Luka 7
7
Mbəl ala ma ɗalanə zlən ataa madagal suji Ruma aagi
(Mat 8.5-13)
1A diwzha ndə Yesu a kəɗaŋatana zlap tə bəza a həji aagi, tsaa kanda tə a hayak ma dzamadzam Kafarnahum. 2A tsutsa ya, madagal ma ndza aha suji aagi teemeri aka, maɗalanə zlən tə aka a kadawər, huk a mca tə, may tə dəy ata ala watsa. 3Ndə madagal suji a zlima zlap ma ndza ata Yesu, zlən a zlənha magulakwakw Yahuda ndiɓi aagi, aska aagi a ndaha a ɗiwzə: Aska ndaha a kwaleŋanə dawər həji ma ɗalanə zlən tə bəza. 4Magulakwakw Yahuda aagi tsaw aa ndaha ara Yesu, dəba aagi adzanə ra, aagi kəsha iŋgaya: «A kazhiva a hwa a lamzə madagal suji watsa. 5Ara ndə a ɗa, a kamay həji takwa aagi, sha ana ma ꞌunzahəji jak ta tarha.»
6Azha, dəba Yesu a anda abə magulakwakw Yahuda aagi. Tiɗa aa slaɓ a gwar, ala watsa a kazlənha ŋgwanambə tə aagi aska aagi azlapanə: «Madagal, hwa ŋtəɓəlaɓa kas, sa vaye a hwa ndaha a wata naka? 7Azha ndə sa gəra, sa abə ha naka sa teete a nda ara hwas. Ci zlapazə ma kwa ŋtaguleŋ, maɗal zlən naka a ambəl tə. 8Sa ci, madagal aha sa aka, sa yəm, sa ana madagal ma ndza aha suji ndiɓi aagi. Sa zlapanə a minja: “Nda,” si kəsha, a nda, sa zlapanə a minja, “Ndaha,” si kəsha, a ndaha. Sa zlapanə a maɗal zlən naka: “Ɗal ikwa,” siy, a ɗalə andza sha.»
9Azha, ndə Yesu a zlima ma watsa, hak a ghərəŋ tə ata madagal suji watsa. Zlaz i ma tə bəza, dəba a azlapatana a ŋgaɓa həji ma ndza aska aagi: «Sa kazlapahuni, kwa a taba həji Isərayila aagi, sa tava a gərazə ala ma ji ma dəy aha ala watsə kwa akas.»
10Ŋgwanambə ataa madagal ma ndza aha suji Ruma aagi ma teemeri, ndə a zlənata aagi, aa zhinha aha wata ya, aa ndaha a gəra ala watsa reh.
Zhinha miɗ mbə wala wədə minja ara Yesu
11Kajik ikwa a diwzha tə, Yesu tsaa kanda tə a hayak ma dzamadzam ndə həji kayə: «Nayin.» Magəli tə aagi abə ŋgaɓa həji ndiɓi aagi kanda abə təmta. 12Tiɗa ndə a slaɓ a gwar a majak hayak ma dzamadzam watsa, aa gəra ya, aa kajaɓ mci a jiɓ. Ala watsa a ɗa malay ara wala wədə watsa. Həji ma ndza a hayak watsa aagi vərəm aa aska wala watsa. 13Ndə Bay Madagal a gəra, taza hahər aka a guɗaŋ aska, zlap a zlapanə iŋgaya: «Hwa hanəs.» 14Kərəɗ a kərəɗha ha abəra zal, pa a tsa ra tə a heɗe. Həji ma tiw aagi, gar aa gar ta ka. Yesu zlap a zlap: «Mbə dərlaŋ, sa kazlapahu, gar kwa a wəzəm!» 15A tsutsa, mbə ma mca tə, a naana, ka a ndza tə ka, dəba a kazlap. Azha, Yesu pa a vəlanə a mamən.
16Hak həji aagi tiwtiw aa ghərəŋ ta, ŋzliŋ tadzata aka, aa kahəmən Bizlaf, aagi iŋgaya: «Wasiy a Bizlaf. Ala ma dagal ma ɗaf ma ndə a zlimazə ara Bizlaf taha a taba takwa. Bizlaf taha a lamzə həji tə aagi.» 17A ŋge a hayak Yahudiya tiwtiw abə hayak ma ndza a mazləm tə aagi, aa kaghal səkən ndə Yesu a ɗalə.
