Luka 22
22
Yahuda Iskariyut huk a ber Yesu
(Mat 26.1-5, 14-16; Mrk 14.1-2, 10-11)
1Gwaygwaya wəda ndə həji ŋkula ɗalə abə faŋtər, ndə həji kayə: «Paska,» slaɓ. 2Magulakwakw maɗal kwakus aagi, abə masərək ma ma garagar aagi, aa kagas təf ta dza Yesu avaŋgəy, ama ŋzliŋ a kadzata ara həji aagi. 3Azha a tsutsa, Gətili nda a nda tə a kusəm Yahuda, ma ɗa Iskariyut. A ɗa ala ma ndza a taba magəli Yesu ma wam aha gbak aagi. 4Azha, Yahuda a kanda, aska aagi azlap abə magulakwakw maɗal kwakus aagi, abə həji ma ndza aha həji ma həbar jak kwakus Bizlaf aagi aska aagi gas təf avaŋgəy abə a bəratana Yesu. 5Aŋta, aa ara ɓas akas, zlap aa zlapanə ka, aagi aŋteranə dala. 6Yahuda ɗal a ɗal awa, dəba a agas təf ndə a kaambələ, a ŋgaɓa həji aagi ŋkula sənə.
Yesu a kalam kusəm aska wəda Paska
(Mat 26.17-25; Mrk 14.12-21; Yhw 13.21-30)
7Ma vah gwaygwaya wəda ndə həji ŋkula ɗalə abə faŋtər taa tə, ndə həji kafat wəzhi ŋcimi a da wəda ataa Paska. 8Yesu zlən a zlən tiw Piyer abə Yahwana, i təmta iŋgaya: «Huni nda, huni slaŋkwa la ndza ta zəm səkən gwaygwaya Paska ka.» 9Dəba aagi aɗiwzə: «Hwa may a ni a nda lamə a vata?» 10Zlap a zlapatana: «Huni tehzə: tiɗa ndə huni kaaɗa gwar a hayak ma dzamadzam, huni kaalima abə ala minja abə duguzl yəm a ha. Huni səbarə a jak ndə a kaakiɗim a mən, 11huni zlapanə a cina jak watsa: “Masərək a kaɗiwzahu: Jak ndə sa kaazəm səkən gwaygwaya Paska abə magəli naka aagi a vata?” iy. 12Ala watsa a kaaghalahuni la a wəzəm a jak ma ndza aha jak, la ma ndza a mən vaɗakvaɗak talamaya tiwtiw, a tsutsa abə huni alam la.» 13Tsaw aa nda, aa gəra andza ndə Yesu a ghalatana, dəba aagi alam la ta zəm səkən gwaygwaya Paska.
Wəda ataa Bizlaf
(Mat 26.26-30; Mrk 14.22-26; 1Kr 11.23-25)
14Ndə ler a gwar tə, Yesu ka a ndza ka aha wəda abə həji ta zlən tə aagi. 15Azha, zlap a zlapatana: «May naka aska a zəm wəda Paska watsə abə huni, abə sa anda sa yaka! 16Ara ndə, sa zlapahuni: həji kaaɓin a zəm səkən zhana abə huni akas, a gwar ata ndə səkən ma zlap aka a kaakəliy tə, a la ndza bay Bizlaf.»
17Mbara, leŋ a ji zlərkuɗ, azha, ɗal a ɗalanə wasiy a Bizlaf, zlap a zlap: «Huni ji, huni ɓizhi a taba kuni. 18Ara ndə a ɗa, sa zlapahuni: ꞋWa aka akacihwa, sa kaazhin a sa mavə watsə a gwar ata ndə la ndza bay Bizlaf a kaandahas.»
19A diwzha tə, leŋ a ji wəda azha, ɗal a ɗalanə wasiy a Bizlaf, teŋ a teŋ ka a mən, pa a vəlatana, zlap a zlap: «Watsə ana zlikusəm naka ndə sa vəlahuni. Kwa vepiy, huni ɗalə ikwa aska a deŋaka.» 20Ikwa zhana, pa a vəlatana zlərkuɗ, a diwzha ndə aa zəm wəda bəza, zlap a zlap: «Zlərkuɗ watsə, sha ana dzəv ma wiyə, abə ampəs naka ma zah ka aska huni. 21Ama tsakwa: ra cini a tizhimzla abə ala ma kaberaka. 22Ara ndə a ɗa, Mbə həji ma dəgnak a anda tə andza ndə Bizlaf a gar ka, ama dadawər ata ala ma kaaberi.» 23Dəba, aagi aɗiwi a taba ta aska aagi asənə ala ma kaanda a ɗal səkən watsa.
Ma kaaɗa madagal vaya?
