Markus 6
6
Hejəye ma ŋ uzam Nasaratu ege əy kalamza Yesu səkwaw
1Aya, Yesu a gwarzam ata la wese, a nda ŋ uzam maa a galha ŋma, madarlaŋw anta ege, əy kásəbar ara. 2A pes ma ata zazak ca, Yesu a nda a ujek ma ata rak Gazlavay mala Yahudu ege, a sasərakzata hejəye. A təwse ca, hejəye vəram ma tehzene zlam ege, əy káŋga ŋkwaɓ mambaza, əy zlap, əy ŋgaya: «A sasərakaza səkan ŋghe anta ege ca, a katay? Ma velene kəleŋ ey ɓarɓar ŋ lata zaɓəla ŋghe ege anta ca, vayay? 3Mbe ca, ara mazla mpe, askwaw aza vaw? Ara mba Marəyama, zlaŋgan Yakuba, zlaŋgan Yawses, zlaŋgan Yahuda leŋ Səymawn, səkwaw aza vaw? Zlaŋgan heldəməye, əy ŋ taba ŋtakwaw ete ŋghe, askwaw aza vaw?» Mavəday anta, hejəye ma a təwse ege, əy kalamza ma mala Yesu səkwaw. 4Aya, Yesu a zlepetene a ŋgaya: «Mba ma zlap ma mala Gazlavay ca, əy kalamza kaw a katay. Cemey, ata la maa a mbawha a təwse ey ŋ taba van anta ege leŋ hejəye ma a wata tata ege ca, əy kalamza ma anta səkwaw.» 5A təwse ca, Yesu kula ŋ la zaɓəla kaw vekey səkwaw, cemey, səy a ca ra anta ata hejəye ma kadawar ege cekuɗe ende ŋghe, a rehzata aza. 6Aya, a ŋga ŋkwaɓ ata hejəye ma a uzam anta ege, mavəday lalam ŋ tata, askwaw.
Yesu a laɓzata madarlaŋw anta ege wam aha gbak
A dəwze anta ca, Yesu a tawar ŋ uzam ma mbermber a təwse ege tewtew, a kasasərakzata hejəye. 7A yata madarlaŋw anta ege ma wam aha gbak, a veletene ɓarɓar ŋ dayzata zəwet malula ege aza, aya, a laɓazata gbak gbak. 8A ŋgazata aka, a zlepetene, a ŋgaya: «Hune nda, hune ɗaw ŋ ŋta kaw vemey ara asa ra ata leŋcəwer ŋkune ege, səkwaw. Hune ɗaw ŋta kaw səkan ma ata zam, kaw bakatar, kaw səlay ŋ bakatar səkwaw, səy hune ŋta ca, zlambay gagaha. 9Hune ca ŋte ara ata ŋgas, cemey, hune ɗaw ŋ ca rəgwac ara gbak ata kusam, səkwaw.»
10Yesu a zlepetene zeney, a ŋgaya: «Mada hune hwas ŋ uzam ca, hune nja ka a wata heje ma lamzahune ha hwas ata vah ma hune kanagwarzam ŋkune. 11Mada hune nda ŋ uzam maa hejəye əy kalamzahune, askwaw, əy ketehzahune zlam askwaw ca, hune kes ŋkune, hune ŋtewetene berdeberde ma ata ŋgas ŋkune ege aka, ŋ ghwelzetene ca, əy kála səkan ma kadak səkwaw.» 12Madarlaŋw Yesu ege əy nda, əy ghwelzetene zlap ŋ hejəye, əy ŋgaya: «Hune ja mbahw, hune bawzata lanja ŋkune ege aza.» 13A təwse ca, əy kágamata zəwet malula ege vəram, əy kétukweɗetene mel ata kusam hejəye ma kadawar ege vəram, əy kérehzata aza ŋ dawar tata ege.
Lamac Yuhana maban hejəye a yam baptəysma
14Bay Həyrudus a zləme labara Yesu, mavəday hejəye tewtew kaw a katay əy kazlap ma anta. Hejəye vedəye, əy kazlap, əy ŋgaya: «Yuhana maban hejəye a yam baptəysma kágwarzamha aza ata lamac, mavəday anta mbəy a ɓardakw ma ata la zaɓəla ege.» 15Cemey, vedəye, əy ŋgaya: «Ara Eləya.» Vedəye yam, əy ŋgaya: «Ara mba ma zlap ma mala Gazlavay, ana vedəye ma zlezle ege.» 16Maa Həyrudus a zləme ana ebe ŋghe ca, a zlap, a ŋgaya: «Ara Yuhana maban hejəye a yam baptəysma! Sa kérezlene ha anta aza, cemey, kágwarzamha aza ata lamac.»