Magəli Yahwana aagi
(Mat 8.5-13)
18Magəli ataa Yahwana ma ɗal batem aagi, dəba aagi aghalanə səkən ma pew tiwtiw a madagal ta. Yahwana daŋ a ya magəli gbak a taba ta. 19Zlən a zlənzata ara Bay Madagal aska aagi aɗiwzə: «Hwa ana Kərist ma kaaɓin a ndaha watsa vəw? Vəw, ala minja ana ndə ni kateh vəw?» 20Ndə aa ndaha abəra Yesu, aagi kəsha iŋgaya: «Yahwana ma ɗal batem ma zlənani ara hwa, aska a ɗiwzahu: “Hwa ana Kərist ma kaaɓin a ndaha watsa vəw? Vəw, ala minja ana ndə ni kateh vəw?”»
21Tiɗa a tsutsa, Yesu a kareh həji dawər aagi vərəm abə ndə zlikusəm a kandirimata aagi, a kagam miɗ ma gamak a ha həji aagi, a kadəɗatana nja a həji wələf aagi dagala. 22Azha, zhin a zhinatana a magəli Yahwana aagi: «Huni nda, huni ghalanə a Yahwana səkən ndə huni gəra abə ndə huni zlima aagi. Həji wələf aagi, nja tadəɗ tə ata təmta, aa kagəra la ghwaɗeɗe, həji ndə ŋgas a gəy ta aagi, aa kanda; həji fagwalakw aagi, fagwalakw ta tasuguf tə, madəŋə aagi, aa kazlima zlima, həji ma bazl ta aagi, aa kasəfəna ta, həji titikw aagi aa talima Ma wiyə ma təwah. 23Ɓas ara ala ma kaŋkula mbasl ma naka.»
24Ndə magəli Yahwana aagi nda ta, azha dəba Yesu a aghalatana ma ata Yahwana a ŋgaɓa həji ma ndza a tsutsa aagi, iŋgaya: «Səkən ndə huni nda taŋazə a damə ata dərzləm veme? Pala ma kakusah ara miɗ vəw? Aŋghə! 25Mbara, səkən ndə huni nda taŋazə veme? Ala ma tsa rəkuts ma ŋtan vəw? Ama həji ma katsa rəkuts ma ŋtan aagi, həji ma ŋtsəɓaŋtsəɓ aagi, la ndza ta, aa ndza ata la ndza bay aagi. 26Mbara azha, səkən ndə huni nda taŋazə azha me? Maɗaf ma Bizlaf vəw? Ayəw, sa kazlapahuni, dəy aha ala ma ɗaf ma ndə a zlimazə ara Bizlaf. 27Tsakwa, Yahwana ana ala ndə ma ma ŋtiraŋtir Bizlaf a zlap a heɗe:
Sa zlənahu matəf naka atama kwa,
aska a lamahu təf.»
28Yesu zlap a zlap zhana: «Sa kazlapahuni, sa tanaka a gəra ala ma həna Yahwana akas. Ama ala ma feŋ a Bay Bizlaf ana madagal aha. 29Həji aagi tiwtiw aa tazlimanə ma tə, kwa həji ma tsak səkən aagi, aa tasən ka ci, Bizlaf təwah, a kamay a rehata bəza, abə ɗal batem ara Yahwana. 30Ama Farisa aagi abə masərək ma ma garagar aagi, aa taji səkən ndə Bizlaf a may a ɗalatanas, aa taŋkalzə batem ataa Yahwana.»
31Yesu a zlap a zlap zhana: «Abə vaya, abə sa saɓ həji ma ndza akacihwa ata manahayak watsə aagi? Abə vaya abə aagi saɓ? 32Tsakwa ana saɓ ta: Aagi andza wəzhi ma kandza ata zaguva aagi, ma kaya ndiɓi aagi, ŋtaguleŋ ŋtaguleŋ, aska a zlap: “Ni tambəzahuni slələm, huni taji dəməs askas. Ni tayahuni dərəf mci, huni taji hanəs.” 33Ndə a ɗa ya, Yahwana ma ɗal batem a ndaha, a kazəm wəda akas, a kasa mavə akas, huni iŋgaya: “Ala ma kawək,” huniy. 34Mbə həji ma dəgnak, tsaw a ndaha, a kazəm səkən, a kasa mavə, azha huni iŋgaya: “Huni sarzə ala watsə, a ndaha aska wəda abə mavə, zhana a ɗa ŋgwanambə həji ma tsak jamargwal aagi abə həji ma gəy ma aagi,” huniy. 35Ama, sən səkən Bizlaf taghalaya təwah a wəzhi ma ji ma tə aagi tiwtiw.»
