Zlən ataa həji ta zlən aagi Diw ma
Diw ma
Ma ndə ɗerewal watsə a ŋtirha dawna sha
Ɗerewal ataa həji ta zlən aagi ci, a ɗa baraf Ma wiyə ma təwah ndə Luka a ŋtiri. A kaghal avaŋgəy abə həji ta zlən aagi, ma ɗa matəf Yesu aagi, aa taɓizh ma tə. Aa diwazə mpər a Wərusalima, a diwzha tə, a hayak ma huk abəra Wərusalima aagi, azha kəɗaŋ tə a hayak Yahudiya. Zlən ndə Yesu a vəlatana ka a ɗalə, aa taɗalə kəliy (Luk 24.47-48 et Zlh 1.8).
Ata diw ataa ɗerewal ataa Zlən ataa həji ta zlən Yesu aagi, Yesu a kataf tə a wəzlaf abəra Bizlaf (1.9). Anawatsə azha, tandza andza ndə a va a ndza zhana səku, ama a zlənatana a həji ta zlən tə aagi, Miɗ ma ghwaɗeɗe ma ndaha ara Bizlaf (Zlh 2). Miɗ watsa tavəlatana ŋgalaŋ a ghal səkən ndə Bizlaf a ɗalata aagi. Diw tə a gwar ata kwakuɗaŋ tə, Miɗ ma ghwaɗeɗe talah həji ma ɗal awa aagi ara Yesu. Piyer ala ta zlən ataa Yesu, ana ala ma təwah ma kazhiva a labar ma ndza a ɗerewal ataa Zlən ataa həji ta zlən Yesu aagi.
Magəli ataa Yesu aagi, aa ɗa Yahuda aagi. Aa kanda pal wəruk a jak kwakus ma ndza a hayak Wərusalima, azha aa kazlap ata Madagal ta. Ama təmta tiwtiw kwa Yesu abə ha tə, aagi abə yaka dagala ara magulakwakw ma ndza aha həji ma tar ha aagi (Zlh 3–8).
Həji ma ji ma Yesu aagi aa kaciwir hayak Yahudiya tiwtiw, hayak Samariya, tsalah a hayak ndiɓi aagi. Aa taɗafatana Ma wiyə ma təwah a həji ma ŋkula ɗa Yahuda aagi (Zlh 8–12). Ma watsa a ɗa wiyə səkən ma ꞌwal a kawha. Tiɗa wan watsa ya, Yahuda aagi gagagha ana ma kasən Bizlaf ŋtaguleŋ. Aa deŋ ka ci, həji ma ŋkula ndza ata təf tar ha ta aagi, ma ndza abə təf ta tar ha ta parpar aagi ya, aa kasən Bizlaf səku. Ama Yesu Kərist tapəlatana təf a həji aagi tiwtiw aska aagi ndza a dzəv ha abə Bizlaf. Wiyə ladzam həji Kərist aagi kadiw. Aa tabəw ta vərəm azha ana ladzam həji Kərist tə watsa aagi, a taba ta ya, Yahuda aagi abə həji ma ŋkula ɗa Yahuda aagi tabəw ta yəm.
ꞌWa aka ata Zləh, kaw ala ta zlən Yesu Pul a səbar baraf ataa Piyer, azha a labar ma ndza a ɗerewal ataa Zlən ataa həji ta zlən Yesu aagi. Yesu Kərist ma yaha Pul (Zlh 9). Ladzam həji Kərist ataa hayak Aŋtakiya ma ndza a hayak Siriya ma mayata abə həji ndiɓi ma kalahzata aagi aska a ghal Ma wiyə ma təwah ataa Yesu, a hayak aagi gədək gədək. Zlh 13–28 a kaghal laciwir ataa Pul a zlən tə aagi. Aa kaghal avaŋgəy abə a fəl ana Ma wiyə ma təwah ataa ladzam həji Kərist aagi a hayak Yahudiya tsalah a Ruma, hayak ma dagal ataa Yahudiya.
Ma wiyə ma təwah ataa Yesu ma ghal ara Luka ci, a zlap ata wan ataa Yesu. Abə ɗerewal ataa Zlən ataa həji ta zlən aagi, abə a diw ana wan ataa ladzam həji Kərist aagi. A wan watsa abə həji ma ji ma Yesu aagi kaŋcah wəruk a ghal ma ataa Yesu kwa a vatəy tiwtiw. Aa kaghalatana a həji kwa ma ndza a vatəy aagi, kwa həji ndə kwakus ta parpar aagi, aa kaghalatana a wəzhi, a həji ma gulakwakw aagi, a həji ma ŋtsəɓaŋtsəɓ aagi zhana a həji titikw aagi.
ទើបបានជ្រើសរើសហើយ៖
Zlən ataa həji ta zlən aagi Diw ma: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល