Yahwana 8
8
Yesu abə wala mazheref
1Yesu tsaa kanda tə a ha dawən Jaytun. 2Biŋ a kwaf tə, tsaa kazhin tə a jak kwakus, həji aagi vərəm, aa kandaha abəra. Ka a ndza tə ka, dəba a asərəkatana səkən aagi. 3Mbara azha, masərək ma ma garagar aagi abə Farisa aagi leŋ aa daanə wala minja ndə aa gəra a kaɗal mazheref. Pa aa tsəzə ka a taba həji aagi tiwtiw. 4Azha zlap aa zlapanə a Yesu, aagi iŋgaya: «Masərək, wala watsə ci, həji mbəlazə a karən. 5Musa tagarani ka a ma ma garagar ci, həji a ŋgwaf wala watsə abə ŋkəɗaŋ. Azha hwa, deŋ kwa avaŋga?»
6Aa zlap ikwa aska aagi asleŋanə kilŋga, aska aagi lima təf ta tək ma a heɗe. Ama ŋtiŋ Yesu a ŋtiŋ wənək tə ka a hayak dəba a aŋtir la ata hayak abə mbə ra. 7Ndə aa katsapanə ɗiw a guɗaŋ, kaf i ha, i təmta iŋgaya: «A taba kuni, ala ma ŋkula va a ɗalzə mpət, madiw a ŋkwal ŋkəɗaŋ mpər ata wala watsə.» 8Zhana wəruk ŋtiŋ i wənək a hayak, dəba a aŋtir la ata hayak. 9Ndə aa zlima ma watsa, kwa vaye ŋtaguleŋ ŋtaguleŋ aa wiɗ ta, a diw ata msəra mawəl ma ndza a mən aagi. Yesu ŋtaɗ tə ana ma finha a tsutsa, abə wala ndə aa gar aka atama tə. 10Azha, Yesu kaf i ha, iy kəsha iŋgaya: «Wala, aa ta mbara wa? Kwa ala ma lima a dzawahu aka wəra?» 11Zhin a zhinanə: «Kwa ala aka səku, Madagal,» Yesu zlap a zlapanə «Sa yəm, sa kadzawahu akas: nda kwa, ara hwa a zhin a ɗal mpət kwa vepiy,» iy.
Yesu ana weɗ la ataa manahayak
12Zhana, Yesu zlap a zlapatana a ŋgaɓa həji aagi, iŋgaya: «Sa, sa ana weɗ la ataa manahayak. Ala ma kasəbaraka ya, a kaanda a ləvaŋ akas, ama a alima weɗ la ma kalahə ata miɗ ma təwah.» 13A tsutsa Farisa aagi kəsha iŋgaya: «Hwa ana ma kaghal səkən ndə hwa gəra abə ndə hwa zlima ata hwa abə ha kwa, ma kwa a kakat akas.» 14Yesu zhin a zhinatana iŋgaya: «Kwa andza sa, sa ma kaghal səkən ndə sa gəra abə ndə sa zlima ata sa abə ha naka ci, ma naka a heɗe a heɗe, ara ndə sa kasən la ndə sa ndaha a heɗe abə la ndə sa kanda a heɗe, ama huni, huni kasən kwa la ndaa naka abə la ndə sa kaanda a heɗe səku. 15Ama aŋkuni, huni zla guma andza ndə həji aagi aa kadeŋi; sa, sa kazla guma kwa ata ala akas. 16Azha andza, sa, sa azla guma, guma naka a heɗe a heɗe, ŋter, ara ndə sa ŋkula ɗa ŋtaguleŋ naka a zla guma watsa, Vava ma zlənaka a ndza abə sa yəm. 17Ama, taŋtiraya a ma ma garagar kuni, andza həji aagi gbak, aa taghal səkən ndə aa gəra abə ndə aa zlima ci, ma watsa a heɗe a heɗe ŋter. 18Sa kaghal səkən ndə sa gəra abə ndə sa zlima ata ha naka, zhana yəm, Vava ma zlənaka a kaghal səkən ndə a gəra abə ndə a zlima ata sa wəruk.» 19Mbara aagiy kəsha iŋgaya: «Cihw watsa a vata?» aagiy. Yesu zhin a zhinatana, iŋgaya: «Huni kasənaka səku, azha huni kasən Vana səku; andza huni tasənaka, huni asən Vana bəza yəm.» 20Yesu a zlap ma watsə aagi, tiɗa ndə a kasərək səkən aagi a jak kwakus, ata la ta vəlanə səkən a Bizlaf. Kwa ala taha a mbələ akas, ara ndə wan tə awli a ndaha.
