Zlən ataa həji ta zlən aagi 3
3
Reh ala ma bazlabazl ŋgas a jak kwakus
1Vah minja aka, tiw Piyer abə Yahwana tsaw aa nda a jak kwakus aska tarha ata ler mahkaɗ ataa ŋtsəɓahw. 2Huk abəra majak, leŋ aa daaha ala ma bazlabazl ŋgas minja, a gəyha tiɗa ndə a mbə. Kala pish, aa kadaazə, pa aa tsə ka a majak kwakus watsa ndə həji kayə: «Majak ma ŋtan» aska a tar səkən ara həji ma kanda a jak kwakus watsa aagi. 3Ndə ala watsa a gəra tiw Piyer abə Yahwana, aa kandaha a nda a jak kwakus, dəba a atar dala ara təmta. 4Tiw Piyer abə Yahwana, zlaz aa zlazakənə ma, tizh aa taŋzə, zlap aa zlapanə, aagi iŋgaya: «Taŋani!» aagiy. 5Ala watsa taŋ a taŋzata, ara ndə a ɗa, aŋtə, deŋ tə ci, a lima səkən bəza ara təmta. 6Ama, Piyer zlap a zlapanə, iŋgaya: «Dala aka səku wəshi, ara sa akas, ama səkən ma ndza ara sa, sa vəlahu: ata zləm Yesu Kərist, ndə Nasaratu, gar kwa a wəzəm, azha nda!» iy. 7Azha, kaw a mbələ ata ra guva zəm, gar a garzə a wəzəm. A tsutsa a tsutsa, ŋgas ala watsa abə tekuretekure ŋgas tə aagi tabəw ta ɓərɓər. 8Takaw a gar tə a wəzəm, dəba a anda, tsaw aa nda abə təmta a jak kwakus, a kanda, a kambir abə guɗaŋ tə, dəba a aya dərəf ta həmən Bizlaf. 9Həji aagi tiwtiw, aa kagəra, a kanda, a kaya dərəf ta həmən Bizlaf. 10Ŋgaɓa həji aagi kasənə: A ɗa sha ana ma kava a ndza ata hayak a tar səkən a majak ma ŋtan ata jak kwakus. Azha, həji tiwtiw, aa tanaana ka, aa taghərəŋ ta a guɗaŋ ata səkən ma pew abə ala ma bazlabazl ŋgas watsa.
Zlap ataa Piyer
11Ala watsa a kaji a nda a bəza abəra tiw Piyer abə Yahwana səku, ŋgaɓa həji aagi tiwtiw, aa taghərəŋ ta, aa kashi abəra təmta, gwara a gəlaɓ ndə həji kayə: «Balak Suleymanu». 12Ndə Piyer a gəra ikwa, zlap a zlapatana a ŋgaɓa həji aagi, iŋgaya: «Zlina ma ndza a hayak Isərayila aagi, huni ghərəŋ kuni ata səkən ma ɗal ara veme? Aka səku, huni taŋani ikwa andza həna ni ma ɗalə abə ɓərɓər cini, aka səku abə hahər cini, abə ala watsə a nda ara veme? 13Bizlaf ataa Ibərahima, ataa Isiyaku, ataa Yakubu, Bizlaf ataa jiji takwa aagi, tavəlanə sləf ma dagal ana ala ma ɗalanə zlən tə, Yesu, ndə huni, huni vəla ka, azha huni ma ŋkalzə zlap cina hayak Pilatu, ndə aŋtə, a zlap a pəl ka. 14Huni taŋkalzə ala ma ghwaɗeɗe, ala ma dəlili, huni tamayɓa aska Pilatu a pəlahuni ala ma bazl həji aagi ana ataa aŋkuni. 15Ala ndə miɗ a ndza a ra tə, ana ndə huni dzə ka, Bizlaf tagarazə a wəzəm a jiɓ a taba həji ma bazl ta aagi, ni tagəra abə nja cini. 16Anawatsə, abə dagal ta ɗal awa ata zləm Yesu, zləm ataa Yesu watsa ana ma reh ala ma gəyagəy ŋgas watsə, huni kagəra, zhana huni kasən anawatsə. Ɗal awa ma ndaha ara Yesu ana ma bəw ala watsə ka a ɗa wirwir, a kazhin a dawər akas, a ɗi ata nja kuni tiwtiw.
17Avəli ci, zlina aagi, sa kasən katkadək, huni abə bay kuni, huni ɗal ikwa, ara ndə huni ŋkula sən səkən ma ŋter. 18Bizlaf tə, abə ha tə, tadiw a ghalazə bəza mpər kwagwa gwara ata madedizh ma ataa həji ma ɗaf ma ndə aa zlimzə ara Bizlaf aagi tiwtiw ya, Kərist a asa yaka bay tə, ikwa abə a kəliy tə. 19Huni mbaɗ landza kuni bəza, huni zhinha ara Bizlaf, aska a pəl mpət kuni aagi. 20Azha ikwa, abə a andaha ana vah ta nəp ndə Bay Madagal a gar ka, a vələ, azha a azlənha Kərist ndə a mayahuni a huni, ma ɗa Yesu. 21Ama, anawatsə kwagwa, Yesu Kərist mandza a wəzəm a wəzlaf, a gwar ata vah ndə səkən aagi tiwtiw, aa talamaya a heɗe a heɗe, ma ndə Bizlaf a zlapata gwara ata madedizh ma ataa həji ma ɗaf ma ndə aa zlimazə ara Bizlaf ma ghwaɗeɗe ma zleezle aagi. 22Ama, Musa mpər tazlap, iŋgaya:Bay Madagal ma ɗa Bizlaf kuni, a azlənahuni ala ma ɗaf ma ndə a zlimazə ara Bizlaf dawna huni andza sa, a aɗa ŋtaguleŋ a taba zlinahw kuni aagi. Huni atehanə ma ndə, a kaaghalahuni tiwtiw. 23Həji ma kaŋkula teh ma ataa maɗaf ma Bizlaf watsa, aagi apəreh ta a bəza a taba həji ma ji ma Yesu aagi, azha aagi abazl ta. 24Həji ma ɗaf ma ndə aa zlimazə ara Bizlaf aagi tiwtiw, ꞌwa aka ata ala ma ɗaf ma ndə a zlimazə ara Bizlaf Samuyila abə ma ndaha a baraf tə aagi tiwtiw, kwa vaye ta, aagi taghal vah ndə həji akacihwa a mən watsə. 25Huni ana wəzhi ataa maɗaf ma Bizlaf abə dzəv ma ndə Bizlaf a ghalazə ka. Bizlaf takəɗaŋ bəza tiw abə jiji kuni aagi, tiɗa ndə a zlapanə a Ibərahima aagi iŋgaya: Shiŋ kwa, wəzhi ataa wəzhi kwa aagi, sa apish bəzla naka ma təwah ata həji ma ndza ata manahayak aagi tiwtiw. 26Mavəy huni, abə Bizlaf a zlənha ala ma ɗal zlən tə mpər, aska a pishahuni bəzla ma təwah, həji vərəm aagi ambasl zlən ma gamak ndə aa kaɗal aagi ka.»
ទើបបានជ្រើសរើសហើយ៖
Zlən ataa həji ta zlən aagi 3: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
