Yahwana 5
5
Reh ala ndə zlikusəm tə a bazl tə ara Yesu
1A diwzha tə, tiɗa ndə Yahuda aagi kaɗal gwaygwaya ta, azha, Yesu taf a taf tə a Wərusalima. 2A hayak ma dzamadzam watsa, yəm ndə aa her ka a dza gwavgwav aka huk abəra la ndə həji kayə, majak wəzhi ŋcimi, yəm ndə aa kayə abə ma Ibəraniŋku «Betijata,» abə bay dəmbə dzaɓən. 3Aska dəmbə watsa aagi, vərəm ana həji dadawər aagi: həji wələf aagi, həji ndə ŋgas a gəy tə ata təmta aagi abə həji ma bazlabazl zlikusəm aagi tawanaya. [Aa katehi a yəm a buŋkwa 4ara ndə matəf Bizlaf a tadukha ata vah minja a gwavgwav azha dəba a akusah yəm. Ala dawər ma diw a ndaha a yəm ma kusahakusah a ɗa wirwir ara kwa andza shiŋ dawər tə veme.] 5A tsutsa ala minja a kadawər a ɗal bəza va ramahkaɗ aha dzamahkaɗ. 6Ndə Yesu a gəra tawanaya ata hayak zhana a zlima wan aka a kadawər, ɗiw a aɗiwzə iŋgaya: «Hwa kamay a ɗa galaɓagha vəw?» iy. 7Ala dawər zhin a zhinanə iŋgaya: «Madagal, ala naka a tsaka a gwavgwav tiɗa ndə yəm a kadiw a buŋkwa akas; tiɗa ndə sa katəlzə a nda, ala minja mpər aha sa.» 8Yesu zlap a zlapanə, iŋgaya: «Gar kwa a wəzəm, ji həzhiɗ kwa, nda!» 9A tsutsa a tsutsa, ala watsa galaɓagha, leŋ a ji həzhiɗ tə dəba a anda.
Azha a ɗa vah ta nəp Yahuda aagi. 10Magulakwakw Yahuda aagi, zlap a zlapanə ana ala ma ꞌwala aka rehha bəza a dawər tə watsa, aagi iŋgaya: «A ɗa vah ta nəp Yahuda aagi akacihwa, hwa abə təf a ji həzhiɗ kwa akas.» 11Zhin a zhinatana: «A ɗa ala ma rehaka ma zlapaka: “Ji həzhiɗ kwa, nda!”» Iy. 12Ɗiw aa ɗiwzə azha, aagi iŋgaya: «A ɗa ala ma zlapahu, “Ji həzhiɗ nda kwa,” iy hwa watsa vaya?» 13Ama ala ndə dawər tə a ɗa galaɓagha watsa tasən ala ma zlapanəs, ara ndə Yesu a ɗa fəcak a taba həji ma ndza ata la watsa aagi.
14A diwzha tə, lima aa lima abə Yesu a jak kwakus Bizlaf, zlap a zlapanə, iŋgaya: «Hwa tagəra anawatsə hwa galaɓagha. Hwa ɗiw a zhin a ɗal mpətəs, ara ndə dadawər ma dəy aha watsə a kazhin a ndakhwa atama.» 15Ala watsa dəba a anda a ghalatana a magulakwakw Yahuda aagi, iŋgaya: «Yesu ma rehaka bəza,» iy. 16A tsutsa, abə magulakwakw Yahuda aagi gas a sanə yaka a Yesu dawna ndə a reh ala vah ta nəp Yahuda aagi. 17Ama Yesu zhin a zhinatana iŋgaya: «Vana a ɗal zlən kapish kapish, sa yəm, sa abə zlən.» 18Dawna zlap watsə, abə magulakwakw ataa Yahuda aagi gas Yesu abə ɓərɓər tə a dzə ka a mci, ara ndə a ŋkula hawanə a vah ta nəp Yahuda aagi gagagha səku, ama zhana dawna ndə a zlap Bizlaf a ɗa Cin ŋter, azha a saɓ ha tə andza mandala Bizlaf.
Dagal ataa Mbə Bizlaf
19Yesu zlap a zlapatana zhana, iŋgaya: «Ayəw, sa zlapahuni a ɗa ŋter, Mbə kula abə ha tə ata səkən a ɗal akas, ama a ɗal səkən ndə a gəra Cin a kaɗalə gagagha. Səkən ndə Vava a kaɗal tiwtiw sha ana ndə Mbə a kaaɗalə yəm. 20Ara ndə a ɗa Cina Mbə abə may Mbə, azha sha ana ndə a kaghalanə səkən ndə a kaɗal aagi tiwtiw ana sha. A aghalanə zlən zhana ma dəy aha watsə aagi, azha huni aghərəŋ kuni. 21Ara ndə a ɗa Vava a kagarzə həji ma bazl ta aagi a wəzəm, zhana tsa kavəlatana miɗ, ikwa yəm Mbə a avəlanə miɗ a nəp ana ala ndə a kamayə. 22Azha Vava a kazla guma ata ala akas, ama tavəlanə ka a Mbə ana dagal ta zla guma, 23aska həji aagi tiwtiw a hawanə a Mbə, andza ndə a kahawanə a Vava. Ala ma ŋkula ji a hawanə a Mbə, a ŋkula ji a hawanə yəm a Vava ma zlənazə.
