Yahwana 9
9
Dəɗ ala wələf ara Yesu
1Ndə Yesu a kapew, a gəra ala minja aka, mbəwa tə tawələf. 2Magəli tə aagi ɗiw aa ɗiwzə, aagi iŋgaya: «Masərək, ma gəy ma abə a nda wələf tə vaya? Sha abə ha tə vəw, aka səku mambəwazə aagi vəw?» 3Yesu zhin a zhinazə, iŋgaya: «Tagwar a ɗa dawna gəy ma tə səku, kwa gəy ma ataa həji ma mbəwzə aagi səku. Ama, a ɗal ikwa aska a ghalha zlən Bizlaf aka ara. 4Andza tiɗa pish a kaɓal, həji aɗalanə zlən ataa ala ma zlənaka. Zaɗə a kandaha, ala kula a ɗal zlən akas. 5Tiɗa ndə sa a manahayak, sa ana weɗ la a manahayak,» iy. 6A diwzha ndə a zlap ma watsa aagi ikwa, dəba a aŋtif majignek ata hayak, ŋgaɗ a ŋgaɗ dərish abə sha. Slərəɓ i nja ala wələf aka abə dərish watsa. 7Azha zlap a zlapanə, iŋgaya: «Nda banha nja kwa bəza a gwavgwav Siləwam.» Zləm Siləwam a may a ghal «zlənha». Ala wələf tsaw a nda a tsutsa, ban a ban nja tə bəza, tiɗa ndə a kazhina tə, a kagəra la. 8Masliji tə abə həji ma gəra a katar səkən aagi ambəɗa, dəba aagi azlap a heɗe, aagi iŋgaya: «Həna ala watsə ana ma kandza pal a tar səkən vəw həjiy wəra?» aagiy. 9Ndiɓi aagi iŋgaya: «Sha,» aagiy. Ndiɓi aagi zhana aa kazlap, aagi iŋgaya: «Aŋghə, sha səku, ama, aa saɓ.» Azha, ala wələf watsa iŋgaya: «Sa ŋter,» iy. 10Ɗiw aa ɗiwzə, aagi iŋgaya: «Nja kwa a sən a dəɗ tə mbara, avaŋga?» 11Zhin a zhinazə, iŋgaya: «Ala ndə həji kayə Yesu ŋgaɗ i, dərish kajik, slərəɓ a slərəɓaka nja ka abə sha, i kəsa, iŋgaya: “Nda a Siləwam, hwa banha nja kwa bəza,” iy. Azha dəba sa anda, a diwzha ndə sa banazə bəza ya, abə sa gəra la,» iy. 12Həji watsa aagi ɗiw aa ɗiwzə, aagi iŋgaya: «Ala watsa a vata?» Zhin a zhinazə, iŋgaya: «Sa kasən səku,» iy.
13Lah aa lahha ala ma va a wələf tə watsa ara Farisa aagi. 14Ama a ɗa ma vah ta nəp Yahuda aagi, abə Yesu a ŋgaɗ dərish, azha abə dəɗ nja ala watsa. 15Sha ana ndə Farisa aagi, təmta yəm, aa kaɗiwzə ala watsa avaŋga abə nja tə a dəɗ tə. Azha iŋgaya: «Slərəɓ a slərəɓaka aka dərish kajik ata nja, dəba sa anda banha nja, ikwa abə sa agəra la.» 16Farisa ndiɓi aagi kazlap, aagi iŋgaya: «Ala ma kaɗal ikwa a ndaha ara Bizlaf səku, ara ndə a ŋkula cecef vah ta nəp Yahuda aagi.» Ama ndiɓi aagi iŋgaya: «Ala mpət a sən a ɗal shiŋ tsaɓan ma həna watsə aagi avaŋga?» aagiy. Azha ɓizh ha taa tə a taba ta. 17Ɗiw aa ɗiwzə ala wələf ndə nja tə dəɗ tə watsa zhana wəruk aagi iŋgaya: «Hwa azha, zlap kwa avaŋga ata ala ma dəɗ nja kwa watsə?» A zhinazə, iŋgaya: «A ɗa ala ma ɗaf ma ndə a zlimazə ara Bizlaf,» iy. 18Ama azha, magulakwakw Yahuda aagi taji səku, ndə a ɗa ala wələf ambəɗa tə, anawatsə nja tə tadəɗ tə, sha ana ndə aa vaŋ a yaha həji ma mbəwazə aagi. 19Dəba aagi aɗiwzata, aagi iŋgaya: «Ala watsə ya, mbə kuni ŋter vəw? Ndə huni mbəwha ci, tawələf tə ŋter vəw? Mbara a ɗal tə abə a ndaha a gəra la anawatsə avaŋga?» aagiy. 20Mambəwazə aagi zhin aa zhinatana, aagi iŋgaya: «Ni kasən ci, a ɗa mbə cini, a mbəwha tawələf tə,» aagiy. 21«Ama, ni kasən a ɗal avaŋgəy abə a nda a gəra la anawatsə səku, zhana ni kasən ala ma dəɗ nja tə səku. Huni ɗiwzə: a ɗa mbə zhana vəw? Kula a ghalahuni abə ha tə!» 22Mambəwazə aagi zlap ikwa ara ndə ŋzliŋ a kadzata ara magulakwakw Yahuda aagi. Ara ndə a ɗa, magulakwakw Yahuda ma ndza a tsutsa aagi aa tagar bəza a walaŋ ta, aska a gam kala ala ma kazlap Yesu ci, Kərist a bəza a jak ta tarha Yahuda aagi. 23Tsakwa sha ana ndə həji ma mbəwha mbə watsa aagi zlap: «A ɗa mbə zhana vəw? Huni ɗiwzə!» aagiy.
