Zlan mala malaɓ ege 2
2
Zəwet ma keweɗ a ndaha ata hejəye ma lamza ma mala Yesu ege aza
1Aya, maa pes gwaygwaya maa əy kayaɓa Pantekwasta a hwasha ca, hejəye ma lamza ma mala Yesu ege aza, əy kéɓeceye tewtew ata la ma teŋguleŋ. 2Kəɗe ca, əy zləme səkan a laha aka mgba ata uzlaf ana bargadaŋ ma kababar. Səkan anta, a ghefza ujek maa əy kénjeye ŋma. 3Aya, əy gəre ganana ege ana kwahwaw, əy ŋtez, əy nja ata tata teŋguleŋ teŋguleŋ tewtew. 4Tata tewtew tata, əy ghef a Zəwet ma keweɗ. A təwse, əy mar ŋ zlap a ma mbəlam ege vedəye vedəye ana maa Zəwet wese a veletene ɓarɓar ŋ zlap.
5Cemey, ŋ Urusaləyma ca, Yahudu ege ma kasəbar taf mala Gazlavay a unaf teŋguleŋ ege aka. Əy ndaha aka ta ŋ hayak ege tewtew ma ŋ manhayak. 6Aya, maa əy zləme pakam ma kaɓam wese ca, əy ɓecha vəram a təwse. Ŋkwaɓ kéŋgetene aza dakala mavəday kaw vayay ŋ taba tata a kezləme ma maa hejəye ma lamza ma mala Yesu ege aza wese, əy kazlap a ma tata ege. 7Cemey, ŋkwaɓ kéŋgetene aza mambaza, əy ɗawza ha tata, əy ŋgaya: «Hejəye ma kazlap ŋghe ege ca, tewtew tata, ara Galəyləy ege askwaw aza vaw? 8Ca, kaw vayay ŋtakwaw a kezləme əy kazlap a ma ŋtakwaw ege ŋghe ca, a san ŋ la vaŋgay? 9Ŋ taba ŋtakwaw ca, hejəye ma ndaha aka ŋ hayak Partəya, ŋ Medəya leŋ ŋ Elam aka. Hejəye vedəye əy ndaha aka ŋ hayak Mesawpawtaməya, ŋ Yahudəya ey ŋ Kapadawsəya, ŋ Pawŋtus ey ŋ Asəya, 10ŋ Fəyrəygəya ey ŋ Pamfəyləya, ŋ Məysəra leŋ ŋ hayak Ləybəya ma mbermber uzam Səyrene. A zeney, ŋ taba ŋtakwaw ca, hejəye vedəye əy ndaha aka ŋ Rawma, 11ŋ Kereta ey Arabəya. Ŋ taba ŋtakwaw ca, hejəye vedəye, ara ŋseŋ Yahudu ege, vedəye yam, ara hejəye ma lamza ŋ səbar kwakwas Yahudu ege. Cemey, heje tewtew ŋtakwaw, heje kezləme, əy kazlap a ma ŋtakwaw ege ata zlan ege ma dakal dakal maa Gazlavay a lata!» 12A təwse ca, hejəye anta ege tewtew əy káŋga ŋkwaɓ mambaza. Aya, kaw əy kasan səkan maa əy kanala səkwaw, əy zlap ŋ taba tata, əy ŋgaya: «Ara ma vekey?» 13Cemey, hejəye vedəye əy ɓas ata hejəye ma lamza ma mala Yesu aza ege wese, əy ŋgaya: «Tata tewtew tata əy kása mavaw aza, əy káŋhwaz!»
Pəyer a ghwelzetene zlap ŋ hejəye
14Aya, Pəyer a gwarzam zlaɓa malaɓ ege vedəye ma wam aha teŋguleŋ wese. A təwse ca, a zlepetene ŋ hejəye meɓeceɓec ege wese a mazlazlay, a ŋgaya: «Hune Yahudu ege leŋ hune hejəye tewtew ma ŋ Urusaləyma ege, hune teh zlam kadak kadak, sa ghwalzahune ma ŋgha anta. 15Hejəye ŋghe ege cemey, əy kaŋhwaz ana maa hune deŋza səkwaw, mavəday na ŋgha ca, ler jafaɗ, mala mapat ule kwagwa. 16Cemey, səkan anta a laha na ŋgha ca, ana maa Yawel, mba ma zlap ma mala Gazlavay, a ŋgaya:
17“Gazlavay, a ŋgaya: Ata vah ege maa manhayak slaɓ ŋtakw ca,
sa neveletene Zəwet naka ŋ hejəye tewtew.
