dəba a agəl vajiɗ, nduŋ ŋtaɗ ya, mbə ndiri teemeri a heɗe.» Yesu dəba a azlap abə guɗaŋ tə: «Ala ma ndza abə zləm a tehi, mazlima.»
Yesu a zlap abə maŋgəla ara veme?
(Mat 13.1-9; Mrk 4.1-9)
9Magəli Yesu aagi, ɗiw aa ɗiwzə, aagi iŋgaya: «Maŋgəla watsə a may a ghal avaŋga?» aagiy. 10Zhin a zhinatana: «Bizlaf tavəlahuni aska huni asən səkən ma ɓah tə a la ndza bay Bizlaf. Ama, ndiɓi aagi, aa zlimaɓa saɓ maŋgəla. Azha,
Aa kataŋ la, ama aa kagəra las.
Aa tehi, ama aa kazlimas.»
Yesu a kaghal maŋgəla ataa mazləga
(Mat 13.10-17; Mrk 4.10-12)
11Yesu zlap a zlapanə a magəli tə aagi, iŋgaya: «Tsakwa ana səkən ndə maŋgəla a kamay a ghalə: shiŋ səkən, a ɗa zlap Bizlaf. 12Shiŋ səkən ma kwiy a mazləm təf aagi saɓ abə həji ma zlima ma Bizlaf aagi, kajik ikwa, Wəliɓi taa tə, leŋ a daazə bəza a ꞌunəf ta, aska a takata ka a ɗal awa ndə aa kareh ta. 13Ndiɓi aagi ma zah ta ata kefe aa saɓ abə həji ma zlima ma aagi, lam aa lamzə abə ɓas, ama aa tapəlanə təf a za dzara a ꞌunəf ta akas, aa ɗal awa ta wan kajik ikwa, ndə yaka a nda tə, mbasl aagi awa ka. 14Ma ndəv tə a jigiɗ, a saɓ andza həji ma zlima ma aagi, ama deŋ ma aagi, ŋtsəɓ, abə təwah landza ma ndza ata manahayak, aa tambasləs, a kaɓəwata. Aa tagwar a ba mbə a nas. 15Ma ndəv ata hayak ma ŋtan, aa saɓ abə həji ma zlima ma aagi, aa tambəl ka a ꞌunəf ta katkadək, azha aa tambəla ra ka a heɗe, taba mbə ma ŋtan.»
Maŋgəla ma ndza ata patərla
16«Kwa vaye, andza tatsa kwahu ka ata patərla ci, aska a dzəɓ ka aska teptepi səku, aka səku, aska la wan səku. Aɓa azha, a tsəzə ka ata la ma tsəham, aska həji ma kanda a jak aagi gəra la ghwaɗeɗe. 17Ara ndə səkən ma ɓahaɓah aagi tiwtiw, aagi aghala ta ata varvara, səkən ma digh ta aagi tiwtiw, həji asənata a bəza, aagi aɗa pay ata la ma ghwaɗeɗe. 18Huni mbəla ŋkwaɓ aska ma ndə huni kazlima. A ɗa ci, ala ndə səkən ara, a alima minja abəra dagala. Azha, ala ndə səkən tə a ŋkula ndza aka, həji ajinə ma kajik ma ndza ara bəza.»
Mana Yesu abə zliŋgin aagi
(Mat 12.46-50; Mrk 3.31-35)
19Mana Yesu abə zliŋgin aagi aa taha ara, ci, aa kula a nda ta gwar aras, ara ndə ŋgaɓa həji aagi ɗa dəy. 20Dəba aagi aghalanə a Yesu: «Tiw matsuh abə zlinahw aagi kagar a bəza, aa gas a gərazahu,» aagiy kəsha. 21Zhin a zhinatana a manahayak tiwtiw iŋgaya: «Ma ɗa mana abə zlina aagi, həji ma teh ma Bizlaf aagi, aa tsa kaɗal zlən abə ma Bizlaf watsa.»
Yesu tagar valalay aka.
(Mat 12.46-50; Mrk 3.31-35)
22Vah minja aka, Yesu takaf aa taf ta a gəlmbə abə magəli tə aagi, a zlapatana iŋgaya: «Kiyzamtakwa a bəza ata guva mazləm mtil minja.» Azha aa tsaa kanda. 23Ndə aa kazlaŋə, Yesu a kawan. Ama a tsutsa aa gəra, valalay taa tə abə ɓərɓər tə, a kazlaɗ yəm aka a gəlmbə, slaɓ a mkpef, a kagas a dzəɓ tə. 24Mbara magəli tə aagi kərəɗ aa kərəɗha abəra, dəba aagi afəɗah ka, aagi iŋgaya: «Madagal, madagal, həji akas!» Yesu fəɗah a fəɗah tə, dəba a agulak valalay, abə yəm ma kagbuŋkwa, ɗekɗek aa gar ta ka. 25Yesu zlap a zlapatana a magəli tə aagi: «Ɗal awa kuni tava?» Ama, ŋzliŋ tadzata bəza, hak aa ghərəŋ ta a heɗe, aa tsa kazlap ata ha ta: «Shiŋ ala watsə azha ya? A zlapatana a tiw miɗ abə yəm, aa jinə ma tə.»
Yesu tambəl ala ndə miɗ ma gamak a kaɗalanə
(Mat 8.23-27; Mrk 4.35-41)
26Zlaŋ aa zlaŋ ta a hayak Gerasene, ma ndza a bəzaha atama Galili. 27Ndə Yesu a tadukha a bəza ata gəlmbə ya, ala minja aka, a hayak ma dzamadzam, taa tə, aska aagi alima abə sha. Ala watsa ya, abə miɗ ma gamak a kaɗalanə. Ambəɗa tə, a katsa rəkuts akas, a kawan a wata akas, ama a ndza a taba jiɓ aagi.
28Ndə a gəra Yesu ya, dəba a adza wəla, ɓərah a fak ha tə ka a mahubəm tə, dəba a azlap abə ɓərɓər tə: «Səkən ndə hwa kamayə ara sa veme, sa Yesu, Mbə Bizlaf ma ndza a wəzəm? Sa kadzahu ra, hwa saka yakas.» 29Ara ndə Yesu a zlapanə a miɗ ma gamak a ndaa tə bəza a zlikusəm tə. Miɗ ma gamak watsa tambəl zhin dagala, həji tadzawanə ŋgas aka abə ra tə abə sheshili aska a tak ka, ama tamtasl bəza, a zlazanə ma a damə. 30Yesu dəba a aɗiwzə: «Zləm kwa veme?» iy, «Zləm naka ci, “Vərəm,”» iy abə a zhinanə, ara ndə a ɗa ya, miɗ ma gamak watsa aagi vərəm ana ma nda a zlikusəm tə. 31Azha, dəba aagi adzanə ra a Yesu, aa tsa katarə ara ndə a kakwiyata ka a wəli ma gulili.
32Biri gəladam ndiɓi aagi, a tsutsa dagala, aa kagasɓa səkən zəm ta ata bəra bərla. Miɗ ma gamak watsa aagi, dəba aagi adzanə ra a Yesu aska a pəlatana təf, aska aagi anda ta a gəladam watsa aagi, azha, pəl a pəlatana təf. 33Mbara azha ya, miɗ ma gamak watsa aagi, tsaw aa ndaa ta a bəza ana ala watsa, tsaw nda ta a ndza a gəladam watsa aagi. Bizl biri gəladam watsa aagi aa wiɗha a bəza a wəzəm ata bəra bərla, aa ndaha shiɓit aagi a gaw, gheneɓ aa bazl ta tiwtiw.
34Ndə wəzhi njin gəladam aagi gəra səkən ma pew ya, aa tsa kashi ta a ghalatana a həji ma ndza a ŋge a hayak ma dzamadzam abə hayak ma dzuk dzuk ma huk aagi. 35Həji aagi aa kandaha a sar səkən ma pew. Ndə aa ɗa peteŋ abəra Yesu, azha, aa gəra a tsutsa ala ndə miɗ ma gamak a ndaa a bəza a zlikusəm tə watsa, tandza tə ka a mahubəm Yesu, abə rəkuts ata zlikusəm, ŋkwaɓ tə tazhina tə. Azha, ŋzliŋ a gas a dzata ka. 36Həji ma gəra səkən watsa aagi ya, aa kaghal avaŋgəy abə ala ma ndza abə miɗ ma gamak watsa a reh tə.
37Azha, həji ma ndza a hayak Gerasene aagi tiwtiw aa kaɗiw Yesu aska a jizatana ŋgas bəza gədək abəra hayak ta, ara ndə ŋzliŋ a dzata. Yesu takaf a taf a gəlmbə aska a kanda tə. 38Ala ndə miɗ ma gamak a ndaa a bəza a zlikusəm tə watsa, dəba a adzanə ra a Yesu aska aagi a ndaɓa abə sha. Ama Yesu zlap a zlapanə: 39«Zhin kwa a wata, nda ghalatana səkən ndə Bizlaf a ɗalahu a həji aagi.» Ala watsa tsaa kazhin tə, azha dəba a aghal səkən ndə Yesu a ɗalanə a ŋge a hayak ma dzamadzam tiwtiw.
