Mata 12
12
Yesu mbəy madakal mala pes ma ata zazak
1A pes wende aka, ara pes ma ata zazak, ata Yesu ey madarlaŋw anta ege, əy nda ta ŋ la ndərey maa əy kayaɓa a alkamarəy. A təwse ca, metes a jata madarlaŋw anta ege wese, aya, əy ŋgaha ndərey maa əy kayaɓa a alkamarəy wese, əy səlamaw, əy ɓamaw. 2Aya, maa Farəysa ege əy gəreta ca, əy zlepene ŋ Yesu, əy ŋgaya: «Sarzata madarlaŋw ŋkwa ege may, əy kala səkan maa ma maŋkanaŋkan ŋtakwaw, a kapal taf ŋ law, a pes ma ata zazak, səkwaw.» 3Yesu a zenetene, a ŋgaya: «Hune kéjəŋge ŋ ɗerewel mala Gazlavay ata səkan maa Dawuda a law, askwaw vaw? A pes wende aka, mbe ey hejəye anta ege, metes kájata. 4A təwse ca, Dawuda a dam a ujek Gazlavay, zlaɓa madarlaŋw anta ege wese, əy zam peŋ ma kéveleye ŋ Gazlavay. Kaw kwakwas ŋtakwaw képelzetene taf ŋ zam ca, askwaw, səy ŋ mala kwakwas ege gagaha. 5Askwaw ca, hune kéjəŋge ŋ ɗerewel ma maŋkanaŋkan mala Musa, maa mala kwakwas ege əy kala zlan a ujek kwakwas a pes ma ata zazak maa keɗe ma maŋkanaŋkan kápal taf askwaw, səkwaw vaw? Cemey, ara gay səkwaw. 6Sa kazlapahune, səkan ma pa ma day aha ujek kwakwas, mbəy ete ŋghe. 7Mada hune kasan ma maa a zlap, a ŋgaya: “Sa ɗaw ca, lasan hahar səkwaw ca, lafat səkan səkwaw,” wese ca, keɗe hune keneghemata hejəye ŋghe ege, maa kaw gay ata tata askwaw, askwaw. 8Mavəday, Mba Ɗala ca, ara madakal mala pes ma ata zazak.»
Yesu a rehza ɗala maa ra anta kámac anta, a pes ma ata zazak
9A dəwze anta, Yesu a gwarzam, a nda a dam a ujek ma ata rak Gazlavay mala Yahudu ege. 10Heje wende a təwse aka, ra anta kámac anta. A təwse ca, Farəysa ege əy ɗaw ŋ ghem Yesu, əy ɗawza, əy ŋgaya: «Ma maŋkanaŋkan ŋtakwaw a kapal taf ŋ rehza ɗala aza a pes ma ata zazak vaw, askwaw vaw?» 11Yesu a zenetene a ŋgaya: «Mada ɗala teŋguleŋ ŋ taba ŋkune, ŋtəmek anta teŋguleŋ aka, kánah anta a uley a pes ma ata zazak ca, a kanadaza aza a bəza askwaw vaw? 12Njenjəwen, ɗala ca, pa ma day aha ŋtəmek. Mavəday anta, taf képeleye ŋ la taŋtaŋ a pes ma ata zazak.» 13Aya, Yesu a zlepene ŋ heje ra mamacamac wese, a ŋgaya: «Daɗ ra ŋkwa.» A təwse ca, heje wese a daɗ ra anta, aya, ra anta mamacamac wese, lam a lam anta ana ra anta wende ma kadak kadak. 14A təwse ca, Farəysa ege əy damha aza a bəza, əy jav, əy zen zlap ŋ mpam taf ma ata ja Yesu aza.
