Rúkasa Ŋgíŋgáánéná
Ŋgíŋgáánéná
Kárate wa Rúkasa a byɔɔnɔmó tékéna mamba imweesií ámó va kárate vá Matyáasa, Márákoso na Yohánese. Wó je rií anáá ó mwané a tíhíyámó wusi na wusi oŋgendɔ rá Yésusu owɔ́rɔ́ ówó na Gariréya ondo húmé na Yerúsareme (9:51 na 19:28) Naáté yá oráŋá mwané ójó ó néménámó oŋgendɔ rá Yésusu wenda ówó na Yerúsareme ará a geremenamó ondo gwé, Rúkasa a ojámó mamba mbunu ámá vasɔ́ɔ́ va kárate vá ta ojá ámó: Oráŋá rá usi wa moto ójó na Samaríyá, Rúk 10:29-37, eheremena yá Yésusu na Maáta na Maréyá Rúk 10:38-42, isyé mwaná ójó a ma wundé wɔŋgɔ́ ombwene ráa ójó ó ma dáŋgá.
Ojo a ma tiré a tíhíyámó até éyé e cakámó orií na mpí na wusó wáa na até éyé é néménámó cómó ra Yésusu na esɔ́tɔ́ yá Yésusu. Rúkasa a tíhíyámó anáá Irɔŋgɔ a ma tómá Yésusu anáá a sótyé vato bimé ává vá ámó berebe anáá vá me atɔ́wɔ.
Yésusu a cakámó onéména vato ává vasɔ́ɔ́ vá wó byéndyámó: Vato ámó veŋga mabé, vaájó, vawora, vinɔ́, menɔ́. Vato áva Rúkasa a ma wó tíréná vá ma ré geremena otimbe akúmé. Rúkasa a ojámó eráŋá ombunu rá Yésusu na até éyé é néménámó ekúmé. A járámó na vihoóhóná vyáa anáá vá tímbaaana na ekúmé na wusó wá Irɔŋgɔ kó hónó anáa vá aká vasɔ́ɔ́. Vihoóhóná vyá Yésusu ví katé rií orɔŋgɔ naá na pé, vá katé rií berebe anáá vá céndyé visɔ́tɔ́ vyáwó, esene éyé vá ma ríi vá etá jembe anáá Irɔŋgɔ a ámó na usi wa otémá kó a diŋgámó vato bimé.
Na vidɔŋgɔ íví va roméne vá katé rií ɔ́wɔ́, vato vá katé járá anáá: «ogónó wa kásará kójo okí.» Va atɔ́wɔ vá mwané vá járá anáá: «Yésusu, Etómá yá Irɔŋgɔ kójo a ámó Okí.» Esené Irɔŋgɔ a ma honóná Yésusu na nugwé owunde o me hwá ŋguru éjé anáá a njwé wandá wimé.
Naáté yá Usi wa cómó ójó Rúkasa a ma tiré, Yésusu a cakámó orií béráánérí anáá Okí otómbá ámó na va kárate ávámó. Kárate wa Usi wa cómó ójó Rúkasa a ma tiré a endámó mana na Yerúsareme ará a ma késyé. Yésusu a ma vátíhíyé pwené na aŋgísó rá vihoóhóná vyáa kó ví ma ríi na visaŋgena mbunu. Ará Yésusu a ma késyé esɔ́tɔ́ yáa, a katé rií táásé na mwáŋ mwáŋ wa ireréŋgi ójó a endámó uré na Irɔŋgɔ.
Vihoóhóná vyá Yésusu ví mwané hónó ví ma timbé mwáŋ mwáŋ wa Ireréŋgi, kó sɛ́ɛm ámó Yésusu, vá ma hítí ovásoóriye owunde ovaána usi wa otémá wa Irɔŋgɔ ámó osawo.
Tékéná mamba éjé na kárate ojó
1. Rúkasa a tíhíyámó kárate waá (1:1-4).
2. Ebyánávéná yá Yohánese na í yá Yésusu (1:5–2:52).
3. Ŋgojéná cómó ra Yohánese (3:1-20).
4. Nduwáná ra Yésusu (3:21–4:13).
5. Yésusu a endamó na Gariréya (4:14–9:50).
6. Yésusu a endamó na Yerúsareme (9:51–19:27).
7. Itúúríyé na nugwé ná Yésusu (19:28–23:56).
8. Ehonowa yá Yésusu (24:1-12).
7. Yésusu a húménamó vihoóhóná vyáa (24:13-53).
ទើបបានជ្រើសរើសហើយ៖
Rúkasa Ŋgíŋgáánéná: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL