Zlan mala malaɓ ege 1
1
Gazlavay a neleɓetene Zəwet ma keweɗ ŋ malaɓ Yesu ege
1Tawfəylus, ɗala naka ma taŋtaŋ, ŋ ɗerewel naka ma mpar ca, sa kéŋterata səkan ege tewtew maa Yesu a lata ey maa a sasərakzata hejəye aka, mar aka ata vah maa a mar ŋ la zlan ŋ manhayak, 2ha hwas ata vah maa Gazlavay a ŋtaza mgba ata uzlaf. Cemey, mar Gazlavay a naŋta aza mgba ata uzlaf ca, kámay malaɓ anta ege leŋ késesərekzetene səkan ege a ɓarɓar Zəwet ma keweɗ. 3Aya, a dəwze gef ege maa a sata ey lamac anta ca, a keghweletene kusam kadak kadak ta ŋ lala səkan ege vedəye vedəye, ndar əy san njenjəwen ca, mbəy nje. Wan raŋfaɗ, a keghweletene kusam, a kezlepetene ata lazam Bay mala Gazlavay. 4A pes wende aka, ata Yesu ey malaɓ anta ege əy kazam uda ŋ la anta, a təwse ca, a ŋgazata, a zlepetene, a ŋgaya: «Hune nja ka ŋ Urusaləyma ete ŋghe, hune ŋkap səkan maa Vana Gazlavay a zlap ŋ valahune, ana maa sa ghwalzahune wese. 5Yuhana ca, kábanata hejəye, a yam baptəysma, cemey, ata wan ege cekuɗe ete ŋghe ca, əy nabanahune a Zəwet ma keweɗ.»
Gazlavay a ŋta Yesu aza mgba ata uzlaf
6Malaɓ Yesu ege wese əy kéɓeceye a həzlar, aya, əy ɗawza, əy ŋgaya: «Bay Madakal, hwa nezen ŋ lamza bay Əysərayəyla ege ka ca, na ŋgha vaw?» 7Aya, Yesu a zenetene, a ŋgaya: «Ŋ san pes anta ege ey vah anta ege ca, ara ma ŋkune səkwaw, cemey, ara Vana Gazlavay teŋguleŋ anta mbəy ma cata a ɓarɓar anta. 8Cemey, a pes maa Zəwet ma keweɗ a kanatadakwha ata hune ca, hune nelem ɓarɓar anta. Aya, ara hune ma kanazlap ma ata sa ŋ hejəye ma ŋ Urusaləyma ege, ŋ hejəye ma ŋ hayak Yahudəya ege tewtew ey ŋ hejəye ma ŋ Samarəya ege leŋ ŋ hejəye ma a manhayak ege tewtew.»
9A dəwze maa káŋtakwza zlap aza ca, Gazlavay ŋta a ŋtaza mgba ata uzlaf. A təwse ca, malaɓ ma a həzlar ege wese, əy kasarza ha mahwabakw a jaɓza. 10Maa malaɓ ege wese əy kasar la maa a kanda anta mgba ata uzlaf wese ca, kəɗe ca, mawal ege gbak əy kégereye a həzlar tata, rəgwac ma pepeɗek ata kusam tata. 11Aya, əy zlepetene, əy ŋgaya: «Hune hejəye Galəyləy ege, hune nja ka ŋ sar la mgba ata uzlaf ende ŋghe ca, mavəday vemey? Yesu maa Gazlavay a ŋtaza ŋ taba ŋkune kəɗe mgba ata uzlaf ŋghe ca, a nezenha ana maa hune gəre maa a nda anta kəɗe mgba ata uzlaf wese.»
