Luka 23
23
Yesu atama Pilatu
(Mat 27.2, 11-14; Mrk 15.1-5)
1A diwzha tə, tiwtiw aa gar ta a wəzəm ana həji ma ndza a tsutsa aagi, jaɓ aa jaɓ Yesu ara Pilatu. 2Dəba aagi atək ma a heɗe, aagi iŋgaya: «Ala watsə, ni tagəra a kaghut həji cini aagi, a katakata ka a ŋtəranə jamargwal a Kaysara, azha zhana, “Sa Kərist, bay.”» 3Pilatu ɗiw a ɗiwzə, iŋgaya: «Hwa ɗa bay Yahuda aagi vəw?» Yesu zhin a zhinanə: «Hwa ma zlapazə.» 4Pilatu zlap a zlapatana a magulakwakw maɗal kwakus aagi abə ŋgaɓa həji ma ndza a tsutsa aagi: «Sa tagəra ma ndə həji kaatsak ala watsə akas.» 5Ama aa tambasləs, aa zlap zhana: «A kasərəkatana ma ta gəy ŋkwaɓ a həji aagi. A ꞌwazə a Galili, zhana, a hayak Yahudiya tiwtiw, anawatsə azha, gwar a ɗi.»
Yesu atama Haridus
6Ndə Pilatu a zlima ma watsa, ɗiw a ɗiwzə: «Ndə Galili ana ala watsə vəw?» iy. 7Azha ndə a zlima Yesu a nda a bəza a hayak ndə Haridus aha, zlən a zlən Yesu ara, ma vah watsa, Haridus taha a Wərusalima. 8Ɓas ara Haridus ndə a gəra Yesu. Ara ndə a ɗa, a kazlima aa kazlap a heɗe, wan aka, a kamay aska aagi lima abə sha, a gərazə tsufa ndə a kaɗalə. 9Dəba a aɗiw ma aagi dagala ara, ama Yesu tazhinanə kwa akas. 10Magulakwakw maɗal kwakus aagi abə masərək ma ma garagar aagi taha ara Haridus. Ama, aa katək ma abə guɗaŋ tə ata Yesu. 11Haridus abə suji tə aagi, dəba aagi arə, aa kaɓas a heɗe. Pa aa tsanə rəkuts ma ŋtan aka ata zlikusəm, azha, zhin Haridus a zhinanə ka a Pilatu. 12A va a ndza, tiw Haridus abə Pilatu aa ɗa həji jaga aagi, ꞌwa aka a bishkit watsa, abə aa bəw ta a ɗa ŋgwanambə.
Guma tazlaya ata Yesu a dza ka a mci
(Mat 27.15-26; Mrk 15.6-15; Yhw 18.39; 19.16)
13Azha, Pilatu dzam a dzam magulakwakw maɗal kwakus aagi, bay aagi, abə həji ma ndza a hayak aagi. 14Zlap a zlapatana: «Huni tadaaka ala watsə, huni iŋgaya: “A katak həji cini aagi ata təf ma dəlili,” huniy. Mbara azha, sa taɗiwzə atama kuni, sa tagəra mpət ndə a ɗalə, gamak teete a huni a daazə ata guma akas. 15Haridus yəm, tagəra mpət ndə a ɗalə ana ala watsə akas, sha ana ndə a zhinazə ka ara aŋkwa. Ala watsə taɗal mpət ma teete a həji a dzə ka a mci akas. 16Sha ana ndə, sa agəzə, a diwzha sa tsa kapəl ka» [17].
18Ama dəba həji aagi adza wəla tiwtiw: «Dza ala watsa ka a mci! Pəlani Barabas!» 19Barabas a ɗa ala ma dza ala, tiɗa ndə a ɗal maskwalay minja a hayak ma dzamadzam, sha ana ndə a ɗa akacihwa a jak yaka. 20May Pilatu aska a pəl Yesu aka, zlap a zlapatana zhana a həji aagi. 21Ama dəba aagi adza wəla: «Dar ka ata mpi ma gəzlaŋgarak! Dar ka ata mpi ma gəzlaŋgarak.» Aagiy.
