Zlan mala malaɓ ege 28
28
Pawl mbəy ŋ hayak ma ŋ taba ŋtele maa əy kayaɓa Malta
1A dəwze maa nene kéreh ŋcene ca, nene zləme, zlam hayak ma ŋ taba ŋtele anta ca, Malta. 2Hejəye ma a təwse ege, əy lemzeney tewtew ŋcene kadak kadak a sasam. Əy beseney kwahwaw ma dakal, mavəday van a kaɗa, tatəɗam a kamaɗ. 3A təwse ca, Pawl a cama cemcelem, a tamza ata kwahwaw, kəɗe ca, ŋkursla mbəy ŋ cemcelem anta. Aya, maa zezekw wese, a zləme lunek kwahwaw ca, a damha, a ŋca Pawl ŋ ra, a təpasl aka ata ra anta. 4Maa hejəye ma ŋ hayak ma ŋ taba ŋtele wese ege, əy gəre zezekw ma kézeŋeye ata ra Pawl ca, əy zlap ŋ taba tata, əy ŋgaya: «Njenjəwen, heje ŋghe ca, ara maja ɗala. Kaw kéreh aza ŋ ŋtele cemey, taŋtaŋ Gazlavay ŋtakwaw képelzene taf ŋ nja ka a nje, askwaw.» 5A təwse ca, Pawl a kwec zezekw ma ata ra anta wese ŋ kwahwaw, kaw kézləme lambal ma laŋca zezekw wese cekuɗe ende ŋghe askwaw. 6A təwse ca, hejəye anta ege əy cakza ca, ra Pawl a nahaf, askwaw ca, a namac a təwse a təwse. Cemey, a dəwze maa əy nja səpek, maa kaw əy kégəre səkan wende kéndewzene askwaw ca, əy zen ŋ deŋza zeney, əy ŋgaya: «Heje ŋghe ca, ara kule.»
7Pubələyus, madakal ma a tama bay hayak ma ŋ taba ŋtele wese, a lemzeney kadak kadak a wata anta, nene la wan mahkaɗ, a təwse. La anta mbermber a ma ŋtele wese. 8Cen Pubələyus anta kéweneye, mbəy werwer askwaw, a kadawar. Kwahwaw ata kusam anta kwak kwak, dəmas a kakwaghaw, mbambaz mbambaz. Pawl a nda ŋ saraza, a ca ra anta a heɗe, a rak Gazlavay, aya, a rehza aza ŋ dawar anta wese. 9A dəwze anta ca, hejəye ma kadawar ege vedəye tewtew ma ŋ hayak ma ŋ taba ŋtele wese, əy ndaha ara Pawl anta, aya, a rehzata aza ŋ dawar tata ege yam. 10A təwse ca, hejəye ma ŋ hayak anta ege, əy wenzeney ha dakala. Aya, maa nene kanda ŋcene ca, əy veleney səkan ege vedəye vedəye tewtew, ma ata cekzeney ata taf.
Pawl a hwas ŋ hayak Rawma
11A dəwze ŋtəra mahkaɗ, nene nah ma a kwambawal ma dakal ma ndaha aka ŋ Aleksandərəya. Kwambawal ma dakal anta ca, əy yaɓa ca, a «Kule musa ege», kánja ata ŋtəra tatəɗam ŋ Malta, hayak ma ŋ taba ŋtele. 12Nene hwas ŋ uzam Səyrakus, nene nja wan mahkaɗ a təwse. 13Nene gwarzam a təwse, nene nda mazlam mazlam ŋtele hwas ŋ Regəyaŋw. A mapat anta, tatəɗam a jaha aka ta uza asa ndaŋw, aya, nene hwas ŋ uzam Pawtəyawləy, ata wan magbak anta. 14Ŋ uzam wese ca, nene kéndew ata hejəye ma lamza ma mala Yesu aza ege. Əy rekeney ŋ nja ara tata luma pal. Ana ebe ŋghe, ana maa nene nda ŋ hayak Rawma. 15Hejəye ma lamza ma mala Yesu aza ege ma ŋ Rawma, maa əy zləme nene hwas a təwse ca, əy ndaha ŋ ŋgeleney ma a luma Appəyus leŋ ŋ Ujek ege Mahkaɗ ma ata lam mbəlakw ege. A təwse, maa Pawl a gəreta ca, a lene wasay ŋ Gazlavay, aya, a lem ɓarɓar. 16Maa nene hwas ŋ Rawma wese ca, əy velene taf ŋ Pawl ŋ nja a ujek anta parpar, zlaɓa sawje teŋguleŋ ŋ həbaraw.