Aya, uzəye ŋkune mawal ege ey heldəməye əy nabaw tata ŋ uzəye ma zlap ma naka ege.
Ŋ darlaŋw ŋkune ege, sa neghwelzetene səkan ege maa sa kanalata,
msəra ŋkune ege yam, seŋseŋ a najata.
18Ayaw, ata wan wese anta ege ca, sa neveletene Zəwet naka ŋ hejəye mala zlan naka ege, ŋ mawal ege leŋ ŋ weləye tewtew,
əy nala tata ŋ uzəye ma zlap ma naka ege.
19Sa nala səkan ma kaŋga ŋkwaɓ ege mgba ata uzlaf leŋ sa nala zaɓəla ege ata hayak ete ŋghe:
Mbambaz a nehey, kwahwaw a nabas leŋ caŋcah a naɗəbas,
20pes a naləfat anta, a keneweɗ zeney askwaw,
ŋtəra a nabaw anta vəre ana mbambaz,
a dəwze anta ca, pes Bay Madakal a nandaha.
Pes anta ca, ara pes ma pa ma day, ma pa ma tuwah aha vedəye.
21Aya, kaw vayay ma ya zlam Bay Madakal ca, a nereh”.»
22Pəyer a zlepetene zeney, a ŋgaya: «Hune Əysərayəyla ege, hune teh zlam kadak kadak ata ma maa sa kanazlapahune ŋgha. Yesu, ɗala Nasaratu ca, ara ɗala maa Gazlavay a ghwalza ɓardakw anta. Mavəday, Gazlavay kála səkan ma kaŋga ŋkwaɓ ege, zaɓəla ege a mbe ŋ taba ŋkune, ana maa hune anta hune kasanaw. 23Heje ŋghe anta ca, zlezle, Gazlavay káslaza aka, kávalza aka asa ra ŋkune ana maa a ɗawaw. Hune kávalza aza asa ra hejəye ma kasan taf Gazlavay səkwaw ege, hune kájaza ata mpe gafaŋgal. 24Cemey, Gazlavay kágwarzamaza aza ata lamac, kádamha aza ŋ gef mala mac, mavəday mac kula ŋ mbal ka a ɓarɓar anta səkwaw. 25Ŋghe, bay Dawuda a zlap ata Yesu zlezle, a ŋgaya:
“Sa kegəre Bay Madakal ara sa ata pes ata pes,
kénjeye ata kəva ra zam naka, ndar sa lalak ata hejəye səkwaw.
26A təwse, unaf naka ghef a sasam, sa la dəraf a sasam.
Kaw sa kámac naka ca, sa nanja ŋ zəhay ŋ teh səkan maa Gazlavay a kenelekey,
27mavəday, sa kasan ca, hwa, Bay Madakal, hwa kenegeɓza zəwet naka ka ata lamac askwaw,
hwa kanayakza mala zlan ŋkwa aka ŋ rəɗa ŋ jeɓ askwaw.
28Hwa kéghwelzekey taf ma taŋtaŋ ma ata nja a nje, sa nasasam dakala mavəday hwa kénjeye a sa”.»
29Pəyer a zlap zeney, a ŋgaya: «Zlana ege, sa kula ŋ zlapahune aza ŋgara ŋgara ata jeje ŋtakwaw bay Dawuda. Kámac anta, əy kámpas aza, ha a tambaca, jeɓ anta mbəy ete ŋghe. 30Cemey, bay Dawuda ca, ara mba ma zlap ma mala Gazlavay, a kasanaw, Gazlavay káŋkan ma anta aza a mbe, a zlepene, a ŋgaya: “Sa naca ɗala teŋguleŋ ŋ taba van ŋkwa ege, mba dəmas ŋkwa ŋ nja ŋ bay a dəwze ŋkwa.” 31Bay Dawuda cemey, kásan səkan maa Gazlavay a kanala aza, amba a zlap ata lagwarzamha Almasəyhu aza ata lamac anta, maa a ŋgaya:
“Gazlavay kégeɓza zəwet anta aka ata lamac askwaw,
kusam anta yam, kárəɗa ŋ jeɓ askwaw.”»