22Mamahkaɗ tə zhana, Pilatu zlap a zlap: «Səkən ndə ala watsə a gəy veme? Sa tagəra mpət ndə a ɗalə, ma kazhiva a dza ka a mci akas. Sha ana ndə, sa agəzlə, a diwzha tə, sa tsa kapəl ka.» 23Ama, aa tambasləs, aa kadza wəla wəruk abə guɗaŋ tə: «Dar ka ata mpi ma gəzlaŋgarak!» Dza wəla ta watsa, taji bak bəza. 24Mbara azha, Pilatu ji a ji a ɗalatana andza ndə aa kamay watsa. 25Azha, pəl a pəlatana ala ndə aa ɗiwi, Barabas. Avəli aa tsəzə ka a jak yaka ara ndə a dza ala ka tiɗa ndə a ɗal maskwalay ata həji Ruma aagi. Azha Pilatu, pa a vəlatana Yesu, iŋgaya: «Huni ɗalanə andza ndə ꞌunəf kuni a mayə.»
Dar Yesu
(Mat 27.32-44; Mrk 15.21-32; Yhw 19.17-27)
26Ndə suji aagi kajaɓ Yesu, dəkdək aa limata abə Simun, ndə Sirene, a ndaha a damə. Suji aagi tak aa takə bəza abə ɓərɓər aska a tiw mpi ma gəzlaŋgarak ata dəɓa tə a diwzha Yesu. 27Ŋgaɓa həji aagi vərəm, aa kasəbarə. A taba ta wali vərəm, aa kadza ma mabərabəra, aa kahan aska. 28Yesu takwaɗ a zlazha ma ara təmta, zlap a zlapatana: «Wali Wərusalima aagi, huni han aska sas! Aɓa azha huni hanɓa aska ha kuni abə wəzhi kuni aagi! 29Ara ndə a ɗa ya, a kaagwar tə ata vah tə ndə aa kaazlap: “Ɓas ara wali ndil aagi, ma ŋkula va a mbəwazə kusəm aagi, abə ndə mbə a ŋkula va a sazə ŋꞌwa ta aagi.” 30Mbara azha, həji aagi aɓin a zlapatana a wəzəm aagi: “Ghurəm kwa aha ni,” a dawən aagi: “Ɓahani bəza meni,” aagiy! 31Ara ndə a ɗa, andza həji taɗalanə gamak a mpi ma njaɓek ya, səkən ndə həji kaaɗalanə a mpi ma ŋhwalaŋhwal veme?»
32Aa tadaaha həji ndiɓi aagi gbak yəm, aa ɗa həji badaway aagi, aska aagi a dzata ka abə Yesu.
33Ndə aa ɗa peteŋ ata la ndə həji kayə: «Kirŋgisl taba ha,» dəba suji aagi adar Yesu ata mpi ma gəzlaŋgarak, abə həji badaway watsa aagi, ŋtaguleŋ ata guva zəm, ŋtaguleŋ ata guva gula.
34A tsutsa Yesu zlap a zlap: «Vana ma ndza a wəzəm, pəlatana mpət ta ka, ara ndə, aa ŋkula sən səkən ndə aa kaɗalə.» Azha, aagi aɓizh rəkuts tə aagi, dəba aagi afak njil. 35Həji aagi tagar ta ka, aa kataŋə a tsutsa. Magulakwakw Yahuda aagi kaɓas a heɗe, aagi iŋgaya: «Tareh həji ndiɓi aagi bəza. Andza a ɗa Kərist, sha ana ndə Bizlaf a mayɓa, mareh ha tə bəza azha!» 36Suji aagi, təmta yəm, aa kaɓas a heɗe. Kərəɗ aa kərəɗha, pa aa vəlanə mavə ma mgbaŋ. 37Aagi iŋgaya: «Andza hwa bay ataa Yahuda aagi ci, reh ha kwa bəza abə ha kwa yəm!» 38A wəzəm ata ha tə, ata mpi ma kəslampalah taŋtiraya: «Ala watsə ana bay ataa Yahuda aagi.»
39Ala minja ŋtaguleŋ a taba həji badaway ma daraya ata mpi magəzlaŋgarak aagi, dəba a ara Yesu, iŋgaya: «Hwa ɗa Kərist, hwiy aɓa wəra? Reh ha kwa bəza abə hwa kwa, hwa rehani bəza yəm!» 40Ama minja dəba a agulakə, iŋgaya: «Hwa yəm, hwa tadaraya andza ala watsə. Azha hwa kaɗal ŋzliŋ ara Bizlaf wəra? 41Ataa aŋtəmə abə hwa, mə sa yaka a heɗe a heɗe, ara gəy ma təmə, ama, ataa aŋtə, tagəy ma akas.» 42A diwzha tə, zlap a zlapanə a Yesu: «Yesu, ndə hwa kaazhina kwa a ɗa bay, hwa ɗiw a hashashaŋaka bəza səku.» 43Yesu zhin a zhinanə: «Sa zlapahu, a ɗa ŋter: akacihwa hwa andza abə sa a wəzəm a la ndza bay Bizlaf.»
Mci Yesu
(Mat 27.45-56; Mrk 15.33-41; Yhw 19.28-30)
44A ɗa pish ɗawarwar, abə pish a dzəɓ tə, ləvaŋ tiwtiw a manahayak, a gwar ata ler mahkaɗ abə ŋtsəɓahw, 45ndə pish a dzəɓ tə. Gidiwri ndə həji her la ma ndza a jak kwakus Bizlaf abə sha, ŋhwak a ŋhwak tə gbak a mən, a wəzəm aska ha jak, a cap ata hayak.
46Yesu kek iy wəla abə guɗaŋ tə, iŋgaya: «Vana, sa kavəlahu miɗ naka ka aska ra kwa!» A diwzha ndə a zlap bəza ikwa, las a mca tə. 47Ndə madagal ma ndza aha suji Ruma aagi, a gəra səkən ma ɗal, azha dəba a ahəmən Bizlaf, iŋgaya: «Səbakw akas, ala watsə ŋter ala ma ŋtan atama Bizlaf.» 48Həji aagi vərəm ana ma ndaha a sar tsaɓan ma ɗal. Azha ndə aa kazhin ta a wata ta aagi, aa kadza mabərabəra, ara ndə aa ghuɗek ta. 49Ŋgwanambə Yesu aagi tiwtiw, abə wali ma lahazə, ndə aa nda a bəza a hayak Galili aagi, aa tagar ta ka abə gədək tə, aa kasar səkən ma ɗal.
Kah Yesu
(Mat 27.57-61; Mrk 15.42-47; Yhw 19.38-42)
50Azha, ala minja taa tə, zləm tə Yusufu. A ɗa ala ma ndza a taba həji ma ndza ata la zla guma ma dagal aagi, a ɗa ala ma ŋtan, dəlili. 51A ɗa ndə hayak Arimatiya, a kateh ndaha la ndza bay Bizlaf. Sha tə kwa taɗalanə kadək ana səkən ndə həji ma ndza ata la zla guma ma dagal aagi, aa deŋi a ɗaləs. 52Tsaw a nda ara Pilatu a ɗiwha zlikusəm Yesu. 53Taduk a daazə a bəza ata mpi ma gəzlaŋgarak, paɗ a paɗ ka a rəkuts ma dəgnak, kah a kah ka a jiɓ ndə aa rə a dehweɗ, aa tava a kahzə ala a mən akas. 54A ɗa vah ta sla kusəm, aska ma vah ta nəp, tiɗa slaɓ a diw ana vah ta nəp.
55Wali ma lahha Yesu ndə a nda a bəza a Galili aagi, aa nda abə Yusufu. Aa kataŋ jiɓ avaŋgəy abə aa wan zlikusəm tə. 56Aa tsaa kanda ta a wata aska aagi nda gasəha mali abə mali ndə nji tə təwah a bəzanə ata zlikusəm Yesu. Ama ma vah ta nəp taɗal tə, zlən akas ara ndə ma ma garagar tatak ɗal zlən ka.
ទើបបានជ្រើសរើសហើយ៖
Luka 23: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