Yesu ca, ara mala zlan maa Gazlavay a mayaw
15Maa Yesu a zləme ma tata anta aza ca, perce a gwarzam anta a təwse, a nda anta. Hejəye vəram əy kasəbar ara. Aya, a rehzata hejəye ma kadawar ege aza tewtew. 16Cemey, Yesu a ŋgazata aka, a zlepetene, a ŋgaya: «Kaw hune ɗaw ŋ ghwalza ma ata sa ŋ kaw vayay səkwaw.» 17Yesu a zlap ana ebe ŋghe ca, a ɗaw ŋ ghwalza ca, ma maa Esaya, mba ma zlap ma mala Gazlavay, a zlap wese ca, a la. 18A zlap, a ŋgaya:
«Gazlavay a zlap, a ŋgaya: “Ebe ŋghe ca, ara mala zlan naka, maa sa mayaw,
ɗala maa sa kaɗawaw mambaza. Sa kasasam a heɗe.
Sa naca Zəwet naka aka a heɗe,
a neghwelzetene laja guma ma a heɗe a heɗe ŋ hejəye tewtew.
19Kaw a kanampam ŋ gulak a ɗala askwaw, kaw a kanaja ula askwaw,
kaw a kanaɓam pakam a hejəye ata taf ege, askwaw.
20A kanaŋga ŋkem ma gudaf anta aza, askwaw,
a kanamacza patarla ma kaɗaw ŋ mac anta aza, askwaw.
A nala zlan anta ha hwas ata pes maa laja guma ma taŋtaŋ a ŋta ha gamzakw aza.
21Hejəye tewtew əy naca ŋkwaɓ tata ege aka a heɗe.”»
Yesu a gamata zəwet malula ege aza
22Aya, hejəye əy dene heje wende aka ŋ Yesu, ara ulaf, mbəy kula ŋ zlap səkwaw, mavəday zəwet malula ŋ ha anta aka. A təwse ca, Yesu a rehza aza, aya, mbəy kula ŋ zlap leŋ a kegəre la kadak kadak. 23Hejəye tewtew əy kedeŋ ŋkwaɓ dakala, əy zlap, əy ŋgaya: «Ebe ŋghe ca, ara Mba Dawuda səkwaw aza vaw?» 24Cemey, maa Farəysa ege əy zləme ma anta ca, əy zlap, əy ŋgaya: «Heje ŋghe a gam zəwet malula ege ca, a ɓardakw mala Beyelzebul, bay zəwet malula ege.» 25A təwse ca, Yesu a kasan lulak ŋkwaɓ tata ege, aya, a zlepetene a ŋgaya: «Mada hejəye ma ŋ hayak ma teŋguleŋ ege, əy kaɗa gham ŋ taba tata ca, hayak anta a nagay. Hejəye ma ŋ uzam kaw vekey, askwaw ca, hejəye ma a wata ɗala kaw vekey, mada əy kaɗa gham ŋ taba tata ca, uzam anta, askwaw ca, ge anta a neweɗ. 26Mada zəwet malula ege əy kaɗa gham ŋ taba tata ca, lazam bay zəwet malula anta, a nasan ŋ nja vaŋgay? 27Mada hune zlap huney, sa gamata zəwet malula ege ca, a ɓardakw mala Beyelzebul, bay zəwet malula ege, ca, madarlaŋw ŋkune ege ca, əy gamata a ɓardakw vecey? Ana ebe ŋghe, madarlaŋw ŋkune anta ege əy neghemahune. 28Njenjəwen, sa gamata zəwet malula ege ca, a ɓardakw Zəwet mala Gazlavay. A kaghwalza ca, lazam Bay mala Gazlavay hwas ara hune. 29Ɗala kula ŋ dam a wata ɗala ma ɓarɓar ŋ pəreslene səkan ma asa ra anta aza ca, askwaw. Cemey, səy mbəy ma jaw aza kwagwa, a dəwze anta, a pəreslene səkan ma asa ra anta ege wese aza tewtew. 30Ɗala maa mbəy a sa səkwaw ca, ara ɗala ma kaɗaw ŋ gərekey ata nje səkwaw. Mada ɗala a kecekzekey ŋ ɓec hejəye askwaw ca, a keweɗzata. 31Mavəday anta, sa kazlapahune, mada ɗala kála gay a tama Gazlavay, askwaw ca, káraɓa Gazlavay ca, Gazlavay a nepelzene gay anta aka. Cemey, mada ɗala a raɓa Zəwet ma keweɗ ca, Gazlavay a kenepelzene gay anta aka, askwaw. 32Mada ɗala a zlap ma madadawar ata Mba Ɗala ca, Gazlavay a nepelzene gay anta aka. Cemey, ɗala ma zlap ma madadawar ata Zəwet ma keweɗ ca, Gazlavay a kenepelzene gay anta aka askwaw, kaw ata vah ma na ŋgha, kaw ata vah ma kanandaha.»