17Cemey, Həyrudus a ha anta ca, kézlepetene ŋ sawje ege əy mambal Yuhana, əy majaw ka a ujek daŋgay. A la ana ebe ŋghe ca, mavəday maa a ŋta Həyrudəya ŋ wala. Həyrudəya anta ca, ara wala Fəyləyp, zlaŋgan Həyrudus anta. 18Mavəday Yuhana kézlepene ŋ Həyrudus, a ŋgaya: «Hwa ŋta wala zlanahw ca, kadak askwaw.» 19Mavəday anta, Həyrudəya a kaɗaw ŋ gəre Yuhana ata nje səkwaw, a ɗaw ca, ŋ jaza, cemey, mbəy kula səkwaw. 20Həyrudus a kalalak ata Yuhana, mavəday a kasan ca, ara ɗala ma taŋtaŋ, ma keweɗ, a kahəbar ka kadak kadak. Mada a kezləme zlap anta ca, a ŋga ŋkwaɓ, a mbe anta tewtew ca, a kaɗaw ŋ zləme zlap anta war.
21Cemey, maa pes ma ata senzene ata lambaw Həyrudus hwas ca, a letene səkan ma ata zam ŋ hejəye madakal dakal mala hayak anta ege, madakal dakal sawje ege leŋ madakal dakal ma a tama, ma ŋ hayak Galəyləy ege. A təwse ca, Həyrudəya kélem taf ma taŋtaŋ. 22Həla Həyrudəya a ndaha a dəmas a tama tata. A təwse ca, dəmas anta kéndəremzetene aza ŋ Həyrudus ey hejəye ma a yahata ege. Aya bay Həyrudus a zlepene ŋ həla wese, a ŋgaya: «Ɗewzekey səkan maa hwa kaɗawaw, sa navalahwaw.» 23Aya, Həyrudus a meɗene ma, a ŋgaya: «Sa navalahwaw səkan maa hwa keneɗewzekey tewtew, kaw mamaw ɓez lazam bay naka ka rakrak ca, sa navalahwaw.» 24Haldəma wese, a damha aza a bəza, a ɗawza maman, a ŋgaya: «Sa naɗawza ca, a vemey?» Aya, maman a zenene a ŋgaya: «Ɗawza ha Yuhana maban hejəye a yam baptəysma.» 25Həla wese, a zenha kəcaŋ ara bay, a zlepene a ŋgaya: «Sa ɗaw ca, hwa velekey ha Yuhana maban hejəye a yam baptəysma na na ŋgha, ata pereŋtəy.» 26A təwse ca, ma anta kéjene kusam aza ŋ bay Həyrudus. Cemey, mbəy kula ŋ gwamza səkwaw, mavəday kémeɗ ma aza a tama hejəye maa a yata ege. 27Aya, a təwse a təwse, a laɓza sawje teŋguleŋ ma kahəbaraw, a zlepene ŋ daza ha Yuhana. Aya, sawje wese a nda a ujek daŋgay, a razlaza ha Yuhana anta. 28A dəwze anta ca, sawje wese, a daza ha anta ata pereŋtəy, a velene ŋ həla wese, mbe yam jeɓ a jeɓzene ŋ maman. 29Maa madarlaŋw Yuhana ege əy zləme ca, əy ndaha əy tew mce anta, əy nda ŋ mpasaza ka.
Yesu a zemetene səkan ŋ hejəye bəlakw jaɓan
30Malaɓ wese ege, əy zenha aza ara Yesu, əy ghwelzene səkan tewtew maa əy lata ege ey maa əy sesəreketene ŋ hejəye. 31Aya, a zlepetene a ŋgaya: «Hune ndaha, kazakwaw a mazlam ata darzlam, hune zazakɓa aza cekuɗe.» Mavəday hejəye vəram ma kandaha, vedəye əy kanda tata, kaw Yesu ey madarlaŋw anta ege əy kelem vah ŋ zam səkan, askwaw. 32A təwse ca, əy tev ŋ kwambawal, əy nda tata gagaha ata darzlam, a mazlam. 33Cemey, maa əy kanda tata ca, hejəye vəram, əy kegəreta, əy kasan la maa əy kanda a təwse. Aya, hejəye, əy damha a uzam ege tewtew, əy hey a ŋgas, əy hwas mpar aha tata.