Yesu a wata Simun ndə Farisa
36Ndə Farisa minja daŋ a ya Yesu a wata tə a zəm səkən. Tsaw a nda, azha, ka aa ndza ka a zəm səkən. 37A tsutsa ya, a hayak ma dzamadzam watsa, wala ma gəy ma minja aka, tazlima Yesu a kazəm səkən a wata ndə Farisa minja, wala watsa taa tə abə mali ndə nji tə təwah mkpef a gambaram dambara. 38Azha, gəliɓ a gəliɓ tə ka a diwzha Yesu aska ŋgas tə. Dəba a ahan, azha ŋgas Yesu ban ban abə han tə. Dəba a asaɗanə bəza abə dzuguɗ ha tə. A kambəla ŋgas tə, a kabəzanə mali ndə nji təwah watsa a heɗe.
39Ndə Farisa ma yaha Yesu a wata tə watsa a gəra ikwa, a kazlap a ha tə iŋgaya: «Andza ala watsə a ɗa ala ma ɗaf ma ndə a zlimazə ara Bizlaf ŋter meni, həna a sən wala ma katsa ra a heɗe watsə bəza, a ɗa wala mazheref.» 40Azha, Yesu zlap a zlapanə a ndə Farisa iŋgaya: «Simun, ma naka minja aka a sa zlapahu.» Simun zhin a zhinanə: «Zlapazə, Masərək,» iy.
41Azha, Yesu zlap a zlap iŋgaya: «Ala minja aka, a kanjin həji aagi gbak ata dəwa, minja burəw teemeri dzaɓən, ataa minja burəw radzaɓən. 42Kwa səkən ta a ŋtəra dəwa watsa akas. Ama, mbasl a mbaslatana dəwa watsa a həji watsa aagi gbak gbak. Ala ma kaamay ala ma dzatana dəwa bəza dəy a taba ta ma vata?» 43Simun zhin a zhinanə: «Aska deŋ naka ci, ala ndə a mbaslanə bay dəwa ka.» Yesu zhin a zhinanə: «Ma kwa ŋter.»
44Azha, zlaz i ma gwara ara wala watsa, zlap a zlapanə a Simun: «Hwa kagəra wala watsə vəw? Nda naka a wata kwa, kwa yəm hwa taɗazaka, a ban ŋgas nakas. Ama aŋtə, tabanaka ŋgas naka bəza abə han tə, zhana tasaɗaka ŋgas naka bəza abə dzuguɗ ha tə. 45Nda naka a wata kwa, hwa taji a zlapzaka andza ŋter ŋgwanambəs, ci aŋtə, ꞌwa aka ndə a ɗi a wata kwa, ra tə ata ŋgas naka, tabəzaka mali ndə nji tə təwah ata ŋgas naka. 46Hwa tabəzaka mali a ha nakas, ama aŋtə, a kambəla ŋgas naka. 47Sha ana ndə, sa ghalahu səkən ŋtaguleŋ: dagal mayha wala watsa ma ghalha, pəl mpət ma vərəm tapəlaya. Ama ala ndə pəl mpət tə kajik, a mayha tə ɓəraŋ.»
48Azha, Yesu zlap a zlapanə a wala watsa: «Mpət kwa tapəlaya.» 49Həji ma kazəm səkən abə sha aagi, dəba aagi azlap a ha ta, aagi iŋgaya: «Ala watsə vaya? Ma kula a pəl mpət həji aagi!» 50Ama, Yesu zlap a zlapanə a wala watsa: «Awa kwa tarehahu bəza. Nda abə təwah.»
ទើបបានជ្រើសរើសហើយ៖
Luka 7: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