Pawl mbəy ŋ hayak Rawma
17A dəwze wan mahkaɗ ca, Pawl a yahata madakal dakal ma a tama a Yahudu ege, ma ŋ hayak Rawma a wata anta. Aya, maa əy kájamha aza ca, a zlepetene a ŋgaya: «Zlana ege, sa kasan ca, kaw sa kála səkan dadawar ata hejəye ŋtakwaw ege askwaw, kaw ata kwakwas jeje ŋtakwaw ege, askwaw. Cemey, əy kémbelekey aza ŋ Urusaləyma, əy kévelzekey aza asa ra Rawma ege. 18A dəwze maa əy kénjenza ma anta aza ca, əy ɗaw ŋ pelzekey aka, mavəday, əy kéndew kaw ata gay ma ata jekey aza ca, askwaw. 19Cemey, a Yahudu ege ca, əy kalamza ŋ pelzekey aka səkwaw. Amba kulakw, sa ɗaw taf ŋ ndaha ŋ gar a tama bay mala hayak Rawma, kaw sa kampam a ŋkəɗawata hejəye naka ege askwaw. 20Sa yahune ca, mavəday anta, ndar heje ŋgelakwaw ma, sa zlapahune. Cemey, əy jewekey a sesele ŋghe ca, mavəday heje maa Əysərayəyla ege, əy kaca ŋkwaɓ tata aka a heɗe wese.»
21A təwse ca, madakal dakal ma a tama Yahudu ege, əy zenene, əy ŋgaya: «Kaw nene kélem ɗerewel ara Yahudu ege ma ŋ hayak Yahudəya, ata hwa, askwaw. A zeney, kaw ɗala teŋguleŋ ŋ taba zlana ŋtakwaw ege ma ndaha aka a təwse, ma deney ma, askwaw ca, ɗala ma zlepeney ma ma dadawar ata hwa ca, askwaw. 22Cemey, nene ɗaw ca, hwa a ha ŋkwa, hwa ghwelzeney səkan maa hwa kedeŋza, mavəday nene kasanaw, hejəye vəram əy kazlap ma ma dadawar kaw a katay ata hejəye ma ata lajav ŋkwa ege.»
23Madakal dakal ma a tama a Yahudu ege ey ata Pawl, əy ca pes maa əy kanajav zeney. Aya, maa pes anta hwas ca, əy ndaha vəram day aha ma a mbarna a wata Pawl. A təwse ca, mar aka mala mapat, ha pes a ndav, Pawl a keghwelzetene zlap ata lazam bay mala Gazlavay ata hejəye. A katal ŋ zlepetene ata Yesu ta ŋ ma maŋkanaŋkan mala Musa leŋ ŋ ɗerewel mala uzəye ma zlap ma mala Gazlavay ege, ndar əy lamza. 24Hejəye vedəye əy kálamza ma anta aza, cemey, vedəye ca, əy kalamza səkwaw. 25Aya, maa əy kananda tata ca, əy kaja səbakw ŋ taba tata war. A təwse ca, Pawl a zlepetene ma teŋguleŋ zeney, a ŋgaya: «Ma maa Zəwet ma keweɗ a zlepetene ŋ jeje ŋkune ege ta ŋ ma mala Esaya, mba ma zlap ma mala Gazlavay wese ca, njenjəwen, 26a ŋgaya:
“Nda ara hejəye ŋghe ege, zlepetene:
Hune keteh zlam kadak kadak, cemey, hune kezləme səkwaw.
Hune kasar la kadak kadak, cemey, hune kegəre la səkwaw.
27Mavəday, hejəye ŋghe anta ege ca, əy kaɗaw ŋ lamza ma səkwaw.
Əy kának zlam tata ege aka,
Əy kámpak nje tata ege aka,
Ndar əy ɗaw ŋ gəre la səkwaw,
Əy ɗaw ŋ zləme səkwaw, əy ɗaw ŋ lamza a unaf tata səkwaw,
Mavəday anta, əy kanabawza lanja tata ege aza a tama naka ndar sa rehzata aza ca, askwaw.”»
28Pawl a zlepetene zeney, a ŋgaya: «Hune san ka, Gazlavay a laɓaza Ma Mewe ma Taŋtaŋ mala lereh ca, ŋ hejəye ma tata Yahudu ege səkwaw. A tata ca, əy nalamza.» 29[A dəwze zlap ŋghe ege ca, Yahudu ege, əy nda tata, əy kaja səbakw ara a mazlazlay ŋ taba tata.] 30Pawl a nja va gbak a ujek maa a kaŋtaraw. A təwse ca, a kalamzata hejəye tewtew ma kandaha ŋ sarza ege. 31A kaghwalza lazam bay mala Gazlavay ata hejəye, a kasasərakzata hejəye ata Bay Madakal Yesu Almasəyhu, ɗala maa Gazlavay a laɓaza ŋ rehzata hejəye aza, kaw a lalak askwaw, kaw ɗala ma katakaw, askwaw.
ទើបបានជ្រើសរើសហើយ៖
Zlan mala malaɓ ege 28: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