Lajav malaɓ ege
12Aya, malaɓ ege wese, əy tadakwha aza ata dahwam maa əy kayaɓa, barla Jaytun. Əy zen tata ŋ Urusaləyma. Barla Jaytun anta ca, mbəy mbermber a Urusaləyma, a la anta kəylawmeter teŋguleŋ. 13Maa əy hwasha aza ŋ Urusaləyma wese ca, əy dam ŋ ujek ma mgba ata ha ujek, ata lajav tata ana ma a mpat a mpat. Ara ata: Pəyer, Yuhana, Yakuba, Andəyre, Fəyləyp, Tawmas, Bartawlawme, Mata, Yakuba mba Alfa, Səymawn, ɗala ma ɓarɓar, ma kampam taf ŋ rehzata hejəye anta ege aza leŋ Yahuda mba Yakuba. 14Əy kajav ata pes ata pes tewtew tata ŋ rak Gazlavay a unaf teŋguleŋ. Əy jav ca, zlaɓa weləye vedəye vedəye, zlaɓa Marəyama man Yesu leŋ zlaŋgan Yesu ege.
Əy ca ɗala matakan a uley Yahuda Əyskarəyawt
15Cemey, a pes wende aka ata vah wese ege, hejəye ma lamza ma mala Yesu aza ege əy kéɓeceye, əy la tata temere a ragbak. A təwse ca, Pəyer a gwarzam ŋ taba tata, a zlepetene, a ŋgaya: 16«Zlana ege, ana maa kéŋtereye ŋ ɗerewel mala Gazlavay, ata Yahuda Əyskarəyawt ca, səkan anta mala anta ana mbe njenjəwen. Dawuda kázlap a ma anta a ɓarɓar Zəwet ma keweɗ a heɗe, ara Yahuda ma ghwelzetene taf ŋ hejəye ma mbal Yesu ege. 17Yahuda anta ca, ara malaɓ ŋ taba ŋtakwaw, kélem ŋ la zlan Gazlavay, ara nene. 18Cemey, Yahuda anta kásəkam la aza a səlay anta maa əy velene ata zlan ma dadawar maa a la wese. Ŋ la wese, a ndav a tama a tama, dəmas anta pəzakw a pəzakw anta, ha ghele ege əy kəɗapaza tewtew. 19Hejəye ma ŋ Urusaləyma ege tewtew əy kézləme ma anta aza. Mavəday anta, əy cene zlam ŋ la anta a ma tata, “Hakeldama”, ana zlap ca, “La mbambaz”.» 20Cemey, Pəyer a zen ŋ zlap zeney, a ŋgaya: «Ŋghe ma meŋtereŋter ŋ ɗerewel Jabura, a ŋgaya:
“Ujek anta mabaw anta a ŋkef,
ɗala a ɗaw ŋ nja ŋma səkwaw.”
A zeney, kéŋtereye ende ŋghe:
“Səy ɗala matakan mala zlan a uley anta.”
21Hejəye ma caheje ma ege ata pes ata pes ata vah maa Bay Madakal Yesu mbəy a tama ŋtakwaw, 22mar aka ata vah maa Yuhana a banaw, a yam baptəysma, ha hwas a pes maa Gazlavay a ŋta aza mgba ata uzlaf wese, səy ɗala teŋguleŋ ŋ taba tata majavha a həzlar heje ŋ ghwal ma ata lagwarzamha anta ata lamac.»
23A dəwze zlap mala Pəyer ca, əy ŋta hejəye gbak, ara ata Yusufu maa əy kayaɓa, Barsabas, həman anta Yustus ey Matəyas. 24A dəwze anta, tata tewtew əy rak Gazlavay, əy ŋgaya: «Bay Madakal, ara hwa ma kasan unaf hejəye tewtew. Ghwelzeney ɗala maa hwa may teŋguleŋ ŋ taba hejəye ma gbak ŋghe ege, 25ndar heje anta a nja a uley Yahuda, ŋ la zlan mala malaɓ ege maa a geɓza aka ŋ nda anta ata la ma késleye mavəday anta.» 26Aya, əy ja caca#1.26 Caca: Ŋseŋ caca ŋghe ca, ara caca maa Gazlavay a ghwelzetene ŋ law. Ete ŋghe əy ɗaw ŋ may ɗala teŋguleŋ a uley Yahuda. ŋ may ɗala teŋguleŋ ŋ taba hejəye ma gbak ege wese. A təwse, caca anta a ghwalaha Matəyas. Aya, a javha a həzlar malaɓ ege ma wam aha teŋguleŋ ege wese.
ទើបបានជ្រើសរើសហើយ៖
Zlan mala malaɓ ege 1: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