24Azha, dəba aagi adza səbakw ana magəli tə aagi ata ala ma kaaɗa madagal. 25Yesu zlap a zlapatana, iŋgaya: «Bay ma gulakwakw ma ndza aha hayak aagi zəm bay ta abə ɓərɓər ata həji aagi. Madagal ma atama həji aagi ya, aa ɗiw ci, həji aagi hawatana, aa ya zləm ta abə “Həji ma ɗal zlən ma ŋtan a həji aagi.” 26Azha huni ya, huni ɗiw a ji a ɗalə andza təmtas. Ala ma dagal ma ndza a taba kuni ci, mabəw ha tə ka ana ala ma feŋ. Madagal ma atama ya, mandza andza ala ma ɗal zlən. 27A taba tiw ala ma zəm səkən, abə ala ma daanə səkən ya, madagal vaya? Ala ma kazəm wəda aka wəra? Mbara, sa, sa ndza a taba kuni andza ala ma ɗal zlən! 28Huni, huni ɗa həji ma ŋtan ma ndza abəra sa aagi, tiɗa ndə səkən aagi aa slənzaka. 29Azha sa yəm, sa avəlahuni la ndza bay, andza ndə Vana a vəlaka yəm. 30Azha, huni azəm səkən, huni asa səkən, həji abə huni a Bay naka, huni andza ata la ndza bay a zla guma ata shiŋ həji Isərayila ma wam aha gbak aagi.»
Yesu a kaghalə ndə Piyer a kaaŋkula sənə
(Mat 26.31-35; Mrk 14.27-31; Yhw 13.36-38)
31Bay Madagal iŋgaya: «Simun, Simun, zlima! Gətili taɗiw ɓərɓər bəza aska a dəŋgəlahuni andza mbəɗmbəɗ ndiri. 32Ama sa, sa tatarahu ha, ara ndə ɗal awa kwa a kafəcak tə. Azha, ndə hwa kaazhina kwa ara sa, vəlatana ɓərɓər aka a zlinahw aagi.» 33Piyer zlap a zlapanə: «Bay Madagal, sa taji, mə abə hwa, kwa a nda a jak yaka, kwa a ndza a mca.» 34Yesu zhin a zhinanə: «Sa zlapahu, Piyer, akacihwa, a gwamzakw a dza wəla, hwa azlap zhin mahkaɗ ci, hwa kasənakas.»
Slibi, dala abə masalam
35Azha a diwzha, Yesu zlap a zlapatana: «Ndə sa zlənzahuni, dala ara huni akas, slibi ara huni akas, aŋci a ŋgas kunis, səkən minja taɗa gas takum ara huni ka vəw?» «Kwa aka səku,» aagiy. 36A tsutsa, zlap a zlapatana: «Anawatsə azha, tabəw tə, ala ndə dala ara, maji, andza ikwa yəm, ana ala ndə slibi ara, maji. Azha, ala ndə masalam tə a ŋkula ndza aka, maji rəkuts tə, maberi, masəkəmaɓa ka. 37Ara ndə, sa zlapahuni: a kaɗiw ci, səkən ma ghalaka a ɗal, ɗal a ɗal tə andza ndə a ŋtira ka: Həji aagi taŋgəɗ ka a taba həji badaway aagi. Azha, səkən ma taŋaka, a aɗal.» 38Magəli tə aagi iŋgaya: «Bay Madagal, masalam gbak a ɗi aka.» «Ga», iy.
Tarha Yesu a ha dawən Jaytun
(Mat 26.36-46; Mrk 14.32-42)
39Yesu tsaw a nda tə a bəza, tsaa nda tə andza ma pal a ha dawən Jaytun. Magəli tə aagi kasəbarə. 40Ndə a ɗa vaŋ ata la watsa, zlap a zlapatana: «Huni tarha, ara ndə huni kandəv kuni ata laghut həji aagi.» 41Sha tə, kərəɗ a kərəɗ tə bəza abəra təmta kajik gədək, gəliɓ a gəliɓ tə ka, dəba a atarha, 42iŋgaya: «Vana, andza hwa kaaji, pərehaka zlərkuɗ yaka watsə bəza abəra sa. May nakas, ci, maɗa may kwa.» 43Azha, matəf ataa Bizlaf taa tə aska a vəlanə ɓərɓər. 44Ara yaka ma dagal watsa, Yesu tambasl tarhas. Azha, wəreɓ ma kazahha a heɗe ya, a ndza andza ampəs ma kaŋtilekw ata hayak.
45A diwzha ndə a kəɗaŋ tarha bəza, gar a gar tə a wəzəm, dəba a azhinha ara magəli tə aagi, a ndaha ya, aa tawan ta, ara ndə aa ghuɗek ta. 46Zlap a zlapatana: «Huni wan veme! Huni gar a wəzəm, huni tarha, ara ndə huni kaandəv kuni a səkən ta ghut aagi.»