Laslaŋgal ma ata mpe ey mba mpe anta
33«Mada mpe mbəy kadak ca, a mbaw mba ma kadak yam, mada kadak səkwaw ca, a mbaw mba ma kadak səkwaw yam. Cemey, heje san mpe kaw vekey ca, ata mba anta. 34Hune uzəye ŋkursla ege, hune hejəye ma kadak səkwaw ege ŋghe, ca, hune nasan ŋ zlap ma ma taŋtaŋ ca, vaŋgay? Mavəday, ma maa ɗala a kazlapaza ta ŋ pakam anta ca, a ghwalza səkan ege maɓahaɓah ŋ unaf anta. 35Ana ebe ŋghe, ɗala ma taŋtaŋ ca, a kaghwalza səkan ma tuwah ma ŋ unaf anta ma taŋtaŋ. Cemey, ɗala dadawar ca, a kaghwalza səkan dadawar ma ŋ unaf anta ma kadak səkwaw. 36Sa kazlapahune, a pes maa Gazlavay a kenejetene guma ŋ hejəye ca, kaw vayay a nezenha zlap a tama Gazlavay ata zlap anta ma kadak səkwaw ege maa a zlapata ege tewtew. 37Ana ebe ŋghe, Gazlavay a nasan hwa ɗala ma taŋtaŋ ca, ta ŋ zlap ŋkwa ege. A zeney, a neghemahwaw ca, ta ŋ zlap ŋkwa ege.»
Hejəye əy ɗawza Yesu, ma la zaɓəla
38Aya, hejəye maghwal ma maŋkanaŋkan ege vedəye ey Farəysa ege vedəye, əy zlepene ŋ Yesu, əy ŋgaya: «Bay ŋcene, nene kaɗaw hwa la zaɓəla ŋ ghwalza ca, ɓardakw ŋkwa a ndaha ca, ara Gazlavay.» 39Yesu a zenetene a ŋgaya: «Hejəye ma na ŋgha ege ca, əy kadak səkwaw, əy kala səkan ana maa Gazlavay a kaɗawaw askwaw, əy ɗaw ca, sa la zaɓəla, cemey, əy kenelem askwaw, səy ŋseŋ zaɓəla mala Yawnas, mba ma zlap ma mala Gazlavay, maa a la zlezle. 40Ana maa Yawnas a law, zaɗaw mahkaɗ, pes mahkaɗ a dəmas ŋkəlef ma dakal wese ca, Mba Ɗala a nala zaɗaw mahkaɗ, pes mahkaɗ ŋ jeɓ, ana mbe yam. 41A pes maa Gazlavay a kanaja guma ata laŋtakw manhayak ca, hejəye ma ŋ hayak Nəynəywe ege, əy nagwarzam, əy neghemata hejəye ma na ŋgha ege, mavəday maa əy zləme zlap Gazlavay maa Yawnas a kaghwalza ca, əy kája mbahw aza, əy kábawza lanja tata ege aza a tama Gazlavay. Cemey, ete ŋghe ca, ɗala ma pa ma day aha Yawnas aka. 42A zeney, a pes maa Gazlavay a kanaja guma ata laŋtakw manhayak ca, bay wala, mala hayak Saba, ma zlezle, a nagwarzam, a neghemata hejəye ma na ŋgha ege, mavəday a ndaha aka gədak, ŋ teh ma mala bay Suleymanu maa a kazlap a kəleŋ. Cemey, ete ŋghe ca, ɗala maa kəleŋ ŋ ha anta pa ma day aha Suleymanu aka.»