24Ayəw sa zlapahuni, a ɗa ŋter, kwa vaye ma teh zlap naka aagi, zhana ɗal awa i aska ma ala ma zlənaka abə miɗ ma kwa vepiy. Guma a kazla a heɗe akas, ama tapew tə a bəza aha mci, a ndza abə nja kwa vepiy. 25Ayəw sa ghalahuni, a ɗa ŋter, a kaagwara tə ana vah tə, azha a ɗi tiw, ndə həji ma bazl ta aagi aa kaazlima maŋgurləm ataa Mbə Bizlaf, azha ma kaazlima aagi tiwtiw aagi andza abə nja kwa vepiy. 26Ara ndə a ɗa, andza ndə meɗizh ma kavəla miɗ a ndza a Vava abə ha tə, sha ana ndə a vəlanə aka a Mbə yəm. 27Tavəlanə aka a Mbə ana dagal ta zla guma, ara ndə a ɗa Mbə həji ma dəgnak. 28A ɗiw a ɗa səkən ta ghərəŋahunis, ara ndə a ɗa, a kaagwara tə ana vah ndə həji ma ndza a jiɓ aagi kaazlima maŋgurləm tə, 29azha həji ma va a ɗal təwah aagi anda ta a bəza a jiɓ tiwtiw, aagi alima miɗ ma kwa vepiy, ama ma gəy ma aagi anda ta a bəza, aa dzaw aka a fak a kwahu. 30Sa, sa kula a ɗal səkən abə ha nakas. Sa zla guma andza ndə Bizlaf a ghalaka, azha guma naka a heɗe a heɗe ara ndə sa kagas a ɗal andza ndə sa kamayəs, ama andza may ataa ala ma zlənaka.»
Ghal səkən ndə həji aagi gəra abə ndə aa zlima ata Yesu
31Yesu zhana iŋgaya: «Andza sa ma kaghal səkən ma təwah ma ɗal ata sa abə ha naka meni, həji aagi kaajis. 32Ama ala minja ma kaghal səkən ma ɗal ata sa təwah, sa kasən ya, a ghal səkən ndə a gəra abə ndə a zlima ata sa ŋter. 33Huni tazlənha matəf aagi ara Yahwana, azha taghal səkən ndə a gəra abə ndə a zlima ma ɗa ŋter. 34Sa ana anaka, sa tamay ala a ghal səkən ndə a gəra abə ndə a zlima ata sa akas, ama sa zlap ikwa ci, aska huni alima reh. 35Yahwana a ɗa patərla ndə həji feŋ kwahu a heɗe aska a ɓal, azha huni tamay a ɓas a weɗ tə a wan kajik ikwa.
36Ama sa ana anaka, ghal səkən ndə ma gəra abə ma zlima ata sa dəy aha ataa Yahwana: Aa ɗa zlən ndə ndə Vava a vəlaka a kəliy aagi. Sa ɗal zlən watsa aagi zlap ata sa zhana aa kaghal səkən ma təwah ata sa, aa ghal ci, Vava ma zlənaka. 37Zhana Vava ma zlənaka a ghal səkən ma təwah ma ɗal ata sa abə ha tə. Ama huni tava a zlimazə maŋgurləm tə abə wənək tə huni tagərazə akas. 38Huni taji a mbəla ma tə ka a ꞌunəf kuni akas, ara ndə huni ŋkula ɗal awa aska ma ataa ala ma zlənazə. 39Huni sərəkə abə ŋkwaɓ ana ma ma ŋtiraya, ara ndə huni kadeŋi, huni ɗal ikwa abə huni alima miɗ ma kwa vepiy: Aɓa azha təmta ana ma kaghal səkən ma ɗal ata sa! 40Avəli azha, huni, huni kaji a ndaha ara sa a lima miɗ ma kwa vepiy səku.
41Sa kateh sləf ma dagal ma ndaha ara həji aagis. 42Ama sa kasənahuni: May Bizlaf a ꞌunəf kuni akas. 43Sa ndaha ata zləm ataa Vana, azha huni kajikas. Ama ala ma kadeŋaɓa a ndaha abə ɓərɓər tə, huni kaji ma tə! 44Huni asənə a ɗal awa avaŋga, huni, huni may a ji sləf ma dagal a taba kuni həji aagi, azha huni tagas a lima sləf ma dagal ŋtaɗ tə ara Bizlaf səku? 45Ama, huni ɗiw a deŋ ka, sa atək ma ata huni atama Vana huniy səku. Musa ana ma kaawəlahuni, sha ndə ŋkwaɓ kuni a heɗe nana. 46A ɗa andza huni taɗal awa ŋter aska ma Musa, mbara həna huni aji ma naka yəm, ara ndə a ɗa, ata sa abə a ŋtir ma. 47Ama andza huni taɗal awa aska ma ndə a ŋtir akas, huni asən a ɗal awa aska ma naka avaŋga?»
ទើបបានជ្រើសរើសហើយ៖
Yahwana 5: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
