Zlan mala malaɓ ege 10
10
Pəyer a ghwelzene zlap Gazlavay ŋ Kawrneləyus
1Heje wende ŋ uzam Kaysarəya aka, zlam anta ca, Kawrneləyus. Heje anta ca, ara madakal sawje Rawma ege temere, maa əy kayaɓa a sawje ege ma ndaha aka ŋ hayak Əytaləya. 2Heje anta, a kasəbar taf Gazlavay a heɗe a heɗe, mbe, zlaɓa hejəye ma a wata anta ege tewtew, əy kewenzene ha aka ŋ Gazlavay. A kecekzetene dakala ŋ metetekw ege ma ŋ taba Yahudu ege, a karak Gazlavay ata pes ata pes. 3A pes wende aka, a la anta ler mahkaɗ mala mackwahw, malaɓ Gazlavay a ghwelene kusam ŋ Kawrneləyus anta, aya, a gəre malaɓ anta kadak kadak. A təwse ca, a dam ara mbe, a yaɓa, a ŋgaya: «Kawrneləyus!» 4A təwse ca, a sarza malaɓ wese, kálalak anta, aya, a zlepene, a ŋgaya: «Ma laha vemey, Bay Madakal?» Aya, malaɓ wese a zenene, a ŋgaya: «Gazlavay kézləme larak ŋkwa ey maa hwa kécekzetene ŋ metetekw ege aza, kéheseŋzahwaw askwaw. 5Laɓzata hejəye na na ŋgha ŋ uzam Jawpe, ŋ yaɓa heje wende a təwse aka, zlam anta Səymawn, maa əy kayaɓa Pəyer. 6Mbəy a wata Səymawn, mala zlan bukəla, ujek anta mbəy mbermber a ma ŋtele.» 7A dəwze maa malaɓ Gazlavay ma zlepene wese ɗak ca, Kawrneləyus a yahata mala zlan anta ege gbak leŋ sawje teŋguleŋ ŋ taba sawje anta ege, ma kelene zlan zlezle. Sawje anta ca, ara ɗala ma kasəbar taf Gazlavay a unaf teŋguleŋ. 8A təwse ca, a ŋgeɗetene ma maa malaɓ Gazlavay a zlepene wese ege tewtew. A dəwze anta, a laɓzata ŋ uzam Jawpe ara Pəyer.
9A mpat anta, hejəye maa Kawrneləyus a laɓzata ege wese, əy kanda ata taf, əy slaɓ ŋ hwas ŋ uzam Jawpe anta. A la anta pes wereywerey, Pəyer a tev mgba ata debeber ujek ŋ rak Gazlavay. 10Aya, maa a karak Gazlavay wese ca, metes a kajaw, a kaɗaw uda ŋ zamaw. Maa əy kempemene səkan ŋ zam wese ca, a lene ana seŋseŋ, a gəre Gazlavay a keghwelzene səkan ege. 11A gəre la ma mgba ata uzlaf kézlereye, səkan ana gwadawre ma dakal a katadakwha ata hayak, mazlam anta ege ŋfaɗ tata əy kéveɗeye. 12Ŋ gwadawre anta ca, ŋseŋ səkan ma kanda ŋgas ŋfaɗ ege tewtew, ŋseŋ səkan ma kenjew dəmas ata hayak ege tewtew leŋ ŋseŋ vəgem ege tewtew. 13A təwse ca, ula a jaha ŋma, a zlepene, a ŋgaya: «Pəyer! Gwarzam, fatata səkan ŋghe ege, zamata!» 14Cemey, Pəyer a zenene, a ŋgaya: «Kay, Bay Madakal, nja naka, kaw sa kázamha səkan maa kwakwas ŋcene a tak ka ŋ zam leŋ səkan ma kadak səkwaw, askwaw.» 15Ula wese, a jaha zeney, a zlepene, a ŋgaya: «Səkan maa Gazlavay a bawza aza tuwah ca, hwa ɗaw ŋ zlap ara səkan ma kadak səkwaw, səkwaw.» 16A laha ana ebe ŋghe, gas mahkaɗ. Aya, a təwse a təwse, səkan wese zen a zen anta mgba ata uzlaf ata la anta. 17Pəyer a kedeŋza səkan maa Gazlavay a ghwelzene wese ca, a ɗawza ha anta, a ŋgaya: «Səkan ma laha ŋgha anta ca, a ɗaw ŋ ghwelzekey ca, ma vekey»? Aya, a təwse ca, hejəye maa Kawrneləyus a laɓata ege wese, əy kaɗawza wata Səymawn, kəɗe ca, enjekeɗe, əy kégereye ca, a mejəkeɗ anta. 18Əy ɗaf ma a mazlazlay, əy ɗawzata hejəye, əy ŋgaya: «Səymawn Pəyer ca, a nja ete ŋghe vaw?» 19Pəyer ca, a kedeŋza səkan maa Gazlavay a ghwelzene wese war. Cemey, Zəwet Gazlavay, a zlepene, a ŋgaya: «Ŋghe, hejəye vedəye mahkaɗ əy kampamahwaw. 20Gwarzam, tadakw ara tata, hune nda na na ŋgha tewtew, kaw hwa ɗaw ŋ deŋ ŋkwaɓ səkwaw, mavəday ara sa ma laɓata!»