Lezenha mala Zəwet malula ŋ ɗala
43«Mada zəwet malula kádamha aza ŋ ɗala ca, a nanda ŋ tawarha ata darzlam ŋ mpam la ma ata zazak a təwse. Cemey, mada kélem askwaw ca, 44a nazlap ŋ ha anta a ŋgaya: “Sa nezen a ujek naka maa sa damha aza ŋma wese.” Aya, a nezenha, a nendewzene la ma ŋma kézleɗeye, kélemeye kadak kadak, cemey, ɗala ŋma askwaw. 45Aya, a nanda ŋ mpamha zəwet malula ege vedəye ŋsəleɗ, ma pa ma ɓarɓar aha mbe ege zeney. Əy nandaha tewtew, əy nadam ŋ nja ka ŋ ujek anta. Aya, heje anta, a nasa gef day aha ma ŋcəne anta. Ana ebe ŋghe, səkan anta a nendewzetene ŋ hejəye ma na ŋgha ege.»
Ata man Yesu ey zlaŋgan ege
46Maa Yesu a kezlepetene ŋ hejəye kwagwa ca, ata maman ey zlaŋgan ege, əy ndaha, əy kégereye a bəza, əy ɗaw ŋ zlepene. 47Heje wende aka a ndaha a zlepene ŋ Yesu, a ŋgaya: «Ata macahw ey zlanahw ege, əy a bəza, əy kaɗaw ŋ zlapahwaw.» 48A təwse ca, Yesu a zenene ŋ heje wese, a ŋgaya: «Mana ca, ara vayay? Zlana ege ca, ara ege vayay?» 49A dəwze anta, Yesu a kwetek ra anta ata madarlaŋw anta ege, a zlap, a ŋgaya: «Ata mana ey zlana ege ca, ara hejəye ŋghe ege, 50Mada ɗala a kala səkan ana maa Vana Gazlavay, ma mgba ata uzlaf a kaɗawaw ca, wese ca, heje anta ara zlana mawal, zlana haldəma, askwaw ca, mana.»
ទើបបានជ្រើសរើសហើយ៖
Mata 12: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
Mata 12
12
Yesu mbəy madakal mala pes ma ata zazak
1A pes wende aka, ara pes ma ata zazak, ata Yesu ey madarlaŋw anta ege, əy nda ta ŋ la ndərey maa əy kayaɓa a alkamarəy. A təwse ca, metes a jata madarlaŋw anta ege wese, aya, əy ŋgaha ndərey maa əy kayaɓa a alkamarəy wese, əy səlamaw, əy ɓamaw. 2Aya, maa Farəysa ege əy gəreta ca, əy zlepene ŋ Yesu, əy ŋgaya: «Sarzata madarlaŋw ŋkwa ege may, əy kala səkan maa ma maŋkanaŋkan ŋtakwaw, a kapal taf ŋ law, a pes ma ata zazak, səkwaw.» 3Yesu a zenetene, a ŋgaya: «Hune kéjəŋge ŋ ɗerewel mala Gazlavay ata səkan maa Dawuda a law, askwaw vaw? A pes wende aka, mbe ey hejəye anta ege, metes kájata. 4A təwse ca, Dawuda a dam a ujek Gazlavay, zlaɓa madarlaŋw anta ege wese, əy zam peŋ ma kéveleye ŋ Gazlavay. Kaw kwakwas ŋtakwaw képelzetene taf ŋ zam ca, askwaw, səy ŋ mala kwakwas ege gagaha. 5Askwaw ca, hune kéjəŋge ŋ ɗerewel ma maŋkanaŋkan mala Musa, maa mala kwakwas ege əy kala zlan a ujek kwakwas a pes ma ata zazak maa keɗe ma maŋkanaŋkan kápal taf askwaw, səkwaw vaw? Cemey, ara gay səkwaw. 6Sa kazlapahune, səkan ma pa ma day aha ujek kwakwas, mbəy ete ŋghe. 7Mada hune kasan ma maa a zlap, a ŋgaya: “Sa ɗaw ca, lasan hahar səkwaw ca, lafat səkan səkwaw,” wese ca, keɗe hune keneghemata hejəye ŋghe ege, maa kaw gay ata tata askwaw, askwaw. 8Mavəday, Mba Ɗala ca, ara madakal mala pes ma ata zazak.»
Yesu a rehza ɗala maa ra anta kámac anta, a pes ma ata zazak
9A dəwze anta, Yesu a gwarzam, a nda a dam a ujek ma ata rak Gazlavay mala Yahudu ege. 10Heje wende a təwse aka, ra anta kámac anta. A təwse ca, Farəysa ege əy ɗaw ŋ ghem Yesu, əy ɗawza, əy ŋgaya: «Ma maŋkanaŋkan ŋtakwaw a kapal taf ŋ rehza ɗala aza a pes ma ata zazak vaw, askwaw vaw?» 11Yesu a zenetene a ŋgaya: «Mada ɗala teŋguleŋ ŋ taba ŋkune, ŋtəmek anta teŋguleŋ aka, kánah anta a uley a pes ma ata zazak ca, a kanadaza aza a bəza askwaw vaw? 12Njenjəwen, ɗala ca, pa ma day aha ŋtəmek. Mavəday anta, taf képeleye ŋ la taŋtaŋ a pes ma ata zazak.» 13Aya, Yesu a zlepene ŋ heje ra mamacamac wese, a ŋgaya: «Daɗ ra ŋkwa.» A təwse ca, heje wese a daɗ ra anta, aya, ra anta mamacamac wese, lam a lam anta ana ra anta wende ma kadak kadak. 14A təwse ca, Farəysa ege əy damha aza a bəza, əy jav, əy zen zlap ŋ mpam taf ma ata ja Yesu aza.
Yesu ca, ara mala zlan maa Gazlavay a mayaw
15Maa Yesu a zləme ma tata anta aza ca, perce a gwarzam anta a təwse, a nda anta. Hejəye vəram əy kasəbar ara. Aya, a rehzata hejəye ma kadawar ege aza tewtew. 16Cemey, Yesu a ŋgazata aka, a zlepetene, a ŋgaya: «Kaw hune ɗaw ŋ ghwalza ma ata sa ŋ kaw vayay səkwaw.» 17Yesu a zlap ana ebe ŋghe ca, a ɗaw ŋ ghwalza ca, ma maa Esaya, mba ma zlap ma mala Gazlavay, a zlap wese ca, a la. 18A zlap, a ŋgaya:
«Gazlavay a zlap, a ŋgaya: “Ebe ŋghe ca, ara mala zlan naka, maa sa mayaw,
ɗala maa sa kaɗawaw mambaza. Sa kasasam a heɗe.
Sa naca Zəwet naka aka a heɗe,
a neghwelzetene laja guma ma a heɗe a heɗe ŋ hejəye tewtew.
19Kaw a kanampam ŋ gulak a ɗala askwaw, kaw a kanaja ula askwaw,
kaw a kanaɓam pakam a hejəye ata taf ege, askwaw.
20A kanaŋga ŋkem ma gudaf anta aza, askwaw,
a kanamacza patarla ma kaɗaw ŋ mac anta aza, askwaw.
A nala zlan anta ha hwas ata pes maa laja guma ma taŋtaŋ a ŋta ha gamzakw aza.
21Hejəye tewtew əy naca ŋkwaɓ tata ege aka a heɗe.”»