Səfənha həla Jayrus abə mbəl wala ma tsa ra ata rəkuts tə
(Mat 9.18-26; Mrk 5.21-43)
40Ndə Yesu a zhina tə, ŋgaɓa həji aagi kalamzə abə ɓas, ara ndə a ɗa, aa katehi tiwtiw. 41Tsakwa ala minja ndə zləm tə Jayrus, taa tə, sha ana madagal ma ndza aha jak ta tarha Yahuda aagi. Tsaw a ndaha ara Yesu ɓərah a fak ha tə ka atama tə, aska a tarə a nda a wata tə. 42Ara ndə a ɗa ya, həla tə watsa a ɗa malay, va tə a ɗal bəza wam aha gbak, a finha ata ꞌunəf ata ꞌunəf.
Tiɗa ndə Yesu ata təf, a kanda, ŋgaɓa həji aagi aska, aa kagbiɓi kwa gwara a vatəy tiwtiw. 43A tsutsa, wala minja aka, a kazah ampəs, a kasa yaka, va tə wam aha gbak abə sha. Kəɗaŋ ana səkən ma ndza aska ra tə a ŋge a jak menjivek ara dakwtər aagi, kwa taɗalzanə galaɓagha akas. 44Kərəɗ a kərəɗha gwara a diwzha Yesu, dish a tsazə ra ata mazləm rəkuts tə. A tsutsa a tsutsa, ampəs ma kazah nana, hats a zla tə, kwaleŋ.
45Yesu ɗiw a ɗiwi, iŋgaya: «Ma dish ra ata sa vaya?» Kwa vaye: «Sa səku, sa səku,» aagiy. Piyer zlap a zlapanə: «Madagal, hwa ndza a taba ŋgaɓa, həji aagi kagbiɓahu kwa gwara a vatəy.» 46Ama, Yesu iŋgaya: «Ala tadishaka, ayəw sa tazlima ɓərɓər minja ta a bəza a zlikusəm naka.»
47Ndə wala watsa a gəra tasən bəza, azha tsaw a ndaha, a kanaana, gəliɓ a gəliɓ tə ka atama Yesu. Dəba a aghalanə ata nja həji aagi tiwtiw, ana səkən ma daazə a tsa ra ata Yesu abə avaŋgəy abə dawər tə a ɗa kwaleŋ a tsutsa a tsutsa. 48Yesu zlap a zlapanə: «Həla naka, ɗal awa kwa tarehahu bəza, nda abə təwah.»
49Tiɗa ndə Yesu a kazlap ikwa awli kwagwa, peteŋ ala minja taa tə a wata ataa Jayrus, Jayrus ma ɗa ala ma ndza aha jak ta tarha Yahuda aagi, zlap a zlapanə: «Həla kwa tamca tə. Hwa ɗiw a ŋtəɓəlɓa Madagal zhanas.» 50Ndə Yesu a zlima ma watsa, zlap a zlapanə a Jayrus: «Ŋzliŋ a dzahus, ɗal awa ana ataa aŋkwa, həla kwa a aɗa reh.»
51Ndə Yesu a ɗa gwar a wata Jayrus, tapəlanə təf kwa ana ala a səbarə a gi akas, səy a Piyer, abə Yahwana, abə Yakuba, abə cina mbə, pa mamən. 52Həji aagi tiwtiw aa kahan ata mci, aa kaŋguzŋguz. Yesu zlap a zlapatana iŋgaya: «Huni hanəs, tamcas, a wan tə.» 53Ama, aŋta aa ɓasɓa a heɗe, ara ndə aa kasən tamca tə.
54A tsutsa azha, Yesu kaw a mbələ ata ra, zlap a zlapanə abə guɗaŋ tə: «Həla naka, gar kwa a wəzəm!» 55A tsutsa a tsutsa səfən a səfən tə, takaw a gar tə a wəzəm, azha Yesu zlap a zlapatana aska aagi gasanə səkən zəm. 56Mambəwazə aagi hak aa ghərəŋ ta a guɗaŋ, ama Yesu ŋgəz a ŋgəzata bəza, ara ndə aa kaghalanə səkən ma pew a kwa vaye.
ទើបបានជ្រើសរើសហើយ៖
Luka 8: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
