Zlan mala malaɓ ege 6
6
Əy may hejəye ŋsəleɗ ŋ cekzetene ŋ malaɓ ege
1Ata vah wese ca, hejəye ma lamza ma mala Yesu aza ege, əy kafal a tama a tama. Cemey, ŋ taba tata ca, hejəye ma kazlap ma mala Yunanəyŋkaw ege, əy ŋgwaŋgwar ata hejəye ma kazlap ma mala Əybəranəyŋkaw ege, əy ŋgaya: «Weləye mce ma ŋ taba ŋcene ege əy kelem ɓez uda tata ata pes ata pes askwaw.» 2Aya, malaɓ ma wam aha gbak ege wese, əy javata hejəye ma lamza ma mala Yesu aza ege tewtew, əy zlepetene əy ŋgaya: «A ŋcene ca, nene kula ŋ geɓza laghwal zlap Gazlavay aka, ndar nene ŋtezetene uda ŋ hejəye səkwaw. 3Mavəday anta, zlana ege, hune may mawal ege ŋsəleɗ ŋ taba ŋkune, hejəye maa əy kazlap ma ma tuwah ata tata ege, ma ghef a Zəwet ma keweɗ leŋ maa kəleŋ ŋ ha tata ege aka, ndar nene veletene zlan ma ata ŋtez uda. 4Cemey, a ŋcene ca, nene narak Gazlavay leŋ nene neghwelzetene zlap Gazlavay ŋ hejəye.» 5Zlap anta kéndəremzetene aza ŋ hejəye tewtew. Aya, əy may Etəyen, ɗala ma ghef a lalam ey Zəwet ma keweɗ, Fəyləyp, Parakwarus, Nəykanawr, Təymawn, Parmenas leŋ Nəykawlawus ɗala ma ŋ Antakəya, maa mbəy Yahudu səkwaw, ma kasəbar kwakwas Yahudu ege. 6A dəwze anta, əy data ara malaɓ ege, aya, malaɓ ege, əy rak Gazlavay leŋ əy ca ra tata ege ata ha hejəye maa əy mayata ege wese. 7Aya, zlap Gazlavay a kavas ŋ ŋtez a tama a tama. Hejəye ma lamza ma mala Yesu aza ege, əy kafal a tama a tama ŋ Urusaləyma. Mala kwakwas mala Yahudu ege vəram, əy kalamza ma Yesu.
Əy kambal Etəyen aza
8Etəyen ca, Gazlavay kévelene bəzla dakala, kévelene ɓarɓar anta, kála zaɓəla ege ey səkan ma kaŋga ŋkwaɓ ege ŋ taba hejəye. 9A təwse ca, hejəye ma kanda ŋ ujek ma ata rak Gazlavay mala Yahudu ege maa əy kayaɓa «Ujek ma ata rak Gazlavay mala Mava mapalapal ege,» əy kaja səbakw a Etəyen. Ŋ taba tata ca, ara Yahudu ege ma ŋ Səyrene ege ey ma ŋ Aleksandərəya leŋ Yahudu ege ma ŋ Səyləykəya ey ma ŋ Asəya. 10Cemey, əy kula ŋ ja səbakw a Etəyen anta səkwaw, mavəday a zlap ca, a kəleŋ maa Zəwet ma keweɗ a velene. 11Mavəday anta, əy ŋteretene səlay ŋ hejəye, ndar əy zla metəwle a heɗe, əy zlap, əy ŋgaya: «Nene kézləme a kazlap ma ma kadak səkwaw ata Musa leŋ ata Gazlavay.» 12Ana ebe ŋghe, əy ŋkurafzetene unaf mala hejəye madakal dakal ma a tama ege leŋ maghwal ma maŋkanaŋkan ege. A təwse ca, əy nda, əy ndewzene ŋ Etəyen hwaf ende, əy mbalaw, əy jeɓza a tama lajav ma dakal ma ata ja guma. 13A təwse ca, əy data hejəye ma zla metəwle ege wese, əy zlap, əy ŋgaya: «Heje ŋghe anta ca, ata pes ata pes, a kazlap ma ma kadak səkwaw ata ujek kwakwas ŋtakwaw ma keweɗ leŋ ata ma maŋkanaŋkan mala Musa. 14Cemey, nene kézləme a kazlap, a ŋgaya: “Yesu ɗala Nasaratu, a naghwaramza ujek kwakwas ŋghe aza leŋ a nambaɗ kwakwas maa Musa a ghwalzaheje aza.”» 15Hejəye tewtew manjanja ata lajav ma dakal ma ata ja guma wese ege, nje tata fəceke ata Etəyen. Əy gəre ca, nje anta a nja ana nje mala malaɓ Gazlavay.
ទើបបានជ្រើសរើសហើយ៖
Zlan mala malaɓ ege 6: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