Nda Yesu abə zla guma
21Yesu zlap a zlapatana zhana, iŋgaya: «Sa, sa anda naka, huni agasaka, ama huni abazl a mpət kuni. Ata la ndə sa kaanda, huni, huni kaaɗa kula a ndahas.» 22Magulakwakw Yahuda aagi, dəba aagi aɗiw a walaŋ ta, aagi iŋgaya: «A ɗiw a dza ha tə vəw, aka səku a kazlap: “La ndə sa kaanda, huni kaɗa kula a ndaha səku,” iy avaŋga?» 23Yesu zhin a zhinatana, iŋgaya: «Huni, huni ɗa ma ndza a nduŋ aagi, ama sa, sa ndaha a wəzəm a wəzlaf. Huni, huni ɗa həji ma ndza a manahayak aagi, ama anaka, sa ɗa ala ma ndza ata manahayak səku. 24Sha ana ndə sa zlapahuni ci, huni abazl a mpət kuni aagi. Ara ndə a ɗa, andza huni taji awa, sa ya, “a ɗa sa” aka səku, huni abazl a mpət kuni aagi.» 25Dəba aagi azlapanə: «Hwa ya, hwa ɗa vaya?» aagiy. Yesu i təmta, iŋgaya: «Ala ndə sa kazlapahuni pal a heɗe ꞌwa aka ata diw tə,» iy. 26«Sa abə zlap dagala abə zla guma ata huni. Ama ala ma zlənaka, a ɗa ŋter ala, azha sa, səkən ndə sa zlimazə ara, sa taghalanə a manahayak.»
27Aa tazlima ci, a zlapatana ata Vava səku. 28Mbara azha, Yesu zlap a zlapatana, iŋgaya: «Ndə huni kaaɓin a kaf Mbə həji ma dəgnak bəza, abə huni asənə ya, sa, “a ɗa Sa”, huni asənə, sa kula a ɗalɓa səkən kwa abə ha naka akas, ama sa zlap andza ndə Vava a sərəkaka. 29Ala ma zlənaka abə sa, tambasl aka ka ŋtaɗ naka akas ara ndə, zlən ndə sa kaɗalə təwahanə kwa vepiy.» 30Tiɗa ndə a kazlap ikwa, vərəm ana həji ma ɗalanə awa aagi.
Həji ma pəlaya aagi abə mava aagi
31Mbara azha, Yesu zlap a zlapatana a Yahuda ma ɗalanə awa aagi, iŋgaya: «Andza huni tambəla ma naka aagi, huni ɗa ŋter magəli naka aagi. 32Azha, huni aɓin a sən ma ma ŋter, azha ma ŋter a abəwahuni ka a ɗa həji ma pəlaya aagi.» 33Zhin aa zhinanə, aagi kəsha iŋgaya: «Ni, ni ɗa shiŋ ataa Ibərahima aagi, ni tava a ɗalha mava ala akas. Avaŋga abə hwa sən a zlap ya: “Ni abəw cini a həji ma pəlaya” aagi avaŋga?» 34Yesu zhin a zhinatana, iŋgaya: «Sa zlapahuni, a ɗa ŋter: Kala ala ma ɗal mpət a ɗa mava mpət. 35Mava a kandza pal a watas, ama mbə jak, ana aŋtə a ndza pal a wata. 36Azha a tsutsa, andza a ɗa Mbə ma pəlahuni, huni aɗa həji ma pəlaya aagi ŋter. 37Huni shiŋ ataa Ibərahima aagi, sa kasənə. Ama huni gas a dzaka aka a mci, ara ndə zlap naka talima la ndza a huni akas. 38Sa, sa zlap ata səkən ndə sa gərazə ara Vana, ama huni yəm, huni ɗal səkən ndə huni zlimazə ara cihw kuni.» 39Dəba aagi azhinanə, aagi iŋgaya: «Vana cini meni, Ibərahima.» Yesu zlap a zlapatana: «Andza huni ɗa shiŋ Ibərahima ŋter meni, huni ɗal zlən tə ndə a ɗalata aagi. 40Ama, huni gas a dzaka aka a mci, sa, ala ma kaghalahuni ma ma ŋter ndə sa zlimazə ara Bizlaf. Ibərahima tava a ɗalzə ikwa akas. 41Ama huni ɗal shiŋ zlən cihw kuni.» Dəba aagi azhinanə, aagi iŋgaya: «Ni, ni taɗa wəzhi ma mbəwha ana ŋge ata sləŋkər aagi səku. Vana cini ŋtaguleŋ, Bizlaf.» 