Mbəla Yesu
(Mat 26.47-56; Mrk 14.43-50; Yhw 18.3-11)
47Ndə Yesu a kazlap ndza tə, ŋgaɓa həji ndiɓi aagi aa taa ta. Ala ndə həji kayə, «Yahuda,» ala minja a taba magəli Yesu ma wam aha gbak aagi, sha ana ma ndaha atama ta. Kərəɗ a kərəɗha abəra Yesu a zlapzanə andza ŋgwanambə ma ŋtan. 48Ama, Yesu zlap a zlapanə: «Yahuda, abə zlap ma ŋtan ndə hwa kazlapzaka andza ŋgwanambə kwa watsə abə hwa ber Mbə həji ma dəgnak vəw?» 49Ndə həji ma ndza abəra Yesu aagi aa gəra səkən ma kapew ya, aagi iŋgaya: «Madagal, ni tsaslata abə masalam vəw?» aagiy. 50Azha, ala minja ŋtaguleŋ a taba ta, tsasl a bəlanə zləm ataa guva zəm ata ala ataa madagal maɗal kwakus aagi bəza. 51Ama dəba Yesu a azlap: «Huni mbasl ka, watsa ga!» Pa a tsa ra ata zləm ala watsa, tay a tay tə ana zləm tə. 52A diwzha tə, Yesu zlap a zlapatana a magulakwakw maɗal kwakus aagi, a magulakwakw ma ndza aha jak kwakus Bizlaf aagi, a həji ma gulakwakw aagi, ma ndaha a mbələ aagi: «Huni ndaha abə masalam abə dambəy aagi, aska a mbəlaka andza ndə həji kanda mbəlaha bay ŋhil səkwa? 53Tiɗa ndə, sa abə huni pal a jak kwakus Bizlaf, huni tagas a mbəlaka akas. Ama ler kuni anawatsə, ɓərɓər ataa ləvaŋ.»
Zlap Piyer, a kasən Yesu səku
(Mat 26.57-58; Mrk 14.53-54; Yhw 18.12-18)
54Kaw aa mbəla Yesu, jaɓ aa jaɓ ka a wata ataa madagal maɗal kwakus. Piyer a diwzha, a kasəbarə abə gədək tə. 55Ndə aa baz kwahu ka gherek ata biygi, aa tandza ta ka tiwtiw a meɗeɗe, Piyer ka a ndza tə ka a taba ta. 56Wala ma ɗal zlən minja a tsutsa ka, nja tə ata Piyer ndə a kandza ama kwahu, iŋgaya: «Ala watsə ya, aa va a nda abə sha!» 57Ama Piyer zhin a zhinanə a wala watsa, iŋgaya: «Wala, sa kasən səku,» iy. 58Kajik ikwa, ala minja ndə a gəra, zlap a zlap: «Hwa yəm, hwa ɗa ala ta!» Ama Piyer zhin a zhinanə: «Aŋghə, sa a taba tas.» 59A diwzha kajik, a ɗal bəza ler ŋtaɗ, ala minja zhana, a kaŋcah a ɗiwzə: «Kwa avaŋgəy, ala watsə, aa tandzaha abə sha, zhana a ɗa ndə Galili.» 60Ama Piyer zhin a zhinanə: «Sa kasən səkən ndə hwa kamay a zlapəs.» A tsutsa a tsutsa ndə a kazlap ikwa, gwamzakw a kadza wəla. 61Bay Madagal takwaɗ a zlazha ma, ndə nja ta aa lima tə abə Piyer. Dəba Piyer a adeŋi azha, ata ma ndə a va a zlapanə ka: «Akacihwa a kaagwar a gwamzakw a dza wəla abə hwa zlap zhin mahkaɗ hwa kasənakas.» 62Piyer tsaa kanda tə bəza aha a bəza, dəba a ahan a guɗaŋ.
Aa kara Yesu, aa rəgaɗə
(Mat 26.67-68; Mrk 14.65)
63Mawəl ma kahəbar Yesu aagi, aa kaɓas a heɗe, aa karəgaɗə.
64Dəp aa dəpanə wənək aka, dəba aagi aɗiwzə: «Sən bəza, ala ma ɗaf ma ndə a zlimazə ara Bizlaf, ma dzahu vaya?» 65Azha dəba aagi arə abə dahalay ma dadawər aagi.
Yesu atama həji ma gulakwakw aagi
(Mat 26.59-66; Mrk 14.55-64; Yhw 18.19-24)
66Tiɗa ndə lakwaf tə, həji ma gulakwakw ataa Yahuda aagi, abə magulakwakw maɗal kwakus aagi, abə masərək ma ma garagar aagi, dzam aa dzam aka. Leŋ aa daaha Yesu atama həji ma ndza ata la zla guma ma dagal. 67Azha, ɗiw aa ɗiwzə: «Andza hwa ɗa Kərist, ghalani.» Zhin a zhinatana: «Kwa andza sa ghalahuni, huni kaaɗal awa aska ma naka akas, 68kwa andza sa ɗiwzahuni, huni kaazhinaka akas. 69Ama Ꞌwa aka akacihwa, Mbə həji ma dəgnak, la ndza tə, a andza ata guva zəm Bizlaf ma ɓərɓər.» 70Zlap aa zlap tiwtiw: «Hwa ɗa Mbə Bizlaf səkwa?» Zhin a zhinatana: «Huni tə, huni tazlap: sa ɗa mbə Bizlaf, huniy.» 71A tsutsa azha, aagi iŋgaya: «Həji zhin a gas ala ma gəra abə zlima ma ndza a heɗe səku, həji tazlima ata ma.»
ទើបបានជ្រើសរើសហើយ៖
Luka 22: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
