Zlan mala malaɓ ege 7
7
Zlap Etəyen ata lajav ma dakal ma ata ja guma
1Madakal mala kwakwas, a ɗawza Etəyen, a ŋgaya: «Ma maa əy zlap ata hwa ŋgha ca, ana ebe ŋghe anta njəwen vaw?» 2A təwse ca, Etəyen a zenene, a ŋgaya: «Zlana ege ey vana ege, hune teh zlam kadak kadak. Gazlavay ca, ɓardakw anta aka, kéghwelzene kusam ŋ jeje ŋtakwaw Əybərahəyma, maa mbəy ŋ hayak Mesawpawtaməya, káyaŋ ŋ uzam Haran kwagwa səkwaw. 3A zlepene, a ŋgaya: “Nda ŋkwa, yakza hayak ŋkwa aka, yakzata van ŋkwa ege aka, nda ŋ hayak maa sa kanaghwalzahwaw.” 4Aya, a yakza hayak Kaldəya aka, a yaŋ anta ŋ uzam Haran. A dəwze maa cen a mac anta ca, Gazlavay a yaŋaza aza ŋ hayak maa hune ŋma na ŋgha. 5Ata vah wese ca, Gazlavay kévelene hayak ŋ Əybərahəyma ŋ nja ŋma askwaw. Kaw la pəzekw ende ŋghe hada laca ŋgas ŋ hayak anta, kélem askwaw. Əybərahəyma ca, mba anta kwagwa askwaw, cemey, Gazlavay kézlepene aza a nevelene hayak ŋgha anta, ŋ mbe leŋ ŋ uzəye dəmas anta ege. 6Gazlavay a zlepene ana ebe ŋghe, a ŋgaya: “Uzəye dəmas ŋkwa ege, əy nanja ŋ hayak ma ata mbəlam. A təwse ca, əy nesetene gef, əy nabawzata aza ŋ mava ege, va temere ŋfaɗ.” 7Cemey, a zlepene zeney, a ŋgaya: “Sa, a ha naka, sa nejetene guma ŋ hejəye ma bawzata aza ŋ mava ege wese. A dəwze anta, əy nayakza hayak anta aka, əy nandaha ŋ həmenzekey ata la ŋgha.” 8Aya, Gazlavay a ŋkenene ma ŋ Əybərahəyma. Səkan ma kanaghwalza laŋkan ma anta ca, ara lazla mandulay. Ana ebe ŋghe, maa Əysəyaku a mbawha aza ca, Əybərahəyma a zlene mandulay aza ata wan majamahkaɗ anta. Əysəyaku yam, a zlene mandulay mala mba anta Yakubu aza, Yakubu yam, a zletene mandulay mala uzəye anta ege ma wam aha gbak aza. Uzəye anta ma wam aha gbak ege anta ca, tata jeje ŋtakwaw ege.»
9«A təwse ca, jeje ŋtakwaw anta ege, əy kála sərah ata zlaŋgan tata Yusufu, əy kásəkamza ŋ mava ŋ hayak Məysəra. Cemey, Gazlavay mbəy a mbe, 10kérehza aza ŋ gef anta maa a kasata ege tewtew. Kévelene kəleŋ leŋ kácaza ŋ ɗala ma taŋtaŋ a tama Fəyrawna, bay mala hayak Məysəra. Fəyrawna anta kácaza ŋ mambal hayak Məysəra leŋ ŋ mambal wata anta tewtew. 11Aya, metes a la ŋ hayak Məysəra leŋ ŋ Kanana tewtew, a kaŋgwavata hejəye dakala, jeje ŋtakwaw ege əy kelem səkan ŋ zam askwaw. 12Maa Yakubu a zləme səkan ta zam ŋ hayak Məysəra aka ca, a laɓzata jeje ŋtakwaw ege, mampar anta, a təwse. 13Maa əy nda magbak anta ca, Yusufu a ghwalza ha anta ŋ zlaŋgan ege. A təwse ca, Fəyrawna a san ŋseŋ mala Yusufu aza. 14A dəwze anta ca, Yusufu a laɓ ŋ daza cen Yakubu, zlaɓa hejəye ma a wata anta ege tewtew. Hejəye anta ege tewtew ca, tata reŋsəleɗ aha jaɓan. 15Yakubu a tadakw, a nja ŋ hayak Məysəra, a mac a təwse. Jeje ŋtakwaw ege tewtew yam, əy mac a təwse. 16Əy jeɓzata mce tata ege ŋ Səykem, əy mpasata ŋ jeɓ maa Əybərahəyma a səkam a səlay ara uzəye Hamawr ege, ŋ Səykem anta.»
17«Vah maa Gazlavay a nala səkan ana maa a zlepene ŋ Əybərahəyma wese ca, slaɓ ŋ hwasha. Hejəye Əysərayəyla ma ŋ hayak Məysəra ege wese, əy kámbaw tata vəram. 18A dəwze anta ca, ɗala matakan a nja ŋ zam bay ŋ hayak Məysəra. Bay anta ca, a kasan Yusufu səkwaw. 19A təwse ca, bay anta a bamzata hejəye ŋtakwaw ege, a setene gef ŋ jeje ŋtakwaw ege, a letene kulakw ŋ hejəye əy megeɓzata uzəye veɗekw tata ege aka ŋ mac. 20Ata vah anta wese ana maa əy mbawaza Musa. Mba anta aka kadadaɓ a tama Gazlavay. A kagal a wata cen ŋtəra mahkaɗ. 21A dəwze anta ca, əy káyakza aka, aya, həla Fəyrawna, a ŋta aza, a galaw, ana mba ma mbawha a dəmas anta. 22A təwse ca, Musa a sasərak səkan ege tewtew maa hejəye Məysəra ege əy kasanata. Kála anta ŋ ɗala ma ɓarɓar ta ŋ zlap anta ege leŋ ta ŋ zlan anta ege maa a kalata. 23Maa va Musa a la anta raŋfaɗ ca, a ulakza ŋ nda ŋ sarata van anta, Əysərayəyla ege. 24Aya, a gəre ɗala Məysəra a kelene səkan ma kadak səkwaw ŋ van anta wende aka. A təwse ca, a cekzene ŋ van anta wese, a ja kusam a uley anta, a ja heje Məysəra wese aza. 25A təwse ca, a ulakza ca, van anta Əysərayəyla ege əy nasan ca, Gazlavay a kaɗaw ŋ rehzata ta asa ra anta, cemey, əy kásan səkwaw. 26A mpat anta ca, Musa a ndewzetene ŋ Əysərayəyla ege gbak, əy kaja kusam. A təwse ca, a ɗaw ŋ ŋtarzata, ndar əy nja ka a zəhay, aya, a zlepetene, a ŋgaya: “Ŋgama naka ege, hune ca, hune ata zlanahw ŋkune ege, hune ja kusam vemey?” 27Cemey, heje ma lene səkan ma kadak səkwaw ŋ zlaŋgan wese, a gam ara, a ŋgaya: “Ma cahwaw ŋ bay ŋcene leŋ ŋ maja guma ŋcene ca, vayay? 28Hwa ɗaw ŋ jekey aza ana maa hwa ja ɗala Məysəra aza a njuna wese vaw?” 29Maa Musa a zləme ma ŋgha ca, a hey anta ata mbəlam, ŋ hayak Medəyan. A təwse ca, a mbawha uzəye mawal ege gbak.»