32Pəyer a zlepetene zeney, a ŋgaya: «Yesu anta ca, Gazlavay kágwarzamaza aza ata lamac, nene tewtew ŋcene, nene kégəre. 33A zeney, Gazlavay káŋta aza mgba ata uzlaf, kénjeye ata la ma taŋtaŋ ata ra zam anta. A təwse, Cen kévelene Zəwet anta ma keweɗ ana maa a zlap a nevelene wese. Aya, Yesu kávalaheje Zəwet ma keweɗ anta aza ŋ heje tewtew ana maa hune kegəre ey maa hune kezləme na ŋgha. 34Njenjəwen ca, Dawuda kétev mgba ata uzlaf a ha anta ca, askwaw, cemey, a zlap ata Almasəyhu, a ŋgaya:
“Bay Madakal, a zlepene ŋ Bay Madakal naka, a ŋgaya:
Ndaha, nja ka ata kəva zam naka,
35ha a pes maa sa macata hejəye ma kaɗaw ŋ gərehwaw ata nje səkwaw ege aza,
asa ŋgas ŋkwa.”»
36Pəyer a zlepetene zeney, a ŋgaya: «Səy hune, hejəye Əysərayəyla ege tewtew, hune san ka njenjəwen ca, Yesu maa hune dar ka ata mpe gafaŋgal ŋghe ca, ara ɗala maa Gazlavay a caw, ŋ Bay Madakal leŋ ŋ Almasəyhu.»
37Aya, maa hejəye meɓeceɓec ege, əy zləme ma ŋgha ca, unaf tata kázla anta mambaza. A təwse ca, əy ɗawza Pəyer leŋ malaɓ ege vedəye, əy ŋgaya: «Ca, nene nalaɓa vaŋgay, zlana ege?»
38Cemey, Pəyer a zenetene, a ŋgaya: «Hune bawzata lanja ŋkune ege aza a tama Gazlavay. Kaw vayay ŋkune maban aza a yam baptəysma a zlam Yesu Almasəyhu, ndar Gazlavay a palzahune gay ŋkune ege ka. A dəwze anta, a navalahune Zəwet ma keweɗ. 39Mavəday, Gazlavay a ŋgaya, a navalza Zəwet anta ma keweɗ, ŋ hune, ŋ uzəye ŋkune ege leŋ ŋ hejəye ma gədak ege tewtew, ey hejəye tewtew maa Gazlavay, Bay Madakal ŋtakwaw a nayahata ege.»
40A təwse ca, Pəyer a zlepetene ma ege vedəye vəram zeney, ndar əy lamza ma wese leŋ əy lem ɓarɓar. Cemey a zlepetene, a ŋgaya: «Hune yakzata hejəye dadawar ma a manhayak ŋghe ege aka, ndar hune lem lereh a tama Gazlavay.» 41Hejəye vəram ŋ taba tata əy kálamza zlap maa Pəyer a ghwalza wese aza, əy kában aza a yam baptəysma. A pes wese ca, hejəye əy la tata bəlakw mahkaɗ ma javha aha lajav hejəye ma lamza ma mala Yesu aza ege.
Lanja hejəye ma lamza ma mala Yesu aza ege
42Ata pes ata pes, hejəye ma lamza ma mala Yesu aza ege wese, əy kavalza ha tata ka ŋ teh zlam kadak kadak ata zlap ege maa malaɓ ege əy kesesərekzetene. Əy kénjeye, əy kéɓeceye ana maa əy ata zlaŋgan tata ege, əy kazam uda leŋ əy karak Gazlavay ŋ la anta. 43Malaɓ ege əy kala zaɓəla ege leŋ səkan ma kaŋga ŋkwaɓ ege vəram a ɓardakw Gazlavay, mavəday anta, hejəye tewtew əy kaŋga ŋkwaɓ ata tata. 44Hejəye ma lamza ma mala Yesu aza ege tewtew, əy kájav ma tata aka, əy kájav səkan ma asa ra tata ege aka ata la anta. 45Cemey, ana zlap ca, əy səkamata la tata ege aza leŋ səkan tata ege aza, əy ŋtez səlay anta ŋ taba tata tewtew, kaw vayay a lem tete ŋ hwesene ŋ la səkan maa a kaɗawaw. 46Ata pes ata pes, əy kajav ŋ ujek kwakwas a unaf ma teŋguleŋ. Əy keŋtez uda a wata tata ege, əy kazam uda tata a sasam leŋ a unaf teŋguleŋ. 47A təwse ca, əy kahəmanza Gazlavay, hejəye tewtew əy kaɗawata. Aya, ata pes ata pes, Bay Madakal a kejevetene hejəye vedəye maa a rehzata aza ege, a həzlar tata.
ទើបបានជ្រើសរើសហើយ៖
Zlan mala malaɓ ege 2: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
