Zlən ataa həji ta zlən aagi 2
2
Ndaha Miɗ ma ghwaɗeɗe
1Ndə vah ta ɗal gwaygwaya ndə həji kayə Paŋtekusta a ndaa tə, həji ma ɗalanə awa a Yesu aagi tiwtiw aa ata la ma ŋtaguleŋ, aa tadzamaya. 2A tsutsa a tsutsa, səkən minja a kandaha a wəzəm a wəzlaf, andza rəv valalay: jak ndə aagi a mən mkpef abə rəv səkən watsa. 3Azha, a payha andza gaɗaɗaŋ kwahu, taɓizh tə, təy təy a ŋge ata təmta. 4Təmta tə tiwtiw, aa mkpef abə Miɗ ma ghwaɗeɗe, dəba aagi azlap abə ma həji ndiɓi aagi, andza ndə Miɗ ma ghwaɗeɗe a vəlatana a zlap. 5Azha, a Wərusalima, aa kandza a tsutsa ana Yahuda ma ndaha ana ŋge a manahayak aagi tiwtiw, aa ɗa həji ndə ŋkwaɓ ta ŋtaɗ ata Bizlaf aagi. 6Ndə aa zlima rəv səkən watsa, azha, ŋgaɓa həji aagi dzəv aa dzəv aka, hak aa ghərəŋ ta a guɗaŋ, ara ndə aa gəra həji ma ɗalanə awa a Yesu aagi kazlap, kwa vaye a kazlima abə ma hayak tə. 7Hak aa ghərəŋ ta a guɗaŋ, zhana aa kadeŋi, dəba aagi azlap: «Həji ma kazlap ma watsə aagi, aa ɗa həji ma ndza a hayak Galili aagi tiwtiw azha vəw? 8A sən a ɗal avaŋga abə kwa vaye a taba takwa a kazlima ma ndə aa kazlap abə ma hayak tə? 9Ni ndaa aka a hayak Partiya, Mediya, Elam, Mesuputamiya, Yahudiya, Kapadusiya, Puntus abə hayak Asiya, 10Firigiya, Pamfiliya, Misəra, abə ma parpar parpar ma ndza a hayak Libiya, ma huk abəra hayak Sirene abə həji ma ndza a hayak Ruma aagi, 11a hayak Kirita abə Arabiya, Yahuda ndiɓi aagi tiwtiw, abə həji ma bəw ta a ɗa Yahuda aagi. Ama ni kazlima kwa vaye a kazlap abə ma hayak takwa, ata səkən tsaɓan ndə Bizlaf a ɗal aagi.» 12Hak aa ghərəŋ ta, aa kazhin a sən ma ndə aa kadeŋ səku, dəba aagi azlap a walaŋ ta: «Ma watsə a may a ghal avaŋga?» aagiy. 13Ama, ndiɓi aagi kaɓas ata həji ma ɗalanə awa a Yesu aagi, aa kazlap: «Həji watsə aagi ndar abə mavə, aa taŋhuz ta,» aagiy.
Zlap ataa Piyer
14Takaw, Piyer a gar a wəzəm abə həji ta zlən ma wam aha ŋtaguleŋ aagi, dəba a azlap, abə ma tə, iŋgaya: «Həji ma ndza a hayak Yahudiya aagi, abə huni tiwtiw ma ndza a hayak Wərusalima aagi, huni teh səkən ma kapew katkadək, huni dəɗ zləm aka katkadək aska ma naka. 15Aŋghə, həji watsə aagi tagwar a saha mavə andza ndə huni kadeŋi a ŋkwaɓ kuni watsa akas: Biŋ kwaf kwaf tə dəy, ata ler dzaŋfaɗ gagagha. 16Ama, a ɗi abə a kəliy ana zlap ataa ala ma ɗaf ma ndə a zlimazə ara Bizlaf Yuwel, ndə a zlap, iŋgaya:
17 Bizlaf iŋgaya: Ma vah kwakuɗaŋ,
sa avəla Miɗ naka ma ghwaɗeɗe a kwa vaye tiwtiw,
wəzhi kuni aagi, abə hildimi kuni aagi, aagi aɗa ala ma ɗaf ma naka aagi,
dərlaŋ kuni aagi abə dahali kuni aagi, aagi agəra la,
sa aghalatana səkən wiyə aagi, aagi agəra abə nja ataa aagi,
msəra mawəl kuni aagi abə msəra wali kuni aagi,
aagi alima deŋ ŋkwaɓ ma ŋtan gwara a shiŋshiŋ.