30«A dəwze va raŋfaɗ ata darzlam, mbermber asa barla Səyna ca, malaɓ Gazlavay a ghwelene kusam ŋ Musa ŋ taba ganana kwahwaw ma kabas ŋ daba vejeɗ. 31A təwse ca, ŋkwaɓ Musa káŋga anta ata səkan maa a gəre. Aya maa a kezen mbermber ŋ sarza kadak kadak ca, a zləme ula Bay Madakal, a kazlap, a ŋgaya: 32“Sa, sa Gazlavay mala jeje ŋkwa ege, Gazlavay mala Əybərahəyma, mala Əysəyaku leŋ mala Yakubu.” A təwse ca, Musa kálalak anta, a kanana, kaw mbəy kula ŋ sarza zeney səkwaw. 33Aya, Bay Madakal a zlepene, a ŋgaya: “Cakw ŋte ma ata ŋgas ŋkwa ege aza, mavəday la maa hwa kédeŋeye ŋma ŋghe ca, ara la ma keweɗ. 34Sa kégəre gef maa əy kesetene ŋ hejəye naka Əysərayəyla ege ŋ Məysəra aza, sa kézləme lahan tata aza. Cemey, sa kándaha aza ŋ rehzata. Na ŋgha ca, sa laɓzahwaw, nda ŋ Məysəra.”»
35«Musa ca, ara ɗala maa hejəye Əysərayəyla ege əy gam ara zlezle, maa əy zlepene, əy ŋgaya: “Ma cahwaw ŋ bay ŋcene leŋ ŋ ɗala maja guma ŋcene ca, vayay?” Wese. Cemey, ara Musa anta, ana maa Gazlavay a laɓaza ana bay ey mereh tata ta ŋ malaɓ Gazlavay maa a ghwelene kusam ŋ daba vejeɗ wese war. 36Ara Musa anta ma damata hejəye Əysərayəyla ege aza ŋ hayak Məysəra ta ŋ lala səkan ma kaŋga ŋkwaɓ ege leŋ zaɓəla ege ŋ hayak anta. A lata zaɓəla anta ege ca, ata ŋtele ma Vəre leŋ ŋ darzlam, ŋ va raŋfaɗ. 37Ara Musa anta, ma zlepetene ŋ hejəye Əysərayəyla ege zeney, a ŋgaya: “Gazlavay a nambawahune mba ma zlap ma ata ŋseŋ ŋkune, ana sa.” 38A zeney, maa hejəye Əysərayəyla ege əy kéɓeceye ata darzlam wese ca, ara Musa anta ma kadaza zlap maa malaɓ Gazlavay a kezlepene ata barla Səyna wese ŋ jeje ŋtakwaw ege. A təwse ca, a lamaza zlap ma kaval lanja, ŋ ghwalzaheje. 39Cemey, jeje ŋtakwaw ege, əy kewenzene ha səkwaw, əy kalamza ma anta səkwaw. Ŋ unaf tata ca, əy ɗaw ŋ zen ŋ Məysəra. 40A təwse, əy zlepene ŋ Haruna, əy ŋgaya: “Lamaheje kule ege ma kanacaheje ma ata taf. Cemey, a Musa ma damaheje aza ŋ hayak Məysəra wese ca, heje kasan səkan ma ndewzene səkwaw.” 41A təwse ca, əy lam kule ana mba velŋgeɗ, əy fetene səkan ŋ kule wese. Əy ja gwaygwaya a sasam ata kule maa əy lam ata ra tata wese. 42Cemey, Gazlavay a bewzetene dəwze, a geɓzata aka, əy mahəmanzata gamzla ma mgba ata uzlaf ege, ana maa kéŋtereye ŋ ɗerewel uzəye ma zlap ma ege, ana ebe ŋghe:
“Hune hejəye Əysərayəyla ege,
ŋ va raŋfaɗ maa hune la ata darzlam ca,
hune kéfetekey səkan patakwar ege ŋ sa aka vaw?
43Kaw askwaw! Hune káŋta kule maa hune kayaɓa Mawlakw ara, ŋ ujek anta.
Hune kétew kule malamalam ana gamzla maa hune kayaɓa Refan,
ara kule ege maa hune lamata ata ra ŋkune ege ŋ həmanzata.
Mavəday anta, sa najeɓzahune ata la ma pa ma gədak aha hayak Babəyla.”»