24Farisa aagi, ya aa yaha ala ma va a wələf tə watsa zhana a magbak tə, aagi kəsha iŋgaya: «Hawanə a sləf Bizlaf, ni kasənə ci, ala watsa a ɗa ala mpət,» aagiy. 25Zhin a zhinatana, iŋgaya: «Sa kasən kata ala mpət ana anaka səku, sa kasənəs. Ama səkən ŋtaguleŋ ana ndə sa kasənə: sa va a ɗa ala wələf, anawatsə sa kagəra la,» iy. 26Zlap aa zlapanə, aagi iŋgaya: «Səkən ndə a ɗalahu veme? A ɗalzə avaŋga abə nja kwa a dəɗ tə?» aagiy. 27Zhin a zhinatana, iŋgaya: «Sa taghalahuni bəza, azha huni taji a tehis. Huni may a zhin a teh zhana ara veme? Huni tə, huni may a bəw kuni a magəli tə aagi yəm vəw?» iy. 28Dəba Farisa aagi arə, azha aagi iŋgaya: «Hwa ana magəla ataa ala watsa, ni, ni ɗa magəli ataa Musa aagi. 29Ni kasən ci, Bizlaf tazlapanə a Musa, ama ala watsa, ni kasən kwa la ndə a ndaha a heɗes,» iy. 30Ala watsa zhin a zhinatana, iŋgaya: «Ya tsakwa ana səkən ma ɗa tsufa azha: huni kasən kwa la ndə a ndaha a heɗes, ama tadəɗaka nja naka bəza! 31Həji kasənə ci, Bizlaf a kazlima tarha ataa həji mpət aagi səku, ama a zlima tarha ataa ala ma təwah abə ma ɗal zlən andza ndə a kamay. 32Kwa həji tava a zlimazə aa zlap ya, ala tadəɗ nja ala ma wələf tə mbəwha a dəməs mamən akas. 33Andza ala watsa a ndaha ara Bizlaf səku meni, a kaɗa kula a ɗal kwa veme səku,» iy. 34Zhin aa zhinanə, aagi iŋgaya: «Hwa, mbəwa kwa, hwa mbəwha a mpət, azha hwa kamay a sərəkani vəw?» aagiy. Azha dəba aagi agamazə aara abə shi a jak ta tarha Yahuda aagi.
35Yesu a zlima ya, aa tagamazə aara a jak ta tarha Yahuda aagi. Nda a ndaha ara, dəba a aɗiwzə, iŋgaya: «Hwa, hwa taɗalanə awa a Mbə həji ma dəgnak vəw?» iy. 36Ala watsa zhin a zhinanə, iŋgaya: «Ala ndə sa kaaɗalanə awa watsa vaye sa Bay Madagal?» iy. 37Yesu zlap a zlapanə, iŋgaya: «Kadək! Hwa tagəra, ala ma kazlapahu watsə, sa watsə, sa ana ala watsa,» iy. 38Ala watsa iŋgaya: «Bay Madagal, sa taɗal awa.» Dəba a agəliɓakənə atama a Yesu. 39Mbara azha, Yesu zlap a zlap, iŋgaya: «Sa ndaha a manahayak aska a zla guma: aska a ɗa həji wələf aagi gəra la, azha, həji ma kagəra la aagi bəw ta a həji wələf aagi,» iy. 40Farisa ndiɓi aagi, ma ɗa huk abəra aagi tazlima zlap ma watsa aagi, zlap aa zlapanə, aagi iŋgaya: «Ni yəm azha, ni ɗa həji wələf aagi vəw?» aagiy. 41Yesu zhin a zhinatana, iŋgaya: «Andza huni va a ɗa həji wələf aagi meni, həna mpət a kaɗa ndza tə ata huni akas. Ama, anawatsə huni kazlap: “Ni kagəra la,” huniy, mpət kuni ndza tə,» iy.
ទើបបានជ្រើសរើសហើយ៖
Yahwana 9: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