18 Ayəw, ata vah watsa,
sa avəlatana Miɗ naka ma ghwaɗeɗe
a mawəl ma ɗal zlən naka aagi abə wali ma ɗal zlən naka aagi,
azha, aagi aɗa həji ma ɗaf ma ndə aa zlimazə ara Bizlaf aagi.
19 Sa aɗal səkən tsaɓan aagi a wəzəm a wəzlaf
abə a ɗi ata manahayak.
Ampəs a aɗa aka abə kwahu, zhana abə gwazlavay andza kətsəh.
20 Pish a adzəɓ tə, la a abəw tə a ləvaŋ,
azha ŋtəra a abəw tə andza ampəs,
abə a anda gwarha ana vah ataa Bay Madagal, vah ma dagal abə sləf.
21 Azha, kwa vaye ma ya zləm ataa Bay Madagal a aɗa reh, iy.
22Huni həji Isərayila aagi, huni teh ma naka: Yesu ndə Nasaratu, ala ndə Bizlaf a ghalahuni dagal tə abə tsaɓan ndə a ɗal aagi abə tsufa abə shiŋ səkən ta ghal səkən aagi, a taba kuni, ata nja kuni, huni kasənə. 23Ala watsa, andza zlap ndə Bizlaf a gar ka, ma gwara deŋ tə mampər, huni taber bəza, azha huni tasafay bəza ndə huni dar ka a dzə ka ata mpi ma gəzlaŋgarak gwara ara həji ma ŋkula sən Bizlaf aagi. 24Ama Bizlaf tapəlazə a bəza a yaka tiɗa a taba həji ma bazl ta aagi, ara ndə a ɗa, ŋgalaŋ mci a heɗe a tak ka abə ɓərɓər tə akas. 25Dawda tazlap a heɗe iŋgaya:
Sa kagəra Bay Madagal pal atama naka,
ara ndə a ɗa a ndza ata guva zəm naka ara ndə sa kaandəv naka.
26 Sa yəm, ꞌunəf naka mkpef abə ɓas,
zhana madedizh ma naka taya dərəf ɓas.
Kwa andza sa tamca naka,
zlikusəm naka a nəp abə deŋ a heɗe a jiɓ,
27 ara ndə a ɗa, hwa Bay Madagal,
hwa kaaji a mbasl miɗ naka ka a ndza ata landza mci aagi akas,
zhana, hwa kaaji a mbasl ala ma ghwaɗeɗe atama kwa ka, a rəɗa a jiɓ akas.
28 Hwa taghalaka təf ataa miɗ ma təwah,
hwa talehlehaka ꞌunəf naka ka abə ɓas,
ara ndə hwa ɗa abəra sa, iy.»
29Piyer zhana, iŋgaya: «Zlina mana aagi, təf aka a ghalahuni a heɗe a heɗe: Jiji ma dagal, Dawda tamca tə, takahaya, jiɓ tə ndza tə a ɗi ara ŋkwa ha pa akacihwa. 30Ama, Dawda a ɗa ala ma ɗaf ma ndə a zlimazə ara Bizlaf, azha a kasənə Bizlaf tameɗanə ka, iŋgaya: Sa atsa ala minja ŋtaguleŋ ata shiŋ kwa, ma mbəwha a bəra kwa, a bay kwa a diwzha kwa, iy. 31Tagəra bəza mpər kwagwa, ana garha Kərist a bəza a taba həji ma bazl ta aagi, a ɗa a heɗe abə a zlap ma watsa, iŋgaya:
Taɗa mba ana miɗ tə ata la ndza mci aagi səku,
zhana zlikusəm tə tagwar a rəɗa səku, iy.
