Markus 7
7
Kwakwas mala jeje ege
1Farəysa ege ey maghwal ma maŋkanaŋkan ege vedəye, əy ndaha aka ŋ Urusaləyma, əy ɓec ara Yesu. 2Əy gəre ca, madarlaŋw anta ege vedəye, əy kazam uda a ra ma tak ban. Ana zlap ca, əy kában ra tata ege ana maa kwakwas Yahudu ege a zlap, askwaw. 3Cemey, Farəysa ege, zlaɓa Yahudu ege vedəye tewtew ca, əy kasəbar kwakwas jeje tata ege, a heɗe a heɗe. Mar əy nazam uda ca, əy ban ra aza kadak kadak. 4Mada əy kázamha luma aza, əy kánda aza a wata ca, mar əy nazam uda ca, səy əy ban ra ey ŋgas tata ege aza. Əy kewenzetene ha aka ŋ ma maŋkanaŋkan ege vedəye vedəye ana maa kwakwas tata a zlap, ana laban tekeɗ ege, dugwazl ege ey pereŋtəy ege. 5Mavəday anta, Farəysa ege əy maghwal ma maŋkanaŋkan ege, əy ɗawza Yesu, əy ŋgaya: «Madarlaŋw ŋkwa ege əy kala səkan ana maa kwakwas jeje ŋtakwaw ege a zlap, askwaw. Əy zam uda a ra ma tak ban ca, mavəday vemey?» 6A təwse ca, Yesu a zenetene, a ŋgaya: «Hune hejəye ma a ganana gbak gbak ege. Esaya kázlap ma mala Gazlavay a nuna anta ata hune, njenjəwen, kéŋtereye ŋ ɗerewel mala Gazlavay ende ŋghe:
“Hejəye ŋghe ege ca, əy həmenzekey ca, a pakam ende ŋghe,
cemey unaf tata ege ca, gədak a sa.
7Əy həmenzekey ca, mala bəse,
cemey, kwakwas maa əy kesesərekzetene ŋ hejəye ca,
ara laŋkan ma mala hejəye.”»
8«Hune káyakza ma maŋkanaŋkan mala Gazlavay aka, hune kasəbar kwakwas mala hejəye.»
9A zlepetene zeney, a ŋgaya: «Ŋkune ca, hune kánahza ma maŋkanaŋkan mala Gazlavay aza njenjəwen, hune səbarɓa kwakwas ŋkune ege. 10Cemey, Musa kázlap, a ŋgaya: “Wenzetene ha aka ŋ ata cehw ey ŋ macahw”. A zeney, a ŋgaya: “Ɗala ma rata ata cen ey maman ca, əy majaza.” 11Ca, hune kasasərakzata hejəye, huney: “Ɗala kula ŋ zlepene ŋ cen, askwaw ca, ŋ maman, səkan maa sa kaɗaw ŋ valahwaw ŋ cakzahwaw wese ca, Kawrbaŋ,” ana zlap ca, ara səkan ma sa kévelene aza ŋ Gazlavay. 12Ana ebe ŋghe, hune katak heje anta aka ŋ cekzene ŋ cen leŋ ŋ maman. 13Hune kagayza zlap mala Gazlavay aka, hune kesesərekzetene kwakwas ŋkune ege ŋ hejəye, cemey hune kala səkan ege vedəye vəram ana ebe ŋghe.»
Səkan ma kagayza ɗala
14A dəwze anta ca, Yesu a yata hejəye tewtew zeney, a zlepetene, a ŋgaya: «Hune tehzekey zlam tewtew ŋkune, hune zləme ma ŋgha. 15Səkan kaw vekey, ma a bəza, ma kadam ŋ kusam ɗala ca, kula ŋ gayza aza ca, askwaw, cemey, səy səkan ma kadamha aka ŋ unaf anta, ana ma kula ŋ gayza aza. [16Ɗala maa zlam a heɗe aka ca, mezləme ma ŋgha aka kadak kadak.»]
17Aya, Yesu a yakzata hejəye wese ege aka, a dam anta ŋ ujek. A təwse ca, madarlaŋw anta ege, əy ɗawza ata ma maa a zlepetene a laslaŋgal ma wese. 18Yesu a zenetene, a ŋgaya: «Hune yam ca, kaw hune kasan səkwaw vaw? Cemey, səkan ta zam ma kadam ŋ kusam ɗala ca, kula ŋ gayza səkwaw, 19mavəday a dam ca, ŋ unaf anta səkwaw, cemey, a dam ca, a dəmas. A dəwze anta ca, a damha aza a bəza.» Ana ebe ŋghe, Yesu a ɗaw ŋ ghwalza ta ŋ zlap ŋghe ege ca, səkan ta zam ege tewtew ca, ɗala kula ŋ zamata aza.
20A zlepetene zeney, a ŋgaya: «Səkan ma kadamha aka ŋ ɗala ca, ara mbe ma kagayza, 21mavəday lulak ŋkwaɓ ma kadak səkwaw ege ca, əy ndaha aka ŋ unaf ɗala. A təwse ca, əy ŋcakwza, ŋ ŋta kusam a bəza, ŋ ŋhel, ŋ ja ŋkəɗeh, 22ŋ la nje ata səkan ɗala, ŋ la səkan ma dadawar, ŋ zla metəwle, ŋ la səkan ma kadak səkwaw ege, ŋ la sərah, ŋ ra ɗala, ŋ la ghav leŋ ŋ deŋ ŋkwaɓ ma kadak səkwaw ege tewtew. 23Səkan ma kadak səkwaw ŋghe ege tewtew ca, əy damha aka ŋ unaf ɗala, ara tata ma kula ŋ gayza ɗala aza.»
Wala ma mbəy Yahuda səkwaw, a lamza Yesu
24Aya, Yesu a gwarzam aza a təwse, a nda ŋ hayak Təyrus. A dam a ujek wende aka, a kaɗaw hejəye əy san mbəy a təwse səkwaw. Cemey, kaw mbəy kula ŋ ɓahza ha anta səkwaw 25A təwse a təwse, wala wende aka, zəwet malula kámbal həla anta aza. A zləme, əy kazlap ata Yesu. A ndaha, a gəleɓ a tama anta, a jene mbahw, a ŋgaya: 26«Mbahw, gam zəwet malula ma ŋ həla naka ŋgha aza.» Wala anta ca, ara Yahudu səkwaw, ara ŋseŋ Səyrawfəynəykəy ege. 27Cemey, Yesu a zenene, a ŋgaya: «Yakzata uzəye, əy mahəraɗɓa aza a səkan ta zam kwagwa. Mada hwa ŋtene uda uzəye aza, hwa veletene aza ŋ həza ege ca, kadak, səkwaw.» 28Wala wese, a zenene, a ŋgaya: «Ayaw, Bay Madakal, kaw ata la maa uzəye əy kazam uda ca, uzəye həza ege əy kagəɗam ma kapapasha ara tata ege ata hayak, askwaw vaw?» 29A təwse ca, Yesu a zenene ŋ wala wese, a ŋgaya: «Hwa kézenha zlap kadak, mavəday anta, zəwet malula kádamha aza ŋ həla ŋkwa. Hwa kula ŋ nda ŋkwa a wata.» 30Aya, wala wese, a nda a wata ca, a ndewzene ŋ həla anta wese kéweneye ata lawan, zəwet malula kádamha aza ŋ mbe.
Yesu a rehza ɗala madaŋgazlam ma kula ŋ zlap səkwaw aza
31A dəwze anta ca, Yesu a yakza uzam Təyrus wese aka, a nda ta ŋ Səydaŋw. A zen kəɗa a ma ŋtele Galəyləy, a zlaŋ ta ŋ uzam maa əy kayaɓa Uzam ege wam. 32Hejəye əy dene heje wende aka, ara madaŋgazlam, mbəy kula ŋ zlap səkwaw. A təwse ca, əy jene mbahw ŋ Yesu, ŋ ca ra anta a heɗe.
33Aya, Yesu a daza aza ŋ taba hejəye, a jeɓza gədak. A təwse ca, a ɗafza uzəye ra anta ege ŋ zlam heje wese ege, a dəwze anta, a ŋtef mejəkəne ata uzəye ra anta ege, a ca ra ata ganana heje wese. 34Aya, a sar la kəɗa mgba ata uzlaf, a səfan a mazlazlay, a zlepene ŋ heje wese, a ŋgaya: «Efata!» Ana zlap ca, «Zlar ŋkwa». 35A təwse a təwse, zlam ɓaɓa ege wese bədaŋ, əy zlar tata, ganana anta a pal anta, a kazlap kadak kadak. 36A təwse ca, Yesu a ŋgazata hejəye wese ege aka tewtew, a zlepetene, a ŋgaya: «Hune ɗaw ŋ ghwalza səkan ma laha ŋgha, ŋ kaw vayay səkwaw.» Cemey, hejəye anta ege ca, əy kavas ŋ ghwalza, Yesu a takata aka, cemey, əy kavas ŋ ghwalza day zeney war. 37Hejəye anta ege tewtew, əy ŋga ŋkwaɓ dakala, əy ŋgaya: «Səkan ege tewtew maa a kalata ca, əy kadak kadak! A kezlerzetene zlam madaŋgazlam ege aza, a kepelzetene ganana hejəye ma kula ŋ zlap səkwaw ege aka.»
ទើបបានជ្រើសរើសហើយ៖
Markus 7: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL