Márákoso 16
16
Ehonowa yá Yésusu
(Mat 28:1-8; Rúk 24:1-11; Yoh 20:1)
1Ará isí yá ihuwe é ma tómbá, Maréyá ójó na Magadára, Maréyá netí Yáka, na Saróma vá ma kusé varebínde ombótó ójó anáá vá endá kumbye mbimbe ra Yésusu. 2Isí yá wusó yá emanjéta, vá ma endá cú-cú na evérá hɔrɔ́ oŋgóná wá paá. 3Vá ma ré oja-oja vá mwané na vá mwané anáá: «Ané kójo a né só bíŋgíriyámó itááné urehí na ŋgíŋgááná ra evérá?» 4Kó vá ma néétyé aŋgísó, wená anáá ekáné yá itááné mwané nó ma ríi bakétérí. 5Vá ma iŋgááná naáté yá evérá, vá enámó ombwene rá moto indindíi na ombɔ́ɔ́ rá enémé rá evérá, a byá akava puŋgúum, kó vá ma siríkáná. 6Ombwene rá moto ó ma járá nawó anáá: «Vinó ka tíné, no sɔsɔmó Yésusu ójó na nasaréte ójó va má obááná na koroso, a má húmé na evérá, a ta né rií ará, pandó éjé vá má me váá kéejé. 7Kó ndáno ojana vihoóhóná vyáa orɔŋgɔ na Pyéere anáá a wó gírámó na Gariréya Ɔ́wɔ́ kówo vá né me enámó ámó a ma járá nawó.» 8Vakótó vá ma urúkyé na evérá obwɔ́nɔ́nɔ nótó tututu na wohwá ówó wó ma wó ambááná, vá ta má ojana moto wandá esene éyé vá ma ré ová wokótó.
Yésusu a húménámó Maréyá ójó na Magadára
9Yésusu ará a ma honówá na evérá isí yá makésyé má emánjéta, a ma késyé ohúmána Maréyá ójó na Magadára, Maréyá mwané Yésusu a ma me uryé vambé vá vireréŋgi byáráátó na imwéesií. 10Maréyá a ma endá woja cómó na ava vá ma ríi orɔŋgɔ na Yésusu kó vá katé vaŋga otémá ó wó káná. 11Ará vá ma ová anáá Yésusu a hwenámó, anáá Maréyá a ma me ená, vá ta ma kaŋga.
Yésusu a húménámó vihoóhóná vyáa vívé
12Na nimé raá, Yésusu a ma húmáná vihoóhóná vyáa vívé na pwényí indyé hɔrɔ́ vá rií na pé wenda ówó na njáná. 13Vá ma wundáná ondo ojana vasɔ́ɔ́ ávámó kó vá mwané hónó vá ta má kaŋga.
Yésusu a húménámó vihoóhóná vyáa vyábɔ́t na umwesií
14Na mamana, Yésusu a ma humáná vihoóhóná vábɔ́t na umweesií na itíndíkáná íjí vá ma ré nyányá, kó a ma wó járéná na wusó wá mpetɔ́ na orará ówó otémá wáwó esene éyé va ta má kaŋga até éyé ava vá ma me ená ámó a ma átá na evérá vá ma ojá. 15Kó a ma járá nawó anáá: «Ndáno nondo oja Usi wa Cómó na vato bimé. 16Ojo a mó atɔ́wɔmó, o wunde oduwana a mó riyámó sótyérí, kó ojo a ta mó atɔ́wɔ Irɔŋgɔ a mó me sombénámó ntóró éjé e ta nyemé. 17Ndeme íjí í mó tíráanámó ava vá mó atɔ́wɔmó kíijí: Na ebérááná yámé, vá mó gúnámó vambé vá vireréŋgi, ojárá mkpámáká rá virémbé. 18Va mó ambaananámó nɔɔ́ na embɔ́ɔ́, itɔɔ va vényú ncu ka wó eŋga wobé vá mó táréyánámó vinɔ́ embɔ́ɔ́, kó vinɔ́ ví mó ondówanámó.»
Yésusu a wundámó na máná
19Okí Yésusu, ará a ma maná ojárá nawó, a ma náátá na máná, onuumana na ombáámbáné rá Irɔŋgɔ. 20Kó vihoóhóná vyáa ví ma endá woja Usi wa Cómó pandó iŋgimé. Okí a ma ré nɔnɔɔ orɔŋgɔ nawó, kó a katé tiseenye Usi wa Cómó mwané na mesimbá íví vá katé eŋga.
ទើបបានជ្រើសរើសហើយ៖
Márákoso 16: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL