Yuhana 15
15
Yesu ca, ara mpe ma taŋtaŋ
1Yesu a zlap, a ŋgaya: «Sa ca, sa mpe mavaw ma taŋtaŋ, Vana ca, ara heje mpe anta. 2Zləram kaw vekey ma ata sa, ma kambaw mba askwaw ca, a narazlza. Cemey, zləram kaw vekey ma kambaw mba ca, a nalamza ka, ndar a vas ŋ mbaw uzəye zeney. 3Ma maa sa zlapahune ŋghe ca, kábawzahune aza ghwezlekghwezlek. 4Hune nja ŋ sa, ana maa sa kénjeye ŋ hune! Mada zləram mbəy ata mpe askwaw ca, kula ŋ mbaw, mbaw, səkwaw. Ana mbe yam, mada hune kénjeye ŋ sa askwaw ca, hune kanambaw, mbaw, askwaw. 5Sa ca, sa mpe mavaw, hune yam, hune zləram mpe anta ege. Kaw vayay ma nja ŋ sa, sa yam, sa nanja ŋ mbe, heje anta a nambaw mba dakala. Mada hune kénjeye ŋ sa askwaw ca, hune kula ŋ la kaw vemey səkwaw. 6Mada ɗala kénjeye ŋ sa askwaw ca, əy nanahza aza a bəza ana zləram ege maa əy razlzata aza, əy ŋhwal tata. A dəwze anta, əy kwakwas ŋseŋ zləram anta ege, əy tamzata ŋ kwahwaw, əy ŋkəɗaw tata aza. 7Mada hune kénjeye ŋ sa, zlap naka ege yam əy ŋ hune ca, hune ɗawza səkan maa hune kaɗawaw, hune nelemew. 8Hune la səkan ma taŋtaŋ ege dakala, hune la ŋkune ŋ madarlaŋw naka ege, ana ebe ŋghe, hune naghwalza ɓardakw Vana. 9Sa yam, sa káɗawahune, ana maa Vana kéɗewekey, hune nja ŋ laɗaw naka. 10Mada hune kambal ma maŋkanaŋkan naka ege aka ca, hune nanja ŋ laɗaw naka, ana maa sa, sa kámbal ma maŋkanaŋkan mala Vana ka, sa kénjeye ŋ laɗaw anta yam.
11Sa zlapahune ana ebe ŋghe ca, ndar sasam naka a nja ŋ hune, sasam ŋkune a ghef. 12Ŋghe ma maŋkanaŋkan naka. Hune ɗaw kusam ŋ taba ŋkune ana maa sa kaɗawahune. 13Laɗaw ma pa ma day aha maa ɗala a kavalza ha anta aza mavəday hejəye maa a kaɗawata ege ca, askwaw. 14Mada hune kala səkan maa sa zlapahune ŋ law, ca, hune ŋgama naka ege. 15Sa kanayahune a mala zlan ege zeney, askwaw, mavəday, ɗala mala zlan ca, a kasan səkan maa təwjek anta a kalaw, səkwaw. Cemey, sa yahune a ŋgama naka ege ca, mavəday səkan ege tewtew maa sa zləmeta ara Vana ca, sa kághwalzahuneta aza. 16Ara hune ma meyekey səkwaw, cemey, ara sa ma mayahune, sa ma cahune, ndar hune nda, hune la səkan ma taŋtaŋ ege, aya, səkan anta ege əy nanja dakala. Aya, Vana a navalahune səkan maa hune kanaɗawza ege tewtew a zlam naka. 17Səkan maa sa kazlapahune ŋ law, ca, hune ɗaw kusam ŋ taba ŋkune.»
Hejəye ma ŋ manhayak ege əy kececefzata ata Yesu ey madarlaŋw anta ege səkwaw
18Yesu a zlepetene zeney, a ŋgaya: «Mada manhayak a kececefzahune səkwaw ca, hune san ka, kécecefzekey səkwaw mpar aha hune. 19Mada hune nja ana hejəye ma ŋ manhayak ege ca, manhayak a naɗawahune, mavəday hune hejəye anta ege. Cemey, hune nja ana hejəye ma ŋ manhayak ege səkwaw. Sa kámayahune aza, sa kádamahahune aza ŋ manhayak, mavəday anta, manhayak a kececefzahune səkwaw. 20Hune senzene ata ma maa sa zlapahune: “Mala zlan ca, mbəy pa ma day aha təwjek anta ca, askwaw.” Mada əy kámpam ŋgwesem asa sa ca, əy nampam ŋgwesem asa hune yam. Mada əy kálamza ma naka ca, əy nalamza ma ŋkune yam. 21Cemey, əy nalahune ana ebe ŋghe tewtew ca, mavəday sa, mavəday əy kasan ɗala ma leɓekey səkwaw. 22Mada sa kándaha askwaw, sa kézlepetene askwaw ca, əy kenelem gay askwaw. Cemey, na ŋgha ca, əy kula ŋ zlap: “Gay ata nene askwaw,” ca, askwaw. 23Ɗala ma kececefzekey səkwaw ca, a cecef səkwaw ca, Vana yam. 24Mada keɗe sa kála zlan ege maa kaw ɗala kula ŋ lata, askwaw ŋ taba tata, askwaw keɗe ca, əy kenelem gay, askwaw. Na ŋgha ca, əy kégəreta səkan anta ege aza, cemey, əy kececefzeney a Vana səkwaw war. 25Cemey, a laha ana ebe ŋghe ca, ndar ma meŋtereŋter ŋ ma maŋkanaŋkan tata a la anta. Kéŋtereye, a ŋgaya: “Əy kécecefzekey, askwaw mala bəse.”
26Mada ɗala ma kanacakzahune maa sa kanalaɓahune ara Vana, ana zlap ca, Zəwet ma njəwen ma ndaha aka ara Vana, kándaha aza ca, a naghwal ma ata sa a ha anta. 27Aya, hune yam, hune naghwal ma ata sa, mavəday mar aka ata lamar zlan naka ca, hune ara sa.»
ទើបបានជ្រើសរើសហើយ៖
Yuhana 15: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