Yesu a gamata zəwet malula ege aza
22Aya, hejəye əy dene heje wende aka ŋ Yesu, ara ulaf, mbəy kula ŋ zlap səkwaw, mavəday zəwet malula ŋ ha anta aka. A təwse ca, Yesu a rehza aza, aya, mbəy kula ŋ zlap leŋ a kegəre la kadak kadak. 23Hejəye tewtew əy kedeŋ ŋkwaɓ dakala, əy zlap, əy ŋgaya: «Ebe ŋghe ca, ara Mba Dawuda səkwaw aza vaw?» 24Cemey, maa Farəysa ege əy zləme ma anta ca, əy zlap, əy ŋgaya: «Heje ŋghe a gam zəwet malula ege ca, a ɓardakw mala Beyelzebul, bay zəwet malula ege.» 25A təwse ca, Yesu a kasan lulak ŋkwaɓ tata ege, aya, a zlepetene a ŋgaya: «Mada hejəye ma ŋ hayak ma teŋguleŋ ege, əy kaɗa gham ŋ taba tata ca, hayak anta a nagay. Hejəye ma ŋ uzam kaw vekey, askwaw ca, hejəye ma a wata ɗala kaw vekey, mada əy kaɗa gham ŋ taba tata ca, uzam anta, askwaw ca, ge anta a neweɗ. 26Mada zəwet malula ege əy kaɗa gham ŋ taba tata ca, lazam bay zəwet malula anta, a nasan ŋ nja vaŋgay? 27Mada hune zlap huney, sa gamata zəwet malula ege ca, a ɓardakw mala Beyelzebul, bay zəwet malula ege, ca, madarlaŋw ŋkune ege ca, əy gamata a ɓardakw vecey? Ana ebe ŋghe, madarlaŋw ŋkune anta ege əy neghemahune. 28Njenjəwen, sa gamata zəwet malula ege ca, a ɓardakw Zəwet mala Gazlavay. A kaghwalza ca, lazam Bay mala Gazlavay hwas ara hune. 29Ɗala kula ŋ dam a wata ɗala ma ɓarɓar ŋ pəreslene səkan ma asa ra anta aza ca, askwaw. Cemey, səy mbəy ma jaw aza kwagwa, a dəwze anta, a pəreslene səkan ma asa ra anta ege wese aza tewtew. 30Ɗala maa mbəy a sa səkwaw ca, ara ɗala ma kaɗaw ŋ gərekey ata nje səkwaw. Mada ɗala a kecekzekey ŋ ɓec hejəye askwaw ca, a keweɗzata. 31Mavəday anta, sa kazlapahune, mada ɗala kála gay a tama Gazlavay, askwaw ca, káraɓa Gazlavay ca, Gazlavay a nepelzene gay anta aka. Cemey, mada ɗala a raɓa Zəwet ma keweɗ ca, Gazlavay a kenepelzene gay anta aka, askwaw. 32Mada ɗala a zlap ma madadawar ata Mba Ɗala ca, Gazlavay a nepelzene gay anta aka. Cemey, ɗala ma zlap ma madadawar ata Zəwet ma keweɗ ca, Gazlavay a kenepelzene gay anta aka askwaw, kaw ata vah ma na ŋgha, kaw ata vah ma kanandaha.»
Laslaŋgal ma ata mpe ey mba mpe anta
33«Mada mpe mbəy kadak ca, a mbaw mba ma kadak yam, mada kadak səkwaw ca, a mbaw mba ma kadak səkwaw yam. Cemey, heje san mpe kaw vekey ca, ata mba anta. 34Hune uzəye ŋkursla ege, hune hejəye ma kadak səkwaw ege ŋghe, ca, hune nasan ŋ zlap ma ma taŋtaŋ ca, vaŋgay? Mavəday, ma maa ɗala a kazlapaza ta ŋ pakam anta ca, a ghwalza səkan ege maɓahaɓah ŋ unaf anta. 35Ana ebe ŋghe, ɗala ma taŋtaŋ ca, a kaghwalza səkan ma tuwah ma ŋ unaf anta ma taŋtaŋ. Cemey, ɗala dadawar ca, a kaghwalza səkan dadawar ma ŋ unaf anta ma kadak səkwaw. 36Sa kazlapahune, a pes maa Gazlavay a kenejetene guma ŋ hejəye ca, kaw vayay a nezenha zlap a tama Gazlavay ata zlap anta ma kadak səkwaw ege maa a zlapata ege tewtew. 37Ana ebe ŋghe, Gazlavay a nasan hwa ɗala ma taŋtaŋ ca, ta ŋ zlap ŋkwa ege. A zeney, a neghemahwaw ca, ta ŋ zlap ŋkwa ege.»