34Maa Yesu a tadakwha aza ŋ kwambawal ca, a gəre hejəye vəram, əy kéɓeceye. A təwse ca, hahar a jaw, ata tata, mavəday a sarzata ca, əy nja ana ŋtəməye maa mba njəwen tata ege askwaw. Aya, a sesərekzetene səkan ege vəram. 35Maa pes slaɓ ŋ ndav ca, madarlaŋw Yesu ege, əy ndaha ara mbe, əy zlepene, əy ŋgaya: «Pes aka zeney, askwaw, la ŋgha yam, gədak a uzam ege. 36Ca, zlepetene ŋ hejəye ŋghe ege, əy manda ŋ kəva ey uzam ma mbermber ege ŋ səkamha səkan ma ata zam.» 37Cemey, Yesu a zenetene, a ŋgaya: «Hune a ha ŋkune ege, hune veletene səkan ma ata zam.» A təwse ca, əy ɗawza, əy ŋgaya: «Hwa ɗaw ca, nene nda ŋ gayaha səlay temere gbak,#6.37 laŋtar zlan mala wan 200 askwaw ca, mala ŋtəra jamahkaɗ nene səkemetene peŋ ŋ zam aza vaw?» 38A təwse ca, Yesu a ɗawzata a ŋgaya: «Peŋ ara hune ca, vanay? Hune nda ŋ sar aza.» Əy sar aza, əy ŋgaya: «Peŋ jaɓan leŋ ŋkəlef gbak.» 39Aya, Yesu a zlepetene ŋ madarlaŋw anta ege, əy manjazata hejəye aka njakw njakw, ata ŋkusaf ma ndendeɓek. 40A təwse ca, hejəye əy nja aka, leɓec ege vedəye, hejəye temere temere, leɓec ege vedəye, hejəye rajaɓan rajaɓan. 41A təwse ca, Yesu a ŋtata peŋ ma jaɓan ege leŋ ŋkəlef ma gbak ege wese, a sar la kəɗe mgba ata uzlaf, a lene wasay ŋ Gazlavay. Aya, a ŋgata peŋ ege wese aka, a veletene ŋ madarlaŋw anta ege, ndar əy ŋtezetene ŋ hejəye. A zeney, a ŋtezetene ŋkəlef ma gbak ege wese ŋ taba tata tewtew. 42Tata tewtew tata, əy həraɗ a səkan ma ata zam. 43Aya, malaɓ ege əy jam sekəɗe peŋ leŋ ŋkəlef ma menha, ujam ghef ghef wam aha gbak. 44Hejəye ma zam peŋ ege wese ca, mawal ege əy kála tata bəlakw jaɓan.
Yesu a nda ata ŋtele yam
45A dəwze anta ca, Yesu a zlepetene ŋ madarlaŋw anta ege, kulakw əy metev ŋ kwambawal, ndar əy zlaŋ tata mpar aha mbe aha bəza ŋtele yam wese, kəɗe ŋ uzam Baytəysayda. Cemey, mbe ca, kénjeye a dəwze ŋ zlepetene ŋ hejəye, əy manda a wata. 46A dəwze maa kézlepetene aza ca, a nda ata barla ŋ rak Gazlavay. 47Maa zaɗaw kála anta ca, kwambawal mbəy ŋ taba ŋtele, Yesu mbəy teŋguleŋ anta ata hayak. 48A gəre ca, madarlaŋw anta ege, əy katal ŋ gaɓ kwambawal, mavəday tatəɗam a jaha kəɗa aha tata. Aya, day mapat ca, a nda ara tata, a kanda ata ŋtele yam a ŋgas, a ɗaw ŋ zletene ma aza. 49Maa madarlaŋw ege, əy gəre Yesu maa a kanda ata ŋtele yam wese ca, əy cakza ca, ara ɗala ma damha aka ŋ jeɓ, a təwse ca, əy ja ula. 50Mavəday, tata tewtew tata, əy kégəre, əy kálalak tata mambaza. Cemey, kəcaŋ, Yesu a zlepetene, a ŋgaya: «Hune mbal unaf ŋkune ege aka, ara sa, hune lalak səkwaw.» 51Aya, Yesu a tev ŋ kwambawal ara tata, tatəɗam ja a jaza ma aka. A təwse ca, madarlaŋw anta ege wese, əy káŋga ŋkwaɓ mambaza. 52Cemey, maa Yesu a la zaɓəla a peŋ ege wese ca, kaw əy kézləme səkan, askwaw, mavəday unaf tata ege ɓarɓar.
Yesu a rehzata hejəye ma kadawar ege aza, ŋ hayak Genesaret
53Aya, maa Yesu ey madarlaŋw anta ege, əy zlaŋ aha bəza ŋtele yam wese ca, əy hwas ŋ hayak Genesaret. 54Maa a tadakw aza ŋ kwambawal ca, hejəye, əy kasan aza. 55Aya, əy hey kaw a katay ŋ hayak wese, əy dene hejəye ma kadawar ege ata lambaŋ ege, əy jeɓzata ata la maa Yesu mbəy a təwse. 56Kaw a katay, ata la maa Yesu a dam, kaw ŋ uzam ege, kaw ŋ kəva ege ca, hejəye əy kadata hejəye tata ma kadawar ege ŋ hubakw ege, əy jene mbahw ma pelzetene taf ŋ hejəye ma kadawar ege, əy macaɓa ra tata ege, kaw ata mazlam rəgwac anta. Kaw vayay ma ca ra anta a heɗe ca, kéreh anta.
ទើបបានជ្រើសរើសហើយ៖
Markus 6: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL