Márákoso 15
15
Vá endámó na Yésusu na aŋgísó rá Piráta
(Mat 27:1-2, 11-26; Rúk 23:1-5, 13-25; Yoh 18:28–19:16)
1Ibeesí kuúkú, vagónó vá vacekiye mómí vá ma váwónjééná orɔŋgɔ na vagónó vá edɔŋgɔ, na vayéere vá mbéndɔ́, na yanje yá jósi yimé. Na nimé ra owótá ówó Yésusu mbéné, vá ma enda naá na Pírata. 2Kó Pírata a ma me súsé anáá: «Ye o ámó ahumu rá va Yúdene?» Yésusu a ma me wundíyé anáá: «Mámó kójo o járámó naná.» 3Vagónó vá vacekiye mómí vá katé sɔ́mɔ́nɔ Yésusu na mamba mbunu. 4Piráta a ma wundé osúsé Yésusu anáá: «O ta wundíyé wandá? Wovámó até yimé éyé vá ma járá na wusó wɔɔ́!» 5Kó Yésusu a ta ma ne wundye wandá, Piráta okémbyé wandá mwané.
Vá sómbénámó Yésusu ntóró ra nugwé
6Na ibínó yá Pásáka yimé, Piráta a katé mice mwaná wa vimboo umweesií ójó vato vá maré súsé anáá vá me mice. 7Moto omo ebérááná anáá Barábasa a katé rií na mboo orɔŋgɔ na vasɔ́ɔ́ na va mbérá váa esene éyé vá ma oná moto ará vá ma hetíyé imburyé na va Roméne. 8Ncumbí wa vato a ma endá sɔ́ɔ́ na yanje yá Piráta kó bimé vá ma késyé o me súsé anáá: «Ŋgá yeŋgaagana yɔɔ́ na wusó wá visó!» 9Piráta a ma wó wundíyé anáá: «Ye no diŋgámó anáá ŋgo nó mícana ahumu rá va Yuúdene?» 10Piráta a ma wó súsé naná esene éyé a katé jembe wusi na wusi anáá vagónó vá vacekiye mómí vá ma me uráná na Yésusu ámó vá katé me njíŋé. 11Kaá vagónó vá vacekiye mómí vá ma púsyé vato anáá vá súsé Piráta anáá a wó mícana Barábasa. 12Piráta a ma wundé o wó súsé anáá: «Kó no diŋgámó anáá ŋgo eŋga twiŋí na ojo no béráanámó anáá ahumu rá va Yuúdene?» 13Vá ma wundíyé na ndurumye anáá: «O me ondáánámó na koroso!» 14Piráta a ma wó súsé anáá: «Owaté wobé kówo a mó éŋga?» Kó vá katé rume hée na ŋguru anáá: «O me ondáánámó na koroso!» 15Kaá ámó Piráta a ma diŋgé anáá vato vá me ovéna wusi, kó a ma wó micáná Barábasa; tii waá weŋga anáá vá núbé Yésusu mkpama kaá o me títíyena visimbi ukú ójó anáá vá me ondáana na koroso.
Visímbi ví kpeérámó Yésusu
(Mat 27:27-31; Yoh 19:2-3)
16Visímbi ví ma endá na Yésusu na yanje yá ŋgɔ́mɔnɔ, kaá obéráana ikiví iŋgímémé. 17Vá ma me váá cunú éjé boótoto, onowa ekátá yá céndé o je vaá Yésusu na ucé. 18Na nimé raá vá ma késyé o me vétíyé anáá: «Ahumu rá va Yuúdene wo a húmáahá!» 19Kó vá ma késyé o me gite na ucé na igoó, vá me cáká metí kaá o je kútyé mabɔ́ŋɔ́ owunde ovásísiye na cí na wusó wáa. 20Ará vá ma maná ome pkeére wusi na wusí, vá ma me uryé cunú éjé boótoto o me wundye cunú ráa kó vá ma endá naá na naŋgáté ukú ójó anáá vá endá me ondáana na koroso.
Vá ondáanámó Yésusu na koroso
(Mat 27:33-44; Rúk 23:36-43; Yoh 19:16-24)
21Moto omo ójó na edɔŋgɔ yá Siréne ebérááná anáá Símono isyé Arekesándere na Ruhúsu a ma tómbéná na pandó mwané ondo etá ówó na kondo, kó visimbi ví ma me jitímíyé anáá a byá koroso ra Yésusu na ŋguru. 22Vá ma endá na Yésusu na pandó emo vá béráana anáá Gorogóta ójó a tirevanámó anáá homó wá vikpókóró vyá icé. 23Vá ma diŋgé anáá vá me hwá mɔwɔ́ báyétérí na ndahaŋga kó Yésusu a ma váráŋgá. 24Kó va ma me ondááná na koroso kaá otáŋgáana cunú ráa na mbe ukú ójó anáá vá jémbe áné kójo a né geremenámó nijí. 25Ó ma ríi wó etá maworo mérémané na umweesií wa ibeesí ará vá ma ondááná Yésusu na koroso. 26Na akɔ́kɔ́ ájá vá katé tire na wusó wá até kówo vá mó ondáana Yésusu, vá ma tiré ɔ́wɔ́ anáá: «Ahumu rá va Yúdene.» 27Vá ma ondááná hónó vaŋgúbí váváné na kɔ́ŋgɔ́ ra Yésusu, omo na ombɔɔ́ rá enémé omo na ombɔɔ́ rá vakótó. [28] 29Vato ává vá katé tómbána pandó mwané vá katé jiye ucé vá séyá Yésusu hɔrɔ́ vá járá anáá: «Hóo! Mámó ójó o katé diŋge anáá osasona yanje yá Irɔŋgɔ owunde ohaá índyé na metúú mátátó, 30ávásótyámó mámó maté, sisé na koroso!» 31Sɛ́ɛm hónó vagónó vá vacekiye mómí na vayéere vá mbéndɔ́ vá katé kpeére Yésusu kó vá katé járá vámwané na vámwané anáá: «A katé sótíiye vasɔ́ɔ́ kó a ta hítí ovásótyé ómwané maté! 32Ŋgá sɔ́ɔ́ ojo Irɔŋgɔ a ma ijátá, ójó a ámó hónó ahumu rá Ísayéere asise na koroso! To né me kaŋgámó ŋgé to ená wandá mwané!» Ava vá ma wó ondááná na koroso na kɔ́ŋgɔ́ ra Yésusu vá mwané hónó vá katé me kpeére.
Nugwé ná Yésusu
(Mat 27:45-56; Rúk 23:44-49; Yoh 19:28-30)
33Ará tyéep a ma wóbá, mbínó e ma obá na edɔŋgɔ yimé ondo húmé na maworo mátátó wa wusí. 34Na maworo mátátó mwané, Yésusu a ma rumétá na ŋguru anáá: «Eroyi, Eroyi rema sakbatani?» Naná ó tírevenámó anáá: «Irɔŋgɔ wame, Irɔŋgɔ wame, na wusó wá até kówo o má ncéŋgítyé?» 35Vato vámó ává vá ma ríi ɔ́wɔ́ vá ma me ová kó vá ma járá anáá: «Óváno, a béráanámó Eríyasa!» 36Omo ójó na vámwané a ma kuré otéta ondo jumiye kusí naáté yá matéyá ámá má gárámó, weteyá na nokáné, otóndíye Yésusu anáá a vényú kaá oje eŋga anáá: «Gíráno, to vaŋgámó wená ŋgé Eríyasa a vaŋgámó ondo me sisye na koroso!» 37Kó Yésusu a ma nɔɔ́ ekáné yá ndurumye otómbá ugwé. 38Ekáné yá cunú éjé vá ma etéyá na yanje yá Irɔŋgɔ e ma saréyá okésyé ówó na máná ondo húmé na cí. 39Ogónó wa visimbi wa va Roméne ójó a ma ríi na wusó wá Yésusu a ma ená ámó a ma gwé kó a ma járá anáá: «Moto ojó a katé rií mwané Mwaná Irɔŋgɔ!» 40Vakótó vámó hónó vá katé rií ɔ́wɔ́ vá néména urehí até éyé é katé tómbávena. Na raaté wawó, Maréyá ójó na edɔŋgɔ yá Magadará a ma ríi ɔ́wɔ́, na Maréyá ójó netí Yáka ójó enjára a wunde orií netí Yosé, na okótó omo hónó ebérááná anáá Saróma. 41Vakótó mwané vá ma byɔɔnɔ́ Yésusu owunde o me eŋgena manɔnɔwɔ ará a ma ríi na Gariréya. Ombunu rá vakótó ávámó ává vá ma náá na Yerúsareme orɔŋgɔ na Yésusu vá ma ríi hónó ɔ́wɔ́.
Vá váámó mbimbe ra Yésusu naáté yá evérá
(Mat 27:57-61; Rúk 23:50-56; Yoh 19:38-42)
42-43Ará enéŋgá é ma jiné, moto omo ójó na oŋgórá rá Arimatéya ebérááná anáá Yóseve a ma endá uré. Moto mwané a katé rií na ipɔ́ké rá va rɔ́yá kó vá katé me mítyé mbunu, ómwané hónó a katé gíre tamba ra Irɔŋgɔ. Wó ma ríi isí éyé vá katé komosana ibínó éyé é ma geréméná obínévena míveri máa, kó ámó ibínó mwané é ma bérúmé na isí yá ihuwe, Yóseve a ma wɔ́rɔ́ nomendá ondo súsé Piráta mbimbe ra Yésusu. 44Piráta a ma kémbyé ará a ma ová anáá Yésusu a ogwé kó a ma bérááná ogónó wa visimbi wa va Roméne o me súsé wa ríi Yésusu a mó gwé wó etá na ikɔkɔ. 45Ará ogónó wa visimbi a ma me hwá ŋgaráná, kó a ma atɔ́wɔ́ anáá Yóseve a wɔ́rɔ́ mbimbe. 46Kó Yóseve a ma kusé cunú ra ikúndé, osisye mbimbe na koroso, ohíté na cunú ra ikúndé kaa ondo vaá naáté yá evérá éyé vá va tímé naáté yá ijoto, kó a ma bíŋgíríyé ekáné yá itááné obweena yiŋgáánéná yá evérá. 47Maréyá ójó na edɔŋgɔ yá Magadára na Maréyá ójó netí Yosé vá katé néména homó ówó vá katé vaá mbimbe ra Yésusu.
ទើបបានជ្រើសរើសហើយ៖
Márákoso 15: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL