Yahwana 21
21
Ghalha ha Yesu a magəli tə ma ŋshiliɗ aagi
1A diwzha ma watsa, Yesu a ghalatana ha tə zhana a magəli tə aagi, a mazləm mtil Tiberiya. Tsakwa abə a ghalatana ha tə. 2Simun Piyer, Tumas ndə aa kayə zhana Ŋhul, Nataniyel ma ndza a hayak ma dzamadzam Kanana ma ndza a hayak Galili, wəzhi Zebede aagi abə magəli Yesu ndiɓi aagi gbak, aa tsutsa ata la ma ŋtaɗ. 3Simun Piyer zlap a zlapatana, iŋgaya: «Sa nda naka a mbəlaha ŋkilif,» iy. Aa zlapanə aagi iŋgaya: «Kiyzaŋkwa a nda tiwtiw,» aagiy. Tsaw aa ndaa, takaf aa taf ata gəlmbə ma dagal. Ama, abə zaɗə watsa, kwa aa taji səkən aara akas. 4Ndə la a kwaf tə, Yesu tagar tə ka a tsutsa a mazləm yəm. Ama, magəli aagi tasənə a ɗa sha səku. 5Yesu a zlapatana azha, iŋgaya: «Ŋgwanambə naka aagi, huni abə ŋkilif kajik aka wəra?» Dəba aagi azhinanə aagi iŋgaya: «Aŋghə,» aagiy. 6A zlapatana, iŋgaya: «Huni fak kadara gwara ata guva zəm ataa gəlmbə ma dagal azha huni alima.» Fak aa fak kadara, aa tambəla ŋkilif ghef a mən, njiwaha takum ara təmta. 7Magəla ndə Yesu a kamayə dəy, a zlapanə a Piyer, iŋgaya: «A ɗa Bay Madagal səkwa!» Ndə Simun Piyer a zlima ma watsa aagi: «A ɗa Bay Madagal» ya, dəm a dəm rəkuts tə ka ata zlikusəm, ara ndə a ɗa a kandza abə bəra a varvara. Azha dəba a ambir a yəm. 8Magəli ndiɓi aagi zhinha abə ma dagal gəlmbə, ndə a kanjiwha kadara ma ghef abə ŋkilif. Aa taɗa gədək a guɗaŋ abəra mazləm yəm akas, huk ata hayak, gədək tə, a ɗal bəza mabəra teemeri. 9Ndə aa taduk ta a bəza ata gəlmbə ma dagal ata hayak, aa gəra a tsutsa ata aŋsli kwahu ŋkilif abə wəda ndə həji kayə Peŋ, aa katsa a heɗe. 10Yesu zlap a zlapatana, iŋgaya: «Huni daaha ŋkilif ndə huni ꞌwal a mbəlata watsa aagi,» iy. 11Simun Piyer takaf a zhin a taf tə a gəlmbə ma dagal, dəba a anjiwha kadara ma ɗa ghef abə bay bay ŋkilif teemeri abə radzaɓən aha mahkaɗ, azha abə ŋkilif ghef a mən, kadara taŋhwak səku. 12Yesu a zlapatana azha, iŋgaya: «Huni ndaha a zəm səkən,» iy. Kwa ŋtaguleŋ a taba magəli watsa aagi, ma təlzə a ɗiwzə, iŋgaya: «Hwa vaye akas?» Aa kasən katkadək a ɗa Bay Madagal. 13Azha Yesu tsaw a ndaha, leŋ a ji wəda ndə həji kayə peŋ watsa, pa a vəlatana, azha pa a vəlatana ŋkilif yəm. 14A ɗa zhin mamahkaɗ tə ndə Yesu a ghalatana ha tə a magəli tə aagi ghala a zhina tə a bəza a jiɓ a taba həji ma bazl ta aagi.
