Yahwana 6
6
Yesu tandar mawəl aagi bəluk dzaɓən
(Mat 14.13-21; Mrk 6.30-44; Luk 9.10-17)
1Azha a diwzha tə, Yesu tsa kanda tə a ata guva mitil Galili, ndə həji kayə zhana mitil Tiberiya. 2Ŋgaɓa həji aagi dagala, aa kasəbarə. Ara ndə a ɗa, həji aagi tagəra səkən tsaɓaŋ ndə a ɗalə aagi, tareh həji dawər aagi dagala. 3Yesu tsak ka nda tə aha wəzəm minja, azha ka a ndza tə ka tsutsa abə magəli tə aagi. 4Azha Paska, gwaygwaya Yahuda aagi huk. 5Yesu kaf i nja, a gəra ŋgaɓa həji aagi kandaha ara. Zlap a zlapanə a Filip, iŋgaya: «Həji anda səkəmatana səkən ta zəm aska aagi azəmə a vata?» 6Yesu a zlap ikwa aska a teh zhin ma ataa Filip, ama a kasən səkən ndə a kaaɗalə. 7Filip zhin a zhinanə: «Kwa abə dala teemeri gbak watsə, a kaakatanə, ala a lima səkən ta zəm kajik kajik səku.#6.7 Burəw radzaɓən aha dzaɓən abə dala» 8Ala minja a taba magəli tə aagi, Andire, zlina Simun Piyer zlap a zlapanə, iŋgaya: 9«Mbə dərlaŋ minja a ɗi abə ambash wəda dzaɓən ndə həji də abə səkən minja ma kasaɓ andza mbə ambəzl ndə həji kayə urzh, abə ŋkilif gbak ya, akat azha a həji ma vərəm watsa aagi veme?» 10Mbara azha, zlap a zlap, iŋgaya: «Huni zlapatana aa mandza aka,» iy. Ata la watsa ŋkəsaf dagala. Mbara ka aa ndza aka azha, mawəl aagi taɗal bəza bəluk dzaɓən. 11Yesu leŋ a ji ambash wəda, a diwzha tə ndə a ɗalanə wasiy bəza a Bizlaf, dəba a aɓizhatana a həji ma ndza a tsutsa aagi. A ɗalə andza sha yəm abə ŋkilif, pa a vəlatana andza ndə kwa vaye a kamay a zəmə.
12Ndə aa zəm ndar, Yesu zlap a zlapatana a magəli tə aagi, iŋgaya: «Huni dzamha kirkem ma finha, ara huni mbasl ka ŋtaguleŋ a fəcak tə,» iy. 13Azha dəba aagi adzam kirkem wəda ma finha aska təmta, a dzamha wədzəm wam aha gbak a diwzha ndə həji aagi ɗa ndar.
14Ndə həji, aa gəra shiŋ səkən tsaɓan ndə a ɗal aagi ya, dəba aagi azlap, aagi iŋgaya: «Ala watsə a ɗa ŋter maɗaf ma Bizlaf, ma kaandaha a manahayak.»
15Ama, ndə Yesu a sən bəza aa kandaha a ji a tsəzə ka a bay, tsaw a nda tə a bəza abəra həji aagi zhana, a taf tə a ha wəzəm ŋtaguleŋ tə.
Yesu a kanda ata yəm
(Mat 14.22-27; Mrk 6.45-52)
16Ndə ŋtsəɓahw a ɗal tə, magəli Yesu aagi tsaa katadukha a ma mtil. 17Takaf aa taf ta ata gəlmbə a nda a Kafarnahum, ma ndza a bəzaha ata gwara ata guva mtil minja. A tsutsa zaɗə taɗal tə, Yesu tanaka a ndaha ara təmta kwagwas. 18Miɗ ma dagal minja dəba a adza abə ɓərɓər tə, mtil a kusah. 19Tiɗa azha ndə aa tagaɓɓa bəza gədək, a ɗal bəza kilumeter dzaɓən, aka səku, ŋkwah, aa gəra Yesu a kanda ata mtil a kakərəɗha ara təmta, ghərek ŋzliŋ a dzata bəza. 20Ama dəba Yesu a azlapatana iŋgaya: «Sa, huni ɗal ŋzliŋ səku.» 21Aa mayə a tiw aara ata gəlmbə, a tsutsa gəlmbə gwar ata hayak, ata la ndə aa kanda.
Yesu ana wəda ma kavəla miɗ
22Apat a kwaf, ŋgaɓa həji ma finha a tsutsa a bəza aha ata guva mtil ndiɓi aagi gəra ya, gəlmbə ŋtaɗ ana mandza a bəzaha, aa kasən ya, Yesu tataf a mən abə magəli tə aagi akas, ama aa nda gagagha ta ana magəli tə aagi. 23Ndə aa kazlap ikwa, gəlmbə ndiɓi aagi ndaha a hayak Tiberiyas, aa huk ata la ndə Bay Madagal a ɗalanə wasiy a Bizlaf, ata wəda ndə aa zəm. 24Ndə ŋgaɓa həji aagi gəra ya, Yesu a tsutsa səku, magəli tə a tsutsa səku, dəba aagi ataf a gəlmbə watsa aagi a nda a Kafarnahum a gasəha Yesu. 25Ndə aa gəra Yesu a bəzaha ata guva mtil minja, dəba aagi azlapanə, aagi iŋgaya: «Masərək, hwa ndaha a ɗi vepe?» 26Yesu zhin a zhinatana, iŋgaya: «Ayəw, sa zlapahuni, ŋter, huni gasaka ara ndə huni zlima səkən tsaɓan ndə sa kaɗal aagi səku, ama huni gasaka ara ndə huni zəm wəda, azha bəra kuni ndar andza ndə huni kamayə. 27Huni ɗiw a ɗal zlən aska a lima səkən zəm ma karəɗa təs, ama huni ɗiw a ɗal zlən aska a lima səkən zəm ma ŋkula kəɗaŋ, ma kavəla miɗ ma kwa vepiy, sha ana ndə Mbə həji ma dəgnak a kavəlahuni, ara ndə Bizlaf ma ɗa Vava tatsa lamba ata dagal tə aka ata Mbə tə.» 28Mbara azha dəba aagi aɗiwzə: «Mbara ni aɗalzə abə ni aɗal zlən ndə Bizlaf a kamayə avaŋga?» 29Yesu zhin a zhinatana, iŋgaya: «Zlən ndə Bizlaf a kamay aska huni aɗalə ci, huni ɗal awa ana ala ndə a zlənazə.» 30Zlap aa zlapanə, aagi iŋgaya: «Mbara hwa azha, shiŋ tsaɓan ndə hwa kaɗalə bəza aska ni agəra, aska ni aɗalahu awa veme? Səkən ndə hwa kaaɗal bəza azha veme? 31Jiji cini aagi tazəm wəda ndə həji a kayə manə ata dərzləm a damə, andza ndə a ŋtiraya, iŋgaya: Tavəlatana a zəm ana wəda ma nda aka a wəzəm a wəzlaf.» 32Yesu zlap a zlapatana, iŋgaya: «Sa zlapahuni, a ɗa ŋter, Musa ana ma vəlatana wəda ma ndaha a wəzlaf səku, ama Vana ma kavəlahuni ŋter wəda ma ndaha a wəzəm a wəzlaf. 33Ara ndə a ɗa wəda ndə Bizlaf a kavələ, sha ana ala ma tadukha a wəzəm a wəzlaf, zhana sha ana ma kavəla miɗ a manahayak.»