32Yesu watsa, Bizlaf tagarazə a bəza a jiɓ, həji tiwtiw, həji tagəra. 33Bizlaf takaf ka, gwar a wəzəm ata guva zəm tə, talima Miɗ ma ghwaɗeɗe ara Vava ndə a gar ka a vəlanə, azha tavəlani, andza ndə huni kagəra abə ndə huni kazlima anawatsə. 34Dawda ma ŋkula va a tafzə kusəm a wəzəm a wəzlaf, ama tazlap, iŋgaya:
Bizlaf Bay Madagal tazlapanə ka a Bay Madagal naka, iŋgaya:
Ndza kwa ka a ɗi ata guva zəm naka,
35 a gwar ata vah ndə sa kaatsa həji jaga kwa aagi ka
aska ŋgas kwa, iy.
36Həji ma ndza a hayak Isərayila aagi tiwtiw, aa masən ka katkadək: Bizlaf taɗal ka, azha Bay Madagal zhana Kərist, a ɗa Yesu ndə huni dar ka ata mpi ma gəzlaŋgarak watsa.»
Diw dzəv həji ma ɗalanə awa a Yesu aagi
37Ndə həji aagi, aa zlima zlap watsa ikwa, ꞌunəf ta tazla tə, dəba aagi aɗiwzə Piyer abə həji ta zlən ataa Yesu ndiɓi aagi iŋgaya: «Zlina mana aagi, ni aɗalzə azha avaŋga?» aagiy. 38Piyer zlap a zlapatana, iŋgaya: «Huni mbaɗ landza kuni bəza, kwa vaye a taba kuni, maɗal batem ata zləm Yesu Kərist aska a pəl mpət tə, azha huni alima səkən ma ɓəlaakaka ataa Miɗ ma ghwaɗeɗe. 39Ara ndə a ɗa, a huni abə a tsa ka, ana səkən ta vəla ma ɓəlaakaka watsa, a wəzhi kuni aagi, yəm a həji ma gədək aagi tiwtiw ndə Bay Madagal Bizlaf takwa ma ndza a wəzəm, a ayata aagi,» iy. 40Azha, abə ma ndiɓi aagi vərəm abə Piyer a ghalatana səkən ma pew aagi, aska aagi aŋcah, iŋgaya: «Həji ma ndza akacihwa aagi ɗa həji ma gamak aagi, huni nda kuni a bəza abəra təmta ana Bizlaf, iy.» 41Həji ma ɗalanə awa a Yesu aagi talima batem, azha, aa ɗal bəza həji aagi bəluk mahkaɗ ma vah watsa ana ma ndaaktana a həji ma ɗalanə awa a Yesu aagi.
Diw landza ataa həji ma ɗalanə awa a Yesu aagi
42Aa tatsa zləm aka abə ŋkwaɓ aska sərək ma ataa həji ta zlən Yesu aagi. Aa ndza ata la ma ŋtaguleŋ andza həji ma ndza ata zliŋgin ta aagi, aa ɓizh wəda ma ŋtaguleŋ, zhana aa tarha ata la ma ŋtaguleŋ. 43Ŋzliŋ a kadza manahayak aka tiwtiw, tsaɓan aagi abə tsufa aagi vərəm ana ndə həji ta zlən Yesu aagi, aa ɗalə. 44Həji ma ɗalanə awa a Yesu aagi ata la ma ŋtaguleŋ tiwtiw, zhana səkən ta aagi ndza ata la ma ŋtaguleŋ. 45Dəba aagi aber səkən ma ndza a ra ta aagi abə səkən ŋtsəɓ ta aagi bəza tiwtiw, ɓizh aa ɓizh dala tə a walaŋ ta tiwtiw, kwa vaye a lima teete aska zlən tə ndə a kamay a ɗalə. 46Kala vah ꞌunəf ta ŋtaguleŋ, aa tadzamaya ata la ma ŋtaɗ, deŋ ŋkwaɓ ma ŋtaɗ a jak kwakus Bizlaf, aa ɓizh wəda a wata ta, aa zəmə abə ɓas abə ꞌunəf ghwaɗeɗe. 47Aa kayanə dərəf a Bizlaf, azha həji aagi kamay ma ta tiwtiw. Azha kala vah, Bay Madagal a kambakatana həji aagi abəra təmta, həji ma kareh ta aagi.
ទើបបានជ្រើសរើសហើយ៖
Zlən ataa həji ta zlən aagi 2: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