Tiw Yesu abə Piyer
15A diwzha ndə aa zəm wəda bəza, Yesu dəba a azlapanə a Simun Piyer, iŋgaya: «Simun, mbə Yahwana, hwa mayaka dəy aha həji watsə aagi vəw?» Zhin a zhinanə, iŋgaya: «Ayəw, Bay Madagal! Hwa kasənə, sa kamayahu.» Yesu a zlapanə iŋgaya: «Tsaka nja ata wəzhi ŋcimi naka watsə aagi katkadək,» iy. 16Zhana, ɗiw a ɗiwzə a magbak tə, iŋgaya: «Simun, mbə Yahwana, hwa kamayaka vəw?» Piyer a zhinanə, iŋgaya: «Ayəw hwa kasənə, sa kamayahu Bay Madagal.» Yesu i kəsha iŋgaya: «Hwa ɗa mbə njin ataa ghəl ŋcimi naka aagi.» 17Zhana wəruk, ɗiw a ɗiwzə a mamahkaɗ tə, iŋgaya: «Simun, mbə Yahwana, hwa kamayaka vəw?» Piyer təlish a ghuɗek tə ara ndə Yesu a ɗiwzə zhin mamahkaɗ, iŋgaya: «Hwa kamayaka vəw?» iy. Azha a zhinanə, iŋgaya: «Bay Madagal, hwa ma kasən səkən aagi tiwtiw, hwa kasənə katkadək ya, sa kamayahu!» Azha, Yesu a zlapanə, iŋgaya: «Zəmaka ɗir a ghəl ŋcimi naka watsə aagi katkadək. 18Sa zlapahu, a ɗa ŋter ŋter: Tiɗa ndə hwa kaɗa dərlaŋ, hwa abə ha kwa ma kadzaw kanda kwa, azha, hwa nda ata la ndə hwa ɗiwi. Ama tiɗa ndə hwa kaaŋgəl kwa, hwa akaf ra, ala maparam ma kaandaha a dzawahu kanda kwa, a ajaɓahu ata la ndə hwa ŋkula aji.» 19Yesu a zlap ikwa aska a ghal shiŋ mci ndə Piyer a kaamca azha tsa kasləf Bizlaf azha a diwzha zlap watsa a zlapanə, iŋgaya: «Səbaraka,» iy.
Tiw Yesu abə magəla tə ndə a kamayə
20Ndə Piyer a zhina tə bəza, a gəra a diwzha tə magəla ndə Yesu a kamayə, ala ndə tiɗa aha wəda taherik ha gwara ata mabərabəra ataa Yesu, zhana ma va a zlap iŋgaya: «Bay Madagal, ala ma kaaberahu watsa vaya?» iy. 21Ndə Piyer a gəra magəla watsa, dəba a azlapanə a Yesu, iŋgaya: «Azha sha tə, Bay Madagal, ma kaandakənə ana aŋtə veme?» 22Yesu a zlapanə, iŋgaya: «Andza sa tamay a ndza pal a gwar ata vah ndə sa kazhinha, ma ma ndza a mən veme, ana ataa aŋkwa? Aŋkwa, Səbaraka.» 23ꞌWa aka ata zlap watsə, ma ndza ata magəla watsa abə ma watsə a ɓizh tə a taba zlina mama, həji Kərist aagi, magəla watsa a kaamca akas. Avəli ci, Yesu tazlapanə a Piyer: «A kaamca ana ala aka səku,» ama a zlap, iŋgaya: «Andza sa tamayə, a ndza pal a gwar ata vah ndə, sa kazhinha, ma kwa ma ndza a mən veme, ana ataa aŋkwa?»
24Magəla watsa abə ha tə ma ghal səkən watsə aagi ndə a gəra abə ndə a zlima abə ha tə sha ma ŋtirata, azha həji kasən ya, ma ndə a ghalə abə ndə a gəra, a ɗa ŋter.
25Yesu taɗal səkən ndiɓi aagi vərəm zhana. Andza həji aŋtirata ŋtaguleŋ, ŋtaguleŋ, sa kadeŋ ci, la za ɗerewal ndə həji kaaŋtirata aagi a manahayak akas.
ទើបបានជ្រើសរើសហើយ៖
Yahwana 21: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