44«Ata darzlam wese ca, jeje ŋtakwaw ege əy kába guɗakw ma ata ŋgel ma a Gazlavay aka. Guɗakw anta ca, ara Gazlavay ma zlepene ŋ Musa ŋ baw, ana maa a ghwelzene. 45A dəwze anta ca, jeje ŋtakwaw ege, əy kégeɓzetene guɗakw wese aka ŋ uzəye dəmas tata ege. Əy ketew ara ata landa tata ŋ hayak maa əy pərasl ara hejəye vedəye ma tata Yahudu ege səkwaw, maa Yawsuwa mbəy madakal tata. Ara Gazlavay ma gamata hejəye anta ege aza a tama a tama. Guɗakw anta kánja hwas ata vah maa Dawuda a zam bay anta. 46Dawuda kéndəremzene aza ŋ Gazlavay, aya, Dawuda a ɗaw taf ara Gazlavay Yakubu, ŋ lemene ujek. 47Cemey, ara Suleymanu, mbəy ma lemene ujek anta ŋ Gazlavay. 48Cemey, Gazlavay ma mgba ata uzlaf ca, a kanja ŋ ujek maa hejəye əy lam ata ra tata ege səkwaw. Ana maa mba ma zlap ma, a zlap:
49“Bay Madakal, a zlap, a ŋgaya: La ma mgba ata uzlaf ca, ara lanja bay naka,
la ma ata hayak yam, ara laca ŋgas naka.
Hune nelemekey ujek ca, ujek ŋseŋ vekey?
La ma ata zazak naka ca, aka vaw?
50Ara sa ma bata səkan ŋghe anta ege tewtew, səkwaw vaw?”»
51«Hune hejəye ma kezləme zləme səkwaw ege ŋghe, maa unaf ey zlam ŋkune ege əy kaɗaw ŋ zləme laya Gazlavay səkwaw ŋgha. Hune nja ana jeje ŋkune ege! Kaw hune kalamza ŋ tehzene zlam ŋ Zəwet ma keweɗ səkwaw! 52Mba ma zlap ma mala Gazlavay maa jeje ŋkune ege əy sene gef səkwaw ca, vekey? Əy kájata hejəye ma ghwalza Ɗala ma Taŋtaŋ ma kanandaha aza. Na ŋgha ca, hune kásəkam heje anta aza, hune kája aza. 53Gazlavay kávalahune ma maŋkanaŋkan ta ŋ ma malaɓ anta ege, cemey, hune kéteh zlam a heɗe askwaw.»
Lamac Etəyen
54Maa hejəye ma ata lajav ma dakal ma ata ja guma ege, əy zləme ma ŋgha ca, əy ŋca ra tata ege, mavəday unaf kághwaɗata aza mambaza ata Etəyen. 55Cemey, Etəyen mbəy ghef a Zəwet ma keweɗ, a sar la kəɗa mgba ata uzlaf ca, a gəre ɓardakw mala Gazlavay leŋ a gəre Yesu kégereye ata ra zam mala Gazlavay. 56A təwse ca, a zlap, a ŋgaya: «Hune teh zlam, sa kegəre la ma mgba ata uzlaf kézlereye leŋ Mba Ɗala kégereye ata ra zam Gazlavay.» 57Aya, maa əy zləme zlap ŋghe ege ca, əy ja ula a mazlazlay, əy nakata zlam tata ege aka. A dəwze anta, əy ɓec a heɗe tewtew tata. 58Aya, əy njew kəɗe a mazlam uzam, əy kwap a ŋkəɗaŋ. Hejəye ma gəre səkan anta ege, əy yakzata rəgwac tata ege aka ara mba darlaŋw wende aka, zlam anta Sawl. 59Maa əy kakwap a ŋkəɗaŋ wese ca, Etəyen a zlap ŋ larak anta, a ŋgaya: «Bay Madakal Yesu, lamza zəwet naka.» 60A dəwze anta, a gəleɓ, a ja ula a mazlazlay, a ŋgaya: «Bay Madakal, pelzetene gay tata anta aka,» a ya. A dəwze zlap ŋghe ege ca, a mac anta.
ទើបបានជ្រើសរើសហើយ៖
Zlan mala malaɓ ege 7: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