42Yesu zlap a zlapatana, iŋgaya: «Andza Bizlaf ana Cihw kuni ŋter ya, həna huni amayaka, ara ndə, sa ndaha ara Bizlaf. Sa a ɗi, sa ataa aŋtə, sa tandaha abə ha naka akas, ama sha ana ma zlənaka. 43Huni ŋkula zlima ma ndə sa ghalahuni ara veme? Ara ndə huni ŋkula teh ma naka. 44Huni, ma ɗa cihw kuni ya, wəliɓi, azha huni may a ɗal zlən ndə cihw kuni a kamayə. ꞌWa aka ata diw tə, bazl həji aagi ana zlən tə. Tava a zlapazə ma tə a ɗa ŋter akas, ara ndə a ɗa, ma ma ŋter ara akas. Tiɗa ndə a kazla gaɗaɗaŋ, a zlap andza ma ma ŋtan, ara ndə a ɗa ala gaɗaɗaŋ zhana, a mən cina gaɗaɗaŋ. 45Ama anaka, sa zlap ma ŋter azha dawna sha abə huni ŋkula ji ma naka. 46Ma kaɗa kula a taba kuni a ghalə, sa tagəy ma vaya? Andza sa zlap ma ŋter, ara azha veme abə huni ŋkalzə a ji ma naka? 47Ala ma ɗa ataa Bizlaf, a teh ma Bizlaf. Andza ndə huni ŋkula ɗa həji Bizlaf aagi, dawna sha abə huni ŋkula teh ma naka.»
48Yahuda aagi zhin aa zhinanə a Yesu, aagi iŋgaya: «Ma ndə ni zlapahu, hwa ɗa ndə Samariya, azha hwa abə miɗ ma gamak niy, a ɗa ŋter səku azha vəw?» aagiy. 49Yesu zlap a zlapatana, iŋgaya: «Sa, sa abə miɗ ma gamak akas. Ama, sa kahəmən Vana azha huni, huni kahəmənaka akas. 50Sa, sa kagas sləf a ha nakas. Ama, ala ŋtaɗ aka ana ma kagasaka sləf watsa, azha sha ana ma kazla guma. 51Sa zlapahuni, a ɗa ŋter, ala ma njin ma naka, kwa a kaaɓin a mca akas.» 52Mbara Yahuda aagi zlap aa zlapanə, aagi iŋgaya: «Anawatsə ni kasən ŋter ya, miɗ ma gamak a ha kwa! Ibərahima tamca tə, həji ma ɗaf ma ndə aa zlimazə ara Bizlaf aagi yəm aa tabazl ta, azha hwa, hwa ndaha a zlap: “Andza ala tambəla ma naka, a kaamca kwa vepiy səku,” hwiy. 53Hwa aɗa dəy aha Ibərahima, vana cini, ma mca tə vəw? Həji ma ɗaf ma ndə aa zlimazə ara Bizlaf aagi təmta yəm aa tabazl ta. Hwa tsa ha kwa andza azha vaye?» 54Yesu zhin a zhinatana, iŋgaya: «Andza sa ma kasləf ha naka yəm, sləf naka a kakat akas. Ala ma kasləfaka, a ɗa Vana. Huni kazlap a heɗe: “Sha ana Bizlaf takwa,” huniy. 55Huni tasənəs. Azha sa, sa kasənə. Andza sa zlap sa kasənə səku, sa ɗa ala gaɗaɗaŋ andza huni. Ama, sa kasənə zhana, sa kambəla ma tə aagi. 56Ibərahima, cihw kuni, taɓas ndə a kadeŋ a gəra vah naka, tagəra azha taɓas təwah.» 57Yahuda aagi zlapanə, aagi iŋgaya: «Hwa tagwar a va radzaɓən səku ya, hwa gəra Ibərahima avaŋga?» aagiy. 58Yesu zhin a zhinatana, iŋgaya: «Ayəw, sa zlapahuni, a ɗa ŋter, tiɗa awli a mbəwha ana Ibərahima, “Sa aka tiw”.» 59A tsutsa, dəba aagi akwar ŋkəɗaŋ aagi aska a ŋkwalə. Ama, Yesu tik a ɓah tə, azha səɗakw a ŋtəɗa tə a bəza a jak kwakus.
ទើបបានជ្រើសរើសហើយ៖
Yahwana 8: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