21Aya, Pəyer a tadakw, a nda ara hejəye wese ege, a zlepetene, a ŋgaya: «Ara sa, heje maa hune kampam wese. Ca, ma dahune ca, vemey?» 22A təwse ca, əy zenene, əy ŋgaya: «Nene ndaha ca, ara Kawrneləyus, madakal sawje ege ma leɓeney. Heje anta mbəy tuwah, a ketehzene zlam ŋ Gazlavay kadak kadak. Yahudu ege tewtew əy kaghwalza ma anta, ara ɗala ma taŋtaŋ. Malaɓ Gazlavay kándaha ara mbe, kézlepene ŋ yahwaw a wata anta, ndar a zləme ma maa hwa kenezlepene.» 23Aya, Pəyer a lamzata, a damzata a ujek, a veletene la ŋ wan a zaɗaw wese.
Pəyer a nda a wata Kawrneləyus
A mpat anta ca, a gwarzam, əy nda tewtew əy ata hejəye ma mahkaɗ ege wese. Hejəye vedəye ma lamza ma mala Yesu aza ege ma ŋ uzam Jawpe ege əy cetene ma. 24A vagumtaɗ anta ca, a gwar ŋ Kaysarəya. A təwse ca, Kawrneləyus káyahata van anta ege ey ŋgama anta ege ma njenjəwen ege aka, əy kahəbarata. 25Aya, maa Pəyer a gwarha aza ca, Kawrneləyus a ndaha a ŋgelene ma, a gəleɓene aka a tama ŋ həmanza dakala. 26Cemey, Pəyer a gwarzamza, a zlepene, a ŋgaya: «Gar aka, sa ca, sa heje dakənak ana hwa yam.» 27Aya, a kezlepene ara ŋ Kwarneləyus wese, a dam a ujek ata la maa a ndew ata hejəye vəram, əy kéɓeceye. 28Pəyer a zlepetene, a ŋgaya: «Njenjəwen, hune kasan ca, kwakwas mala Yahudu ege ca, képelzetene taf ŋ Yahudu ege ŋ mbal ŋgama leŋ ŋ dam a wata mbəlam ege ca, askwaw. Cemey, Gazlavay kéghwelzekey aza, sa ɗaw ŋ sar kaw vayay ana ɗala ma kadak səkwaw səkwaw, maa dama a heɗe səkwaw. 29Mavəday anta, kaw sa kédeŋ ŋkwaɓ ata maa hwa yekey ca, askwaw. Ca, na ŋgha ca, sa ɗaw ŋ san, hune yekey ca, ŋ vay?»
30A təwse ca, Kawrneləyus a zenene, a ŋgaya: «Kála anta wan mahkaɗ, a ler mahkaɗ mala mackwahw ana ebe ŋghe, sa karak Gazlavay a wata naka. A təwse a təwse, sa gəre heje wende aka a tama naka, rəgwac ma ata kusam anta, tezlezle, 31a zlepekey, a ŋgaya: “Kawrneləyus, Gazlavay kézləme larak ŋkwa aza, kéheseŋza taŋtaŋ ŋkwa maa hwa letene ŋ metetekw ege askwaw. 32Laɓzata hejəye ŋ Jawpe, ŋ yaɓa Səymawn, maa əy kayaɓa Pəyer, mandaha ete ŋghe. Mbəy a wata Səymawn, ma kala zlan bukəla. Wata Səymawn anta ca, mbəy a ma ŋtele.” 33Sa laɓzata hejəye kəcaŋ ata hwa ŋ yahwaw ca, mavəday anta. Hwa yam, hwa kálamza aza, hwa kándaha aza. Na ŋgha ca, nene kéɓeceye tewtew ete ŋghe a tama Gazlavay ŋ teh zlap ege maa Bay Madakal a gwarzamahwaw ŋ zlepeney tewtew.»
Pəyer a ghwal zlap a wata Kwarneləyus
34A təwse ca, Pəyer a zlap, a ŋgaya: «Na ŋgha ca, sa kasan njenjəwen, Gazlavay a kaŋtar ma aha ɗala askwaw. 35Kaw vayay ma kewenzene ha aka ŋ Gazlavay, ma kala səkan ma tuwah ca, kaw heje anta ara ŋseŋ vekey ca, Gazlavay a nalamza. 36Gazlavay kálaɓaza zlap anta ŋ hejəye Əysərayəyla ege. Zlap anta ca, ara Ma Mewe ma Taŋtaŋ mala lanja ŋ zəhay. A laɓaza ta ara Yesu Almasəyhu, Bay Madakal mala hejəye tewtew. 37Hune kasan səkan ma laha ŋ hayak Galəyləy, a dəwze anta, ŋ hayak Yahudəya tewtew, a dəwze maa Yuhana a ghwelzetene zlap anta ata laban a yam baptəysma. 38Hune kasan ca, Gazlavay káca Yesu ɗala Nasaratu aza ŋ bay, kévelene Zəwet ma keweɗ leŋ ɓarɓar anta aza. Yesu anta kánda kaw a katay, kéletene taŋtaŋ ŋ hejəye, kérehzata hejəye maa malula a mbalata aza ege tewtew, mavəday Gazlavay mbəy a mbe.»
39«Nene ca, nene kégəre səkan ege tewtew maa a lata ata nje ŋcene ege ŋ hayak Yahudu leŋ ŋ Urusaləyma, əy kádar ka ata mpe gafaŋgal, əy kája aza. 40Cemey, ata wan mamahkaɗ anta ca, Gazlavay kágwarzamaza aza ata lamac, képelzene taf ŋ ghwalza kusam anta. 41A ghwalza kusam anta ca, ŋ hejəye tewtew səkwaw, cemey, ŋ nene maa Gazlavay a meyeney ka zlezle ŋ ghwal səkan maa nene gəre a nje ŋcene ege. A dəwze maa Gazlavay a gwarzamaza aza ata lamac ca, nene kázam səkan leŋ nene kása səkan ŋ la anta. 42A zeney, Yesu anta kézlepeney ŋ ghwelzetene Ma Mewe ma Taŋtaŋ ŋ hejəye leŋ ŋ ghwelzetene ca, njenjəwen, Gazlavay káca aza ŋ jetene guma ŋ hejəye ma a nje ege leŋ ŋ hejəye ma mac tata ege. 43Uzəye ma zlap ma Gazlavay ege tewtew əy kázlap a heɗe, əy ŋgaya: “Kaw vayay ma lamza ma anta aza ca, Gazlavay a nepelzene gay anta ege aza ta ŋ ɓarɓar zlam anta.”»
Zəwet ma keweɗ a tadakwha ata hejəye ma tata Yahudu ege səkwaw
44Maa Pəyer a kazlap kwagwa ca, Zəwet ma keweɗ a tadakwha ata hejəye ma keteh zlap ege wese tewtew. 45A təwse ca, Yahudu ege ma lamza ma mala Yesu aza ege, maa əy ndaha tewtew əy ata Pəyer wese, əy káŋga ŋkwaɓ dakala, mavəday maa əy gəre Gazlavay a veletene Zəwet ma keweɗ ata hejəye ma tata Yahudu ege səkwaw wese yam. 46Yahudu ege wese əy zləme ca, hejəye ma tata Yahudu ege səkwaw wese, əy kazlap a ma ege vedəye vedəye, əy kahəmanza madakal mala Gazlavay. Aya, Pəyer, a ŋgaya: 47«Na ŋgha ca, hejəye ŋghe anta ege əy kélem Zəwet ma keweɗ aza, ana maa heje lem yam. Ca, ma kanatakata aka ŋ lem laban aza a yam baptəysma ca, vayay?» 48A təwse ca, Pəyer a zlepetene, əy mabanata aza ŋ yam baptəysma a zlam Yesu Almasəyhu. Aya, hejəye ma tata Yahudu ege səkwaw wese, əy rak Pəyer ŋ nja ka ara tata wan ege cekuɗe.
ទើបបានជ្រើសរើសហើយ៖
Zlan mala malaɓ ege 10: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