34Azha zlap aa zlapanə, aagi iŋgaya: «Bay Madagal vəlani wəda watsa pal ma!» 35Yesu zlap a zlapatana, iŋgaya: «Sa ana wəda ma kavəla miɗ. Ala ma ndaha ara sa, mintish a kaadzə akas, ala ma ɗal awa aska ma naka, yəm a kaadzə kwa vepiy akas. 36Avəli sa tava a zlapahuni, huni tagəraka, ama huni taji a ɗal awa səku. 37Kwa vaye a taba həji ndə Vava a vəlaka aka, a andaha ara sa, sa kaafak kwa ala ma kandaha ara sa bəza akas. 38Ara ndə a ɗa, sa tadukha a wəzəm a wəzlaf a ɗal səkən ndə sa kamayəs, ama a sa a ɗalə andza may ata ala ma zlənaka. 39Tsakwa ana may ala ma zlənaka: Ara a fəcak ala ŋtaguleŋ a taba həji ndə a vəlaka ka aagi, ama a sa a garazata a wəzəm a jiɓ ata kwakuɗaŋ wan. 40Watsə ana səkən ndə Vana a mayə: Kala ala ma kagəra Mbə, azha dəba aagi aɗalanə awa, aagi alima miɗ ma kwa vepiy, azha sa ana anaka, sa agarazə a wəzəm a jiɓ vah kwakuɗaŋ manahayak.»
41A tsutsa azha, Yahuda aagi dəba aagi aŋguzŋguz ara ndə Yesu a zlap, iŋgaya: «Sa ana wəda ma tadukha a wəzəm a wəzlaf,» iy. 42Aa kazlap, aagi iŋgaya: «Həna Yesu, mbə Yusufu, ndə həji kasən cin katkadək abə mamən wəra? Mbara a sən a zlap anawatsə, iŋgaya: “Sa tadukha a wəzəm a wəzlaf,” avaŋga?» 43Ama, Yesu zhin a zhinatana, iŋgaya: «Huni mbasl ŋguzŋguz aka a walaŋ kuni. 44Kwa ala kula a ndaha ara sa akas, andza ala ma zlənaka tayazə aka səku, azha sa, sa agarazə a wəzəm a taba həji ma bazl ta aagi ma vah ta kəɗaŋ manahayak. 45Maɗaf ma Bizlaf aagi taŋtir ka: Huni tiwtiw Bizlaf a asərəkahuni səkən aagi . Kala ala ma teh ma ma ndaha ara Vava abə ma lamzə sərək ma tə, a ndaha ara sa. 46A may ghal ci, ala ma va a gərazə Vava abə nja tə akas, səy ala ma ndaha ara Bizlaf. Aŋtə tagəra Vava abə nja tə. 47Sa zlapahuni ŋter ŋter: Ala ma ɗal awa, abə miɗ ma kwa vepiy. 48Sa ana wəda ma kavəla miɗ. 49Jiji kuni aagi tazəm wəda ndə həji kayə manə ata dərzləm a damə, azha aa tabazl ta. 50Tsakwa ana wəda ma tadukha a wəzəm a wəzlaf, kala ala ma zəmə, a kaamca zhana akas.
51Sa ana wəda ma tadukha a wəzəm a wəzlaf, ma kavəla miɗ. Ala ma zəm wəda watsa, a andza abə nja kwa vepiy. Azha wəda ndə sa kaavələ, a ɗa zli zlikusəm naka, sa vələ aska manahayak a lima miɗ.» 52Ndə a zlap ikwa, Yahuda aagi dza səbakw a taba ta a guɗaŋ, aagi iŋgaya: «Ala watsə a sən a vəlaŋkwa zli zlikusəm tə a zəm avaŋga?» 53Azha Yesu zlap a zlapatana, iŋgaya: «Ayəw sa kazlapahuni, a ɗa ŋter, andza huni tazəm zli zlikusəm ataa Mbə həji ma dəgnak aka səku, huni tasa ampəs tə aka səku, huni kaalima miɗ a huni səku. 54Ala ma zəm zli zlikusəm naka, ma sa ampəs naka, abə miɗ ma kwa vepiy, azha sa agarazə a wəzəm a taba həji ma ndza a jiɓ aagi ata vah ta kəɗaŋ manahayak. 55Ara ndə a ɗa, zli zlikusəm naka a ɗa səkən zəm ma ŋter, ampəs naka a ɗa səkən ta sa ma ŋter. 56Ala ma zəm zli zlikusəm naka abə ma sa ampəs naka, a ndza abə sa, sa yəm, sa ndza abə sha. 57Andza ndə Vava ma zlənaka a ndza abə nja, azha sa nəp gwara ara yəm, ikwa azha yəm, ala ma zəm zli zlikusəm naka a andza abə miɗ dawna sa. 58Tsakwa andza watsə ana wəda ma tadukha a wəzəm a wəzlaf, parpar abəra ndə jiji kuni aagi zəmə, azha aŋta, aa tabazl ta. Ama, ala ma kaazəm wəda watsə a andza miɗ ma kwa vepiy.» 59Yesu a zlap ma watsa aagi tiwtiw azha ndə a kasərəkatana səkən a jak ta tarha Yahuda aagi a hayak Kafarnahum.
Zlap ataa miɗ ma kwa vepiy
60A diwzha ndə aa zlima ma Yesu, vərəm ana magəli tə aagi, aa zlap: «Ma watsə ɓərɓər, ma kaaɗa kula a zlima ya?» 61Ama Yesu tasən bəza a ha tə ci, magəli tə aagi ŋguzŋguz ata ma watsa. Dawna sha abə a zlapatana, iŋgaya: «Ara huni ci, azha a ɗa səkən ta ndəvahuni vəw? 62Mbara andza huni gəra Mbə həji ma dəgnak a kataf tə ata la ndaa tə ma avandza ya, huni aɗalzə azha avaŋga? 63Miɗ Bizlaf ana ma kavəla miɗ, ala a ɗa səkən ma ɗa ɓəlaakaka. Ma ndə sa zlapahuni aagi ɗa Miɗ Bizlaf, zhana aa ɗa miɗ. 64Ama, a taba kuni aka ana ndiɓi aagi ma ŋkula ɗal awa aagi.» Ara ndə a ɗa, Yesu a kasənə ata diw tə, aa ɗa aka ana həji ma ŋkula ɗal awa aagi, a kasən ala ma kaaɓin a beri bəza. 65Zhana iŋgaya: «Ikwa abə sa zlapahuni, ala ma kaɗa kula a ndaha ara sa andza Vava taghalanə təf akas.»
66ꞌWa aka a tsutsa, vərəm ana magəli tə ma zhina ta abə ma a diwzha ma mbasl ka a səbarə aagi. 67Mbara Yesu ɗiw a ɗiwzə magəli tə ma wam aha gbak aagi: «Azha huni kamay a nda kuni, ana huni yəm wəra?» 68Simun Piyer zhin a zhinanə, iŋgaya: «Bay Madagal, ni andakənə a vaya? Zlap ma kavəla miɗ ma kwa vepiy ara hwa. 69Ni, ni taji, ni kasənə, hwa ana ma Ghwaɗeɗe ma zlənha ara Bizlaf.» 70Yesu zhin a zhinatana, iŋgaya: «Sa ma may a dəmahuni, huni, ma wam aha gbak aagi wəra? Ama, ŋtaguleŋ a taba kuni, a ɗa miɗ ma gamak!» 71A zlap ikwa ata Yahuda, mbə ataa Simun Iskariyut. Ara ndə a ɗa sha ana ma kaaɓin a beri, sha, ŋtaguleŋ a taba ta wam aha gbak aagi, ma nda ber Yesu bəza.
ទើបបានជ្រើសរើសហើយ៖
Yahwana 6: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