Hejəye əy ɗawza Yesu, ma la zaɓəla
38Aya, hejəye maghwal ma maŋkanaŋkan ege vedəye ey Farəysa ege vedəye, əy zlepene ŋ Yesu, əy ŋgaya: «Bay ŋcene, nene kaɗaw hwa la zaɓəla ŋ ghwalza ca, ɓardakw ŋkwa a ndaha ca, ara Gazlavay.» 39Yesu a zenetene a ŋgaya: «Hejəye ma na ŋgha ege ca, əy kadak səkwaw, əy kala səkan ana maa Gazlavay a kaɗawaw askwaw, əy ɗaw ca, sa la zaɓəla, cemey, əy kenelem askwaw, səy ŋseŋ zaɓəla mala Yawnas, mba ma zlap ma mala Gazlavay, maa a la zlezle. 40Ana maa Yawnas a law, zaɗaw mahkaɗ, pes mahkaɗ a dəmas ŋkəlef ma dakal wese ca, Mba Ɗala a nala zaɗaw mahkaɗ, pes mahkaɗ ŋ jeɓ, ana mbe yam. 41A pes maa Gazlavay a kanaja guma ata laŋtakw manhayak ca, hejəye ma ŋ hayak Nəynəywe ege, əy nagwarzam, əy neghemata hejəye ma na ŋgha ege, mavəday maa əy zləme zlap Gazlavay maa Yawnas a kaghwalza ca, əy kája mbahw aza, əy kábawza lanja tata ege aza a tama Gazlavay. Cemey, ete ŋghe ca, ɗala ma pa ma day aha Yawnas aka. 42A zeney, a pes maa Gazlavay a kanaja guma ata laŋtakw manhayak ca, bay wala, mala hayak Saba, ma zlezle, a nagwarzam, a neghemata hejəye ma na ŋgha ege, mavəday a ndaha aka gədak, ŋ teh ma mala bay Suleymanu maa a kazlap a kəleŋ. Cemey, ete ŋghe ca, ɗala maa kəleŋ ŋ ha anta pa ma day aha Suleymanu aka.»
Lezenha mala Zəwet malula ŋ ɗala
43«Mada zəwet malula kádamha aza ŋ ɗala ca, a nanda ŋ tawarha ata darzlam ŋ mpam la ma ata zazak a təwse. Cemey, mada kélem askwaw ca, 44a nazlap ŋ ha anta a ŋgaya: “Sa nezen a ujek naka maa sa damha aza ŋma wese.” Aya, a nezenha, a nendewzene la ma ŋma kézleɗeye, kélemeye kadak kadak, cemey, ɗala ŋma askwaw. 45Aya, a nanda ŋ mpamha zəwet malula ege vedəye ŋsəleɗ, ma pa ma ɓarɓar aha mbe ege zeney. Əy nandaha tewtew, əy nadam ŋ nja ka ŋ ujek anta. Aya, heje anta, a nasa gef day aha ma ŋcəne anta. Ana ebe ŋghe, səkan anta a nendewzetene ŋ hejəye ma na ŋgha ege.»
Ata man Yesu ey zlaŋgan ege
46Maa Yesu a kezlepetene ŋ hejəye kwagwa ca, ata maman ey zlaŋgan ege, əy ndaha, əy kégereye a bəza, əy ɗaw ŋ zlepene. 47Heje wende aka a ndaha a zlepene ŋ Yesu, a ŋgaya: «Ata macahw ey zlanahw ege, əy a bəza, əy kaɗaw ŋ zlapahwaw.» 48A təwse ca, Yesu a zenene ŋ heje wese, a ŋgaya: «Mana ca, ara vayay? Zlana ege ca, ara ege vayay?» 49A dəwze anta, Yesu a kwetek ra anta ata madarlaŋw anta ege, a zlap, a ŋgaya: «Ata mana ey zlana ege ca, ara hejəye ŋghe ege, 50Mada ɗala a kala səkan ana maa Vana Gazlavay, ma mgba ata uzlaf a kaɗawaw ca, wese ca, heje anta ara zlana mawal, zlana haldəma, askwaw ca, mana.»
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL