Zlan mala malaɓ ege 9
9
Sawl kálamza ma Yesu aza
1Ata vah wese ca, Sawl a kavas ŋ setene gef ŋ hejəye ma lamza ma mala Bay Madakal aza ege, a zlepetene, a ŋgaya, a najata aza. Aya, a nda ara madakal mala kwakwas, 2a ɗawza, meŋterene ɗerewel ege ŋ veletene ŋ madakal dakal a ujek ma ata rak Gazlavay ma ŋ Damas ege, ŋ ghwelzetene ca, mada Sawl kéndew ata hejəye ma kasəbar Taf Bay Madakal ege, mawal ege ey weləye tewtew ca, a mbalata, a jawata, a jeɓzata ŋ Urusaləyma.
3Maa Sawl mbəy ata taf, mbəy slaɓ ŋ hwas ŋ Damas ca, a təwse a təwse, leweɗ a ndaha aka a mgba ata uzlaf, a weɗ a heɗe. 4A təwse ca, a ndav ata hayak, aya, a zləme ula ɗala a kayaɓa, a kezlepene, a ŋgaya: «Sawl, Sawl, hwa sekey gef ana ebe ŋghe ca, ŋ vay?» 5Sawl wese, a ɗawza, a ŋgaya: «Hwa vayay, Bay Madakal?» Aya, ula wese a zenene, a ŋgaya: «Ara sa, Yesu, maa hwa kesene gef wese. 6Cemey, gwarzam, nda ŋ uzam Damas, a təwse, əy naghwalzahwaw səkan maa hwa kanalaw.» 7A təwse ca, hejəye maa əy nda tewtew ege əy ata Sawl wese, əy gar aka, kaw əy kula ŋ zlap səkwaw. Əy kezləme ula ɗala a kazlap, cemey, kaw əy kegəre ɗala askwaw. 8Aya, Sawl a gwarzam ata hayak, a zlarza nje anta ca, kaw kula ŋ gəre la səkwaw. Hejəye anta ege, əy mbelene ra anta, əy jeɓza ŋ uzam Damas. 9A təwse ca, wan mahkaɗ, kaw a kegəre la askwaw, a kazam uda askwaw, a kasa yam askwaw.
10Ŋ uzam Damas anta ca, heje ma lamza ma mala Yesu aza a təwse aka, zlam anta Ananəyas. Bay Madakal a ghwelene kusam, a yaɓa a ŋgaya: «Ananəyas!» A təwse ca, a zenene, a ŋgaya: «Away, Bay Madakal, sa cakwa.» 11Aya, Bay Madakal a zlepene, a ŋgaya: «Gwarzam, nda na ŋgha ta ŋ taf maa əy kayaɓa “taf Ma Gbar”, dam a wata Yahuda, ɗawza heje wende a təwse aka zlam anta Sawl ma ŋ uzam Tarsus, hwa nendewzene, a kerekekey. 12Cemey, maa a kerekekey wese ca, səkan wende kéghwelene kusam, aya, a gəre heje wende aka, zlam anta Ananəyas kádamha aza, káca ra anta aka a heɗe, ndar a lem ŋ gəre la zeney.»
13Ananəyas a zenene, a ŋgaya: «Bay Madakal, hejəye vəram əy kézlepekey ma ege ata heje ŋghe anta. Əy ŋgaya, késetene gef mambaza ŋ hejəye ma lamza ma ŋkwa aza ege ŋ Urusaləyma. 14A ndaha ete ŋghe ca, ara madakal dakal mala kwakwas ege əy ma pelzene taf ŋ mbalata hejəye tewtew ma kaya zlam ŋkwa ege.» 15Cemey, Bay Madakal a zlepene ŋ Ananəyas wese, a ŋgaya: «Gwarzam, nda, mavəday sa kámay heje ŋghe anta aza, ndar a la zlan naka, a ghwelzetene ŋ hejəye maa tata Yahudu ege səkwaw, ŋ bay tata ege leŋ ŋ hejəye Əysərayəyla ege, əy mesenekey. 16Sa, a ha naka, sa neghwelzene gef maa a kanasa tewtew, ŋ zlan anta, mavəday zlam naka.»
17Aya, Ananəyas a gwarzam, a nda. A hwas a wata wese, a ndewzene ŋ Sawl. A təwse ca, a ca ra anta ata ha Sawl anta, a zlepene, a ŋgaya: «Sawl, zlana, ara Bay Madakal Yesu ma leɓekey ara hwa. Ara mbe ma ghwalahwaw kusam anta ata taf maa hwa kandaha ete ŋghe wese. A leɓekey ca, ndar hwa zen ŋ gəre la zeney, ndar Gazlavay a ghefzahwaw a Zəwet ma keweɗ.» 18Kəɗe ca, səkan ana dawan ŋkəlef ege, əy naha ŋ nje Sawl, a təwse a təwse, nje anta a zlar anta. A gwarzam, a lem laban a yam baptəysma. 19A dəwze anta, a zam uda, a lem ɓarɓar anta zeney.
Sawl, a ghwal zlap Gazlavay ŋ uzam Damas
Sawl kánja wan ege cekuɗe ara hejəye ma lamza ma mala Yesu ege aza, ŋ uzam Damas. 20A təwse ca, a nda kəcaŋ ŋ ujek ma ata rak Gazlavay ege, a ghwalza Yesu ca, ara Mba Gazlavay. 21Hejəye tewtew ma kezləme zlap anta ege, əy káŋga ŋkwaɓ, əy zlap, əy ŋgaya: «Heje ŋghe ca, ara heje ma kuɗapzata hejəye ma kaya zlam Yesu ege ŋ Urusaləyma wese askwaw aza vaw? A ndaha ete ŋghe ca, ŋ mbalata, ŋ jeɓzata ara madakal mala kwakwas ege askwaw aza vaw?» 22Cemey, ata pes ata pes, Sawl a kavas ŋ ghwal zlap Gazlavay a ɓarɓar, a kaghwalza ca, «Yesu ara Almasəyhu.» Ana ebe ŋghe, Yahudu ege ma a uzam Damas, əy kasan ma maa əy kenezenene səkwaw.
23A dəwze wan ege vəram, Yahudu wese ege, əy jav ma tata ka, ŋ ja Sawl aza. 24A zaɗaw ey a pes, əy kahəbar ma ujek mala uzam ege, ŋ mbal Sawl, ndar əy jaza. Cemey, Sawl anta ca, kézləme səkan maa əy kaɗaw ŋ lene aza. 25Aya, a zaɗaw wende aka ca, madarlaŋw anta ege, əy ca ŋ ujam, əy damza ta ŋ uley ma ata mahwal ma dərezl uzam Damas anta, əy tadakwaza a serek kəɗe ata hayak ta ŋ kəva wende.
Sawl a zenha ŋ Urusaləyma
26Sawl a zenha ŋ Urusaləyma, a mpam taf ŋ jav a hejəye ma lamza ma mala Yesu aza ege. Cemey, hejəye anta ege tewtew tata əy kalalak tata a heɗe, əy deŋza ca, Sawl anta kála anta ŋ ɗala ma kálamza ma mala Yesu aza njenjəwen ca, askwaw. 27Aya, Barnabas a ŋta Sawl, a jeɓza ara malaɓ Yesu ege. A təwse ca, a ghwelzetene ma ma ata Sawl maa a gəre Bay Madakal ata taf Damas, maa Bay Madakal a zlepene leŋ maa a ghwalza ma mala Yesu ŋ hejəye ma ŋ uzam Damas ege, kaw a lalak askwaw. 28Mar aka a pes wese, Sawl kénjeye ara malaɓ Yesu ege, əy katawar tewtew ŋ Urusaləyma. Sawl anta a kazlap a zlam Bay madakal Yesu, kaw a lalak, askwaw. 29A zeney, a kezlepetene ŋ Yahudu ege ma kazlap ma Yunanəyŋkaw ege, a kaja səbakw a tata. Cemey, hejəye anta ege ca, əy kampam taf ŋ ja aza. 30Aya, hejəye ma lamza ma mala Yesu aza ege, əy zləme maa əy kaɗaw ŋ jaza wese ca, əy jeɓza ŋ uzam Kaysarəya, əy zlaŋza kəɗa ŋ uzam Tarsus.
31Ata vah wese ca, lajav hejəye ma lamza ma mala Yesu aza ege, ma ŋ hayak Yahudəya, ŋ hayak Galəyləy leŋ ma ŋ hayak Samarəya tewtew, əy kénjeye a zəhay. Ata pes ata pes, əy kelem ɓarɓar, əy kewenzene ha aka ŋ Bay Madakal ata lanja tata ege. Əy kafal a tama a tama, mavəday Zəwet ma keweɗ a kecekzetene.
Pəyer a rehza Ayneyas aza ŋ dawar anta
32Pəyer a katawar ŋ hayak ege tewtew. A pes wende aka, a nda ŋ sarata hejəye ma lamza ma mala Yesu aza ege ŋ uzam Ləyda. 33A təwse ca, a ndewzene ŋ heje wende aka, zlam anta Ayneyas, mbəy halɓaya, va jamahkaɗ, kéweneye ata lawan anta. 34Pəyer a zlepene, a ŋgaya: «Ayneyas, Yesu Almasəyhu kérehzahwaw aza. Gwarzam, ŋta lawan ŋkwa a ha ŋkwa.» A təwse a təwse, heje wese, perce a gwarzam. 35Hejəye tewtew ma ŋ uzam Ləyda ege ey ma ŋ Sarawn ege, maa əy gəre heje wese ca, əy zenha aza ara Bay Madakal.
Pəyer a gwarzamaza Tabəyta aza ata lamac
36Wala wende ŋ uzam Jawpe aka, zlam anta Tabəyta, əy yaɓa a ma Yunanəyŋkaw ege ca, Dawrkas, ana zlap ca, meŋ. Ara wala ma lamza ma mala Yesu aza. Ata pes ata pes, a kala zlan ma taŋtaŋ, a kecekzetene ŋ hejəye metetekw ege. 37Cemey, ata vah wese ca, dawar kánahza ata hayak, kámac anta. A dəwze maa əy banza ca, əy wanza ka a ujek ma mgba ata ha ujek. 38Hejəye ma lamza ma mala Yesu aza ma ŋ uzam Jawpe ege əy zləme ca, Pəyer mbəy ŋ uzam Ləyda. Uzam Ləyda anta mbermber a uzam Jawpe anta. Aya, əy laɓ hejəye gbak ata Pəyer ŋ yaɓa, əy zlepene, əy ŋgaya: «Pəyer, mbahw ndaha kəcaŋ a wata ŋcene.» 39A təwse a təwse, Pəyer tel əy nda a hejəye wese ege. Maa a hwas a təwse ca, əy jeɓza delele a ujek ma mgba ata ha wese. Weləye mce ma a təwse ege tewtew əy ndaha ara mbe, əy kahanha ara. A təwse ca, əy ghwelzene rəgwac ege maa Tabəyta anta a jata ata vah maa mbəy a həzlar tata ule. 40A təwse ca, Pəyer a damata hejəye aza tewtew a bəza. Aya, a gəleɓ, a rak Gazlavay. A dəwze anta, a bawha tama kəɗe aha mce wese, a zlap, a ŋgaya: «Tabəyta, gwarzam.» Tabəyta a zlar nje, aya, maa a gəre Pəyer ca, a gwarzam, a nja aka. 41Pəyer a mbal ŋ ra, a gwarzamza. A dəwze anta ca, a yahata hejəye ma lamza ma mala Yesu aza ege leŋ weləye mce ege wese, a ghwelzetene Tabəyta wese, mbəy nje. 42Hejəye ma ŋ uzam Jawpe ege tewtew əy zləme ma anta, aya, hejəye vəram əy lamza ma mala Bay Madakal. 43Pəyer kánja wan dakala ŋ Jawpe a wata heje wende aka, zlam anta Səymawn, ara ɗala ma la zlan bukəla.
ទើបបានជ្រើសរើសហើយ៖
Zlan mala malaɓ ege 9: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
